Read South Giziga MAT 13 Bible Online

MAT 13 - South Giziga bible

MAT 13

¹Ngi pas nah na, Yesu a bi ti haya, ara cifi a miyam madiɗaŋ.

²Zigiduw haɗi a kus a cikeˀe, hã Yesu a ci palalam, a cifi ara. Zigiduw gar a cici hirkim a ˀay didik.

³Dar a ɓa taŋ ɓi haɗi, a wa taŋ di weˀ ti wi, a ɓi: «Mbur a bi nga zliɗa hilfa gwat ar guva.

⁴Ti naŋ mazliɗa na, mengeleleŋ mekelemey a ndilam a ciki jiviɗ, ɗiyuwoy a soko, a ndaka cek.

⁵Mekelemey a ndilam ar li ɗugur, hirwuy anta haɗa ar li nah ta. A pusam kutum, vur hirwuy anta jileŋ ta tuwa.

⁶Pas mijiɗo na, a wura taŋ. A muˀulom, asi dimbasl anta.

⁷Mekelemey a ndilam a wuzla hadaw. Hadaw a gil, a vuso taŋ.

⁸Amma mekelemey a ndilam ar li mezle, a gi haɗi. Mekelem a gi mengeleleŋ skat, numuŋ, kukur merkeɗ, mekeleme ma kukur makir.

⁹Mbur misi ti slimiɗ macin na, anja a cin!»

¹⁰Yesu, mizli ngi seˀehey a kirohoko ng'avaŋ, a ɓakaŋ: «Ka maɓa taŋ, ki wa taŋ ɓi nah weˀ ti wi na vur mike?»

¹¹Yesu a mbiɗa taŋ di: «Ɓi muɗum vur Zumabuy ngi muŋ na, a bugukum di le, ɓa ki sinakaŋ, amma a bigaka da mizli tayna ta.

¹²Vur mbur misi ti gwat na, a sa vulakaŋ ava ma hã fineˀ gidaŋ. Mbur manja gwat na, a sa tiɓaka mineˀ ngi si haŋ naŋ vuna ma.

¹³Vur ara puram, amma anta puram ta, ara cinam, amma anta slaka wala nah ta, a sinaka ta ma. Yi wa taŋ ɓi nah weˀ ti wi na aseˀe.

¹⁴Ɓa ɓi ngi mijiviɗ Ezayi miɓa zleˀe na, a gi avu taŋ muduba, a ɓi na: «Ki sa cinam ti cin ngataraŋ, kum anta slaka wala ngi ɓi ta. Ki sa puram ti pur ngataraŋ, kum anta puram ta.

¹⁵Asi hirnga ngi mizli tayna naŋ gidaŋ, a dislaka slimiɗeye le, a tiɗaka hiriheye le, ɓa hiri taŋ a pur ta, ɓa slimiɗ taŋ a cin ta, ɓa a slaka wala nah a mevel taŋ ta, ɓa a mbiɗaka mevel taŋ ta, vur taŋ masa moko ng'avi ya, ɓa i mbulo taŋ!»

¹⁶«Amma kumo, mumulom, asi hiri kum ara pur, yo slimiɗ kum ara cin!

¹⁷Gisiŋ, yi ɓukum na: mijiviɗey haɗi ati mizli mijeŋŋehey haɗi, a wuɗam pura gwat kum mapuraka hana le, amma a puraka ta. A wuɗam cine ɓi kum macinaka hana le, amma a cine ka ta

¹⁸«Kumo so na, cinaka mbiɗeˀvra ngi ɓi ngi mbur mizliɗa hilfa gwat ar guva tuwa so:

¹⁹Da mbur ara cin ɓi ngi Zumabuy ngi muŋ, anta sla wala nah ta na, naɓa Satan a sawa, ava ɓi midiɗ a mevele tuwa. Hilfa gwat midiɗ a ciki jiviɗ na, i nah.

²⁰Hilfa gwat midiɗ ar li ɗugur na, i mbur macin ɓi, a tiɓa kutum ti mumul.

²¹Amma dimbasl anta va ta, i mbur mazik ta si. Da ara gakaŋ bonoy, malla ara guzuvrakaŋ asi ɓi ngi Buymisemuŋ tuwa na, a pula si.

