Read South Giziga MAT 22 Bible Online

MAT 22 - South Giziga bible

MAT 22

¹Yesu a wa ɓi weˀ ti wi da mizli ava ma, a ɓi:

²«Zumabuy ngi muŋ a bam vu ati ɓi ani: Buy madiɗa mekelem ada, a di ɗaf madiɗa ngi vula ngwas ngi mangal naŋ.

³A slina gawla naŋhay ɓa ara ziloko mizli naŋ mizila taŋ ngi vula ngwasa, amma mizli a ngumam soko ta.

⁴A slin gawla mekelemey ma, a ɓa taŋ: A ram, ɓaka mizli ya muzulo taŋ na: «Wurenna yi ɗiya gwat ngi zumoyo le si, gusoŋ ati ginew ɗu muzlumbraˀahaya, yi kiɗa taŋ le, yi ɗiya gwataya le gar si. Soko, ɓa i vulaka ngwasa muduba so.»

⁵Amma mizli naŋ muzulo taŋ tuwa a puraka ka ɓi ta wãˀ, a cohom gwaɗ taŋ: mbur numuŋ ng'ar guva naŋ, mekeleme nga gi terere naŋ.

⁶Mizli mekelemey a jaka gawlahay tuwa, a guzuvraka taŋ, a kiɗaka taŋ vagay vagay.

⁷Buy a zla a ji mevel, a slina soje naŋhay ɓa ara kiɗaka mizli mikiɗa hirnga tayna vagay vagay, a wuraka hay taŋhaya cek.

⁸Yo a ɓa gawla naŋhaya: «Ɗaf ngi vula ngwas a di le si, amma mizli ya muzulo taŋ na, a ndilaka ɓa a zumam ta.

⁹Wurenna, aram nga jiviɗ madiɗahay, ziloko mizli kum mulumam le gar, ɓa a soko zumam ɗaf ngi vula ngwasa.»

¹⁰Joˀ gawlahay a ram nga jiviɗey tuwa, a cikiloko mizli taŋ mulumam le gar, mizli mezlehey ati malambaˀhay gar. A nahaka hay ngi vula ngwasa ɗǝŋ ɗǝŋ.

¹¹Buy a ci nga pura mizli naŋ muzulo taŋ tuwa, keɗ na, mbur mekelem akẽh, a ki di i zana ngi vula ngwas ta.

¹²Joˀ buy a ɓaŋ: «Ngama ɗu, ki co aka mbri manja zana ngi vula ngwasa ka?» Amma mbur tuwa naŋ teˀteˀe.

¹³Dar buy a ɓa gawlahaya: «Juwakaŋ saray ati haŋhaya, hizigaka ng'ar luvuŋ avra! A sa tuwuy, a sa humbuɗ sliŋ a diga.»

¹⁴«Gisiŋ, mizli mizilahaya, taŋ haɗi, amma muwunahaya, taŋ neˀkini si.»

¹⁵Dar Farisahay a kusom, a ngilam wuy ɓa a cam a kwacay Yesu, ɓa a jakaŋ ar mingiɓi naŋ.

¹⁶A slinaka mizli ngi si taŋhay ati mizli ngi si Herodoy, ara ɓaka Yesu: «Kumani, i sinaka le, ka ki ɓi ɓi mijeŋ, ki biga jiviɗ ngi Buymisemuŋ da mizli jeŋ jeŋ wãˀ gisiŋ. Ko k'anta zluwun ti mbur loŋ ta, asi ki pur di i deŋ ngi mbur ta.

¹⁷Inga ɓa ndra wuluk ɗike so: Jiviɗ ada ngi wurka buutu da buy mimadiɗa kwa, malla anta kwa?»

¹⁸Amma Yesu a si na wer taŋ le, a ɓa taŋ: «Kayya, mizli miɓi mi cuw cuwoy! Ki cam a kwacay ɗu vur mike?

¹⁹Bigikiy dala kum mawurkam di buutu vuna.» Joˀ a bigakaŋ dala purla.

²⁰Yesu a ɓa taŋ: «Foto ati slimiɗ mutohoko anga na, i ngi waka?»

²¹A mbiɗakaŋ di: «I ngi buy mimadiɗa.» Dar Yesu a ɓa taŋ: «Wurkaka gwat ngi buy mimadiɗa da buy mimadiɗa, yo gwat ngi Buymisemuŋ kwana, wurkaka da Buymisemuŋ ya.»

