Read South Giziga 2 Mak 3 Bible Online

2 Mak 3 - South Giziga bible

2 Mak 3

¹Ar hin ngi Oniyas mimakir naŋ, masay madiɗa, mangal ngi Simoŋ mucuw mazum buy na, mizli Zeruzalem, walahay mipal a roko ar zuy. A ra cinaka mi da ɓimujuwa kuy kuy ɓele Oniyas mawuɗ Buymisemuŋ, ati naŋ mahirsa gwat malambaˀa.

²Pas mekeleme, buyoy ti haŋ taŋ a ɗuvaka hirnga da hay ngi Buymisemuŋ, yo a vulam gwat ngatara mimezlehey ar li gi mikuli,

³hã Selewsus, buy Azi a wurka dala mitiki gar ar li gi slra ngi mikuli ti zlili nganaŋ.

⁴Amma mbur mekelem ada, i Simoŋ, ngir tizer ngi Bilga, naŋ a wi slra ngir hay ngi Buymisemuŋ. A wunukamˀay ati Onyas masay madiɗa, asi ɓi ngi pura luma ngir walahayay.

⁵Naŋ mija Oniyas ti kiita ta na, a ra lumo Apoloniyus, Traseyas. Ti hin nah, Traseyas i miwi Siri-Madiɗa waɗ ruwuy Fenisi.

⁶A njikaŋ ɓi ngi zlili ngir hay ngi Buymisemuŋ misi a Zeruzaleme wãˀ. A ɓaŋ li pi zlili ngi Zeruzaleme zlili ara haɗa, dala ngi raˀa anta sluf ta, yo a funa dala mawuɗam ngi gi slra ngi mikuli le. A ɓaŋ mana, i sa tuɓaka da buyo gu.

⁷Ti Apoloniyus mira kiɗam slir ati buy na, a ɓaŋ ɓi ngi zlili Simoŋ minjikaŋ di tuwa ya. Buy a wini Eliyodor, madiɗa ngi miwi lihey, a slinaŋ nga Zeruzalem, ɓa a ra tuɓo zlili miɓakaŋ ɓi naŋ tuwa gar.

⁸Eliyodor a bi kutum. A ru kaɓa ngi pura Siri-madiɗa ati walahay Finisi, dambalaka na, a ru nga gi gwat buy muwuɗ tuwa.

⁹Naŋ mindil a Zeruzalem na, masay madiɗa ati mizli ngir walahayaya, a tuɓakaŋ kaɓa ngama taŋ. A ɓa taŋ ɓi ngi gwat naŋ muso vurˀe, waɗ a slufa taŋ ɓi minjikaka taŋ di a hirnga zlili ngir hay ngi Buymisemuŋ tuwa. Amma a cufuɗa taŋ, da ɓi nah vuna i gisiŋ kwana.

¹⁰Masay madiɗa a ɓaŋ di: misi ar li pi zlili i dala ngi wadigahay ati mutuhoy,

¹¹waɗ cah mekeleme, i ngi Hikraŋ, mangal ngi Tobi, mbur mijoˀ ar li mupuɗaw wãˀa. Jom gar na, naŋ ɓiri bara kilo durmuk kuruˀ ngaŋkaˀ waɗ ɓiri hirnga kilo durmuk zlum ti kilo skat skat zlum. Mingiɓi ngi Simoŋ i slir.

¹²wãˀ naŋ mana, li mipala , mizli a vulakaŋ mevel taŋhaya le, a paka gwat taŋhaya le ara, yo hay madiɗa ngi Buymisemuŋ, duniya gar a ra ɗuvaŋ hirnga. Da i pulaka taŋ le na, naɓa i gwat mukuy ta. Ɓa i jaka haŋ avi gwat taŋhay na, a gi ta.

¹³Amma Heliyodoro, vur buy miɓaŋ tuwa, naŋ a ro hirdam ɓa a pa zlili tayna ng’ar li pi zlili ngi buy.

¹⁴A wini hin pal, a ci ng’ar hay ngi Buymisemuŋ ɓa a slufa gwat ngir li pi zlili vuna. Dar didak a muɗa walahaya gar.

¹⁵Masayay a kaka zana ngi gi mikuliheye, dar a hurkom a mbuŋ li gi mikuli, a tumbuloko Buymisemuŋ mujuwa ɓi vur buutuhoyo, ɓa a pula zlili tayna nga taŋ nga taŋ da mizli mipaka taŋ na.

¹⁶Keɗ keɗ masay madiɗa na, a guw kaɓa mevel i mungra le. Mihiri naŋ a mbiɗi le, yo kuturkuy ngi vu naŋ a buga le, a ra lik vuna si.

¹⁷A ra zluwun, yo a ra jijik ti vu naŋ gar. Mizli mapuraka gar na, a sinaka le, naŋ a ra si bonoy haɗa.

¹⁸Mizli a boko ngacca ngacca ti hayaya nga diradibiɗ, ɓa hirisa vu, a bi tir hay ngi Buymisemuŋ avra.

¹⁹Ngwasay hiɗim hiɗim, kaˀ kaˀ zana ngi vagayay ar kwacay, mbak mbak ɗuwa timi, a ra laˀam a jiviɗeye. Diylihey mitikaka taŋ a hay, ɓa a bam avra ta na, a kilam nga miviŋhey, malla ng’avi moholoy, mekelemey a puram hiri tir fenetirey.

