Read South Giziga 2 Mak 4 Bible Online

2 Mak 4 - South Giziga bible

2 Mak 4

¹Simoŋ mbur miɓaka ɓi naŋ zleˀe tuwa, a tiri le minjika ɓi ngi zlili ati minjika mizli naŋhay. A ra gila ɓi da Oniyas aruŋ na si, a ɓi na: miga bonoy da Heliyodor, yo misaŋ ti mendere na, i Oniyas kini.»

²Oniyasa, a gi mezle ar walahaya, a cik vu ar muy naŋhaya, yo naŋ wirwir ngi ja ɓimuɗuva a hirnga. Amma Simoŋ a zla a gilaŋ ɓi, kaɓa i migi gidiɓi a hirnga ngumna kini.

³A gam mesene ti vendeke, hã Simoŋ a hil mizli, a kiɗam hirnga.

⁴Gi mesene kahana, a ji mevel da mbur na, Oniyas a sina le, yo mana, Apoloniyus, mangal ngi Meneste, buy miwi li vay Siri madiɗa waɗ ngi Fenisi na, a ra pa mi da Simoŋ, ɓa a gi moˀore ti gidaŋ.

⁵A ru nga hay buyo, kaɓa i migila ɓi da mizli mata, amma ɓa ngi cika vu a hirnga mizli gar, a hirnga mbur gar.

⁶A pura na, da buy a ci ar ɓi nah ta na, naɓa ko ɓi ngi so ti zuy a wuzla mizli a gi ta, yo mana, Simoŋ n’anta sa pula gilaw naŋ na ta ma.

⁷Neˀ a dirba nah na, Selekus a mucu, Antiyokus mazilaka Epifan a tuɓa li naŋ. Dar Zasoŋ sukum ngi Oniyasa, a vul goro, joˀ a tiri masay.

⁸Ar kiɗa slir taŋ ati buyo, a ɓa buyo, a sa vulaŋ ɓiri bara kilo durmuk kuruˀu, mihila ar buutu, yo a sa pi kilo durmuk cuw ti skat skat cuw mihila ar gwat mekelemey.

⁹Waɗ mana, da buy a ngum le, ɓa a ndir li sirka gawla ati diylihey, a ndir li gi dungur, waɗ a toho slimiɗ ngi mizli Zeruzalemeye gar na, a vulaŋ ɓiri bara, kilo durmuk mufaɗ ava ma.

¹⁰Buy mutuɓa ɓi nah na, Zasoŋ a lum jalaŋ le. A tikaˀay da muy naŋhaya ɓa mbiɗaka gwat ngi gi taŋ, joˀ a gam gwat ngi Grekey.

¹¹Ti mislinaka Zaŋ cine ngi Epifan nana vuna ng’avi Romahay, ɓa ngi ɗiya ɓi ngi ji ngama ati ngi jumoˀay na, buyoy a sa pulam ɓihey le da mizli. Zasoŋ a kiɗa ɓi tayna pay, yo a kiɗa ɓi ngi sipiheye, waɗ a ɗuv ɓi mekelemey gbiŋ gbiŋ, mbak ɓimujuwahaya le.

¹²Hiri a ciraŋ hã a ndir li sirika vu asi virzi ngi muwã ngi hay ngi Buymisemuŋ vuna, yo a ɓa gawla ati diylihey misinaka gi dungur kuy kuyoyo, ɓa a ra dubunaka gi dungur ngi Grekey adiga.

¹³Akẽh na, mizli a ra wuɗam sirik ngi Grekeye. Mizli a wuɗam haɗa i sirik ngi mulakay, a gi gar vur Zasoŋ. Mbur nana i mbur malambaˀ muwãˀ naŋ, i mesene ngi Buymisemuŋ, ko a ndila ngi cifi di masay madiɗa zleˀe ta.

¹⁴Ar kiɗa mi naŋ na, hã masayay vuna, a puraka gi mikuli ar li ngi gi mikuli kuy mata, joˀ a hirsaka hay ngi Buymisemuŋ, a puraka gi mikuli ka ɓi ta. Taŋ micinam le, a ra kiɗaka gwat nga gi dunguro le na, a kilam kutum, i dungur misi ɓimujuwa a tika le ngbaŋ.

¹⁵Anta ɗuvaka hirnga da ruwuy taŋ ta wãˀ, a ŋhiyaka sirik ngi Grekey haɗi wãˀ.

¹⁶Taŋ mandiram ar ɓi mutuwaˀ na vurˀe. Naŋ kine, a puraka sirik ngi Grekeye kuyyo, yo a wuɗam gi gwata kaɓa nga taŋ, a wuɗam gi gwat gar rak rak ati taŋ. Amma Grekey a tiram mesene taŋhay, joˀ a gaka taŋ bonoy haɗa.

