Read South Giziga 2 Mak 6 Bible Online

2 Mak 6 - South Giziga bible

2 Mak 6

¹Hin neˀ a dirba naŋ na, Buy a slina Geronte mbur Atene nga Zeruzalem. A ɓaŋ ɓa a ra tika ˀay da Zudeheye, ɓa a pulaka sirik taŋhay, yo ɓa sipaka ɓimujuwa ngi Buymisemuŋ mata.

²Waɗ mana, a ɓaŋ ɓa a hirya hay ngi buy misemuŋ ngi Zeruzaleme, ɓa a vula da Zes, kuli ngi Olempihey, yo hay ngi Buymisemuŋ misi a muwã Garizime, a vula da Zes, kuli mitiɓi mizli, kaɓa mizli ngir walahay mawuɗam.

³Mendere hanayna, a tiri le tuwaˀ avi mizli gar, yo i ngi pul teˀ ta.

⁴Ar hay ngi Buymisemuŋ, Zudehey ta, a ra gam sulome, yo a zumam fineˀ gidaŋ anga. A gam dungur ati ngwas sulomehey, a hinam ti taŋ a mamay Buymisemuŋ. Waɗ a ram ti gwat mitikahay le ng’adiga.

⁵Li ngi mikuli, gwat misi dilihey a ra dirisl, gwat ɓimujuwa mitika le.

⁶Ɓa ngi gi mezegwel ngi Sabat, ngi gi muguzlum ngi dideˀhey, malla ngi ɓi: ‹ndr’i Zudehey› na, jiviɗ naŋ anta.

⁷Vur kiya gar, ar hin miyaka buy ara na, a tikam ndra ˀay ngi zuma ɗaf ngi mezegwel, waɗ ar muguzlum ngi Diyonisosoy [1] na, sey i jijiraka lappol mija ti zeweɗ ati kalafaya tak ˀay, yo sey i sipaka mizli maram ti loppol nana, ngi gi dudok da kuli vuna.

⁸A ɗuvam ɓi le vur mizli ngir walahay Ptolomayise. Anja ar walahay Grek migweˀ gweˀ avi walahay Zudehey na, a gam gwat misi purla ati Zude ngi digahaya, yo anja a zumam ɗaf ngi mezegwele ya.

⁹Yo mizli masa sipaka sirik ngi Zudehey ta na, a slaka taŋ ˀay. Mendere mawuɗ a ndilo gweˀ na, mbur gar a sina le.

¹⁰Naŋ kine, a ram ti ngwasay ada cuw ng’ar kiita, vur taŋ micaka ziri taŋhay a mizaw. A gunom taŋ walahaya kurzluˀ a mihiri ngi mizli gar, ti ziri taŋhay a mi ɗuwa a mi ɗuwa. A dirba nah, a poko taŋ haŋ baɗ a hirnga moholo nga ruwuy.

¹¹Zude mekelemey a ram arleˀe, a ra gaka mezegwel ngi sabata yaŋ ti yaŋ ar butum migweˀ gweˀhey. Mizli a ra ɓaka ɓi naŋ da Filip, dar a wuraka taŋ cek arleˀe, asi taŋ a ngumam ɓiɓi ngi laha hirnga taŋ ta, asi hin nana i hin mipal.

¹²I ra ɓa mizli masa lumaka ɗerewol hana asi haŋ taŋ na, anja a gam vagas asi ɓi ngi mendere hanay na ta, amma anja a wulukaka mendere hanayna ta, amma anja a wulukam, maguzuvuraka taŋ na, anta ngi hirya taŋ ta, amma i ngi sirika muy ndrahay.

¹³Mupulaka misi moˀorehey mbak ngi hin haɗa ta, amma bonoy a ndilo taŋ gurjik na, i gwat mabuga mezle ngi Buymisemuŋ mihaɗa.

¹⁴Ɓa ngi kuta mizli mekelemey na, Buy madiɗa miwãˀ ngi mizli, a kutuk ɓiri tapasl tapaslro ɓa a gaka mungra taŋ na wãˀa. Amma vur ndra, a pura naŋ jeŋ ɓa ngi gi ndrakanah ta.

¹⁵Vurˀe, ɓa ngi kuti ndra, a pula ndra i kiɗaka mi ngi mungra ndrahaya ta, a kutuko ɓa i gaka mungra ndrahaya talalaˀ wãˀ ta.

¹⁶Vurˀe, n’anta pula pura ndra ircece mbak le ta ndidaˀ: da Buymisemuŋ a ra kuta mizli naŋhaya ti bonoy na, naɓa ko n’anta pula taŋ ta.

