Read South Giziga 2 Mak 15 Bible Online

2 Mak 15 - South Giziga bible

2 Mak 15

¹Ti Nikanor micina, Zudas ati soje naŋhay a roko tir vay Samari na, a juwa a kwacay naŋ ɓa a zla taŋ ngi kiɗa vu ar hin sabat , asi tapasa, ko gwat masa gaŋ anta.

²Zudehey maram aseˀe a ɓakaŋ jak na: «Anja ki ra kiɗa taŋ ti wuluk misi kaɓa ngi ginewey mallakaɓa ngi gilaway ta. Amma anja ki ga dudok da hin Buymisemuŋ majigina gwatay gar, maɗuvaŋ hirnga, yo naŋ mitiri di hin mipal na.»

³Amma mbur mikiɗa hirnga makaw makir tuwa, a cufuɗa taŋ: «A muŋ adiga, buy madiɗa miwãˀ, micica ɓi ngi ɗuva hirnga da hin sabat ada kwa?»

⁴Taŋ a mbiɗakaŋ di: «I Bumbulvuŋ misi siifa vuna ti haŋ naŋ, Buy madiɗa miwãˀ misi amuŋ, miɓa daˀ daˀ le ɓa a jaka ɓi ngi hin mitarnaˀ naŋ a hirnga.»

⁵Naŋ a mbiɗa taŋ di: «Na ya kwana, yi buy madiɗa miwãˀ a ruwuy, hilaka gwat ngi vurumoy, yo a gaka gwat nga ya buyo.» Dambalaka, kiɗa hirnga naŋ mujuwa ɓi naŋ a mevel naŋ ngi gi na, a ga gu ta ngbaŋ.

⁶Nikanor mahuhum tuwa, a ra wuɗ ɓa a buga zikitiŋ ngi gwat masa tuɓo taŋ avi Zudas ati mizli ngi seˀeheye, ngi buga bugawla naŋ.

⁷Amma Zudas Makabe ya kwana, a vula mevel naŋ le wãˀ, a ro hiri njah ar Bumbulvuŋ masa jiniˀis aseˀeŋ.

⁸Vurˀe, a vula gidaŋ da mizli ngi seˀeheye, ɓa mizli Zudahay ta, masa zlaka taŋ ngi kiɗa vu na, anja a zluwunam ti taŋ ta. Amma anja a wulukam keŋ ar kila widi misawa ada zleˀe ti muŋ tuwa. Wurenna vuna kwana, anja a kutukom ti vula mevel taˀ, Buy ngi Gidaŋ wãˀa, a sa vula taŋ bugawla ma.

⁹A tuso taŋ didak ti ɓimujuwa ngi Moyis ati ngi mijiviɗey, yo a mataŋ hiri ngi ɓi taŋ mulumam di bugawla zleˀe na ma. Dar a vula taŋ gidaŋ amuŋ kahana so.

¹⁰A dirba naŋ muvula taŋ gidaŋ kanah tuwa, a kiɗa mi nah, a tuso taŋ didak ti ɓi ngi mizli Zudehey ta, magaka gwatakaslsla ta, taŋ miɓaka ɓi le na, anta sa gaka mata.

¹¹A dirba nah, a vula gwat ngi vurum da mbur gar, anta i mbaray ati ziwit masa laha taŋ pal ta, amma a kiɗa taŋ slir ngi gwat matuso taŋ didaka. A ɓa taŋ pulaˀ avra ngi musuwun ngi tiɓi a mevel, i gwat naŋ mupura kleŋ, dar mizli gar a ciram di hiri.

¹²Gwat Zudas mupura ar musuwuno, n’ani: a pur Oniyas masay madiɗa misi zlezle, i mbur mezleŋ, yo mihina hirnga ma, gwat ngi gi naŋ mezleŋ, a ɓi ɓi ti lesle, yo zle ti zuŋ si na, a sina gi gwat mijeŋŋe le gar. A ra dir dibiɗ haŋ hoc nga muŋ, vur mizli Zudehey gar.

