Read South Giziga 2 Mak 14 Bible Online

2 Mak 14 - South Giziga bible

2 Mak 14

¹A vam vi makir, a dirba nah, Zudas ati mizli naŋhay a cinaka na, Demetriyus, mangal ngi Seleyukus a ru le ti palalam nga mubuliy Tripoli, a ru ti sojehey aseˀe haɗa.

²A tuɓa ruwuyo le, yo a kiɗa Antiyokus le vagay jom ti Liziyas mbur migil naŋ.

³Mbur mekelem ada, a zilaka Alkim, wureˀ aka, i masay madiɗa zleˀe. Amma ti hin ngi Zudehey mislikiɗam ɓi na, a ci ar dili waˀ waˀa. A sa pura na, jiviɗ ngi laha hirnga naŋ anta mata, yo Zudehey anta pulakaŋ a gumbaˀa li mipal ngi gi mikuli mata.

⁴Ar vi miskat ti kukur zlum ngankaˀ naŋ na, a ru nga hay buy Demetriyus. A raŋ ti loppol ngi ɓiri hirnga waɗ kalaf ngi dibinoji, a vulaŋ mihaŋ ngi widisey magam taŋ slra ar hay ngi Buymisemuŋ. Tapas nana, ko a gi gwat mekelem mata.

⁵Amma Alkime, ti Demetriyus mizilaŋ ng’aciki mingila wuy naŋhay na, a lum jiviɗ ngi ga gwat naŋ ngi gilawaya. Demetriyus a cufuɗaŋ vur joˀ ngi Zudehey ar wuluk taŋ.

⁶A mbuɗaŋ di: «Mizli ada asi Zudeheye, a zilaka taŋ Asidihey, madiɗa taŋ i Zudas Makabe. Taŋ a roko tum weˀ vu ngi gi vurum, ati ngi slikiɗa ɓi, yo anta pulaka ruwuyo a cifi zuy zuyo ta wãˀ.

⁷Ya zle ar li cifi mupuɗaw ngi dide ɗuwoy, yi masay madiɗa zleˀe, ani taŋ a cukikiy di le avra. Ya muso ng’aka na, vurˀe.

⁸wãˀ naŋ na, yi ra wuɗ ɓa lum ngi buyo a cuh kuy kuy waɗ ngi mizli ngi si ruwuyo ma. Amma mibi hirngahay ya maɓa ɓi taŋ ani na, a ra caka mizli gar ar bonoy madiɗa.

⁹Aw buy ɗu, naka so na, daka misaka virzi ngi ɓi hana le na, anja ki ki slimiɗ ar hirwuy ndra ati mizli ndrahay masam bonoy na kuy kuy, ti mezle ɗik ka maga da mizli gar na.

¹⁰Asi mike, da Zudasa n’ada ti siifa na, ko ruwuy anta luma zuyo gu ta.»

¹¹Alkim miɓi kanah si na, ngama ngi buyoyo, mekelemey mawuɗam ɓi ngi Zudas ta na kwana, a slikiɗaka mevel da Demetriyuso kutum.

¹²A wuna Nikanor kutum, a cifaŋ i madiɗa ngi mukukuro begene ngi vurumoy, yo i lamiɗo ngi walahay Zade ma, dar a slinaŋ ng’adiga.

¹³A pulaŋ jiviɗ ngi susuyumo Zudasa, a wuyaha mizli ngi seˀeheye, waɗ a cifa Alkime, i masay madiɗa ar hay ngi Buymisemuŋ mimadiɗa ngir duniya wãˀ.

¹⁴Mizli Zudehey ta, mikilam tivi Zudasa, a jumom ng’avi soje ngi Nikanoroy. A puraka na, kaɓa ɓi ati bonoy muluma Zudehey na, a sa mbiɗi ti mezle vur taŋ.

¹⁵Zudehey micinaka Nikanor a ra ndiloko ati mizli Zudahay ta na, Zudehey a pam mereɓ avu vu. Joˀ a tumbuloko Buymisemuŋ mucufa taŋ i mizli naŋhay ngi wãˀ, yo naŋ mapula kila widi taŋ ta na, a buga taŋ di ti gwatay misi hã a puraka ti hiri taŋ.

