Read South Giziga 2 Mak 8 Bible Online

2 Mak 8 - South Giziga bible

2 Mak 8

¹Dambalaka Zudas mazilaka Makabe ati cil naŋhay a cam ti yaŋ yaŋ ng’ar walahayay. A ziloko muy taŋhaya ng’asi taŋ. A ɗiɗoko mizli mindiram teŋteŋ avi ɓimujuwa ngi Zudeheye ng’avi taŋ ma. A kusom gweˀ ng’avi mizli durmuk merkeɗe.

²A tumbuloko Bumbulvuŋ ɓa a kilo widi ngi mizli misi mizli gar a ra guzuvuraka taŋ, yo ɓa a pura ircece da hay naŋ, mizli misi moˀorehey mahiryaka na,

³yo ɓa a pura ircece da walahay mizli mawahaka, a susuyumoko ngirnin wãˀ na. Pumbus ngi mizli mawudam ng’ava na, a pura taŋ ircece.

⁴Mikiɗaka ziri manja a gam gwata si na, anja a wuluka keŋ, yo mizli mizakaŋ na, anja a slikiɗ mevel fõh fõh ng’ar taŋ.

⁵Zudas muluma madiɗa ngi sojehey lum sina, ko sukwi ngi mizli a tikakaŋ ˀay gu mata, asi Bumbulvuŋ a pula mevel mufõh fõh le, a ra ga mezle da mizli naŋhaya.

⁶Zudasa, a diɗ vu kpis ar walahay madiɗa ati memeɗeheye, a wura taŋ. Li mupuɗaw puɗaway na, a tuɓa taŋ. A gidiɗ mesene naŋhay le haɗa.

⁷Ɓa ngi zli kiɗa vu kahana na, a wuɗ sey ti duvuɗu. Mizli a ra ɓaka ɓi ngi wirwir naŋ ar li gar.

⁸Filip, mbur madiɗa ngi buy a Zeruzaleme, a pura na, Zudas a ra tiri puɗaw neˀ neˀe, yo a ra lum bugawla is mbeˀmbeˀe. A tuh letir da Ptoleme, buy miwi li vay Siri Madiɗa ati Finisi. A cufuɗaŋ ɓa a kilo widi naŋ vur gwat ngi buyoyo.

⁹Nikanor ada, i mangal ngi Patrokle, naŋ a wuzla ngama mudumbuŋ ngi buyoy. Ptoleme a slinaŋ kutum, ɓaˀ a mbuŋ soje ngi sukwiheye keɗeɗe, a gam gwat ngi durmuk kukur cuw aseˀe, ɓa a ra ngizlaka sukwi ngi Zudeheye pay wãˀ, a vulaŋ Gorziyas zeneral ngi sojehey, asi naŋ a sina ɓi ngi vurumo le.

¹⁰Buy Antiyokuso, duvus ngi Romahay ada ava zle, ɓiri bara gwat ngi kilo durmuk kukur zlum nga mufaɗa. Nikanor a wuɗ ɓa mbur Zude mujoko di le gar na, a hiɗika avra, ɓa a wurka duvuso ti naŋ.

¹¹A slin kutum ng’ar walahay madiɗa ngi miyamay, ɓa a sa hiɗikam Zude bekeheye. A ɓa taŋ, mizli kukur ngoltire, ɓiri bara kilo kukur cuw nga tarnaˀa. Buy misi Gidaŋ wãˀa, a sa kutaŋ ti bonoy mutuwaˀ na, naŋ a sina ta.

¹²Zudas a cina na, Nikanor a bo le, a ro a jiviɗ. A ɓa cil naŋhaya, soje mesene taŋhay mihiɗim hiɗime taŋ gweˀe,

¹³Miŋhiyahay ati mutuɓaka jeŋŋe ngi Buymisemuŋ ta na, a kilam ng’ar li mekelemey.

¹⁴Mizli mindiramaya, a hiɗikaka gwat taŋhaya cek, joˀ a diram dibiɗ da Bumbulvuŋ ɓa a laha mizli, Nikanor mihiɗika taŋ avra dumbuŋ manja vurum a zli na.

¹⁵Da Bumbulvuŋ mawuɗ taŋ na, a laha taŋ vurˀe ta na, anja a laha taŋ vur naŋ mujum ˀay ati dideˀ taŋhay na. Naŋ Buymisemuŋ mipal , yo misi dudoko, a zila taŋ le ɓa a tiram mizli naŋhay.

¹⁶Zudas mazilaka Makabe, a kuso mizli naŋhaya, taŋ mizli durmuk merkeɗe. A vula taŋ gidaŋ ɓa a zluwunam a mbuŋ mesene taŋhaya ta. Yo mesene taŋ yudehey ta masoko hiɗim hiɗim ng’ar taŋ, ngi kiɗa vu manja a gam gwata si na, anja a zluwunam ti taŋ ta. Amma anja a gam wirwir ngi kiɗa vu.

¹⁷Gwat malambaˀ muwãˀ mizli tayna migaka ar li mipal , taŋ migaka gwat ngi mesem da walahay Zeruzalem, yo taŋ mususuyumoko sirik ngi Zudehey na, n’ada keŋŋe a hirnga taŋ.

¹⁸A ɓa taŋ ma na: «Taŋ a vulaka vu taŋ le taˀ da gwat ngi vurum ati gi gwat malambaˀ taŋ na, amma ndra, vulukum vu ndra taˀ da Buy misi gidaŋ wãˀ. A hizigiɗa hirnga le hizigiɗ na, a ngizla mizli masoko ng’ar ndra na pay,jom ti duniya kurzluˀ gar.»