¹⁷Anta ngilaka ɓimujuwa ngi Buymisemuŋ manja kuti ti bonoyo ta. Hin misi nga mbuŋ a sa buga.

¹⁸Vur vi mufaɗ gar na, ar walahay Tire, a pam mi a mihiri ngi buyo.

¹⁹Zasoŋ, mbur malambaˀ vu nah tuwa, a slin mizli ar deɗe naŋ nga Zeruzaleme, i mizli Antiyosoy. Aram ti dala suloy skat makir ngi gi mikuli da kuli Heraklese. Amma mizli maram di vuna, a puraka na, a tuɓaŋ ngi tika dala haɗakahana ngi gi di mikuli ta, zuwen pi naŋ sek ngi sa gi di slra mekelem.

²⁰Vurˀe, dala Zasoŋ muvula ngi gi mikuli da kuli Heraklese, mizli a gam di slra ngi ciɗa palalam ngi vurum.

²¹Antiyokuso, a slina Apoloniyus mangal ngi Meneste le nga Ezipte, ɓa a ra gi muguzlum ngi ki sa ngwas ngi buy Filometor. Antiyokus a cina na, buy a ŋhiya ɓi ngi zuma buy naŋ ta, joˀ a wuluk ngi laha hutuŋ nga naŋ. Wuluk magiraŋ na, a ru nga Zope, joˀ a cuh ti ŋkeh nga Zeruzalem.

²²Zasoŋ ati mizli ngi walahaya, a tuɓakaŋ le kuy kuy. A cam di nga Zeruzaleme ti dali vu njiriy njiriy, salalay. A dirba nah, Antiyokus a ra pa soje naŋhaya a Fenisi.

²³Vi makir a dirba naŋ na, buy a slina Menelas, mangal ngi Simoŋ miɓaka ɓi naŋ zleˀe tuwa, ɓa a ru ti dala da buy ngi ɗiya ɓi ngi slra ngi gi wure wurenna.

²⁴Amma Menelas mubuga vu bigeˀ da buyo si na, a gi a mbuŋ naŋ kaɓa mbur madiɗa. A vula slimiɗ ngi masay madiɗa da vu naŋ teehe amuŋ. A vul ɓiri bara kilo durmuk dangafaɗ fineˀ ngi Zasoŋ tuwa ma.

²⁵Buy a vulaŋ ɗerewol ngi cifaŋ ar slra, dar a mo nga Zeruzalem amuŋ. Dambalaka ko gwat mabuga i masay madiɗa na, anta ava ko neˀ ta ngbaŋ. Amma i mbur maga bonoy tak ˀay da mizli, yo mawuɗ gi gwata ar gidaŋ, da a ji mevel le na, naŋ kaɓa gwat misahmi ngi ɓuh.

²⁶Joˀ Zasoŋ muɓula sukum naŋ zleˀe tuwa, mbur mekelem a ɓulaŋ ya, dar a kil kini nga Amaŋ.

²⁷Menelasa, i buy ɓula, amma dala naŋ miɓa buy, a sa vulaŋ di tuwa, a vulaŋ di ta.

²⁸Na, Sostrat, prefe ngi Zeruzaleme, a ra cufuɗa dala nana, asi matuɓa buutu i naŋ. Buy a zila taŋ cuw taŋ.

²⁹Ti Menelas maru ng’avi buyo na, a pul sukum naŋ Lizimak ar li naŋ, ngi gi slra ngi masay madiɗa, Sostrata kwana, a pul Krates, ɓa a cifi madiɗa ngi sojeheye.

³⁰Ar hin nah, mizli Tarse ati Malosoy a slikiɗam ɓi, asi walahay taŋ, a vulaka le ngatara da Antiyokis, mangasl ngi buy.

³¹Buy a kil kutum nga ɗiya ɓi naŋ. A pul Andronikus, mbur ngi wuzla ministir naŋhay, a cifi ar li naŋ.

³²Menelas a pura na, a pulakaŋ li le baŋ, a hul gwat ngi ɓiri hirngahay ar hay ngi Buymisemuŋ, joˀ a vul ngatara da Andronikus. A sumuɗ ti mekelemey nga hiɗik a Tir waɗ ar walahay ngi cikeˀehey.

³³Oniyas micina ɓi nah kuy kuy na, a ra ɗum a Dafne, ar li magakaŋ malambaˀ ara gu ta, gweˀ avi walahay Antiyoso.

³⁴Menelas a kiɗam slir yaŋŋa ati Andronikuso, joˀ a tuɓa ɓi nah, ɓa a susuyumoŋ Oniyasa kutum kutum. Andronikus a ra luma Oniyasa, a tilaŋ haŋ hazumo til ti hudum aseˀe, a ɓaŋ a sa vulaŋ gwatay haɗa ma. Oniyasa wuluko cuw cuw ngi bawa ngbaŋ. Amma naŋ mubo put sina, Andronikus a kiɗa daˀ arleˀe, ko a wuluk ar ɓi mijeŋŋe neˀ le ta.

