Read South Giziga 2 Mak 9 Bible Online

2 Mak 9 - South Giziga bible

2 Mak 9

¹Ar hin tayna vuna, buy Antiyokus a mo tir vay Perse manja luma dudoko.

²A ci le ar walahay Persepolise, a titila le kaɓa ngi tuɓa, yo kaɓa ngi hila gwat ngir hay ngi Buymisemuŋ ngi diga. Amma mizli a slam himaˀ, a hilaka gwat ngi vurumoy. Antiyokus, mizli a ɓuloko di, a kil ti mesem.

³Naŋ migweˀ aciki walahay Ekbataŋ na, a cina ɓi muluma ti Nikonar ati Timote na le.

⁴Mevel a jaŋ, a pura kaɓa mizakaŋ, yo muɓulakaŋ na, a sa wurka ng’ar Zudeheye gu. A ɓa mukuro mota ngi vurum naŋ ɓa a ru di manja a cici, ɓa a kiɗa mi ngi zuɓa mulaka kutum, dambaka Buy muŋ a sla kiita le si. Ti huhumo vu naŋ, a ɓi: «Da ya misa ndil le na, i sa tiri ti Zeruzaleme zivi ngi Zudehey taˀ ar li purla.»

⁵Amma Bumbulvuŋ mapura gwat gar, Buymisemuŋ ngi Israyele, a gaŋ jiji masin ta, yo mambul ta ma. A kiɗa mingiɓi naŋ ti kiɗ aruŋ si na, gwat a zla a kwacaya, slalak naŋ anta, a jaŋ kucoˀosl kucoˀosl.

⁶Nah i gwat mijeŋŋe vur naŋ, asi a ga bonoy le da kwacay ngi mizli ti bonoy manja siney wal wal.

⁷Amma ko anta pula njurovu naŋ na ta, huhumo vu mufunaŋ gidaŋ tuwa, a ra bula vu ngi himaˀ naŋ ng’ar Zudehey, a ɓa mukuro mota ɓa a kukuro ti gidaŋ. Gurjik sina, a diɗo putukul tir mota makukur ti gidaŋ, a ngila sar ati haŋhaya pay.

⁸Wureˀani aka, Antiyokus a ra huhum, a pura vu naŋ kaɓa naŋ pal kine, kaɓa a tikaˀay da diɓel ngir mubuliye gu, yo kaɓa a wa muwã musuburoyo ti kilo gu. Wurenna, a ro ɓaˀ a ruwuy, hã a zuɓaka ti cacala. Hana i gwat mabuga gidaŋ ngi Buymisemuŋ da mizli gar.

⁹Mbur misi moˀore nah, naŋ titiri ngbaŋ, amma mumuyuŋ a hiri wenewene. Dum vu naŋ a wuraŋ njim njim, yo naŋ titiri ngbaŋ, amma useˀ ngi vu naŋ a ci bip ɓaˀ bip ɓaˀ. Vu naŋ a zĩˀĩ titititi, hã a ga didak bar bar da sojeheye ngi vunuh.

¹⁰Wureˀ ani aka, Antiyokus a pura vu naŋ kaɓa a ja haŋ avi wurzlaŋ ngi muŋhoyo gu, ani wurenna, ko mbur ngi jijir naŋ anta, asi mbur maɓusa zĩˀĩ naŋ mitititi na gu anta.

¹¹Antiyokuso, naŋ kupuyah ɓaˀa, a zla akẽh, a wuɗ pula huhumo vu naŋ na muduba, a wuɗ huhumo vu mata, Buymisemuŋ makutaŋ le ti bonoy, yo jiji maguzuvuraŋ na, a ra wulka gwat ngi gi naŋ muduba.

¹²Vu naŋ maziˀĩ titititi na, naŋ vuna ti haŋ naŋ, a ɓusa nah gu ta. Dar a ɓi: «Hina hirnga asi Buymisemuŋ na, naŋ kaslsla. Yo ka mbur titira na, a tuɓaŋ ɓa ki wa vu ɗik ati Buymisemuŋ ta.»

¹³Amma diradibiɗ ngi mbur malambaˀ nana, a dira da Buymisemuŋ masa puraŋ ircece mata.

¹⁴Antiyokus a ɓi zleˀe na: «Zeruzalem, walahay mipala , naŋ mawus vu zleˀe ɓa a fuca leɗeɗ wãˀ avra, yo ɓa a tiri di zivi ngi dika mizli jom arleˀe tuwa na, wurenna i ɓa, i walahay diymu.

