Read South Giziga 2 Mak 2 Bible Online

2 Mak 2 - South Giziga bible

2 Mak 2

¹A lumaka toh toh ar ɗerewolo na, mijiviɗ Zeremi a ɓa mizli mijahay nga ruwuy mulaka, ɓa a ram ti vu a haŋ kaɓa miɓaka ɓi naŋ na.

²Yo waɗ a vula taŋ ɓimujuwa, joˀ a ɓa taŋ ɓa ɓimuɗuva ngi Bumbulvuŋ a puyukom di ta. Yo da taŋ mupuraka kuli mipa ti ɓiri tapasl tapaslay waɗ geˀ geˀ wuyahay na le kwana, anja wuluk taŋ a zliɗ ta.

³A vula taŋ kutihey le mbeˀ mbeˀ, a ɓa taŋ anja a pulaka ɓimujuwa mbak le ta.

⁴Ar ɗerewol nana vuna, a tohoko na, mijiviɗ a ɓa mizli daˀ daˀ le ti mingiɓi ngi Buymisemuŋ. A ɓa mizli, a zuɓakaŋ akoti mipala tir hay ngi zlir ati Buymisemuŋ, a ru di nga muwã. Moyis mupura ruwuy, Buymisemuŋ miɓi a sa vula da mizli naŋhay na, tir muwã nah vuna.

⁵Yo naŋ adiga na, Zeremi a lum butum gugwiŋ gugwiŋ, a pa hay ngi zlir ati Buymisemuŋ, akoti waɗ li zluma urdiheye sek ara. A dirba naŋ, a disla mi ngi butumo dasla.

⁶Mizli ngi seˀe mekelemeye, a wuɗam a bummo ɓa a gam gwat a jiviɗe ngi sa pur ava, amma ko a lumakaŋ ta.

⁷Zeremi micina na, a mburo taŋ himaˀ, a ɓa taŋ: «Li hana a sa ndir manja sin hã Buymisemuŋ a kiɗa mi ngi kuso mizli naŋhaya, yo a buga taŋ pura ircece naŋ ɗagay.

⁸Dar Bumbulvuŋ a sa buga gwat hanayna ava ma, joˀ dudok naŋ a sa bugo vu ar gazlavay, kaɓa naŋ mubugo vu da Moyis, yo Salomoŋ midir dibiɗ ɓa li mipal a tiri i muvula le da Buymisemuŋ na.»

⁹Salomoŋ, buy misi sin mijileŋ muvula gwat ngi mikuli ngi kiɗa mi, yo ngi vula hay da Buymisemuŋ na, a slufaka ɓi naŋ le ya.

¹⁰Yo kaɓa Moyis midir dibiɗ da Bumbulvuŋ, dar vu a po sar ti muŋ, a zluma gwat ngi gi mikuliheye na, Salomoŋ a dir dibiɗ, dar vu a po sar, a wura mikuli mizlam zlamaya.

¹¹Moyis a ɓi zle na: «gwat ngi mikuli vur mungrahay muzlumam na, asi mizli a zumaka taŋ ta.

¹²Salomoŋ a ga muguzlumo, hã hin dangafaɗ kaɓa magaka zle vuna ya.»

¹³Ar ɗerewol hanayna waɗ ar ɗerewol ngi wuluk ngi Nehemi, a slufaka ɓi ngi gwat tayna le ma. Waɗ mana, Nehemi mindir li pi ɗerewoloy nw, ada slufaka ara. Ɗerewoloy maɓam ɓi a hirnga buyoy ati mijiviɗey, waɗ ngi Davitey ati letir ngi buyoy vur ɓi ngi gwat ngi mikulihey na, a cikila taŋ cek ng’ara.

¹⁴Ɗerewol mizliɗam hirnga asi ɓi ngi vurum migam ndra taŋhay na, Zudas a cikila taŋ cek kanah ya. Ani a roko wurenna asi haŋ ndra.

¹⁵Da ki ra wuɗam na, slinoko mizli ɓa a rukum taŋ.»

¹⁶«Muguzlum ngi zuɓa dili ngi hay ngi Buymisemuŋ, i ra wuɗam i gaka gweˀe, ani i tuhukum letir hana ɓa ki gaka ar hin naŋhay aya.