³⁵Oniyas muluma muc ngatara na, a muɗa didak le da mizli, yo a ja taŋ mevel le, i Yudehey pal ta, amma mizli ngir sukwi mekelemeye haɗa ma.

³⁶Ti buy mimo tir walahay Silisi na, Yude ngir walahay ati Grekey misi mevel a ja taŋ le na, a soko, a sa lumaka buyo vur ɓi mikiɗaka Oniyas ngatara lambaˀ na.

³⁷Buy Antiyokuso, ɓi nah a giraŋ teˀ a mevele, yo a lika haɗa. A wuluka sin naŋ mijileŋ, waɗ gwat ngi gi naŋ mikaslsla na, a pula tuwuy kwililili.

³⁸A zuɓ himaˀ fõh fõh, hã a cuko zana gagaza mindezze ngi Andronikus magi di mezegwele, joˀ a ngiraŋ zanahaya. A dirba nah, a laˀam di bal bal walahaya, hã seŋseŋ ar li naŋ mikiɗa Oniyas ara vuna, dar a kiɗaka vagay ar nah vuna ya. Hana i Bumbulvuŋ mukuta Andronikus ti bonoy miweˀe avi nganaŋ so.

³⁹Dambalaka Lizimak muhul hul mukuyta wãˀ, is mbeˀ mbeˀ ar hay ngi Buymisemuŋ na, migi gidiɓi naŋ i sukum naŋ Menelas. A hul gwat ngi ɓiri hirngahay haɗa. Mingiɓi naŋ misa njik na, naɓa a zliɗa hirnga ngi gwat ngi ɓiri hirngahaya le haɗa si. Mizli a kusom tiŋ tiŋ ti ɓi ngi Lizimaka.

⁴⁰Mevel a ja mizli le haɗa, a wuɗ a slikiɗam ɓi, Lizimak a hil sojehey gwat ngi durmuk makir, joˀ a ara zli kiɗa vu lambaˀa si, sojehey taŋ asi haŋ ngi mbur ada, a zilaka Oranos. I mbur muzum ɗaf le, a ga gwata gilaw gilaw.

⁴¹Mizli a puraka na, Lizimak a ra zla taŋ le ngi kiɗa vu. Mekelemey a hilam ɗugur, numuŋhoy a hilam tokom. Mekelemeye, fucu ada akẽh, a hilaka kusom kusom a haŋ, joˀ a zliɗaka ng’ar ti Lizimak ati mizli naŋhaya.

⁴²A gam waˀa da mizli haɗa, waɗ mumucahay cah, a ɓulaka mekelemeye. A kiɗaka Lizimak, mbur muhulo gwat muvula le da Buymisemuŋ vuna, gweˀ avi li pi zlili.

⁴³Vur gwatay migam na, a gaka kiita da Menelasa.

⁴⁴Ti buy mindil a Tir na, kus ngi mingila wuy ngi Zeruzaleme, a slino mizli makir, ɓa a tuwaka ɓi Menelas a mbuŋ naŋ.

⁴⁵Menelas a pura na, kiita a sa jaŋ. A ɓi a sa vula dala haɗa da Pitolome, mangal ngi Dorimene, ɓa a ɓa buyo a ru ti kiita tiseˀe.

⁴⁶Pitoleme a ru ti buyo baˀ, kini ng’ar li misi ɓamtalay, kaɓa nga fi himiɗi, a ga hã a mbiɗa wuluk ngi buyo.

⁴⁷Menelas, mbur miga malambaˀhay gar tuwa, buy a pulaŋ mungra nah, a pulaŋ a ru. Amma mizli migeˀ ircecehey mimakir tuwa, buy a ga taŋ kiita ngi kiɗ vagay. I mizli misi, ko da a tuwaka ɓi taŋ na, avi mizli Sit misi moˀorehey na kwana, a sa pulaka taŋ a ram cimak.

⁴⁸Mizli tayna, a cikam vu le a hirnga Zeruzaleme, a hirnga mizli Yudehey waɗ a hirnga gwatay muvula le da Buymisemuŋ. Amma a kiɗaka taŋ kalla, ngatara mambaˀ kine.

⁴⁹Mizli Tireye, ɓi ngi moˀore hana, a ja taŋ mevel le haɗa, a gaka vagay taŋ timbiɗ timbiɗ.

⁵⁰Amma Menelas a ndir ar slra naŋ, asi mizli madiɗahaya, may dala avi taŋ haɗa. Menelasa, a zla a gi wer ti vendeke, yo a tiri le i mesene madiɗa ngi mizli naŋhay teehe.