Read South Giziga MAT 21 Bible Online

MAT 21 - South Giziga bible

MAT 21

¹Ti taŋ migweˀ avu Zeruzaleme, a ndilam le gweˀ avu Betfage, a sar muwã tutumbur. Dar Yesu a slin mizli ngi seˀehey cuw,

²a ɓa taŋ: «A ram ng'ar walahay ngi mbuŋ kum na, madiya zungu ada, mujuwa le kaˀ waɗ zinga naŋ, kisa lumaka kutum.Puskoko di, sikiy taŋ.

³Da mbur a cufuɗukum le na, kisa ɓakaŋ: ‹I Buy mawuɗ› si na, naɓa a sa pulukum taŋ kutumo si.»

⁴A gi kahana ɓa ɓi ngi mijiviɗ miɓa na, a gi muduba. A ɓi zleˀe na:

⁵«Ɓaka zuŋ diili ngi Siyoŋ na: Pura, Buy madiɗa ɗik ara so ng'avi ka! Naŋ i mbur mihina hirnga, naŋ gilaˀ ar madiya zungu, waɗ ar zinga naŋ.»

⁶Dar mizli ngi seˀehey a ram so, a gaka ka Yesu miɓa taŋ di tuwa.

⁷A soko ti madiya zungu ati zinga naŋ tuwa, a ciyaka zana taŋhay a duba taŋhaya. Joˀ Yesu a jiɗ araŋ.

⁸Zigiduw haɗi ara ciyaka zana taŋhay a jiviɗe. Mekelemey a ngumoko mihaŋ ngi widisey, a cupaka taŋ a jiviɗe.

⁹Zigiduw maru a mbuŋ Yesu ati mekelemey masipakaŋ na, a tilam mi, a ɓam: «Mangal ngi Davit misi ti dudok! Anja Buymisemuŋ a ɗuwula mi da mbur maso ti slimiɗ naŋ! Buymisemuŋ misi a muŋ misi ti dudok!»

¹⁰Ti Yesu maci nga Zeruzalem na, a ga welele teˀ da mizli gar, a cufuɗam vu, a ɓam: «Mbur hana i wa ma ska?»

¹¹Zigiduw a mbiɗa: «I Yesu, mijiviɗ a Nazaret, hirwuy Galile.»

¹²A dirba nah na, Yesu a ci ng'ar hay ngi Bumbulvuŋ a Zeruzalem. A ɓula migi tererehey ati mihiɗika gwatay gar. Tebur ngi mimbiɗi dalahay ati janga ngi migi terere ngi ɗiyuw dirgwaɗay cek na, a putukuso taŋ gar avra.

¹³Dar a ɓa taŋ: «A tohoko na: ‹Hay ɗu a sa zilaka hay ngi dira dibiɗi.› Amma kumo, ki tiram di butum ngi muhuloy mbrike?»

¹⁴Dangaray ati jegwerey a soko ng'avi Yesu ar hay ngi Bumbulvuŋ, joˀ Yesu a ɗiya taŋ.

¹⁵Gwat ngi zuma hirngahay Yesu miga taŋ waɗ ziri matilam mi ar hay ngi Bumbulvuŋ, maɓam: «Mangal ngi Davite naŋ ti dudok» tuwa na, a ja mevel le haɗa da masay madiɗahay ati buy ngi ɓimujuwahaya.

¹⁶Joˀ a ɓaka Yesu: «Kˀada cin taŋ maɓam na ya?» Amma Yesu a mbiɗa taŋ di: «Hĩ! Na a tohoko na: ‹Ki ga ɓa ziri memeɗehey ati ziri gazahay a hunumukuw› na, ki slufaka ɓi nah ɗaˀ ta kwa?»

¹⁷Dar Yesu a pula taŋ hirkim akẽh, a bi tir walahaya, aru nga Betani, a hin wãˀ a diga.

¹⁸Ngi miprik ngi li naŋ muwun na, Yesu ara mawa ng'ar walahay, may ara jaŋ.

¹⁹A pur uruf kaˀ, gweˀ a ciki jiviɗe. A ngizli nga seˀeŋ, amma ko a lum yi ava loŋ ta, sey kalaf tewle si. Dar a ɓa urufo: «K'anta sa yi mata ndiɗaˀ wãˀ!» Uruf a muˀul sok a haŋhaŋ si.

²⁰Mizli ngiseˀeheye mupuraka na, a zuma taŋ hirnga le, a ɓam: «Uruf hana a muˀul mbri sok a haŋhaŋ si ka?»

²¹Yesu a mbiɗa taŋ di: «Gisiŋ, yi ɓukum na: da kum ada ti tiɓi, kum anta wulkam cuw cuw ta na, kisa gam di i gwat ya miga da uruf hana tew ta, amma ko ki ɓaka muwã hana le: ‹Budugur ti kẽh, ara diɗ angi mubuliy› kwana, a sa gi si.

²²Gwat kum masa cufuɗam gar ar dira dibiɗ ti tiɓi na, kisa lumakaŋ.»

²³Ti Yesu mici ng'ar hay ngi Bumbulvuŋ a Zeruzalem, yo naŋ mira dubuna gwat da mizli na, masay madiɗahay ati micawwa ngi wuzla Yudehey a soko ng'avaŋ, a cufuɗakaŋ: «Ka maga gwat tayna vuna ti gidaŋ ngi waka? Muvuluw gidaŋ nah i waka?»

²⁴Yesu a mbiɗa taŋ di: «Ya kwana, i wuɗ i cufuɗukum purla tewle si. Da ki mbiɗikiy di le na, i sa ɓukum ɓi ngi gidaŋ ya magi di gwat tayna vuna ya.