²²Hilfa gwat midiɗ a wuzla hadaw na, i mbur macin ɓi. Amma wuluk ngi duniya ati tikin ngi luuma zlili a vuso ɓi tuwa, mbak a gi mengeleleŋ mata.

²³Hilfa gwat midiɗ ar li mezle na, i mbur macin ɓi, yo masla wala nah. Dar a gi mengeleŋ, mekeleme skat, numuŋ kukur merkeɗ, mekeleme ma kukur makir.»

²⁴Yesu a wa taŋ ɓi mekelem weˀ ti wi ma, a ɓa taŋ: «Zumabuy ngi muŋ a bam vu ati ɓi ngi mbur mizliɗa hilfa gwat mezle ar guva naŋ [4]

²⁵Hirak ti mizli mahinjam na, mesene naŋ a sawa, a zliɗ birngezleŋ a wuzla alkamari tuwa, a cuh.

²⁶Ti alkamari migil, yo a pi hirnga so na, dar birngezleŋ a bugo vu aya.

²⁷Buy ngi haya, gawla naŋhay a soko, a ɓakaŋ: ‹Ka mizliɗ angi guva ɗik na, i hilfa mezle ta kwa buy? Na, birngezleŋ a bo anga ti dama maka?›

²⁸Naŋ a ɓa taŋ: ‹I mesene ɗu miga gwat hana.› Yo gawlahay a ɓakaŋ: ‹Ani, ki wuɗ ɓa i ra muɗaka avra kwa?›

²⁹A ɓa taŋ: ‹Ĩˀĩ, ki muɗaka ta, asi da ki ra muɗaka birngezleŋ na, naɓa kisa muɗaka jom ati alkamari.

³⁰Mbak taŋ a gilam jom hã avu sifi. Tapasa, i sa ɓa misli alkamiriheye: Slaka birngezleŋ naŋ ɗagay, juwaka pim pim ɓa ngi wur. Yo pikiy alkamari nga dirgwaɗa.›»

³¹Yesu a wa taŋ ɓi mekelem weˀ ti wi ma, a ɓa taŋ: «Zumabuy ngi muŋ a bam vu ati ɓi ngi zinga ngi lar ada [5] mbur muzuɓa, midika ar guva naŋ.

³²I meciɗek ngi wuzla hilfa gwatay gar. Amma da a gil le na, i madiɗa fineˀ gwat ngi luguɗo laraya gar. A tiri widis hã ɗiyuwoy a soko, a ɗiyam hay ar mihaŋ naŋhaya.»

³³Yesu a wa taŋ ɓi mekelem weˀ ti wi ma, a ɓi: «Zumabuy ngi muŋ a bam vu ati ˀis [6] ngwas mihila, milihiɗa angi hapa kilo kukur cuw nga zlum hã a slikiɗa hapa tuwa gar.»

³⁴Yesu miɓa ɓi hana gar da zigiduwo, a wa taŋ di weˀ ti wi. A ɓa taŋ ɓi manja a wa taŋ di weˀ ti wi na, anta,

³⁵ɓa ɓi ngi mijiviɗ miɓa zleˀe na, a gi muduba, a ɓi na: «I sa wuna mi ngi ɓa taŋ ɓi ɗu weˀ ti wi. Ɓi ngi gwat muɗumo zleˀe zle angi zlivirzi ngi duniya na, i sa til di mi.»

³⁶Joˀ Yesu a pula zigiduwo, aru ngi hay. Mizli ngi seˀehey a kiraham ng'avaŋ, a ɓakaŋ: «Inga biga ndra mbiɗeˀvra ngi birngezleŋ ar guva tuwa.»

³⁷Yesu a mbiɗa taŋ di: «Mbur mazliɗ hilfa gwat mezle na, i Mangal ngi mbur.

³⁸Guva i duniya. Hilfa gwat mezle i mizli ngir Zumabuy ngi muŋ. Birngezleŋ kwana, i mizli ngi Satanay.

