Read South Giziga MAT 18 Bible Online

MAT 18 - South Giziga bible

MAT 18

¹Hirak ti nah vuna si na, mizli ngi si Yesuhoy a kirohoko ng'avaŋ, a ɓakaŋ: «Ar Zumabuy ngi muŋ na, madiɗa mifineˀ mizli gar i waka?»

²Joˀ Yesu a zilo zuŋ meciɗek, a cica deŋ a wuzla taŋ,

³a ɓi: «Gisiŋ, yi ɓukum na: da ki mbiɗam ta, yo da ki tiram ka ziri ta na, ko kum anta sa cam ar Zumabuy ngi muŋ ta.

⁴Ko wa gar masa hina hirnga naŋ ka zuŋ meciɗek hana na, madiɗa ar Zumabuy ngi muŋ, i naŋ.

⁵Mbur matiɓa zuŋ meciɗek kahana asi ya na, a tiɓi di i ya vuna si.

⁶«Mizli mizlew hanayna matiɓikiy na, ko wa gar mahizigiɗ purla a wuzla taŋ ng'ar mungra na, zuwen taŋ majuwakaŋ ngurvuŋ madiɗa tindr'iŋ asi ay, a hizigaka ng'ar mubuliy.

⁷Duniya mahizigiɗ mizli ng'ar mungra na, kay, naŋ ar bonoy! Gwat ngi hizigiɗa mizli ng'ar mungra na, a tik ta, amma mbur mahizigiɗ mizli ng'ar mungra na, kay, naŋ ar bonoy!

⁸Da haŋ ɗik malla sar ɗik ara hizigiɗuw ng'ar mungra na, buko, hiziga kileŋ avu ka. Zuwen ka maci haŋ sluloŋ malla sar sluloŋ purla ng'ar li ngi siifa, a funa taŋ mahizigukuw ti haŋ ɗikey cuw taŋ malla ti sar ɗikey cuw taŋ ng'ar vu mamuc ta na le.

⁹Da hiri ɗik ara hizigiɗuw ng'ar mungra na, huzlugoŋ, hiziga kileŋ avu ka. Zuwen ka maci ti hiri purla ng'ar li ngi siifa, a funa taŋ mahizigukuw ti hiri ɗikey cuw taŋ ng'ar vu mamuc ta na le.

¹⁰«Jam lesl, mbur purla a wuzla mizli mizlew hanayna, anja ki puraka hiris le ta. Vurˀe, yi ɓukum na: modro mijigin taŋhay a roko dedeŋ ndrehhe a mbuŋ Cine ɗu misi a muŋ.

¹¹Vur Mangal ngi mbur a so ngi laha ko wa gar mizizi le. [10]

¹²«Ki wulkam mbrike? Da mburo, naŋ da ti tumuŋ skat, yo da purla a wuzla taŋ a zizi le na, a pula mizli ngir ngoltir nga ngoltire mbak a muwã, ɓa ara puro mipal mizizi na ta kwa?

¹³Gisiŋ, yi ɓukum na: da a luuma le na, a sa mumul aseˀe haɗa fineˀ mizli ngir ngoltir nga ngoltir mizizam ta na.

¹⁴Naŋ kine, Cine kum misi a muŋ a wuɗ ko mbur pal a zizi a wuzla mizli mizlew hanayna ta.

¹⁵«Da sukum ɗik a gi mungra le na, aru ng'avaŋ, kum cuwcuw kumo tewle, bigaŋ malambaˀ naŋ. Da a tiɓa ɓi ɗike le na, naɓa ki luuma sukum ɗike le a muŋ.

¹⁶Amma da a tiɓa ɓi ɗike ta na, wuɗ mbur pal malla mizli cuw avu ka, ɓa ɓi gar a cici asi mizli cuw malla makir migam sedewo naŋ na.