¹³A dirba nah, Zudas a pur gwat kanah ma, i mbur misi hol tullo, mbur mindila le gisiŋ, gwat ngi gi naŋ ki ŋhiyaŋ, keɗ keɗ na, n’ada ti gidaŋ ngi wi mizli njah wãˀ.

¹⁴Oniyas a ɓi na: «Puraka Zeremi ɗi, i mijiviɗ ngi Buymisemuŋ, a wuɗ ndra sukum naŋhaya, a dir dibiɗ haɗa vur mizli waɗ vur Zeruzalem walahay mipala.»

¹⁵Dar Zeremi a sika maslalam ngi ɓiri hirnga da Zudasa, ti haŋ hazum, joˀ a ɓaŋ na:

¹⁶«Tuɓa maslalam mipal hana, i gwat Buymisemuŋ mavuluw di, ki sa buko mesene ɗikeye meɗ meɗ ti naŋ.»

¹⁷Mingiɓi ngi musuwun ngi Zudas tuwa, naŋ kuy teˀ, a vula wirwir le da sojehaya, a vulaka zil le da gawlahaya. Zudehey a ɓam, anja a ko a kilam ng’ar walahay guɗuko ta, amma ɓa a ra kiɗam vu hirngakaˀ amuŋ, hiri taˀ taˀ, ɓa ɓi taŋ miɓaka daˀ le tuwa a gi. Asi mike na, walahay Zeruzalem, sipa jiviɗ waɗ hay ngi Bumbulvuŋ a ra kiɗam.

¹⁸Ko t’anta wulkam ar ngwas taŋhay, ziri taŋhay, sukum taŋhay waɗ ar mizli taŋhaya ta, a likam nga taŋ dum le i hay mipal ngi Bumbulvuŋ na si.

¹⁹Mizli mindiram ar walahaya, didak a ra muɗa taŋ haɗa. Taŋ mawulkam ar kiɗa vu mara gi a wuzla ɓuh na, a ra ga taŋ zluwun.

²⁰Mizli gar a ra kutukom hin ngi kiɗa mi mindir mata na, naɓa mesene taŋhay a kusom le, a cinjaham le ngi kiɗa vu si. A cicaka begeneheye le ar li mezle avi taŋ, misi piliseye, murciki taŋ, tika tika.

²¹Zudas Makabe a pura sojeheye keɗ keɗ na, taŋ haɗi, gwat ngi vurumoyo taŋ ti sukwi mbeˀ mbeˀe, begeneheye, i mihimaˀhaya ma. A hila haŋ hoc nga muŋ, a dir dibiɗ da Bumbulvuŋ magi gwat migi daˀ ta. Asi naŋ a sina le, Bumbulvuŋ mavula bugawla da mizli mindilaka le na, n’anta vur gwat ngi vurum taŋhay ta, amma a gi avi naŋ muwuɗ le.

²²Zuda madiradibiɗ naŋ na, a ɓi: «Aw kumani, ti hin ngi Ezekiyas, buy Zude, ki slino modro ɗik le, joˀ a ngizla soje ngi Senakeripeye, mizli durmuk skat ti kukur dangafaɗ nga zlum.

²³Aw Buy madiɗa miwãˀ ngi muŋ, wurenna, slino ndra ti modro mezle nga mbuŋ ndra, ɓa mesene ndrahay a zluwunam, a jijikam kirkir.

²⁴Ga ti gidaŋ ɗike, ɓa mizli musoko, mazukuw, yo mawuɗam a zlaka mizli ɗikey mipal ngi kiɗa vu na, ngizla taŋ ti gidaŋ ɗiki.» Naŋ a kiɗa mi ngi diradibiɗ naŋ ti mingiɓi hana so.

²⁵Soje ngi Nikanoroy a ra joko mamar ti fugum waɗ dimis ngi vurum.

