Read South Giziga MAT 19 Bible Online

MAT 19 - South Giziga bible

MAT 19

¹Ti Yesu mikiɗa mi ngi ɓi nah na, a pula Galile, aru nga hirwuy Yude, a dubazaw Zurdeŋ.

²Zigiduw haɗa aru aseˀe, a mbul misi jijihey a diga.

³Farisahay a kirohoko ng'ava ɓa a cam a kwacay naŋ, a ɓakaŋ: «Mburo, naŋ da ti jiviɗ ngi ɓula ngwas naŋ vur ɓi ko wanaka gar kwa mbrike?»

⁴Yesu a mbiɗa taŋ di: «Zle avu zli virzi naŋ, Buymisemuŋ miga mbur na, a gi zil ati ngwas na, ki slufaka ɓi nah ɗaˀ ta kwa?

⁵Yo Buymisemuŋ vuna a ɓi ma: «Vurˀe, zil a sa pula cine ati mumuŋ naŋ, ɓa a sa jumom ati ngwas naŋ. Taŋ cuw taŋ a sa tiram dumvu purla.»

⁶Naŋ kine, t'anta cuw mata, amma i dumvu purla. Gwat Buymisemvuŋ mujumo le na, anja mbur a wunka ta!»

⁷Farisahay a ɓakaŋ: «Na, Moyis a ɓi: «Da mbur ara ɓula ngwas naŋ na, sey a vulaŋ ɗerewol mabiga a ɓula le na, vur mike?»

⁸Yesu a mbiɗa taŋ di: «Moyis a pulukum jiviɗ ngi ɓula ngwas kumoyo na, asi hirnga kumo gidaŋ haɗa. Amma angi zlivirzi naŋ na, naŋ zleˀe kanah ta.

⁹Yi ɓukum na: da mbur ara ɓula ngwas naŋ, ɓa a zuɓ mekelem na, a gi di i madama, sey da a zuɓa zleˀe kaɓa Ɓimujuwa mawuɗ ta far.»

¹⁰Joˀ mizli ngi seˀehey a ɓakaŋ: «Da ɓi ngi zil vur ngwasa, naŋ kahana na, zuwen a zuɓam vu mata si.»

¹¹Yesu a mbiɗa taŋ di: «Mizli gar anta slaka wala ngi ɓi hana ta, sey mizli Buymisemuŋ muvula taŋ di le far.

¹²Asi mike na, mizli munguɗo miyaka taŋ cak ti yi ada. Mekelemey i mizli munguɗoko taŋ ti nguɗ. Numuŋhoy anta zuɓam vu ta asi Zumabuy ngi muŋ. Mbur masla wala naŋ gu na, anja a slaŋ!»

¹³Akẽh na, mizli a soko ti ziri ng'avi Yesu ɓa a buca haŋ a hirnga taŋ ti dira dibiɗ, amma mizli ngi seˀehey a bucaka taŋ.

¹⁴Yesu a ɓi: «Pulaka ziri a soko ng'avi ya, ki tikaka taŋ ta, vur Zumabuy ngi muŋ i ngi mizli misi ka taŋ na.»

¹⁵A dirba naŋ mubuca haŋ a hirnga taŋ na, a cuh ti kẽh.

¹⁶Mbur mekelem ada, a kiroho ng'avi Yesu, a ɓaŋ: «Kumani, sey yi gi gwat mezle wana ɓa yi lum siifa ngi sete ka?»

¹⁷Yesu a ɓaŋ: «Ki cufuɗiy vur gi gwat mezle vur mike? Mbur mezle naŋ purla tewle. Da ki wuɗ le ɓa ki lum siifa na, ja ɓimujuwa a hirnga.»

¹⁸Mbur tuwa a cufuɗa Yesu: «I ɓi wanahay ka?» Yesu a mbiɗaŋ di: «Ki kiɗ hirnga ta. Ki gi madama ta. Ki hul ta. Ki gi sedewo ti slir ta.

¹⁹Ɗuva hirnga da bunuk ati munuko. Yo wuɗ mbur cil ɗike, kaɓa ka mawuɗ vu ɗik vuna na.»

²⁰Gawla tuwa a ɓaŋ: «Ɓi tayna, yi ja taŋ le a hirnga gar. Mikic avu ya i mi maka?»

²¹Yesu a ɓaŋ: «Da ki wuɗ le ɓa ɓi a kic avu ka ta na, a ru, hiɗika gwat ɗikey gar avra, vula dala nah da misi murgahay, ɓa kisa lum zlili ngi muŋ. A dirba nah, so sipiy so!»

²²Gawla tuwa micina ɓi hana na, a cuh ti ndurɓo hiri, asi zlili ava haɗa.

²³Dar Yesu a ɓa mizli ngi seˀeheye: «Gisiŋ, yi ɓukum na, naŋ tuwaˀ ɓa mbur misi zlili a ci ng'ar Zumabuy ngi muŋ.

²⁴Yi mukum hiri naŋ ava ma, zlogomo a ci kutum tir vigiɗ ngi batala fineˀ mbur misi zlili maci ng'ar Zumabuy ngi muŋ.»

²⁵Mizli ngi seˀehey micinaka ɓi hana na, a zuma taŋ hirnga teˀe, a ɓam: «Da kine na, mbur masa lih ada kwa?»

²⁶Yesu a ɗuva hiri taˀ angi taŋ, a ɓa taŋ: «Avi mizli na, a gi ta wãˀa, amma avu Buymisemuŋ, gwat gar a gi gu.»

²⁷Joˀ Piyer a ɓaŋ: «Ani, ndra i puloko gwat ndraˀahaya le gar, i supukuw le. Masa gi avu ndra i mi ska?»

²⁸Yesu a ɓa taŋ: «Gisiŋ, yi ɓukum na: Tapas gwatay gar masa mbiɗam nawayaŋ, yo tapas Mangal ngi mbur masa cifi ar janga naŋ ngi buy misi ti dudok na, kum misipi ɗuwoyo, kisa cifam ar janga ngi buy madiɗahay kuruˀ nga cuw aya, ɓa ngi gi kiita da sukwi ngi Israyel muwunuk taˀ taˀ kuruˀ nga cuw na.

²⁹Ko wa gar mupulo hay naŋ le asi ya, sukum naŋ mizilehey ati mongosohoy, cine, mumuŋ, ziri naŋhay, malla guva naŋhay na, a sa lum fineˀ tayna makaw mbeˀ mbeˀe, yo a sa lum siifa ngi sete.

³⁰Mizli mudumbuŋhoy wurenna haɗi a sa tiram ngi dirbahay, yo ngi dirbahay wurenna haɗi a sa tiram mudumbuŋhoy.