Read South Giziga MAT 2 Bible Online

MAT 2 - South Giziga bible

MAT 2

¹Ti Herod mazum buy na, a ya ka Yesu a Beteleyem, hirwuy Yude. A dirba nah, misi sinmijileŋhey a soko tisi pas ngi miprik nga Zeruzaleme.

²Dar a cufuɗam mizli: «Buy madiɗa ngi Yudehey miyaka wurenna na, naŋ amaka? I puroko bangay naŋ le zle tisi pas ngi miprike, i soko na, ɓa i dilkam a mbuŋ naŋ.»

³Herod buy madiɗa, micina labara nah na, a muɗaŋ didak le, naŋ ati mizli ngi Zeruzalemey gar.

⁴Joˀ a kuso masay madiɗa hay ati buy ngi ɓimujuwa ngi wuzla mizli naŋhaya, a cufuɗa taŋ: «A sa ya ka Mesi na zleˀe amaka?»

⁵Mizli a mbiɗakaŋ di: «A Beteleyem, hirwuy Yude, asi mijiviɗ a toho le zleˀe, a ɓi na:

⁶«Ka Beteleyem, hirwuy Yude, ki prok miwãˀ ngi wuzla walahay madiɗa ngi si ruwuy Yudeheye ta, asi buy masa jigina Israyel, mizli ɗuwoy na, a sa bo tivi ka.»

⁷Dar Herod a zilo misi sinmijileŋhey tuwa ti mi yaŋ yaŋ, a cufuɗa taŋ, ɓa a si na hin taŋ mupuraka bangay na.

⁸Joˀ a slina taŋ nga Betelyeme, a ɓa taŋ: «A ram, jikam slimiɗ kuy kuy vur mangala. Da ki lumaka le na, kisa ɓikiy di, ɓa i ra huruk huruk a mbuŋ naŋ aya.»

⁹A dirba buy miɓa taŋ kanah na, misi sinmijileŋhey a cohom, bangay taŋ mupuroko di zle tisi pas ngi miprik tuwa, ara ru a mbuŋ taŋ, hã ara cici ar li mangal misi anga na.

¹⁰Taŋ mupuraka bangaya na, a mumulom haɗi teˀe.

¹¹A cam ngi haya, a lumaka mangal ati mumuŋ naŋ Mariya. A girdaˀam, a dilkam a mbuŋ naŋ. A wunaka akoti taŋhaya, dar a vulakaŋ urdi hirnga , mukuturɓuy ngi zlum ti zlum waɗ urdi mukuturɓuy.

¹²A dirba nah, Buymisemuŋ a ɓa taŋ ɗaˀ ɗaˀ ar musuwun, ɓa a mam bal ti vu Herodo mata. Joˀ a cohom nga hirwuy taŋ tir jiviɗ mekelem.

¹³A dirba misi sinmijileŋhey mucohom na, modro ngi Bumbulvuŋ a biga vu da Zozef ar musuwun, a ɓaŋ: «Slikiɗ, zuɓa mangal ati mumuŋ, kil nga hirwuy Ezipte, cifi a diga, sey ya misa ɓuw le mawa, asi Herod a sa sipa mangala, ɓa a zizaŋ.»

¹⁴Zozef a slikiɗ, a zuɓa mangal ati mumuŋ naŋ, a cohom ngi duvuɗo nga hirwuy Ezipte.

¹⁵A cifi a diga hã Herod a mucu. A gi kahana, ɓa ɓi ngi Bumbulvuŋ mijiviɗ miɓa zleˀe na, a gi muduba, asi a ɓi na: «Yi zilo mangal ɗu ti Ezipte.»

¹⁶Herodo mupura misi sinmijileŋhey tuwa migam di jalaɓi na, a zuɓ himaˀ haɗi, a slin ɓa ara kiɗaka ziri mizile ngi Beteleyemey ati ngir prok naŋhaya cek vagay vagay, zle avu ziri gazahay hã avu ziri misi vi cuw cuwoy, weˀ avu hin misi sinmijileŋhey miɓakaŋ di tuwa.

¹⁷Ɓi ngi mijiviɗ Zeremi miɓa na, a gi le muduba:

¹⁸«A cinam ara wudam a Rama, ara tuwam, ara irslikam haɗa haɗa. I Rasel matuwuy asi ziri naŋhay. Anta ngum taˀa tuwuyo ta, asi ziri naŋhaya t'anta mata.»

¹⁹A dirba Herod mumuc so na, modro ngi Bumbulvuŋ a biga vu da Zozef ar musuwun a Ezipte,

²⁰a ɓaŋ: «Slikiɗ, zuɓa mangal ati mumuŋ, mam nga hirwuy Israyel a muŋ, asi mizli mawuɗam kiɗa mangal vagay tuwa, a micam le.»

²¹Zozef a slikiɗ, a zuɓa mangal ati mumuŋ, a mam nga hirwuy Israyel a muŋ.

²²Amma Zozef micina Arkelawus i buy madiɗa ngi si ruwuy Yude ar li ngi cine naŋ Herod na, a zluwun ngi mi nga diga. Ar nah na, Buymisemuŋ a ɓaŋ ɗaˀ le ar musuwun, ɓa a ngizli, ara cifi angi hirwuy Galile.

²³Vurˀe, a ru, ara cifi angi walahay mazilaka Nazarete. A gi kahana na, ɓa ɓi mijiviɗey miɓaka zleˀe na, a gi muduba: «A sa zilaka mbur Nazaret.»