²⁵Mislino Zaŋ ngi ci mizli ar yam i waka? I Buymisemuŋ kwa, malla i mizli kwa?» Hirik a ngilam wuy ar wala taŋ kwaɗay, a ɓam: «Da i mbiɗakaŋ di le: ‹I Buymisemuŋ› mislino di na, a sa ɓa ndra: «Na, ki tiɓaka ɓi naŋ ta vur mike?»

²⁶Yo da i ɓam le: «I mizli mislinoko di» ma na, sey i zluwunam ti zigiduw maso, asi mizli gar a sinaka le, Zaŋ i mijiviɗi.»

²⁷Dar a mbiɗaka da Yesu: «I si na ka ta» Yesu kwana, a ɓa taŋ: «Ya maga gwat hana ti gidaŋ ngi waka na, yi ɓukum di ta ya.

²⁸«Ɓi ani, ki wulkam anga mbrike? Mbur ada, naŋ ti ziri cuw. Aru ng'avi mangal mudumbuŋ, a ɓaŋ: «Mangal ɗu, ara gi slra ar guva ɗu dana takwa.»

²⁹Mangal tuwa a mbiɗaŋ di: «Yi ngum ta.» Amma a dirba nah neˀ na, a mbiɗa wuluko, aru ng'ar guva tuwaŋ.

³⁰Yo mbur tuwa a ɓa mangal mucuw naŋ kanah ma. Mangal a mbiɗaŋ di: «Yi ru, baha.» Amma ko aru mata.

³¹A wuzla ziri mucuwoy na, migi gwat cine taŋ muwuɗo, i wanaka?» A mbiɗakaŋ di: «I mangal mudumbuŋ na.» Dar Yesu a ɓa taŋ: «Gisiŋ, yi ɓukum na: micikila buutuhoy ati ngwas sulomehey a sa cam dumbuŋ angi kum ng'ar Zumabuy ngi muŋ.

³²Asi mike na, Zaŋ a so avu kumo, a bugukum jiviɗ mijeŋŋe na, ki tiɓaka ɓi naŋ ta, amma i micikila buutuhoy ati ngwas sulomehey mitiɓaka ɓi naŋ jaka. Ko ti kum mupuraka kanah kwana, ki mbiɗaka mevel kumo ɓa ki tiɓaka ɓi naŋ ta na si.

³³«Cinam, y'ani wukum ɓi mekelem ani weˀ ti wi: Mbur ada, a gi guva ngi gudubun, a cup zluɓ gun hirnga naŋ, a li vigiɗ ngi ɗuco yi naŋ waɗ a ndir hay madiɗa ngi jigina guva. A pula guva tuwa asi haŋ ngi migi slrahay, a cuh nga mulak.

³⁴Hin ngi ngila yi ngi gudubun a ndila le. Buy ngi guva a slin gawla naŋhay ng'avi migi slraˀahaya, ɓa a tiɓakaŋ mi nga naŋ aya.

³⁵Amma migi slrahay tuwa a jaka gawlahaya, mbur pal mekeleme, a mbakaŋ ti kiɗ, pal numuŋ a kiɗaka vagay, mipal mekeleme ma na, a kuypakaŋ ti ɗugur.

³⁶Buy ngi guva a slin gawla mekelemey haɗi fineˀ mudumbuŋhoy ma. Amma migi slrahay a gam ti taŋ kanah ma ni.

³⁷Angi kiɗa mi naŋ na, hã mbur tuwa a slin mangal naŋ, a ɓi ti kwacay naŋ: «Ko mbri na, a sa sinaka mangal ɗu.»

³⁸Amma migi slraˀahaya mupuraka mangal naŋ tuwa, a ɓam ar wala taŋ na: «Puraka, ngi diga na, i muzuma hay vuna. Akum, kuɗukum di vagay ɓa masa zumaka haya i ndra!»

³⁹A jaka mangal tuwa, a bam di tir guva, a kiɗaka vagay.

⁴⁰«Ani, da buy ngi guva a sa so le na, a sa ga migi slra tayna mbrike?»

⁴¹A mbiɗakaŋ di: «A sa ziza mizli malambaˀvu tayna ti bonoy haɗa, a sa pula guva naŋ asi haŋ ngi migi slra mekelemey, ɓa a sa vulakaŋ yi ngi gudubuno kaslsla angi hin naŋ.»

⁴²Yesu a ɓa taŋ: «Ɓi misi ani na, ki slufaka ar Ɓimutoho ɗaˀ ta kwa? A ɓi na: ‹Ɗugur mindira hayay mihizigaka avra na, mitiri ɗugur hirnga ngi ji mivay [12], i naŋ. Hana i slra ngi Bumbulvuŋ, i gwat hirnga wãˀ avu ndra ngi pur hiri ngal ngal.›»

⁴³Yo yi ɓukum ma, Zumabuy ngi muŋ, a sa zuɓaka avu kumo, a sa vulaka da mizli masa gam gwat mizlir le kaslsla avu Zumabuy nah vuna.

⁴⁴Mbur masa diɗ ng'ar ɗugur nah na, a sa ngil. Yo da ɗugur nah a sa diɗ le ng'ar mburo na, a sa njirslaŋ.»

⁴⁵Masay madiɗahay ati Farisahay micinaka ɓi Yesu miwa weˀ ti wi hana na, a sinaka le, a ɓi na, vur taŋ.

⁴⁶Dar a puram jiviɗ ɓa a jakaŋ. Amma a zluwunam ti zigiduw, asi taŋ a sinaka le, Yesu i mijiviɗi.