²⁶Zudas ati mizli naŋhay a waham ngbuw ng’ar mesene taŋhay ti tumbulo Bumbulvuŋ waɗ ti diradibiɗi.

²⁷A ra kiɗam vu ti haŋhay, yo a ra diram dibiɗ ti mevel taŋ cici ma. Dar a ngizlam gwat mizli durmuk kukur makir nga zlum. Gwat Buymisemuŋ miga hana, a vula taŋ mumul le haɗa wãˀ.

²⁸Ɓi ngi kiɗa vu mikiɗ mi muduba na, Zudehey a waham ngbiɗiɗiɗi ti mumul, asi taŋ mupuraka vagay ngi Nikanoro le soɗoɗ, libiti ɓaˀ avu vu.

²⁹A ra gaka sise da Kumani, Buy madiɗa miwãˀa, ti mi ngi dideˀ taŋ, ti salalay cərəwcərəw.

³⁰Zudasa, naŋ i mudumbuŋ, a vula vu naŋ le ngi kiɗa vu ti gidaŋ wãˀ vur mizli naŋhaya. Zle ti gawla naŋ si na, a ra wuɗ mizli naŋhaya. Misa ɓa mizli ɓa a bukoko hirnga ngi Nikanoro waɗ ti haŋ hã ar pepesl, yo ɓa a ram di nga Zeruzalem na, i naŋ.

³¹A ru ng’adiga ti haŋ naŋ, a kuso mizli waɗ a cica masayaya, a mbuŋ li ngi gi mikuli. Dar a slin ɓa a ra ziloko mizli ngir walahay muguno ti mohol.

³²A buga taŋ hirnga ngi Nikanor, mbur malambaˀ mukuyta wãˀ tuwa. A buga taŋ haŋ naŋ, naŋ misika ti huhumo vu naŋ ng’ar Hay mipal ngi Mimadiɗa na.

³³A buko irne ngi Nikanoro, a ɓa mizli, ɓa a bukoko meɗ meɗ, a vulaka da ɗiyuwoy a ndaka, waɗ ɓa a luwaka haŋ naŋ law a mbuŋ hay ngi Bumbulvuŋ ɓa ngi buga migir ngi gi gilaw naŋ na.

³⁴Mizli misi aŋke gar, a zuɓaka hirnga paɗ amuŋ, a gaka sise da Bumbulvuŋ misi dudoko, a ɓam: «Mbur miga ɓa li naŋ mipal a ci ar dili ta na, sise nga naŋ.»

³⁵Zudas a luwa hirnga ngi Nikanoro law avi hay musubur, ɓa mizli gar a puraka, a sinaka jinaˀis ngi Bumbulvuŋ ava.

³⁶Taŋ gar a cicaka ɓi nah, a zuɓaka hin nana, ɓa a puyukom di hirnga ta. Vur vi gar na, a sa gaka muguzlum naŋ ar wuna li ngi hin Mardoke, a mbiɗiavra, hin mukuruˀ nga makir ngi kiya mukuruˀ nga cuw naŋ, mazilaka kiya Adar ti mi Aram na.

³⁷Gwatay mucohom avi Nikanor, i tayna so. Ani zle ti nana, walahay Zeruzaleme, i mizli Zudehey mazumam buy ara. Ya kwana, i sa pula mingiɓi ɗu aka ya.

³⁸Da i toho le kuy, yo ada cira hiri da mizli na, ya muwuɗ vuna i nah. Da naŋ puɗaw wãˀ ta, yo anta kiɗ may ta na, ya migi migidaŋ ɗu i nah.

³⁹Ani i sinaka le, ɓa ki si mbaazla pal naŋ, malla yam pal naŋ na, a so ti gir, amma mbaazla milihiɗa ti yama, i gwat ngi si mundum mavul mumul. Naŋ kanah ya, hana i wer ngi toho ɗerewol hana, ɓa a cira hiri da mizli macinaka ɓi naŋ ti cin, malla maslufaka ti slufu. I cici akah so.