¹⁷A tuɓaŋ le ngi ki mumuyuŋ ngi zay sla a slimiɗ mizli vur ɓi mikaslsla hana vuna. A dirba mingiɓi mineˀ hana, mukum ng’ar ɓi ndra maslufoko di zleˀe na amuŋ

¹⁸Elazar i mbur ngi wuzla buy ngi ɓimujuwa mudumbuŋhoy, a gi mbur le, yo kuy naŋ a zli ta. A tikakaŋ ˀay, a wunakaŋ mi ngi zuma useˀ ngi fedem.

¹⁹Naŋ, a pura na, zuwen naŋ mamuc ti dudok a funa naŋ mandir ti siifa ar meseme le. Akẽh na, a ru ng’ar li taŋ masa kiɗakaŋ vagay ara na.

²⁰Useˀe misi a balama, a putuko di avra. Gwat mitika le ngi zum na, ko da a bi ngi ziza hutuŋ kwana, mutuma vuhoy a gaka kanah.

²¹Mizli mavulaka gwat ngi zum misi ɓimujuwa a tika le vuna, a cifaka Elazara baˀ pal. Asi a sinakaŋ le diga zlezle. Dar a ɓakaŋ ɓa a so ti useˀ naŋ mazuma zuy, yo misi i naŋ vuna mida. Anja a sa gi kaɓa a ra zum useˀ ngi mikuli buy mujuwa ɓi naŋ na.

²²Da a ga le kanah na, naɓa a sa laha hutuŋ naŋ, yo a sa gam di kaɓa magam ti mbur titira, asi taŋ i ngamahay diga zlezle.

²³Elazar a gi mbur le, yo i mbur micawwa ngir walahay, yo a gi hol a hirnga tullo ar slra, a ndila mburo le, gwat ngi gi naŋ i mezle diga naŋ misi ti zuŋ. wãˀ naŋ mana, a ja ɓi Buymisemuŋ mujuwa na le. A ɓa mizli ɓa a kiɗaka vagay, ɓa a ru ng’ar li ngi mizli mumucahay kutum.

²⁴A ɓa taŋ ma: «Ar gal ndra hana, ɓa ki ga gwata kaɓa ti kaɓa na, naŋ kuy ta. Naɓa gawla ati diylihey haɗa, a sa wulukam kaɓa ya Elazar misi vi kukur ngoltir na, i ra wuɗ sipi sirik ngi mulakay.

²⁵Asi ya miga gwat hana, taŋ a sa zizam aya. Ya misi zik ngi vi ɗu a ndir hin neˀ kini na. Naɓa ar midigila ɗu hana, i so ti dili ati mesem nga hirnga ɗu.

²⁶Da i lih le tir bonoy ngi mizli titrahaya tekeɗe kwana, y’anta sa lih avi kuta mizli ti bonoy na ta si, avi kiita ngi Misi Gidaŋ wãˀa, malla mucu malla siifa.

²⁷Ya matum vu ngi pula siifa wurenna na vurˀe. I wuɗ i buga, i ndila gi midigila le.

²⁸Naɓa i buga jiviɗ ngi muc mezle le da gawlahaya, i vula vu taˀ ngi muc tahaŋ ɗu, ti mevel purla, ngi ɗuva hirnga da ɓimujuwa migisiŋ gisiŋ, yo mipal na.» Naŋ miɓa ɓi hana daˀ daˀ na, a ru cirre ng’ar li taŋ masa kiɗakaŋ vagay ara tuwa.

²⁹Mizli maki sa kaŋ, a mbiɗaka wuluk taŋ mimezle taŋ misi ti naŋ wurenna tuwa, ti wuluk malambaˀa, a purakakaɓa mingiɓi naŋ miɓa hana, i mi ngi gilaway.

³⁰Amma ti naŋ mawuɗ a muc gweˀ ti kiɗe na, a niˀic a ɓi: «Bumbulvuŋ naŋ ti sin ngi gi gwat gar. Yi lih avu muco zleˀe gu na, naŋ njah. Ani wurenna, i ra si bonoy haɗi ti kiɗ ti laway, amma a mevel ɗu, i sa bonoyo ti mumul, asi Buymisemuŋ miga ɓa i zluwun di na.»

³¹Elazar mupula siifa na, kanah so. Ti muc naŋ na, a pul gwat ngi buga jiviɗ da gawlahay pal ta, amma da vendeke ngi sukwi ngi mizli gar.