Read South Giziga MAT 10 Bible Online

MAT 10 - South Giziga bible

MAT 10

¹Dar Yesu a zila mizli ngi seˀe mukuruˀ nga cuwoyo, a vula taŋ gidaŋ ngi wi setenehey, ɓa a ɓulaka taŋ, ɓa a mbuloko misi jijihey ati misi bleheye gar.

²Mislin ngi Yesu mukuruˀ nga cuwoyo, slimiɗ t'ani: mudumbuŋ i Simoŋ mazilaka Piyer ati sukum naŋ Andre, Zak ati sukum naŋ Zaŋ, ziri ngi Zebedehey,

³Filip ati Bartelemi, Tomas ati Matiye mbur micikila buutu, Zak mangal ngi Alfe waɗ Tade,

⁴Simoŋ muwuɗ hirwuy naŋ ati Yudas Iskariyot masa vula Yesu ɓa a jakaŋ.

⁵Dar Yesu a slina mislin mukuruˀ nga cuwoy tuwa, a ɓa taŋ ɗaˀ ɗaˀ le: «Mizli Yudehey ta na, ki zuɓam jiviɗ ng'avi taŋ ta, ki cam ng'ar walahay ngi Samariheye ta.

⁶Zuwen aram ng'avu tumuŋ miziza ngi wuzla Israyeley.

⁷Kum maram a jiviɗ na, tilam mi, ɓam: ‹Zumabuy ngi muŋ a ndilo le gweˀe!›

⁸Mbuloko misi jijiheye, slikiɗaka mumucahaya, ɗiyaka misi kukulahaya, ɓulaka seteneheye. Ki lumaka ngataraŋ, vulaka ngatara ya.

⁹«Ɓiri tapasl tapasl malla dala, ko suloy, ki ram di a haŋ ar jiiba kumoyo ta.

¹⁰Ko ki zuɓam gabal ngi zuɓa mulak a haŋ ta. Ki ram ti zana cuw cuw ta, ko tarak, ko ganday, ki ram di a haŋ ta. Asi mbur migi slra na, sey a lum gwat ngi zumo.

¹¹Kum masa cam ng'ar walahay madiɗa malla meciɗek gar na, cufuɗam mizli, da mbur mindila le ɓa a tuɓukum na, cifam a hay naŋ hã tapas kum masa cohom.

¹²Da ki ra cam ngi hay mbur na, jam haŋ ngi haya.

¹³Da mizli ngir hay nah i mezlehey, a tuɓukum le na, anja zuy kum a ndir avu taŋ. Amma da i mezlehey ta na, anja zuy kum a mo ng'avi kum a muŋ.

¹⁴Da mizli a tuɓukum ta, yo da a cinaka mingiɓi kumo ta na, bam tir hay nah malla tir walahay nah bal ti tuko lagwada ngi vu sar kumoy avra.

¹⁵Gisiŋ, yi ɓukum na: tapas gi kiita na, a sa gaka da walahay nah ti himaˀ fineˀ ngi walahay Sodom ati Gomoro.

¹⁶«Ani i ra slinukum ka tumuŋhoy a wuzla kiriɓuhoy. Gam wer kaɓa kaway, ndiram ti mevel ngi ziri memeɗehey ka gonokoy.

¹⁷«Jam lesl vur mizli, asi a sa vulukum da migi kiitahay, a sa sliɗukum ar hay ngi dira dibiɗ taŋhay.

¹⁸A sa ram ti kum nga mbuŋ buy miwi lihey waɗ nga mbuŋ buy madiɗahay asi ɓi ɗu. Ki sa gam sedewo ɗu a mbuŋ taŋ waɗ a mbuŋ mizli Yude tahaya.

¹⁹Da a sa vulukum le asi haŋ taŋ na, ki likam: ‹I sa ɓam mbrike? Malla i sa ɓam ɓi wanaka› na, ki likam kanah ta. Ɓi kum masa ɓaka na, kisa lumaka hirak ti nah vuna si.

²⁰Asi masa ɓam i kum ta, amma i ˀUf ngi Cine kum masa ɓi a hur kumo.

²¹«Mbur a sa vula sukum naŋ a haŋ mizli ɓa a kiɗaka vagay, yo cine a sa vula zuŋ naŋ aya. Ziri a sa mbiɗam hirnga avu miyi taŋhaya, a vulaka taŋ ɓa a kiɗaka taŋ vagay vagay.

²²Mizli gar a sa hirsukum asi ya. Amma da mbur micici le zlak hã avu kiɗa mi naŋ na, a sa lih.