²²Taŋ micinaka ɓi hana na, a zuma taŋ hirnga le, joˀa pulakaŋ, a cohom.

²³Kalla tapas nah vuna, mekelemey a wuzla sadukihey a soko ng'avi Yesu. Sadukiheye, taŋ a ɓam na, mizli mumucahay anta sa slikiɗam ta. A cufuɗaka Yesu:

²⁴«Kumani, Moyis a ɓi na: «Da mbur a muc le, a pul zuŋ ta na, sey sukum naŋ a ngila ngwasa, ɓa a yi ziri da vagay sukum naŋ na.»

²⁵Na, mizli sukumuŋhoy ada zleˀe tarnaˀ a wuzla ndra. Mudumbuŋ muɗuf ngwas a mucu, ko a pul zuŋ ta, a pula ngwasa da sukum naŋ.

²⁶Mucuw taŋ a ngila ngwasa, naŋ kwana a muc, ko a pul zuŋ ta ma. A gi kanah avu mimakir taŋ ya, hã avu mitarnaˀ taŋ, a micam, ko a pulam zuŋ ta.

²⁷A dirba taŋ gar na, ngwas tuwa muc aya.

²⁸Ani so na, tapas mumucahay masa slikiɗam na, ngwas a sa ndir da wa asi taŋ ka? Asi taŋ tarnaˀ taŋ gar, a ɗuvakaŋ le.»

²⁹Yesu a mbiɗa taŋ di: «Kumo, ki ra zizam, asi ko ki sinaka Ɓimutoho ta, ko gidaŋ ngi Buymisemuŋ, ki sinaka ta ma.

³⁰Asi mike na, mizli mumucahay masa slikiɗam na, ziley ati ngwasay anta sa zuɓam vu mata, amma a sa ndiram kaɓa modrohoy a ciki Buymisemuŋ.

³¹Yo Buymisemuŋ muɓukum vur slikiɗ ngi mizli mumucahay na, ki slufaka ɓi nah ɗaˀ ta kwa?

³²«Yi Buymisemuŋ ngi Abraham, Buymisemuŋ ngi Izak, Buymisemuŋ ngi Zakop.» I Buymisemuŋ ngi mizli mumucahay ta, amma i Buymisemuŋ ngi mizli misi ti siifahay.»

³³Zigiduw micina mingiɓi naŋ cin cin na, gwat naŋ mudubuna taŋ di a zuma taŋ hirnga teˀe.

³⁴Farisahay micinaka, Yesu a guco mi le da Sadukiheye na, a kusom.

³⁵Mbur pal asi taŋ, i buy ngi ɓimujuwa, a cufuɗa Yesu, ɓa a ci a kwacay naŋ, a ɓaŋ:

³⁶«Kumani, ar Ɓimujuwa na, ɓimuɗuva madiɗa anga i wanaka?»

³⁷Yesu a mbiɗaŋ di: «Sey ki wuɗ Bumbulvuŋ ɗike, ti mevel ɗik wãˀ, ti membezleŋ ngi vu ɗik wãˀ, ti lesl ɗik wãˀ.»

³⁸Ɓimuɗuva madiɗa yo mupuɗaw i nah.

³⁹Mijingaˀ naŋ kwana, i madiɗa ma: «Sey ki wuɗ mbur cil ɗike, kaɓa ka mawuɗ vu ɗik vuna.»

⁴⁰Ɓimujuwa ngi Moyisey gar ati ɓi ngi mijiviɗey gar na, a jumom ar ɓi mucuw hanayna.»

⁴¹Yo Farisahay mukusom tuwa na, Yesu a cufuɗa taŋ:

⁴²«Ki wulkam mbri ar Kristu ka? I mangal ngi waka?» A mbiɗakaŋ di: «I mangal ngi Davit.»

⁴³Yesu a ɓa taŋ: «Na Davite, ˀUf Mipal a bigaŋ di, a zila Kristu ‹Buy› mbri mbri maka? Asi mike na, Davit a ɓi na:

⁴⁴«Bumbulvuŋ a ɓa Buy ɗu: So cifi joˀ tir vay hazum ɗu, ɓa hã yi hina mesene ɗikey asi sar ɗiki.»

⁴⁵Da Davit a zila Kristu ‹Buy› na, a sa tiri mangal naŋ mbri mbri maka?»

⁴⁶Ko mbur pal mumbiɗaŋ di gu, anta. Zle ti hin nah na, ko mbur matum vu ngi cufuɗaŋ, anta mata.