Read South Giziga MAT 14 Bible Online

MAT 14 - South Giziga bible

MAT 14

¹Ti di nah na, Herod, buy miwi hirwuy Galile a cine slimiɗ ngi Yesu mazil na le.

²Joˀ a ɓa mizli naŋhaya: «Mbur nah vuna, i Zaŋ mici mizli ar yam tuwa! I naŋ mislikiɗ ti wuzla mumucahay, naŋ misi ti gidaŋ ngi gi cekenehey na vurˀe.»

³Asi mike na, mupula jiviɗ ɓa a jaka Zaŋ i Herod vuna. A juwakaŋ, a kaka ar dangay asi Herodiyad, ngwas ngi sukum naŋ Filip.

⁴Asi Zaŋ a ɓa Herodo zleˀe: «Ɓa ki zuɓa Herodiyad, ki tiri di ngwas ɗik na, a gi ta.»

⁵Herod a wuɗ kiɗ naŋ vagay so na, amma ara zluwun ti zigiduw, asi zigiduw gar a sinaka le, Zaŋ i mijiviɗi.

⁶Yo ti Herod magi muguzlum ngi yi naŋ na, zuŋ diili ngi Herodiyad a ɓuruk a mbuŋ mizli miziloko taŋ tuwa. Herod a hĩyã teˀe,

⁷hã a hudum, a ɓi ɓa gwat naŋ masa cufuɗ gar na, a sa vulaŋ di.

⁸Zuŋ tuwa, mumuŋ a paŋ mi, a ɓa Herodo: «Vuliy hirnga ngi Zaŋ mici mizli ar yam ɓaˀ ar taasa aka!»

⁹Buy Herod a hĩyã ta wãˀ, amma gar ti nah kwana, gwat zuŋ mucufuɗa na, a ɓi ɓa a vulakaŋ di, vur a hudum le a mbuŋ mizli, naŋ muzulo taŋ tuwa.

¹⁰Dar a slin ɓa ara bukoko hirnga ngi Zaŋ ar dangaya.

¹¹Joˀ a soko ti hirnga naŋ ɓaˀ ar taasa, a vulaka da zuŋ diili tuwa. Zuŋ kwana ar di da mumuŋ.

¹²Mizli ngi si Zaŋhay a soko, a zuɓaka vagay naŋ, ara dikakaŋ. A dirba nah na, ara slufaka labara nah da Yesu.

¹³Ti Yesu micina labara nah na, a ci palalam, a bi silaŋ nga ɓuh. Zigiduwo kwana, a cine le ya, mizli a bam tir walahayaya, dar a sipakaŋ ti sar.

¹⁴Ti naŋ mabo tir palalama na, a pur zigiduw haɗa. A pura taŋ geˀ irceceˀ, a ɗiya misi ble taŋhaya.

¹⁵Hiikuɗ a ji le, mizli ngi seˀehey a kirohoko ng'avaŋ, a ɓakaŋ: «Li hana i ɓuh, ani li a cuh le si. Waha zigiduwo ɓa ara hiɗikam gwat ngi zum ar walahay.

¹⁶Amma Yesu a ɓa taŋ: «Tˀanta ti may ngi ru ta. Kum vuna, vulaka taŋ gwat ngi zumo si.»

¹⁷Dar a ɓakaŋ: «Avu ndra sey ɗaf zlum ati kilif cuw tewle.»

¹⁸Yesu a ɓa taŋ: «Sikiy taŋ ng'aka.»

¹⁹A dirba naŋ miɓa zigiduw, ɓa a cifam ar giziŋ misilip silip na, a zuɓa ɗaf muzlum ati kilif mucuw tuwa, a zuɓa hiri nga muŋ, a ɗuwul mi araŋ. Joˀ a ngila ɗafahay tuwa, a vula da mizli ngi seˀeheye, ɓa a wunkaka da zigiduwo.

²⁰Taŋ gar a zumam hã a mbam. A cikilaka is naŋ mindire, gadagar caɓ caɓ kuruˀ nga cuw!

²¹Yo mizli muzumam vuna, taŋ zileye, a gam gwat ngi durmuk zlum, mbak ngwasay ati ziri le.

²²A dirba nah kutum si na, Yesu a tika ˀay da mizli ngi seˀeheye, ɓa a cam palalam, a tuwuɗam cici nga dubazaw vay mekelem.

²³A dirba naŋ muwaha zigiduw na, a jiɗ nga muwã, ɓa a dir dibiɗ silaŋ pal naŋ. Hiikuɗ a ji di, naŋ pal naŋ a diga.

²⁴Palalama naŋ zar avu ay didike, a gi metir skat mbeˀmbeˀ si. Diɓel ngi yam ara dumbusla palalama, asi burkataŋ ara gi puɗak angi taŋ.

²⁵Gweˀ ng'avi miprik na, Yesu ara ru ti sar ar yama ng'avi taŋ.

²⁶Mizli ngi seˀeheye mupuraka naŋ maru ti sar ar yam tuwa na, a muɗa taŋ membezleŋ haɗi, a ɓam: «I musuɗuk ngi mbur mumuca!» A wudam asi zluwun ara ga taŋ haɗa.

²⁷Amma ar nah vuna si na, Yesu a ɓa taŋ: «Tumom vu, ki zluwunam ta, i ya!»

²⁸Piyer a zla a ɓaŋ: «Buy, da i ka gisiŋ na, ɓiy ɗaˀ ɓa yi ru ng'avi ka ti sar tir yam vuna aya.»

²⁹Yesu a ɓaŋ: «Sawa.» Joˀ Piyer a bi tir palalama, ara ru ti sar ar yama ng'avu Yesu.

³⁰Amma naŋ mapura burkataŋ magi na, a zluwun, a zla ara ci ng'asi yam, a widi, a ɓi: «Buy, lihiy!»

³¹Ar nah vuna si na, Yesu a tilaŋ haŋ, a jo di, a ɓaŋ: «Ka mbur misi tiɓi keɗecce! Ki wuluk cuw cuw vur mike?»

³²Yo ti taŋ micam ng'ar palalama si na, burkataŋ a cici.

³³Mizli ngi seˀehey misi angi palalam tuwa a dilkam a mbuŋ naŋ, a ɓakaŋ: «Ka ki Mangal ngi Buymisemuŋ gisiŋ.»

³⁴A dirba taŋ mutuwuɗaka yama na, a ndilam angi hirwuy Zenezarete.

³⁵Mizli ngir li nah a sinaka Yesu le si, a slinam ti ɓi nah asi ruwuy taŋ keɗeɗe. Dar mizli a sakaŋ ti misi jijihey gar.

³⁶A tumbuloko Yesu anja a pula misi jiji taŋhaya, ɓa a wusakaŋ avu mi ngi zana tekeɗe kwana, muk si. Muwus naŋhay gar na, a mbulom le.