Read South Giziga 2 Mak 5 Bible Online

2 Mak 5 - South Giziga bible

2 Mak 5

¹Ti hin nana, Antiyokus a juw vu ɓa a zla Ezipteheye ngi kiɗa vu sar mucuw naŋ.

²Dambalaka a gi le ng’avi hin kukur mufaɗa, mizli a puram misi pilisey ar walahay Zeruzaleme ɓaˀ li, taŋ ti godo midira ˀay dar dar ti ɓiri hirnga avu vu, waɗ mizli mamar taˀ ti gwat ngi vurumoy.

³Misi piliseye, taŋ ti ngay taŋ cinjah cinjah ngi kiɗa vu. mekelemey a ra kiɗam vu, numuŋhoy a ra tikaka kiɗe. Mbaray a hurum deŋ kaɓa yam ar mibulih, suwar a pur juroˀ kaɓa widisey mingiriɗi, maslalam a wucuɗ walak walak, luvut kwiɗiɗiɗi tika, kwiɗiɗi tika, zana ngi ɓiri a wucuɗ walak walak ti ɓiri hirnga, libitihey wal wal gar ada.

⁴Mizli gar a ra diram dibiɗ ɓa gwat mubugo vu hana a bigi gwat masa cuh ti mezle.

⁵Migilaka ɓi ngi muc da Antiyokus tuwa, ɓi naŋ a tisla le le tisl. Zasoŋ a kus sojehey fineˀ durmuko, joˀ a ram nga zli Zeruzalem gurjik ngi kiɗa vu. A ɓulaka mijigina moholoyo, joˀ a tuɓaka walahaya. Menelas a ra ɗum ar hay musubur fineˀ hay ngi Buymisemuŋ.

⁶Zasoŋ a zla kiɗa sukum naŋhaya teehe, manja ircece. Luma bugawla ar sukum ɗikey na, i gwat malambaˀ muwãˀ naŋ na, Zasoŋ a sina ta. Naŋ makiɗa sukum naŋhaya, kaɓa a kiɗ di i mesene naŋhay ma.

⁷Mbak, tika a luma buyo ta, tika a pi mesem le asi naŋ minjika naŋhay na. Akẽh, a kil nga ruwuy mulak tuwa si ma ni, a ra ɗum a Amaŋ.

⁸Gi malambaˀ naŋ madiɗahay tuwa, a kiɗ mi le muduba so. A gicaka gic a hay Aretas, buy Arap. A sa kil ng’ar walahay aka aka. Mizli gar a ra ɓulakaŋ, a ra hirsakaŋ, asi a njika ɓimujuwa ngi mizli naŋhaya le. Yo asi a ga bonoy haɗa da sukum naŋhay teehe asi ruwuy naŋ. Taŋ a ɓulakaŋ seŋseŋ a Ezipte na, vurˀe.

⁹A kil ti ŋkeh nga ruwuy Grese, a pura zleˀe kaɓa a ra ɗum a ciki Spartiyahay, muy ngi Yudehey kwani. Naŋ muɓula muy naŋhay ngiɗ ngiɗ, a ra mucam a ruwuy mulak na, naŋ vuna kwana, a ra muc a ruwuy mulaka ya.

¹⁰Zasoŋ mupula vagay ngi mizli ɓaˀ ɓaˀ haɗa manja dik tuwa, naŋ vuna, ko mbur mutuwaŋ anta, a gakaŋ vagaya ta ma. Ko a lum vigiɗ ngi dik naŋ a ciki dideˀ naŋhaya ta ma.

¹¹Buy micina ɓi ngi gwatay micohom a Zeruzalem na, a purakaɓa Zudehey gar a slikiɗam ɓi le. A pula Ezipte, ti mevel fõh fõh kaɓa gwat misahmi ngi ɓuh, joˀ a tuɓa walahaya ti vurum.

¹²A ɓa sojeheye daˀ daˀ le, ɓa taŋ mulumam mbur le gar na, a kiɗaka vagay, yo ɓa a slaka ˀay da mizli mduɗum ɗum a viŋ.

¹³A ngizlaka gawla ati midigilahaya, a susuyumoko ngwasay ati ziri, waɗ a slaka ˀay da diyli mungbuˀohoy ati ziri gazahaya.

¹⁴A Zeruzaleme, a kiɗam mizli durmuk kukur dangafaɗ ar hin makir. Mizli durmuk kukur mufaɗa, i mihiɗika taŋ ti hiɗik avra ngi beke.