¹⁵I juwa le zle a mevele, ɓa i zliɗa vagay ngi Yudehey ati ngi ziri taŋhaya da gwat muzuma vu ngi ɓuhoy ati mogodokoy, asi a ndilaka ngi dik ti dike ta. Amma wurenna, i wuɗ ɓa Yude tayna, a gam gwat ngi gi zuyo kaɓa Ateney na ya.

¹⁶Gwat ngir hay mipal ngi Buymisemuŋ, i va taŋ le gar zleˀe, wurenna i sa gaŋ wuya ti gwat ngi sedege mimezlehey. Gazlangahay mipal, mihilaka taŋ na, i sa mo taŋ gar amuŋ, hã fineˀ misi zleˀe. Yo dala ngi gi slra ngi mikuli, i sa wurka ti lum nga ya.

¹⁷Waɗ ma na, i ɓi i sa tiri mbur Zude, joˀ i sa bula li misi mizli anga gar, ɓa i til mi ti ɓi ngi gidaŋ ngi Buymisemuŋ.»

¹⁸Amma ko bonoy naŋ a kiɗ mi ta na si, asi mike na, kiita mikaslsla ngi Buymisemuŋ a ro risl ar naŋ. Buy a pura na, njaha hiri anta mata. Joˀ a tuh letir ngi tumbulo Zudehey. Mingiɓi naŋ ani:

¹⁹«Antiyokus madiɗa, yo madiɗa ngi sojeheye, a ra ja haŋ da mizli Zudeheye kuy kuy. Anja a mumulom, yo a lumam zuy.

²⁰Da ki roko zuy zuy ati ziri kumoy, yo da gwat ngi gi kumoy a ra ram ka kum mawuɗam na, i gaka sise haɗa da Buymisemuŋ, ya manjih hiri aseˀeŋ na.

²¹Ya vuna, ngi hin neˀ ani na, i ro ɓaˀ ti ɓaˀ, manja gidaŋ. Amma i ro keŋŋe ti ɓi ngi wuɗ kum a hirnga. Ti ya mimo tir vay Perse na, jiji madiɗa a kiy ɓaˀ, i ro liki. I wuɗ kpak naŋ zleˀe na, anja mizli taŋ setete.

²²Tuma vu ɗu a kiɗ mi ta, i ro hiri njah gisiŋ gisiŋ, i sa mbul tir jiji hana.

²³Amma na, i si na le. Cine ɗu, ti naŋ mawuɗ a cuh nga gi vurum ati ruwuy ngir miɗigirey na, a wuni mbur ngi sa zuma li naŋ le.

²⁴A wuɗ zleˀe na, da gwat mugurjik a gi le, malla ɓi ngi ji mevel a ndilo le kwana, mizli ngi si ruwuy naŋhay a likam ta, a sinaka, buy a vula gwat ngi si ruwuyo le asi haŋ ngi mana.

²⁵Na keɗ keɗ mana, buy madiɗa ngi ruwuy ngi midigwi ndrahaya, a ra jiɗam ndra, ɓa a lumam hin zliv ngi zla ndra ngi kiɗa vu. Vurˀe so na, mangal ɗu Antiyokuso, i sa cifa buy madiɗaŋ. Da ya mira wus vu ngi ru kini ng’ar li vay muŋ gar na, i ra buga, yo i ra ɓa ɓi naŋ da mizli haɗa a wuzla kumo. Ki sa lumaka hiri ngi letir ya mutohoŋ di na ani:

²⁶«I tumbulukum so, gwat mezlehey ya miga taŋ da mizli ho gar, waɗ da mizli wal wal na, wulkam keŋ ar taŋ, anja mbur gar a ndir ti gi mezle naŋ vur ya ati mangal ɗo.

²⁷Na zle, yi sina le, naŋ teŋteŋ haɗi, gwat ya mujuwa ngi gi ngi gi gar na, a sa ga taŋ ti sila ti sila, yo jumoˀay a sa gi kuy kuy ar wala kumo.»

²⁸Naŋ kine, mbur mikiɗa hirnga hana, maza Buymisemuŋ tuwa na, a dirba naŋ misiŋ bonoy ti vu ngi ji mukuyta wãˀ, kaɓa naŋ miga da mizli mekelemey tuwa ya na, nga naŋ a gi ti vendeke jak ma, a ra muc muc mukuy ta wãˀ a muwã, asi ruwuy mulak.

²⁹Ngama naŋ Filip a mi ti vagay naŋ nga Antiyos. Amma naŋ mazluwun ti mangal ngi Antiyokus tuwa na, a ru nga Ezipte, a ra ciki a ciki buy Ptoleme Filometor.