²³Da ara ɓulukum tir walahay numuŋ na, kilam ng'ar walahay mekelem. Gisiŋ, yi ɓukum na: Mangal ngi mbur a sa so dumbuŋ ar kum masa zliraka walahay madiɗa ngi Israyele.

²⁴Mudubun anta funa mbur madubunaŋ gwata ta. Gawla ngi mbur anta funa buy naŋ ta ya.

²⁵Mbur mudubuno, a zlir le ɓa a tiri ka mbur madubunaŋ di, yo gawla ngi mburo, a zlir le ɓa a tiri ka buy naŋ ya. Da a gam ti buy ngi haya le i Beˀelzebul na, a sa gam ti mizli ngi hay naŋhaya fineˀ nah ta jak kwa?

²⁶«Anja ki zluwunam ti taŋ ta. Gwat muɗum gar masa njik ta na, anta. Gwat miyaŋŋa gar masasinta na, anta ma.

²⁷Ɓi ya muɓukum di ar luvuŋ na, njikaka njoy wãˀ. Ɓi maɓukum di yaŋŋa a slimiɗ na, tilam di mi deŋ a balak.

²⁸Mizli makiɗaka dumvu kumoy vagay vagay, amma makiɗaka musuɗuk kumoyo gu ta na, ki zluwunam ti taŋ ta. Musuɗuk ati dumvu ngi mburo, Bumbulvuŋ a ndila le ngi ziza taŋ angi vu. Zluwunam di i naŋ jaka.

²⁹A hiɗikam ɗiyuw memeɗehey cuw sisi ta kwa? Amma ko pal asi taŋ madiɗ a ruwuy anta, sey Cine kum mupula jiviɗ nah le.

³⁰Kumo kwana, ko himac ngi hirnga kumo, a slufaka taŋ le gar.

³¹Anja ki zluwunam ta so, kum puɗaw haɗa fineˀ ɗiyuw memeɗehey gar.

³²Ko wa gar masa ɓi njah a mbuŋ mizli, naŋ i mbur ɗu na, ya kwana, yi sa ɓi njah a mbuŋ Cine ɗu misi a muŋ, yi mbur naŋ aya.

³³Amma ko wa gar masa ɓi njah a mbuŋ mizli a siniy ta na, ya kwana, yi sa ɓi njah a mbuŋ Cine ɗu misi a muŋ, yi sinaŋ ta ya.

³⁴«Ki wulkam kaɓa yi so di i zuy asi ruwuyo kwa? Ĩˀĩ, yi so di i zuy ta, amma i maslalam.

³⁵Haˀaw, yi so ɓa ngi wunkaˀay ngi cine ngi mangal ati mangal naŋ, ɓa ngi wunkaˀay ngi zuŋ ati mumuŋ naŋ, yo ngwas ngi mangal ati mumuŋ ngi zil naŋ.

³⁶Mizli ngir hay purla a sa gam mesene ar wala taŋ tehhe a muŋ.

³⁷«Mbur mawuɗ cine malla mumuŋ naŋ fineˀ ya na, a ndila ɓa a tiri mbur ɗu ta. Mbur mawuɗ mangal naŋ malla zuŋ naŋ fineˀ ya na, a ndila ɓa a tiri mbur ɗu ta.

³⁸Mbur mazuɓa dum naŋ mizlira ta, yo masipa sar ɗu ta na, a ndila ɓa a tiri mbur ɗu ta.

³⁹Mbur mawuɗ laha siifa naŋ na, a sa zizaŋ. Amma mbur miziza siifa naŋ le asi ya na, a sa luuma a muŋ.

⁴⁰«Mbur matuɓukum na, a tiɓi di i ya vuna si. Mbur matiɓiy ya kwana, a tiɓi di i mbur mislino ya.

⁴¹Mbur matiɓa mijiviɗ ngi Buymisemuŋ asi i mijiviɗ na, a sa lum migir ngi mijiviɗ vuna ya. Yo mbur matiɓa mbur mijeŋŋe asi i mbur mijeŋŋe gisiŋ na, a sa lum migir ngi mbur mijeŋŋe vuna ya.

⁴²Gisiŋ, yi ɓukum na: mizli ngi si ya hanayna, da mbur muvul yam miyaɓyaɓ le da mbur pal asi taŋ, ko ti zuŋ sikiɗ tekeɗe, asi naŋ i mbur ngi si ya na, anta sa ziza migir naŋ na ta ndiɗaˀ.»