Read South Giziga MAT 16 Bible Online

MAT 16 - South Giziga bible

MAT 16

¹Farisahay ati Sadukihey a kirohoko ng'avi Yesu, ɓa a cam a kwacay naŋ. A cufuɗakaŋ ɓa a ga taŋ cekene maso ti vu Buymisemuŋ.

²Amma Yesu a mbiɗa taŋ di: «Da pas a diɗ le na, ki ɓam: ‹Tiprike muŋ njoŋ, asi muŋ naŋ gagaza ciihe.›

³Ti miprike ma na, ki ɓam: ‹Dana, muŋ kuy ta, asi muŋ naŋ gagaza, ndilimme.› Gwatay magam a muŋ kanah na, ki slaka wala taŋ gu ɓula. Na, cekene ya maga taŋ angi hin dana na, ki slaka wala taŋ gu ta mbrike!

⁴Mizli malambaˀ migwenehey, migi madamahay. Ki cufuɗam cekene avu ya, amma kum anta sa lumam cekene ko pal ta, sey ngi Zonas na si.» Yesu a cuh, a pula taŋ hirkim akẽh.

⁵Mizli ngi si Yesuhoyo, ti taŋ matuwuɗam nga dubazaw mekelem na, a puyukam hirnga le ngi ru ti ɗaf a haŋ.

⁶Dar Yesu a ɓa taŋ: «Jam lesl, wam vu avu ˀis [8] ngi slikiɗa hapa ngi Farisahay ati ngi Sadukiheye.»

⁷Mizli ngi seˀehey a wulkam a mevel taŋ, a ɓam: «Asi ndra musoko ti ɗaf a haŋ ta na.»

⁸Amma Yesu a si na wuluk taŋ le, a ɓa taŋ: «Kum mizli misi tiɓi keɗeccehey, ki wulkam a mevel kumo vur kum musoko ti ɗaf a haŋ ta vur mike?

⁹Ki cinam t'aruŋ kwa? Peŋ zlum muwunkaka da mizli durmuk zlum na, mindir naŋ, ki naham di gadagar caɓ caɓ kite ka? Anta sukum ŋkeŋ a hirnga ta kwa?

¹⁰Yo ɗaf tarnaˀ muwunkaka da mizli durmuk mufaɗ na, mindir naŋ, ki naham di gadagar caɓ caɓ kite ka? Anta sukum ŋkeŋ a hirnga ta kwa?

¹¹Ya muɓukum: wam vu avu ˀis ngi slikiɗa hapa ngi Farisahay ati ngi Sadukihey na, i ɓukum di i ɓi ngi ɗaf ta na, ki cinam ta mbrike?»

¹²Joˀ a sinaka muduba, Yesu miɓa taŋ na, ɓa a wam vu avu ˀis ngi slikiɗa ɗaf kanah ta, amma ɓa a wam vu avu gwat Farisahay ati Sadukihey madubunaka da mizli.

¹³Ti Yesu mindil ar prok ngi Sezare ngi Filip na, a cufuɗa mizli ngi seˀeheye: «Mizli a ɓam mbri vur Mangal ngi mburo ka?»

¹⁴A ɓakaŋ: «Mizli mekelemey a ɓam: ki Zaŋ mici mizli ar yam. Numuŋhoyo, ki Eli. Mekelemeye ma na, ki Zeremi, malla ki mbur purla ngi si mijiviɗey.»

¹⁵Yesu a ɓa taŋ: «Na kumo, ki ɓam yi waka?»

¹⁶Simoŋ Piyer a slaŋ di: «Ki Kristu, Mangal ngi Buymisemuŋ misi ti siifa.»

¹⁷Dar Yesu a mbiɗaŋ di: «Ki ra mumul, Simoŋ mangal ngi Zonas! Asi ɓi ka miɓa na, i mbur titra mubuguw di ta, amma i Baha misi a muŋ mubuguw di.

¹⁸Ya i ra ɓuw njah Piyer: ka ki mandazlay muwã, Cikil ngi misikristuhoyo, i sa ndira ar mandazlay hana, ko gidaŋ ngi muc anta sa gaŋ gwat neˀ ta.

¹⁹I sa vuluw lakle ngi Zumabuy ngi muŋ. Gwat gar ka misa juwa ɓi nah le a ruwuyo na, a sa juwaka ɓi nah a muŋ aya. Gwat gar ka misa pusuka ɓi nah le a ruwuyo na, a sa puskaka ɓi nah a muŋ aya.»

²⁰Joˀ Yesu a buca mizli ngi seˀeheye, ɓa a ɓaka mizli, naŋ i Kristu ta wãˀ.

²¹Zle tapas nah na, Yesu a zla a biga njah da mizli ngiseˀeheye, a ɓa taŋ: «Anja yi ru nga Zeruzalem ɓa ngi si bonoy haɗi a haŋ mizli micawwahay, a haŋ madiɗa migi mikulihey ati buy ngi ɓimujuwahay, ɓa a kiɗikiy vagay, amma angi hin mimakir naŋ na, i sa slikiɗ a muŋ.»

²²Piyer a zila Yesu baˀ pal naŋ, a zla a mbiɗaŋ hirnga: «Kay, anja Buymisemuŋ a tika Buy! Anja gwat hana a gi avu ka ta wãˀ si!»

²³Amma Yesu a mbiɗa duba da Piyere, a ɓaŋ: «Kirih kileŋ avu ya, Satan! Ki ra wuɗ ɓa ki biy sar, asi wuluk ɗik i wuluk ngi Buymisemuŋ ta, amma i wuluk ngi mizli si.»

²⁴Dar Yesu a ɓa mizli ngi seˀeheye: «Da mbur a wuɗ ru le asi ya na, sey a pula wuluk vur hirnga naŋ, a zuɓa dum naŋ mizlira, a sipa sar ɗu.

²⁵Vur ko wa gar mawuɗ laha siifa naŋ na, a sa zizaŋ, amma ko wa gar maziza siifa naŋ asi ya na, a sa lumaŋ.

²⁶Da mbur a luuma gwat ngir duniya le gar, amma da a ziza siifa naŋ le aseˀe na, a lum di mike? Malla mbur a hiɗik siifa ti gwat naŋ muluma gu kwa?

²⁷Vurˀe, Mangal ngi mbur a sa sawa ati modro naŋhaya ti dudok ngi Cine. Joˀ a sa wurka mburo gar weˀe avu gwat ngi gi naŋ.

²⁸Gisiŋ, yi ɓukum na, mizli mekelemey a wuzla kum aka anta sa micam ta, sey da a puraka Mangal ngi mbur masa so ngi zuma buyo le far.»