³⁹Mesene mizliɗa birngezleŋ na, i Satan. Sifi i duniya masa kiɗ mi, misli alkamarihey i modro ngi Buymisemuŋhoy.

⁴⁰Taŋ mahilaka birngezleŋ ɓa a paka ar vu ɓa a wur na, tapas duniya masa kiɗ mi na, a sa gi kanah ya.

⁴¹Mangal ngi mbur a sa slino modro naŋhay. Mizli magam gwat ngi hizigiɗa mizli ng'ar mungra ati migi mungrahay gar na, a sa cikilaka taŋ, a sa bam taŋ avra tir Zumabuy naŋ,

⁴²a sa zliɗaka taŋ ng'ar vu matiɓi giw giw, a sa tuwam, a sa ngirɗam sliŋ anga.

⁴³Tapasa, mizli mijeŋŋehey a sa wucuɗam ka pas ar Zumabuy ngi Cine taŋ. Mbur misi ti slimiɗ macin na, anja a cin!

⁴⁴«Zumabuy ngi muŋ, a bam vu ati ɓi ngi zlili muɗumo ar guva. Mbur a luma, a ɗumo hiri nah ɗum ava ma. A mumul haɗi wãˀ, a ru, a hiɗika gwat naŋhaya cek avra, a hiɗika guva tuwa.

⁴⁵Yo Zumabuy ngi muŋ, a bam vu ati ɓi ngi mbur migi terere masipi virzle mezle.

⁴⁶Naŋ mulum virzle hirnga mipal naŋ kine tuwa na, a ru, a hiɗika gwat naŋhaya cek avra, a hiɗikaŋ.

⁴⁷«Ma na, Zumabuy ngi muŋ a bam vu ati ɓi ngi zuva maka ka ng'ar yam madiɗa, majo sukwi ngi kilifey wal wal gar.

⁴⁸Da zuva a nih le na, a ɗuɗoko di nga ay didik. A dirba nah, mizli a cifam joˀjoˀ, dar a wunaka kilif mezleheye ng'ar gadagaray, malambaˀhaya, a zliɗaka taŋ avra.

⁴⁹Tapas duniya masa kiɗ mi na, a sa gi kanah aya: modro ngi Buymisemuŋhoy a sa soko, a sa gwahaka mizli malambaˀhaya ti wuzla mizli mijeŋŋeheye,

⁵⁰yo a sa zliɗaka taŋ ng'ar vu matiɓi giw giw, a sa tuwam, a sa ngirɗam sliŋ anga.»

⁵¹Yesu a ɓa mizli ngi seˀeheye: «Ki cinaka ɓi nah le gar kwa?» A mbiɗakaŋ di: «Hĩ.»

⁵²Joˀ a ɓa taŋ: «Naŋ kine, buy ngi ɓimujuwa gar misina ɓi ngi Zumabuy ngi muŋ le na, a bam vu ati buy ngi hay mabo ti gwat nawayahay ati magalahay tir zlili naŋ.»

⁵³Ti Yesu mikiɗa mi ngi wa ɓi weˀ ti wi na, a cuh ti kẽh.

⁵⁴Naŋ mindil angi li naŋ migil anga na, a zla a dubuna gwat da mizli ngir li nah ar hay ngi dira dibiɗ taŋ, hã a zuma taŋ hirnga haɗi, dar a ɓam: «A lumo sinmijileŋ hana vuna amaka? Yo a ga cekenehey vuna mbri mbrike?

⁵⁵I mangal ngi mbur micira dum tuwa takwa? Mumuŋ a zilaka Mariya takwa? Zak, Zozef, Simoŋ waɗ Yude i sukum naŋhay takwa?

⁵⁶Sukum naŋ mongosohoyo, taŋ cek a hay ndra aka takwa? A lumo ɓi nah gar ama ska?»

⁵⁷A slaka wala nah ta hã sar a ba taŋ aseˀeŋ. Yesu a ɓa taŋ: «A zirɗaka mi ngi mijiviɗe na, sey ar li naŋ migil angaŋ, waɗ a wuzla mizli ngi hay taŋhay.

⁵⁸Yesu a gi cekene a diga haɗa ta, asi anta tiɓakaŋ a mevele ta.