Read South Giziga MAT 17 Bible Online

MAT 17 - South Giziga bible

MAT 17

¹Hin merkeɗ a dirba nah na, Yesu a zuɓa Piyer waɗ Zak ati sukum naŋ Zaŋ, a jiɗ ti taŋ baˀ pal taŋ nga muwã madiɗa.

²Vu ngi Yesu a mbiɗi a mbuŋ taŋ: mihiri naŋ a zla a wucuɗ ka pas, zana naŋhay a mbiɗam njazlazl njazlazl ka li minjahha.

³Akẽh na, Moyis ati Eli a bigaka taŋ vu, ara kiɗam slir ati Yesu.

⁴Joˀ Piyer a zla a ɓa Yesu: «Buy, ndra misi aka na, naŋ kuy. Da ki wuɗ le na, yi sa ɗiyi mazlaɓ makir aka, pal da ka, pal da Moyis waɗ pal da Eli.»

⁵Hirak ti naŋ maɓi aruŋ vuna si na, keɗ na, gazlavay minjazlazla a so sirta taŋ. Yo ay a cino tir gazlavay tuwa: «Mbur hana i Mangal ɗu ya mawuɗaŋ haɗa, ya hĩhĩyaŋ ɓa yi winaŋ! Cinaka mingiɓi naŋ!»

⁶Mizli ngi seˀehey micinam kanah na, zluwun a ga taŋ haɗi teˀe, a ndilam midibiɗ a ruwuy a ruwuy.

⁷Joˀ Yesu a kiroho ng'avi taŋ, a wusa taŋ, a ɓa taŋ: «Slikiɗam! Ki zluwunam ta!»

⁸A zuɓaka hiri, keɗ keɗ na, mbur mekelem anta, sey Yesu pal naŋ.

⁹Ti taŋ mapoko sar ti muwã tuwa, Yesu a ɓa taŋ ɗaˀ le: «Gwat kum mupuraka hana, ko ki ra ɓaka ɓi nah da mbur ta wãˀ, hã da Mangal ngi mbur mislikiɗ le ti wuzla mumucahay ɗagay.»

¹⁰Dar mizli ngi si Yesuhoy a cufuɗaka Yesu: «Na buy ngi ɓimujuwahay a ɓam, sey Eli a so ɗagay na, vur mike?»

¹¹Yesu a mbiɗa taŋ di: «Kanah ɓula, Eli a sa so ɗiya gwataya gar a muŋ.

¹²Amma yi ɓukum na: Eli a so le si, mizli a sinakaŋ ta, hã a gam di ka taŋ muwuɗam gar. Mangal ngi mburo kwana, a sa si bonoy asi haŋ taŋ aya.»

¹³Angi nah na, mizli ngi seˀehey a slaka wala nah le muduba, dambalaka a ɓa taŋ di i ɓi ngi Zaŋ mici mizli ar yam.

¹⁴Ti taŋ mindiloko avu zigiduwo na, mbur a girjoho ng'avu Yesu, a huruk huruk a mbuŋ naŋ,

¹⁵a ɓaŋ: «Buy, pura ircece da mangal ɗu ani, vur a diɗ kuli, ara gaŋ bonoy kuyta wãˀ. A diɗ gweˀ gweˀ ng'ar vu, malla ar yam.

¹⁶Yi ru di le zleˀe avu mizli ngi si kahaya, amma ko a ɗiyakaŋ gu ta.»

¹⁷Joˀ Yesu a zla a ɓi: «Kayya, kum mizli misi hirnga gidaŋhay! Mizli sulome malambaˀhay! I sa cifi ati kum hã ti vunaka? I sa ɓusukum hã ti vunaka? Sikiy di ng'aka!»

¹⁸Joˀ Yesu a buca setene tuwa ti gidaŋ, a bi ti vu mangala. Mangal a ɗiyi a haŋhaŋ si.

¹⁹Dar mizli ngi seˀehey a kirohoko pal taŋ ng'avi Yesu, a ɓakaŋ: «Ndr'i ɓulaka setene hana vuna gu ta vur mike?»

²⁰Yesu a ɓa taŋ: «Asi tiɓi kumo naŋ geˀ preˀe. Gisiŋ, yi ɓukum na: pas mekeleme, da kum ada ti tiɓi a mevele, ko meciɗek ka zinga ngi lar ada [9] tekeɗe kwana, da ki ɓaka muwã hana le: ‹Budugur baɗ ti ka nga digaˀ na, a sa budugur. Ko gwat masa fucukukum anta.»

²¹Amma sukwi ngi setene misi kahana na, a ɓul gu ta, sey ti dira dibiɗ ati gi dalyam far.

²²Ngi pas numuŋ, mizli ngi si Yesuhoyo micikilam gar taŋ a Galile na, Yesu a ɓa taŋ: «A sa vulaka Mangal ngi mbur asi haŋ ngi mizli.

²³A sa kiɗakaŋ vagay, amma ar hin mimakir naŋ na, a sa slikiɗi.» Taŋ micinam kahana na, a likam haɗi.

²⁴Ti taŋ mindilam a Kapernahum na, micikila buutu ngir hay ngi Bumbulvuŋ a soko ng'avi Piyere, a ɓakaŋ: «Kumani kumo, a wuruk buutu ngir hay ngi Bumbulvuŋ ta kwa?»

²⁵Piyer a ɓi: «Hĩ, ada wuruku.» Ti Piyer mindil a haya na, Yesu a zla a ɓaŋ dumbuŋ: «Simoŋ, ka ki wuluk mbrike? Mawurkaka laada malla buutu da buy madiɗa ngi si ruwuyoy i waniy ka? I ziri taŋhay kwa? Malla mulakay kwa?»

²⁶Piyer mumbiɗaŋ di, miɓaŋ: «I mulakay,» na, Yesu a ɓaŋ: «Da kine na, ziri taŋhay anta wurkam ta.

²⁷Amma anja i gaka taŋ gwat ngi ji mevel ta. Aru nga miyam madiɗa, ka kunayele. Kilif ka masa ja dumbuŋ na, ɗuɗo di, wuna mi naŋ, kisa lum suloy pal a balama. Zuɓo di ngi wurka buutu ɗu ati ngi ɗike.»