¹⁹Buymisemuŋ mijigina dideˀ taŋhay na, a slufa taŋ di gar, kaɓa ani: ar hin ngi Senakerip mazum buy na, a kiɗ mesene taŋhay mizli durmuk skat ti kukur dangafaɗ nga zlum.

²⁰A Babiloŋ, ti vurum migi ati Galatay na, Zudehey taŋ mizli durmuk dangafaɗ, yo Maseduwanay ada asi taŋ mizli durmuk mufaɗ. A kiɗam vu ati mizli durmuk skat ti kukur cuw. Ɓi a bul vu avi Maseduwanaya, amma Zudehey durmuk dangafaɗ tuwa, a lumam bugawla mbele jiniˀis ngi Buy muŋ, yo a hilaka gwat taŋhaya haɗa.

²¹Naŋ mutuso taŋ didak ti mingiɓi hana na, a vula taŋ gidaŋ ɓa a vulaka vu taŋ taˀ ngi muc vur ɓimujuwa ati ruwuy taŋ. A wuɗka soje naŋhaya, taˀ taˀ ngay mufaɗa.

²²Ngay gar naŋ ti mizli durmuk ti mizli skat skat zlum. Misi a hirnga taŋhay i sukum naŋhay, Simoŋ, Zozef, ati Zonataŋ waɗ naŋ vuna.

²³Waɗ mana, a ɓa Elazar ɓa a slufa ɗerewol mipala. A vula taŋ mingiɓi naŋ: «Kila widi ngi Buymisemuŋ!» si na, a bi ɓaˀ a mbuŋ ngay mudumbuŋ, a ra zlaka Nikanaro ngi kiɗa vu.

²⁴Buy misi Gidaŋ wãˀa, n’ada ati taŋ, a ngizlam mesene taŋhaya, gwat ngi mizli durmuk ngoltir. A gam waˀa, yo a bukoko sar malla haŋ ngi vendeke ngi soje ngi Nikanoroyo, joˀ a gidiɗaka taŋ.

²⁵A hilaka ɓiri bara ngi mizli musoko nga hiɗik taŋ tuwa. A gidiɗaka taŋ yikiɗik. Pas mawuɗo doɗ na a moko deŋŋe jiviɗ amuŋ.

²⁶Asi mike na, ɓa li a wun i hin sabat, taŋ migidiɗaka taŋ hirnga puyuk ta na, vurˀe.

²⁷Taŋ mihilaka gwat ngi vurum ati zlili ngi mesene taŋhay na, dar a gaka mezegwel ngi sabat so. A gaka sise da Bumbulvuŋ, a hunumakaŋ, asi naŋ muvula taŋ hin mudumbuŋ ngi pura taŋ ircece na.

²⁸A dirba sabata, a hilam cah avi zlili taŋ mihiloko di ar vurum tuwa, a vulaka da mizli ngisi taŋhay mulumam guzuvur le zleˀe, da wudiga ati mutuhuhoy, joˀ a wunkaka is naŋ ar wala taŋ ati ziri taŋhay.

²⁹A dirba taŋ muwunkaka le muduba na, a ɓam daˀdaˀ ar wala taŋ, a diram dibiɗ arleˀe da Bumbulvuŋ mapur ircece, ɓa a ɗiya ɓi wãˀ ati gawla naŋhaya.

³⁰A dirba na, Zudas ati soje naŋhaya, a bam nga kiɗa vu ati soje ngi Timote waɗ ngi Bakidesey. A kiɗam mizli fineˀ durmuk kukur cuw, yo a tuɓam hay musuburoy le ma. A lumam gwatay ar vurumo fineˀ misi zleˀe, a wunkaka taˀtaˀ cuw, rak raka. Pal da taŋ, numuŋ, da mizli mulumam guzuvur le, mutuhu ati wudigahay, a puyukom hurnga ti midigila ati madangwasaya ta.

³¹Taŋ mihilaka gwat ngi vurum ngi mesene taŋhay ti jiviɗ naŋ na, a ra paka taŋ ar li pi taŋ mihĩˀĩ. Aram ti is ngi gwat mekelemeye nga Zeruzalem.

³²A kiɗaka madiɗa ngi sojehey misi asi Timote vagay. I mbur misi moˀore muwãˀ naŋ, a ga bonoy le haɗa da Zudeheye.

³³A Zeruzaleme, ti taŋ magaka muguzlum ngi taŋ mulumam bugawla na, a jaka mizli muɗuvaka vu da miviŋ mipal aya, joˀ a ra ɗumom ati Kalistene ar hay mupurla, joˀ a kaka taŋ ng’ar vu titiri kine. A lumam hana i migir ngi gwat malambaˀ taŋ migaka.

³⁴Nikanor, madiɗa ngi mingizla vuhoy, a so ti migi tererehey durmuk ngi hiɗika Zudehey.

³⁵A ra hirisa Zudeheye zle, amma taŋ a vusokoŋ le mbele Buymisemuŋ. A cuko zana naŋ mezle, joˀ a kil yaŋ pal naŋ nga ɓuh kaɓa mbur beke milih le. A bi jiŋ haɗa wãˀ, ko a jaka haŋ ava ta, hã a ndil a Antiyos, naɓa a ngizlaka soje naŋhaya le pay.

³⁶Yo naŋ miɓi, a sa wurka duvus ngi Romahaya ti hiɗika mizli Zeruzalemey avra tuwa na, ani wurenna, a ɓi Zudeheye, mijiniˀis taŋ ada kini ma. Zudeheye, mbur a ja haŋ avi taŋ gu ta, asimike na, a ra sipaka ɓimujuwa, mijiniˀis taŋ muvula taŋ di na.