Read South Giziga 2 Mak 7 Bible Online

2 Mak 7 - South Giziga bible

2 Mak 7

¹Ngi pas mekelem mana, a jam ziri sukumohoy tarnaˀ ati mumuŋ taŋ. Buy a wuɗ ɓa a sliɗaka taŋ ti laway waɗ ti ngi dambasl ngi slahay, ɓa a zumam useˀ ngi fedem. Zuma useˀ ngi fedem i mitika le ar ɓimujuwa ngi Buymisemuŋ.

²Mangal pal a zla a ɓi ti slimiɗ taŋ gar, a ɓa buyo: «Gwat ka macufuɗ mallaka mawuɗ dubun avi ndra i gwat mike? I juwam vu le ngi mucu, a funa ndra mangilaka ɓimujuwa ngi dideˀ ndrahaya le.»

³Dar buy a slikiɗ mevel fõh fõh. A ɓa mizli joˀ a kam gwat ngi fuko useˀ ati mejejeŋhey ng’ar vu.

⁴Taŋ mijam vu njulilili sona, buy a ɓa mizli joˀ a bukoko ˀirne ngi mangal miɓi ti slimiɗ taŋ gar tuwa. Waɗ mana, a turokoŋ garak ngi hirnga, a bukokoŋ sar ati haŋhaya daˀ a mihiri ngi sukum naŋhay ati mumuŋ naŋ.

⁵A dirba taŋ mubukokoŋ gwataya le cek sona, buy a ɓi, joˀ a kirjohoko di nga ciki vu, yo a kaka ng’ar gwat ngi fuko useˀ tuwa titiri naŋ kine. Mangal matus na, zĩˀĩ naŋ a guno hirnga ngi vu gun. Sukum naŋ mekelemey ati mumuŋ taŋ, a ra vulam gidaŋ ar wala taŋ, ɓa a mucam manja zluwun, a ɓam:

⁶«Bumbulvuŋ, Buymisemuŋ ndra a ra pura ndra, n’ada pura ndra ircece gisiŋ. Moyis a ɓa ɓi naŋ le ar dimis magila ɓi da mizli naŋhaya, a ɓi na: «Buymisemuŋ a sa pura ircece da gawla naŋhaya.»

⁷Ti mangal mudumbuŋ mumuc sona, a soko ti mucuw naŋ ng’ar li kiɗa mbur vagaya. A dirba taŋ muturokoŋ garak ngi hirnga jom ti ngwice, a cufuɗakaŋ: «Zuwen ka mazum useˀ ngi fedem, a funaka masi bonoy ti buko sar ati haŋhay purlaha purlaha na le takwa?»

⁸Naŋ a mbiɗa taŋ di: «ŋiˀi», ti mi ngi dideˀ naŋhay maɓam di. Vurˀe, a gakaŋ bonoy misi purla ati ngi sukum naŋ mudumbuŋ tuwa ma.

⁹Ti naŋ mawuɗ a muc gweˀ na, a ɓa buyo: «Ki migi mungra madiɗaŋ! ki tika ndra hutuŋ le dana ɓula, amma Buy ngi duniya, ndra mumucam asi ɓimujuwa naŋhay na, a sa slikiɗa ndra ng’ar siifa ngi sete.»

¹⁰A dirba nah, a gaka bonoy da mimakir taŋ ma. Taŋ macufuɗakaŋ ɓa a bo ti irne na, a bo di, yo a sika taŋ haŋ manja zluwun.

¹¹A tum vu tum, a ɓi: «Haŋ ati sar hanayna, i Buymisemuŋ muvuliy taŋ zleˀe, wurenna i ra hirsa taŋ ɓa ngi ɗuva hirnga da ɓimujuwa naŋhay, amma i sina le a sa miy taŋ amuŋ.»

¹²Tumo vu ngi mangal hana, yo naŋ mapura bonoyo ka ɓi lambaˀ na, a zuma hirnga le da buy ati mizli naŋhaya.