¹⁶Dar buy taŋ Zudas a pula taŋ jiviɗ, a cohom kutum tir li taŋ misi zleˀe ara, a ra zlaka mesene taŋhay ngi kiɗa vu gweˀ a ciki walahay Hadaka.

¹⁷Simoŋ, sukum ngi Zudas, a zla kiɗa vu le ati Nikanoro si. Amma mesene taŋhay a ndiloko gurjik na, a zla mi nga dirba.

¹⁸Maslufaka ɓi ngi Zudas mupuɗaw ati soje naŋhaya, yo wirwir taŋ ar li kiɗa vu vur ruwuy taŋ na, Nikanor ada cina. Ɓa a sa lum bugawla ti gi vurumo na, wuluko cuw cuw.

¹⁹Vurˀe a slina ti Posidoniyus, Teyodot ati Matatiyasa, ɓa a ra ɗiyam ɓi ngi jumoˀay ati Zudasa.

²⁰Zudas misingila ɓi ngi mislineye singil singil na, a fa ɓi naŋ da mizli naŋhay fẽẽt. Sojehey gar a wulukam misi purla, dar a tuɓaka ɓi ngi jumoˀaya.

²¹A wunam hin pal, ɓa buyoy a sa zliram pal taŋ. Mota ngi pilis a so pal tir vay walahay numuŋ waɗ pal tir vay mekeleme ma, joˀ a ɗuvaka taŋ li cifi ngi ɗuva hirngahay.

²²Zudas a pi mizli le zle sek ar li miyaŋŋa ti gwat ngi vurumoy avi taŋ. A roko weˀ vu da mesene taŋhay a sa zlaka taŋ gurjik ngi kiɗa vu kwana. Amma kiɗa slir taŋ, a kiɗ mi ti jumoˀay.

²³Nikanor a zik hin neˀ a Zeruzaleme, ko a gi gwat malambaˀa ta. Mizli mulakay mijoko kaw kaw a ciki naŋ na, a ɓula taŋ.

²⁴A ro ti Zudas a cikeˀe na si, asi a ra wuɗaŋ haɗa.

²⁵A vulaŋ kuti, ɓa a zuɓ ngwasa, ɓa a yi ziri. Zudas a zuɓ ngwasa, joˀ a mumul ar zik ngi vi naŋ, a cifi setette.

²⁶Amma Alkime a pura na, Nikanor ati Zudas a jumomˀay le kuy kuy. A zuɓ ɗerewol ngi taŋ mujumom di ˀay vuna, a so ng’avi Demetriyus. A ɓaŋ Nikanor a wuɗ a gi gwat mipal kine, mbak ngi ngumna mujuwa na le. Ani a zuɓa Zudas, mesene ngi li naŋ mazum buy ara na, a vulaŋ di le, ɓa a sa zuma a dirba naŋ.

²⁷Kupa ɓi ngi mbur migeˀ ircece nana, a slikiɗa mevel le da Zudasa. A tuh letir da Nikanoro. A ɓaŋ n’anta tuɓa ɓi ngi jumoˀay ar wala taŋ ati Zudas Makabe na ta, jo di, so di kutum nga Antiyos.

²⁸Nikanor muluma letir na, a gaŋ lesl weleleŋ, ɓa a ngila ɓi taŋ ngi jumoˀaya, manja mbur a gi gwata si na, a pura naŋ kuy ta.

²⁹Amma ɓa ki gi gwat mekelem mbak ngi buy miɓa le na, a gi ta. Vurˀe, a sipi pas ngi gi gwat buy miɓa tuwa, ti wer ngi tikina Zudeheye.

³⁰Zudas a pura na, Nikanor anta kuy kuy avaka misi zleˀe mata, yo anta tuɓaŋ ti wuɗa vu kaɓa misi zleˀe mata. A pura na, gwat Nikanor maga hana, anta sa bo ti ɓi mezle ta. A kus mizli naŋhay haɗi, joˀ a ra ɗum, ɓa a lih avi Nikanoro.

