Read South Giziga MAT 20 Bible Online

MAT 20 - South Giziga bible

MAT 20

¹«Asi mike na, Zumabuy ngi muŋ a bam vu ati ɓi ngi buy ngi hay mibi ngi miprik prik nga hila migi slrahay ng'ar guva naŋ.

²A ɗiyaka ɓi nah ati migi slraˀahaya, mbur gar na, hiipasa suloy suloy [11] Joˀ a slina taŋ ng'ar guva naŋ so.

³Ti pas ngi vula yam a pilis ma na, a bi ma, a pur mizli mekelemey deŋ deŋ ar li ngi luuma, anta gam slra ta.

⁴Buy ngi hay tuwa a ɓa taŋ: «Kumo kwana, a ram ng'ar guva ɗu aya, yi sa wurkukum kaslsla.»

⁵Dar mizli tuwa a ram. Ngi pas deŋ waɗ ngi pas ngi ɓula away ngi hay ma na, a ga kanah ma.

⁶Ngi pastaˀ wãˀ ma na, a bi, a lum mizli mekelemey deŋ deŋ lambaˀ. A ɓa taŋ: «Ki vam hiipas dedeŋ aka, ki gam slra ta vur mike»

⁷A mbiɗakaŋ di: «Asi mbur mucufuɗa ndra ngi gi slra anta.» Joˀ a ɓa taŋ: «Kumo, aram ng'ar guva ɗu aya.»

⁸Pas a diɗ le muduba, buy ngi guva a ɓa madiɗa ngi migi slra naŋhaya: «Zulo migi slraˀahaya, ɓa ki wurka taŋ migir taŋ. Zla avu mizli musoko ngi dirbahay, kisa kiɗa mi naŋ avu musoko mudumbuŋhoy.»

⁹Joˀ mizli mizlaka slra ngi pastaˀ wãˀ tuwa, a soko, mbur gar a lum gabal gabal.

¹⁰Mizli mizlaka slra dumbuŋ a soko aya, a wulkam kaɓa a sa lumam fineˀ mizli mekelemeye, amma taŋ kwana, a lumam gabal gabal vuna ya.

¹¹Ti taŋ matiɓaka migir taŋ na, ara dirɗaka buy ngi haya cici, a ɓam:

¹²«Mizli ngi dirbahay a gam slra ler purla si. Ndra, i ɓusaka slra hiipas angi pas mucõˀcõˀ, amma ki wurka taŋ rak rak ati ndra mbrike?»

¹³Buy ngi guva a mbiɗa da mbur pal a wuzla taŋ, a ɓaŋ: ‹Ngama ɗu, yi zumuw ta. I ɗiyaka ɓi nah le ati ka ɓa yi wurkuw hiipasa gabal takwa?

¹⁴Tuɓa migir ɗike, a ru. Yi wuɗ i wurka mbur muso ngi dirba rak rak ati ka.

¹⁵Jiviɗ anta ɓa yi gi ti zlili ɗu ka ya mawuɗ ta kwa? Malla ki gi suloŋ vur yi mbur mezle na kwa?›

¹⁶Naŋ kine, mizli ngi dirbahay a sa tiram mudumbuŋhoy. Mudumbuŋhoy a sa tiram ngi dirbahay.»

¹⁷Yesu ati mizli mukuruˀ nga cuwoy tuwa, taŋ migweˀ ngi ru nga Zeruzalem na, a ngica taŋ pal taŋ, ti taŋ maram a jiviɗe, a ɓa taŋ:

¹⁸«Cinam, ani i ra ram nga Zeruzalem, a sa vulaka Mangal ngi mbur asi haŋ ngi masay madiɗahay waɗ asi haŋ ngi buy ngi ɓimujuwahay, a sa gakaŋ kiita ngi muc a diga.

¹⁹A sa vulakaŋ asi haŋ ngi mizli misi i Yudehey ta, ɓa a singiram angaŋ, a sliɗakaŋ, waɗ ɓa a dirakaŋ avu dum mizlira. Yo angi hin mimakir naŋ na, a sa slikiɗ a muŋ.»

²⁰Mumuŋ ngi ziri ngi Zebedehey a kiroho ng'avi Yesu, naŋ ati ziri naŋhay, a girdiˀ a mbuŋ naŋ ɓa a cufuɗaŋ.

²¹Yesu a ɓaŋ: «Ki wuɗ mike?» Ngwas a mbiɗaŋ di: «Ar Zumabuy ɗik na, anja ki ɓa ziri ɗuwoy mucuw hanayna a sa cifam, pal tir vay hazum ɗik, pal numuŋ tir vay gula ɗiki.»

²²Yesu a mbiɗaŋ di: «Ki sinaka gwat kum macufuɗama ta. Ani, sikiɗ ngi bonoy ya masa sa vuna, ki saka gu kwa?» Taŋ a ɓakaŋ: «I saka gu.»

²³Yesu a mbiɗa taŋ di: «Ki sa saka sikiɗ ngi bonoy ɗu gisiŋ, amma cifi tir vay hazum ɗu ati tir vay gula ɗu na, i ya mavula ta. A sa vulaka da mizli Cine ɗu miɗiya vur taŋ.»

²⁴Mukuruˀ mekelemey micinam ɓi hana na, a jam mevel haɗa ar sukumuŋhoy mucuw tuwa.

²⁵Dar Yesu a zila taŋ, a ɓa taŋ: «Ki sinaka le, buy ngi sukwi ngi mizli gar ara tikakaˀay da mizli taŋhaya, mizli micawwahaya kwana, ara waka taŋ ti gidaŋ.

²⁶Anja a gi kanah a wuzla kumo ta. Da mburo wuɗ le ɓa a tiri madiɗa a wuzla kumo na, anja a tiri gawla kum jaka.

²⁷Da mbur a wuɗ le ɓa a tiri mbur ngi mbuŋ a wuzla kumo na, anja a tiri beke kum jaka.

²⁸Naŋ kanah ya, Mangal ngi mbur a so ɓa mizli a tiram gawla naŋhay ta, amma ɓa a tiri gawla taŋ jaka, ɓa a vula hirnga naŋ ngi mbiɗa hirnga ngi mizli haɗi.»

²⁹Yesu ati mizli ngi seˀehey ara bam ti Zeriko, zigiduw haɗa ara sipaŋ.

³⁰Dangaray ada joˀjoˀ cuw aciki jiviɗe. Taŋ micinam i Yesu macuh na, a zlaka a tilakaŋ mi, a ɓakaŋ: «Mangal ngi Davit, pura ndra ircece takwa Buy!»

³¹Zigiduw a buca taŋ ɓa a taˀaka mi, amma taŋ a tilam mi ti gidaŋ ma jak: «Mangal ngi Davit, pura ndra ircece takwa Buy!»

³²Yesu tuwa a cici, a zilo taŋ, a ɓa taŋ: «Ki wuɗam ɓa yi gukum mike?»

³³A ɓakaŋ: «I wuɗam ɓa hiri ndra a wun, Buy.»

³⁴Yesu a pura taŋ geˀ ircece, dar a wusa taŋ avu hiri avu hiri. Angi nah si na, a puram kweŋ kweŋ muduba, a sipakaŋ.