¹⁵Antiyokus a pura na, naŋ muk t’aruŋ, a ci ng’ar hay ngi Buymisemuŋ, mipal wãˀ ngisi ruwuy ceke. Mici di ng’ara i Menelas, mbur mususuyumo ɓimujuwa ngisi ruwuynaŋ tuwa.

¹⁶Tutuŋhoy muvula le da Buymisemuŋ, Antiyokus a ja haŋ naŋ misi dili na avi taŋ. Gwat ngi mikulihey Buy mekelemey mipaka taŋ ɓa li mipal a sik, a lum dudok, yo a ɗuvakaŋ hirnga na, naŋ a hila taŋ ti haŋ naŋ malambaˀ na.

¹⁷Antiyokus a ra huhum, na Buy ngi gwat gar miji mevel ngi hin neˀ ar mungra ngi mizli ngir walahay na, naŋ a sina ta. Naŋ mungum jigina hay nga naŋ Buymisemuŋ ta na, vurˀe.

¹⁸Da mungra mihaɗa hana, Zeruzalemey a cam gizliv ara zleˀe ta na, anja buy Antiyokuso, a kiɗaka zle ti naŋ maci ng’ar walahay vuna si. Buy Selekus mislino Eliyodor nga jiɗa li pi zlili ngir hay ngi Buymisemuŋ na, anja a kiɗaka zle ti naŋ mindilo ti ndil vuna si, anja ani a mbiɗi duba le avi gwat malambaˀ naŋ mujuwa ngi gi na.

¹⁹Amma Bumbulvuŋ a wuna mizli naŋhaya, vur hay naŋ ta, amma a wuna hay naŋ vur mizli naŋhay.

²⁰Vurˀe hay ngi Buymisemuŋ vuna, malambaˀ ngi mizli a mbiɗi le nga hirnga naŋ. A dirba nah, gi mezle mizli mulumam na, naŋ a lum aya. Buy misi gidaŋ wãˀ miji mevel fõh fõh na, a pula hay naŋ manja jigin, amma Buy ngi gwat gar mujum ˀay ati mizli naŋhay na, a ɗiyaka haya ti dudok naŋ, kaɓa naŋ misi zleˀe amuŋ.

²¹Antiyokus a hil suloy kilo durmuk kukur mufaɗ nga dangafaɗ, dar a cuh kutum nga Antiyos. A ra huhum, a pura na, gwat mafunaŋ anta, ko palalamay kwana, a kukurom a ruwuyo gu, malla sojehey kwana, a rudigam a hirnga mubuliye njiraŋ njiraŋ gu.

²²Amma a pul soje madiɗahay a dirba ngi gi malambaˀ da mizli Yudeheye. A Zeruzaleme, a pul Filip ngir sukwi Frigi, gwat ngi gi naŋ malambaˀ fineˀ ngi Antiyokus vuna.

²³Ar muwã Garizime, a pul Andronikus. Jom ng’avi mizli tayna, a pul Menelas, maguzuvura Yude mizli naŋhaya, fineˀ cil naŋhaya. Andronikus a ra wuɗ ga malambaˀ da Yudeheye haɗa haɗa.

²⁴A slin Apoloniyus, madiɗa ngi mikiɗa hirnga ngi Misihey ti soje durmuk kukur cuw nga cuw. A ɓaŋ ɓa a ngizla mizli ngir walahaya pay, yo ngwasay ati ziri, a hiɗika taŋ avra ng’ar beke.

²⁵Apoloniyus mindil a Zeruzalem na, a ga vu naŋ kaɓa mbur muso ti leleŋ asi ruwuy. A ndila hin sabata , a pura Zudehey anta gam slra ta, avi Yudeheye, i hin muvula le da Buymisemuŋ. A cir tisi hin nana, hin Yudehey mupulaka slrahaya le gar, joˀ a ɓi ɓa soje naŋhay a hilaka gwat ngi vrumoyo.

²⁶Gurjik si na, a ɓa taŋ ɓa a ngizlaka mizli muboko ngi pura hiri gar, a cam ng’ar walahaya, a nahaka rek rek, a kiɗam mizli haɗa.

²⁷Dambalaka Zudas, mazilaka Makabe, ati mizli mekelemey kuruˀ, a bam le zleˀe ng’ar li papala. Naŋ ati cil naŋhaya, taŋ kaɓa gwat misãmihey a muwã. A zumam sey i giziŋ vur taŋ macam ar dili.