³¹Ti Nikanor misina, Zudas a tikinaŋ le na, a ru ng’ar hay ngi Buymisemuŋ mimadiɗa ngir duniya wãˀ, mipal , naɓa masayay a ra gam mikuli miho gar. A tika taŋ ˀay ɓa a vulakaŋ Zudasa.

³²Amma masayay a hudumom, a ɓakaŋ a sinaka li ngi mbur naŋ masipa na ta na,

³³Nikanor a zuɓa haŋ ng’avi hay ngi Buymisemuŋ, a hudum a ɓa taŋ: «Da ki vilikiy Zudasakaˀ kaˀ ti celelu ta na, i sa susuyumo hay ngi Buymisemuŋ hana cay, i sa waha li gi mikuli, joˀ i sa ndir li gi mikuli mawucuɗ, da kuli Diyonisoso, ar li nah.»

³⁴Naŋ miɓi kanah na, a cuh. Amma masayay a hilaka haŋ a muŋ, a tumbuloko mbur macik vu tum ar sukwi ndra, dar a ɓam:

³⁵«Aw Bumbulvuŋ, k’anta ti may ngi gwat ko neˀ ta, na hay ɗik ka misi ara awuzla ndra na, ada ciruw hiri ngbaŋ.

³⁶Wurenna so na, Bumbulvuŋ mipal miwãˀ naŋ, hay hana, muzuɓaka dili naŋ wureˀani na, ga ɓa a tiram di hay muho gar ta.»

³⁷Mbur mekelem ada, a zilaka Razis, naŋ a wuzla mizli micawwa ngi Zeruzalemey, i mbur miwirwir avi mizli naŋhaya, slimiɗ naŋ mazil ti mezle na, a ra cir di hiri. A zilaka ‹Cine ngi Zudehey› asi naŋ mawuɗ taŋ haɗa. A sa njaka da Nikanoro.

³⁸Ar zli virzi ngi slikiɗa ɓi na, mizli a gilakaŋ ɓi le, a ɓam, a ra supi sirik ngi Zudehey kini. Dar naŋ a pula vu naŋ ati siifa naŋ mbak wãˀ vur sirik ngi Zudehey vuna so.

³⁹Nikanor a wuɗ a buga a ra hirisa Zudeheye. A slin ti sojehey skat skat zlum nga ji Razise.

⁴⁰A pura na, da a kiɗa mbur hana le vagay na, naɓa i ɓi madiɗa avi Zudeheye.

⁴¹Keɗ keɗ na, sojehey a wuɗ a tuɓaka hay musubur, Razis misi ara, a ra ngilaka miviŋ naŋhaya, yo a vulaka taŋ jiviɗ le ɓa a ɗuvaka vu da miviŋheye. Razis a pura na, a gunokoŋ le gun muduba, a zuɓa maslalama, ɓa a zliga vu naŋ tehhe amuŋ.

⁴²A pura na, zuwen naŋ mumuc ti ɗuva hirnganaŋ, a funa naŋ mara muc asi haŋ ngi mikiɗa hirngahay, joˀ a gakaŋ bonoy mizlir avi naŋ ta na le.

⁴³Na jom ti wusa vu ngi vurum tuwa si na, a ja maslama kuy kuy ta. Sojehey a ra wusam vu ngi ci nga viŋ. A kil tum vu nga hirnga moholo, a pulo vu mbak nga wuzla mizli.

⁴⁴Mizli a kilam lursisisi, a pulaka Razis a diɗ nga ruwuyo njoŋ kine.

⁴⁵Amma a ra musuwun aruŋ, gidaŋ ada a vu vu aruŋ, pumbus cih cih avu vu, waˀahay a ra jakaŋ haɗi ngbaŋ, a ngira mizli ŋkak ti kil. A jiɗ nga hirnga ɗugur musubur.

⁴⁶Dambalaka pumbus a tiki le avu vu, a huro tanday ngi kwacay naŋ, a ja taŋ haŋ cuw cuw, a zliɗa taŋ ng’ar mizli. A diradibiɗ da buy ngi siifa ati ngi musuɗuko, ɓa a sa maŋ taŋ amuŋ, dar a muc kanah so.