¹³Mangal nana mumuc na, a gaka bonoy mupurla da mumufaɗ taŋ ma.

¹⁴Naŋ mawuɗ a muc gweˀ na, a ɓi: «Zuwen muc tisi haŋ ngi mizli, ngi kutuko slikiɗ ti wuzla mumucahay, Buymisemuŋ miɓa daˀ daˀ le tuwa. Amma ka buyo, slikiɗ ng’ar siifa ngi sete, ngi ɗike anta.»

¹⁵A soko ti muzlum taŋ, joˀ a gakaŋ bonoy.

¹⁶A ɗuva hiri taˀ ar buyo, dar a ɓaŋ: «K’ada ti gidaŋ awuzla mizli ɓula, amma ki mbur misi vu mazĩˀĩ ngbaŋ. Ga gwat ka mawuɗo, na ki wuluk misi Buymisemuŋ a pula mizli naŋhaya le na, ki wuluk kanah ta ɓula.

¹⁷Kutuko neˀ kini ɗi, ki sa pura gidaŋ naŋ mihaɗa na. Ki sa pura naŋ maguw bonoy daka ati dideˀ ɗikey nga mbuŋ ɗi.»

¹⁸A dirba nah, a soko ti mimerkeɗ taŋ ma. Naŋ mawuɗ a muc gweˀ na, a ɓi: «Ki gi gilaw ta, ndra masaka bonoy hana na, vur ndra vuna teehe, asi i gam mungra le avu Buymisemuŋ ndra. Mendere madiɗahay magam avi ndra na vurˀe.

¹⁹Amma ka, ka magi vurum ati Buymisemuŋ na, ki wuluk misi anta sa kutukuw ti bonoyo ta na, ki wuluk kanah ta.

²⁰Mumuŋ taŋ na, hiri a ɗuv ava ta, yo a ndila le ɓa slimiɗ naŋ a zil ti mezleŋ. Ziri naŋhay tarnaˀ a mucam a mihiri naŋ, angi hin purla si. Amma a ra ɓusa tum vu, asi a pula mevel naŋ le da Bumbulvuŋ.

²¹A ra vula taŋ gidaŋ purla purla gar ti mi ngi dideˀ taŋhaya. Ngwasa, a nihi le ti wuluk madiɗahay, yo naŋ ti gidaŋ kaɓa mbur zil, a ɓa taŋ na:

²²«Kum micam nga kwacay ɗu vuna, yi sina ta. Muvulukum musuwun ati siifa i ya ta, yo mujuɓukum joɓ joɓ ɓa hã ki tiram vu deŋ na, i ya ta ma.

²³Anja Buy miga duniya, mikiciwa mbur ɓa hã a yakaŋ, yo mizla virzi ngi gwatay gar, a vulukum musuwun ati siifa ar pura ircece naŋ. Asi mike na, wurenna kum tahaŋ kum, ki ra vulaka vu kumo, asi kum mawuɗam ɓimujuwa naŋhay.»

²⁴Buy Antiyokus a pura na, ngwas a ra singir araŋ. Yo a pura mingiɓi hana kaɓa i mi ngi zi vu. Mangal hiri meciɗeke, a ro ti siifa aruŋ. Buy a ɓaŋ ɓi ngi vulaŋ gidaŋ tew ta ma, amma a ɓaŋ da a pula sirik ngi dideˀ naŋhaya le na, a sa tiri misi zlili, a sa mumul, a sa tiri di ngama naŋ, joˀ a sa vulaŋ slra madiɗaŋ.

²⁵Amma mangala, anta jik slimiɗ neˀ le asi mingiɓi naŋ ta. Buy a ɓa mizli, ɓa a kuroko mumuŋ, a ɓaŋ ɓa a vula kuti da mangal gawla ngi laha hutuŋ naŋ.

²⁶Buy a hurdum hirdam avi ngwasa, joˀ ngwas tuwa a ɓa mangala so.

