Read South Giziga MAT 15 Bible Online

MAT 15 - South Giziga bible

MAT 15

¹Akẽh na, Farisahay ati buy ngi ɓimujuwa ngi Zeruzalemey a kirohoko ng'avi Yesu, a ɓakaŋ:

²«Mizli ngi si kahay anta sipaka sirik ndra mulumoko di avu dideˀ ndraˀahaya ta na, vur mike? Asi mike na, da ara zumam gwat na, anta bunaka haŋ ceɗ le kaɓa sirik ndra ta.»

³Yesu a mbiɗa taŋ di: «Na kumo, ki ngilaka ɓimuɗuva, ɓa ki sipam sirik ngi dideˀ kumoy na vur mike?

⁴Buymisemuŋ a ɓi na: ‹Ɗuva hirnga da bunuk ati munuko›, waɗ ma na, ‹Mbur manisa cine malla mumuŋ na, sey a kiɗaka vagay.› [7]

⁵Amma kumo, ki ɓam, ko wa gar maɓa cine malla mumuŋ: ‹Gwat ya mawuɗ i jinuw zleˀe ti naŋ na, i muvula le da Bumbulvuŋ› na,

⁶naɓa naŋ anta ti may ngi ɗuva hirnga da cine mata. Naŋ kanah, ki hiryaka ɓi ngi Buymisemuŋ le, ɓa ki sipam sirik ngi dideˀ kumoy.

⁷Kum miɓi mi cuw cuwoy! Ezayi a njika ɓi nga naŋ mijiviɗe le kaslsla vur kumo, a ɓi na:

⁸«Mizli tayna a ɗuvikiy hirnga ti mi tewle, amma mevel taŋ, naŋ kileŋ avu ya.

⁹Taŋ maputukulom a mbuŋ ɗu na, i ngataraŋ, asi ɓi taŋ madubunaka da mizli, i ɓi ngi mizli ɓi micicaka si.»

¹⁰Yo Yesu a zila zigiduw, a ɓa mizli: «Cinam, yo slaka wala ngi ɓi anihĩ:

¹¹Maci ti mbur ar dili i gwat maci nga balam ta, amma maci ti mbur ar dili na, i gwat mabo ti balam jaka.»

¹²Dar mizli ngi seˀehey a kirohoko, a ɓakaŋ: «Farisahay micinaka mingiɓi ɗik na, a jam mevel le na, ki si na le ya?»

¹³Yesu a mbiɗa taŋ di: «Widis gar, da i Cine ɗu misi a muŋ mihirva ta na, a sa muɗaka avra.

¹⁴Pulaka taŋ, i dangar miɗiɗa dangar cil taŋhay. Da dangar ara ɗiɗi dangar cil naŋ na, taŋ cuw taŋ a sa ndilam ng'ar vigiɗi.»

¹⁵Piyer a zla a ɓaŋ: «Ɓi hana a bo njak wãˀ ta, inga biga ndra pulaˀavra nah takwa.»

¹⁶Yesu a ɓi: «Hã wurenna, kumo kwana, kum i manja lesley aya kwa?

¹⁷Gwat mbur maca nga mi gar na, aru nga kwacay, a dirba nah, a sa bo ng'ar vigiɗ na, ki sinaka ta kwa?

¹⁸Amma gwat mabo ti balam mbur na, a bo zle a mevele, maci ti mbur ar dili na, i nah so.

¹⁹Asi wuluk malambaˀ, kiɗa hirnga, gi madama, gi sulome, hul, sedewo ti slir, zi vu gar na, i gwat mabo zle a mevel mburu.

²⁰Maci ti mbur ar dili i naŋ. Amma zuma gwat manja buna haŋ na, anta ci ti mbur ar dili ta.»

²¹Yesu a slikiɗ baɗ akẽh, aru ng'ar hirwuy Tir ati Sidoŋ.