¹⁷Buymisemuŋ a laha mizli naŋhaya le gar. Yo da mizli nga naŋhay gar, a vula taŋ ruwuy taŋhaya, li zuma buy taŋhay, slra ngi gi mikuli ati wer ɓa vulakaŋ vu taˀ da naŋ,

¹⁸kaɓa naŋ miɓa daˀ le ar ɓimuɗuva tuwa. Vurˀe, ndr’i ra njaham hiri asi Buymisemuŋ a sa pura ndra ircece gweˀe, yo ndra mizlaɗ hirnga na, a sa kuso ndra ng’ar hay naŋ mipal. Asi mike na, a tuɓo ndra le avi ɓi madiɗahaya, yo a buna dili ngi li mipala le.

¹⁹Gwat madiɗahay a gam le ar hin ngi Zudas mazilak Makabe ati sukum naŋhaya. A bunaka dili ngir hay madiɗa ngi Buymisemuŋ le, a vulaka li gi mikuli le da Buymisemuŋ.

²⁰A kiɗaka buy Antiyokus Epifana le ati mangal naŋ Epator.

²¹Mizli micikam vu hirdam hirdam ar tiɓi ngi Zudehey na, gwat madiɗa ngi muŋhoy a gam slra le vur taŋ. Vurˀe, ko ti taŋ mineˀ kini kwana, a kiɗaka ruwuyo le, yo a ɓulaka soje ngi mesene taŋ haya le gu.

²²Hay ngi Bumbulvuŋ mimezle ngi si duniya, a tuɓaka le amuŋ, a lahaka Zeruzaleme, yo ɓimujuwahay mawuɗ a kiɗam na, a cicaka taŋ amuŋ. A gaka gwat tayna gar ti gidaŋ ngi Bumbulvuŋ, ati gi mezle naŋ.

²³Zasoŋ, ngi ruwuy Sirene, mbur mutoho gwata, a toho ɓi ngi gwat tayna ar ɗerewol zlum, amma yi wuɗ i tum vu ɓa i juwa hirnga naŋ ar ɗerewol purla.

²⁴Mambaˀ hana, bi ada ra haɗa, yo gwat migehey ara a tikam ta. Vurˀe, mizli mawuɗam a dubunaka mambaˀ hana gar na, a sa gi tuwaˀ avu taŋ.

²⁵Mizli mawuɗam sluf tewle na, i tum vu le ɓa a ŋhiyaka. Mizli mawuɗam a jaka a hirnga, i ga taŋ di le kefek. Mizli mawuɗam pura ɗerewol ɗu na, i wuɗ i gi slra vur taŋ.

²⁶Gi slra ngi juwa hirnga ngi mambaˀ hana vuna, i ɓi mikefek ta. Ɓi hana a biniy lihiriɓ le, yo a tikiy hinje le ma.

²⁷Mbur madi ɗaf madiɗa na, a wuɗ a ga mezle da mizli naŋ mazilo taŋ na, amma naŋ kefek ta. Slra ɗu hana a gi ti tuwaˀ kaɓa nana vuna. Ɓa ngi ɓusa slra mutuwaˀ nah vuna, ɓa mizli masa slufaka na, a sa sinikiy.

²⁸Ɓi ngi mambaˀ hana, i pula le mbak da mutoho gwat ɓa a pitisa ɓi ngir gwat migi le gar. Naɓa i sa lum gidaŋ ngi juwa hirnga naŋ gu.

²⁹Asi da a ra ndiram hay nawaya na, muɗuva hay i buy ngi ndir naŋ wãˀa. Amma sona, mbur magaŋ gwat ngi wuya, yo makuroŋ peŋtir na, a kiɗ mi ar gi gwat ngi wuya si. Yi pura slra ɗu, naŋ kanah ya.

³⁰Mbur magi slra ngi mambaˀ na, sey a pura ɓi vuna, ar jileŋ naŋ ɗagay. A cufuɗ vu aka aka, yo pitisa ɓi kwana, sey a purakaɓa naŋ kuy.

³¹Amma mbur magi slra ngi matay naŋ sina, a sa pulakaŋ jiviɗ ngi gijuwa ɓi, yo a pula ɓi ngi ɓa ɓi njahnjaha.

³²Ani hin a ndilo le, anja i zla kiɗa mambaˀ ɗu, anja i po nga hirnga ya miɓa hana mata. Naŋ kine, ɓa ki toho mingiɓi ngi dumbuŋ jek, amma ɓi naŋ vuna gbusl kini na, a tiri ti ka gilaw.