²⁰Taŋ gar haŋ ng’amuŋ ng’amuŋ, a ra tumbuloko Buymisemuŋ.

²¹Keɗ keɗ mizli muhuruk huruk a ruwuy ngi diradibiɗ, yo didak mamuɗa masay madiɗa na, a guw ircece.

²²Mizli a ra cufuɗaka Buy misi gidaŋ wãˀa, ɓa a pula gwat ngi mizli mipaka taŋ na, nga taŋ nga taŋ.

²³Heliyodor a ra ga gwat buy miɓaŋ di tuwa.

²⁴A roko zle ati mijigin naŋhaya gweˀ avi li pi zlili ngir hay ngi Buymisemuŋ, amma Buy Mulvuŋ, Buy misi gidaŋ wãˀ, a bugo vu ngbitik akẽh. Mizli ngidigahay gar mupuraka na, a kiɗa taŋ vu tay tay, gidaŋ anta mata.

²⁵Naŋ kine, a puram pilis deŋ ti gwat ngi wuyahay denjek, waɗ mukukur naŋ a gi zluwun da mbur, naŋ joˀ ara, naŋ sirit ti libiti ngi ɓiri hirnga. Pilis a jiɗ ka cucuk, a kuca sar ngi mbuŋhoyo kini ng’avi Heliyodoro.

²⁶Ziri gawlahay a boko piyar cuw. Keɗ ti hiri na, taŋ gidaŋ, yo taŋ kuy teˀ ma. Zana mezlehey ɓaˀ ɓaˀ avu vu taŋ. A cicam pal ti gula, pal ti hazum, a ciki Heliyodoro. A ra gakaŋ bonoy teˀ le ta, a ra kiɗaka kiɗ mukuyta wãˀ tika tika.

²⁷Gurjik sina, Eliyodor a diɗ nga ruwuy simtraˀ, hiri timbiɗim. A zuɓaka, a rakaka ar gwat ngi hin.

²⁸Mbur nah, micoko ng’ar li pi zlili ati mizli hiɗim hiɗim aseˀe waɗ mijigin naŋhay tuwa, n’ani gidaŋ naŋ a kiɗ mi le wãˀ. Mizli ngi seˀehey a zuɓakaŋ, a sinaka le Buymisemuŋ i Buy madiɗa miwãˀ.

²⁹Gidaŋ ngi Buymisemuŋ a ga Eliyodoro, a ro simtraˀ tup, ko a ɓi gu ta, yo jaha hiri ɓa a sa mbul kini na, anta mata.

³⁰Mizli mekelemey a ra gaka sise da Buymisemuŋ, asi naŋ migi cekene ngi ɗuva hirnga da li naŋ mipal na. Wureˀ ani aka, mizli a ra zluwunam, didak a ra muɗa taŋ, amma wurenna, Buy misi gidaŋ wãˀ a vula taŋ mumul ati cira hiri.

³¹Cah asi mizli ngi si Eliyodoroy a wusam vu, a cufuɗaka Oniyas ɓa a dir dibiɗ, ɓa Misi gidaŋ wãˀ a vula gidaŋ da mbur misimtraˀ tuwa. Asi mike na, a ro simtraˀ, yo a ro fiɗek fiɗeke.

³²Masay madiɗa a ge mikuli vur buy masa wulukakaɓa i Zudehey migakaŋ. Joˀ masay madiɗa a gi mikuli ɓa Eliyodor a mo ti siifa amuŋ.

³³Ti mbur madiɗa migi sedege maga mikuli ngi pula mungra na, gawlahay mucuw tuwa, a boko ti zana mupurla, dedeŋ a ciki Heliyodor tuwa mani, joˀ a ɓakaŋ: «Ga sise haɗa da Oniyas, masay madiɗa, asi Bumbulvuŋ a mupuluw ti siifa na mbele naŋ.

³⁴Buy muŋ mukutuw ti bonoy kuy kuy na, a ra ɓa ɓi ngi gidaŋ ngi Buymisemuŋ da mizli gar.» Taŋ miɓakaŋ ka nah na, a susuyumom.

³⁵A dirba Eliyodor miga mikuli da Bumbulvuŋ, naŋ midir dibiɗ da mbur mupulaŋ ti siifa na, a mbiɗa mi da Oniyasa ti mi teˀteˀe, a mam ati soje naŋhaya ng’avu buy amuŋ.

³⁶Gwat Buymisemuŋ madiɗa haɗa miga gar, naŋ mupura ti hiri naŋ na, a ga sedewo naŋ avi mizli gar.

³⁷Buy a cufuɗaŋ: «I sa slinam wa nga Zeruzaleme ma sika?» Eliyodor a mbuɗaŋ di:

³⁸«Da mesene ɗik ada, malla mbur mira juw vu ngi gi vurum ati li ka mawa na, slinaŋ ng’adiga. Da a loho le ti siifa na, naɓa a sa mo vu juroˀjuroˀ ti kiɗi. Naŋ kine, Buymisemuŋ ada buga gidaŋ naŋ gisiŋ.

³⁹Asi mike na, Buy muŋ a ra jigina walahay nana, mizli maram ng’ara ti wuluk malambaˀhay na, a kiɗa taŋ, a ziza taŋ.»

⁴⁰Gwatay micohom avi Eliyodor, yo milahaka li pi zlili na, naŋ kanah so.