²²Keɗ na, ngwas Kanaˀan a so ti kẽh, a zla tila mi da Yesu, a ɓaŋ: «Aw mangal ngi Davit, puriy ircece takwa Buy! Zuŋ ɗu ani, setene a hirnga, ara gaŋ bonoy haɗi teˀe.»

²³Amma Yesu a mbiɗaŋ mi ko pal ta. Mizli ngi seˀehey a kirohoko ng'ava, a ɓakaŋ: «Ɓula ngwas hana, ɓa aru so, vur ara sipa ndra ti widi.»

²⁴Yesu a mbiɗa: «A slinoko ya ng'avu tumuŋ miziza ngi Israyeley tewle.»

²⁵Amma ngwas tuwa a so girdiˀ a mbuŋ naŋ, a ɓaŋ: «Aw Buy, jiniy!»

²⁶Yesu a mbiɗaŋ di: «Ɓa ngi zuɓa gwat ngi zum ngi ziri, ngi hiziga da ziri kirihey na, a zlir ta.»

²⁷Ngwas a ɓaŋ: «Kanah ɓula Buy, amma ko ziri kirihey vuna kwana, a zumam di i misi mi ngi buy taŋhay madiɗo nga ruwuy na takwa?»

²⁸Akẽh na, Yesu a mbiɗaŋ di: «Ngwasa, tiɓi ɗike naŋ haɗa! Anja a gi kaɓa ka mawuɗo.» Joˀ zuŋ naŋ a ɗiyi hirak ti nah vuna si.

²⁹Yesu a slikiɗ baɗ ti kẽh, aru nga mi yam madiɗa ngi Galile. A jiɗ nga muwã, a cifi a diga.

³⁰Zigiduw haɗa a so ng'ava, a soko ti jegwerey, dangaray, mumuca haŋ malla saray, mizli misi irne mingbaˀahay ati misi jiji mekelemey wal wal haɗi. A soko taŋ a mbuŋ Yesu, a ɗiya taŋ.

³¹Mizli misi irne mungbaˀahay ara ɓam calala, mumuca haŋ malla saray a ɗiyam le kuy kuy, jegwerey ara ram kuy kuy, dangaray ara puram. Zigiduw mapura taŋ gar na, hã ɓi nah a zuma taŋ hirnga haɗa. Joˀ a gaka dudok da Buymisemuŋ ngi Israyele.

³²Yesu a zila mizli ngi seˀeheye, a ɓa taŋ: «Yi pura mizli hanayna geˀ irceceˀ, ani a gam le hin makir a ciki ɗu aka, t'anta ti gwat ngi zum ta. Ɓa yi waha taŋ, a ram ti may na, i ngum ta, naɓa may a sa sla taŋ zlambar a jiviɗe.»

³³Mizli ngi seˀehey a ɓakaŋ: «Zigiduw mitaˀ hana, i sa lumoko ɗaf zliv ngi mba taŋ ama a ɓuh aka ka?»

³⁴Yesu a ɓa taŋ: «Kum ti ɗaf kite ka?» A mbiɗakaŋ di: «Tarnaˀ waɗ kilif memeɗehey ada neˀ ma.»

³⁵Dar Yesu a ɓa zigiduwo, ɓa a cifi a ruwuy.

³⁶A dirba nah na, a hila ɗaf mitarnaˀ ati kilif memeɗehey tuwa, a ga sise da Buymisemuŋ, a ngila taŋ, a vula da mizli ngi seˀeheye, joˀ taŋ kwana, a vulaka da zigiduw aya.

³⁷Taŋ gar a zumam, hã a mbam. A cikilaka is naŋ mindire gadagar caɓ caɓ tarnaˀ.

³⁸Mizli muzumama, zileye taŋ durmuk mufaɗ, mbak ngwasay ati ziri le.

³⁹A dirba Yesu muwaha zigiduwo na, a ci palalam, aru ng'ar hirwuy Magadaŋ.