²⁷A guɓ guɓ ng’ava. A tikina mikiɗa hirnga maga gwat ar gidaŋ tuwa, joˀ a ɓa mangal naŋ ti mi ngi dide naŋhay, a ɓaŋ na: «Aw mangal ɗu piriy ircece. I jujuruw le kiya ngoltir a kwacaya, a vuluw ɗuwa le vi makir, i vuluw gwat ngu zum le, yo i giluw le hã dana ani na.

²⁸Ambuh mangal ɗu, pura muŋ ati ruwuyo, singila gwat ngi rahaya gar, anja ki sina, Buymisemuŋ a ga taŋ tahaŋ ngataraŋ. Sukwi ngi mizli kwana, a ga taŋ ka nana ma.

²⁹Ko ki zluwun ti mbur mikiɗa hirnga hana ta, amma buga ki ndila le kaɓa sukum ɗikey vuna ya, tuɓa muco, ɓa yi sa ra lumukum ati sukum ɗikeye ar hin ngi Buymisemuŋ masa ga mezle naŋ na.»

³⁰Mumuŋ mitika mingiɓi ti tiki aruŋ sina, mangal a ɓi: «Ki kutukom mike? Y’anta cina mi da ɓi midaˀ le ngi buyo ta, amma yi cin mi da ɓimujuwa, Moyis muvula da dideˀ ndrahay na.

³¹Naka, Buy Antiyokus, ka muso ti mendere nga hirnga mizli Zudehey na, k’anta sa lih tisi haŋ ngi Buymisemuŋ ta.

³²Asi mike na, da ndra mekelemey i ra sam bonoy na, i saka vur mungra ndrahay teehe amuŋ.

³³Ɓa ngi kuti ndra, yo ngi dubuna ndra gwata, da Bumbulvuŋ, Buy ndra misi titiri, a ji mevel le ngi neˀ ar ndra na, a sa jumˀay ati ndra migi slra naŋhay amuŋ si.

³⁴Amma ka, ki misi moˀore, ki malambaˀ muwãˀ ngi si mizli, ki gi zlokoko ngataraŋ, yo ka mazuɓa haŋ ng’ar migi slra ngi Buymisemuŋhoy na, njaha hiri ɗike i ng’araŋ.

³⁵Asi mike na, Buy misi gidaŋ wãˀ a ra pura gwatay gar, ki lih avi kiita naŋ t’aruŋ.

³⁶Wurenna, sukum ndrahay a sam bonoy le neˀ, i bonoy makiɗmi, ɓa ngi luma siifa ngi sete. A mucam ar jumoˀay ati Buymisemuŋ. Amma ka, Buymisemuŋ a sa guw kiita, yo a sa kutuw ti bonoy weˀe avu huhumo vu ɗik na.

³⁷Ya kwana, yi vula vu ɗu ati siifa ɗu vur ɓimujuwa ngi dideˀ ɗuwoy, kaɓa sukum ɗuwoy muvulaka na ya. I ra cufuɗa Buymisemuŋ ɓa a pura ircece da sukwi ndra muduba. Amma anja a buguw di ti bonoy waɗ mendere, ɓa ki sina Buymisemuŋ pal i naŋ.

³⁸I ra dir dibiɗ ɓa misi gidaŋ wãˀ miji mevel ar sukwi ndra na, anja a kiɗ mi ar ndra ati sukum ɗuwoy tewle si.»

³⁹Buy a pura na, mangal ngi dirba a zaŋ le gbaˀ avi tesle. A zuɓa himaˀ, joˀ a gaŋ bonoy fineˀ ngi ziri numuŋhoyo.

⁴⁰Mangal gawla hana, a muc manja dili ava, yo a vula mevele le taˀ wãˀ da Bumbulvuŋ.

⁴¹A dirba taŋ, mumuŋ taŋ a muc aya.

⁴²Vur ɓi ngi ɗaf ngi mesegwel ati bonoy mutuwaˀhay na, i cicam aka.