¹⁷Amma da a ngum tiɓa ɓi taŋ ta ma na, ɓa ɓi nah da Cikil ngi misikristuhoy. Da a ngum tiɓa ɓi ngi Cikil ngi misikristuhoyo ta ma na, anja ki pura kaɓa i mbur duniya malla ka micikila buutu.

¹⁸Gisiŋ, yi ɓukum na: Gwat gar kum mitikaka jiviɗ nah le a ruwuyo na, a sa tikaka a muŋ aya. Gwat gar kum mupulaka jiviɗ nah le a ruwuyo na, a sa pulaka a muŋ aya.»

¹⁹«Yi ɓukum ma na: Da mizli cuw a wuzla kumo, a ngiɓam ay le a ruwuyo, ɓa a cufuɗam ko mike gar na, Cine ɗu misi a muŋ a sa vula taŋ di.

²⁰Asi ar li mizli cuw malla makir micikilam le ti slimiɗ ɗu na, y'ada a wuzla taŋ.»

²¹Dar Piyer a girjoho ng'avi Yesu, a ɓaŋ: «Buy, da sukum ɗu a sa zluɓ ɓi le avu ya na, yi sa pula ɓi nah teˀ teˀe is kiteka? Hã is tarnaˀ kwa?»

²²Yesu a mbiɗaŋ di: «Ĩˀĩ, is tarnaˀ tew ta, amma hã is kukur tarnaˀ makaw tarnaˀ.

²³«Asi mike na, Zumabuy ngi muŋ a bam vu ati ɓi ani: Buy madiɗa ada, a wuɗ ɓa a ɗiya ɓi ngi duvus naŋ misi avu gawla naŋhay.

²⁴Ar zli virzi naŋ na, a sakaŋ ti mbur misi duvus naŋ ava miliyoŋ skata.

²⁵Mbur tuwa, gwat ngi wurka duvus nah anta ava ta. Joˀ buy a ɓi ɓa a hiɗikaka mbur tuwa avra, yo ɓa a hiɗikaka ngwas naŋ ati ziri naŋhay waɗ gwat naŋhay gar avra, ɓa ngi wurka duvus naŋ tuwa.

²⁶Gawla tuwa, a hin krap a mbuŋ buy naŋ, a tumbuloŋ, a ɓaŋ: ‹Kutukiy ɗagay, yi sa wurkuw di wãˀ.›

²⁷Buy a puraŋ ircece, a pulaŋ jom ati duvus naŋ wãˀ, a ru.

²⁸Gawla tuwa, naŋ mubo ti haya na, a zlir ti cil naŋ pal ngi wuzla cil naŋhaya, duvus naŋ ava gabal skat. A jaŋ mumburloko krop, ara ɓutoŋ, a ɓaŋ: «Wurkiy duvus ɗu tuwa way.»

²⁹Cil naŋ tuwa, a hin krap a mbuŋ naŋ, a tumbuloŋ, a ɓaŋ: ‹Kutukiy ɗagay, yisa wurkuw di.›

³⁰Amma ko naŋ a ngum ta, aru di ng'ar dangay jak, sey da naŋ muwurkaŋ duvus naŋ le.

³¹Gawla cil naŋ mekelemey mupuraka gwat migi hana na, a ga taŋ kuyta wãˀ, ara slufaka ɓi nah gar da buy taŋ.

³²Dar buy a zilo mbur tuwa, a ɓaŋ: «Gawla malambaˀ vu! Yi puluw duvus ɗike le wãˀ asi ka mutumbuliy na.

³³Anja ka kwana, ki pura ircece da cil ɗike, kaɓa ya mupuruw di na y'ayɗi?›

³⁴Buy naŋ a zuɓ himaˀ, a vulaŋ asi haŋ ngi mukuti dangayay, sey da naŋ muwurka duvus naŋ le wãˀ.

³⁵Da kum anta pulaka mungra ngi sukum kumoy ti mevel purla ta na, naɓa Cine ɗu misi a muŋ a sa gi ti kum kanah ya.»