Read South Giziga MAT 23 Bible Online

MAT 23 - South Giziga bible

MAT 23

¹Akẽh na, Yesu a ɓa zigiduw ati mizli ngi seˀeheye na:

²«Buy ngi ɓimujuwahay ati Farisahaya, madubunaka mbiɗeˀvra ngi ɓimujuwa ngi Moyis da mizli, i taŋ.

³Na so na, cinaka taŋ mi, yo mingiɓi taŋ maɓukum di gar na, jaka a hirnga. Amma anja ki gaka gwat ngi gi taŋ na ta ɓula. Asi a ɓam ti mi tewle si, amma t'anta gaka gwat nah ta.

⁴A juwam gwat mududok dudokoy haɗa, a zuɓaka da mizli ar pepesl, ɓa a jijiraka taŋ di, amma taŋ vuna, ko ti muzuŋ haŋ tekeɗe kwana, anta ngumam wus naŋ ta.

⁵Gwat ngi gi taŋ gar na, a gaka ɓa mizli a puraka taŋ. A tufam layahay kurmboˀ kurmboˀ ti mingiɓi ngir ɗerewol ngi Buymisemuŋ ar taŋ, yo a jam silyãjihey ziɓ ziɓ avu mi ngi dawra taŋhaya ngi ska taŋ.

⁶Ar li zuma gwat gar na, a wuɗam sey li cifi mezlehey.Yo ar hay ngi dira dibiɗeye, a wuɗam sey li cifi ngi mbuŋhoy.

⁷A wuɗam sey mizli a jaka taŋ haŋ ar luuma, yo ɓa mizli a zilaka taŋ ‹Kumanihey.›

⁸Amma kumo, anja a zulukum ‹Kumani› ta, asi Kumani kumo, naŋ purla si, yo kumo gar i sukumuŋhoy.

⁹Anja ko ki zilam mbur ‹Baha› a ruwuy aka ta, asi Cine kumo naŋ purla si, i Cine kum misi a muŋ.

¹⁰Anja a zulukum ‹Buy› ta ma, asi Buy kumo naŋ purla si, i Kristu.

¹¹A wuzla kumo, mbur madiɗa mifineˀ kum gar na, a sa tiri gawla kum.

¹²Ko wa gar maɗuva hirnga da vu naŋ tehhe a muŋ na, a sa makaŋ nga ruwuy. Yo ko wa gar mama vu naŋ nga ruwuy kwana, a sa ɗuvakaŋ hirnga.

¹³«Kum buy ngi ɓimujuwahay ati Farisa miɓi micuw cuwoy, kay, kum ar bonoy! Asi kum matikaka mizli ɓa a cam ng'ar Zumabuy ngi muŋ ta na. Asi mike, kum vuna, kum anta cam ta ma. Na, mizli mawuɗam ci ma na, ki pulaka taŋ ɓa a cam ta ma [13] [

¹⁴«Kum buy ngi ɓimujuwahay ati Farisa miɓi mi cuw cuwoy, kay, kum ar bonoy! Kum mazumaka gwat ngi si haŋ ngi ngwas wudigahay gar, kum madiram dibiɗ hã ki zikam di haɗi ɓa mizli a purukum na, a sa gukum kiita mutuwaˀ haɗi vurˀe! [14]]

¹⁵«Kum buy ngi ɓimujuwahay ati Farisa miɓi micuw cuwoy, kay, kum ar bonoy! Ki ra bulaka li gar ti ruwuy, tir mubuliy gar ɓa ki lumam mbur pal matiɓa ɓi kumo. Yo da ki lumam le ma na, ki tiram di malambaˀ wãˀ fuk ng'ar vu, hã fineˀ kum tuwa makaw cuw ma.

¹⁶«Kum dangar miɗiɗa dangaray, kay, kum ar bonoy! Kum maɓam: «Da mbur a hudum le ti hay ngi Bumbulvuŋ na, nah i ɓi mupuɗaw ta. Amma da mbur a hudum le ti ɓiri tapasl tapasl misi ar hay ngi Bumbulvuŋ na, naɓa a jaŋ ɓula.»

¹⁷Kum gilaw, dangaray! Mufuna cala i wana asi taŋ ka? Ɓiri tapasl tapasl na kwa, malla hay ngi Bumbulvuŋ mitiri ti ɓiri nah, naŋ pal vuna na kwa?

¹⁸Ki ɓam ma na: «Da mbur a hudum le ti li gi mikuli a mbuŋ Buymisemuŋ na, anta jaŋ ta, amma da mbur a hudum le ti gwat ngi sedege, miɓaˀ ar li gi mikuli a mbuŋ Buymisemuŋ na, a jaŋ ɓula.»

¹⁹Dangaray! Mufuna cala asi taŋ i wanaka? I gwat ngi sedege na kwa, malla i li gi mikuli a mbuŋ Buymisemuŋ matiri ti gwat ngi sedege nah, naŋ pal vuna na kwa?

²⁰Mbur muhudum le ti li gi mikuli a mbuŋ Buymisemuŋ na, naɓa a hudum na ti li gi mikuli a mbuŋ Buymisemuŋ ati gwat ngi raˀahay vuna gara ma.

²¹Mbur mahudum ti hay ngi Bumbulvuŋ na, a hudum ti Hay ngi Bumbulvuŋ waɗ Buymisemuŋ misi a huroˀo vuna gara ma.

²²Mbur mahudum ti muŋ na, naɓa a hudum ti janga ngi Buymisemuŋ ati Buymisemuŋ mujoˀ ngi raˀa vuna gar.

²³«Kum buy ngi ɓimujuwahay ati Farisa miɓi micuw cuwoy, kay, kum ar bonoy! Kalaf ngi minti ati kalaf ngi luguɗo laray gar na, ki vulaka mukuruˀ taŋ ɓula. Amma jeŋŋe ati pura ircece waɗ gi teŋteŋ, ɓi madiɗa hanayna ngir ɓimujuwa na, ki kam slimiɗ ar taŋ ta. Anja ki gam di i nah zleˀe waɗ mekelemeye jak ayɗi.

²⁴Kum dangar miɗiɗa dangaray! Ki jujuroko gwat ngi si kumoyo ti kata ɓa ki jaka jijiwiɗ meciɗek avra ɓula. Na, ki ndaka zlogomo jak mbrike?

²⁵«Kum buy ngi ɓimujuwahay ati Farisa miɓi micuw cuwoy, kay, kum ar bonoy! Sikiɗ kumoy ati taasa kumoyo, ki bunaka duba taŋhaya ceɗ ceɗ ɓula, dambalaka huroˀo taŋhaya ndus ndus ti gwat muhulohoy ati may gwat kum malambaˀ na.

²⁶Ka mbur Farisa dangar! Buna huroˀ ngi sikiɗ ɗike ɗagay, ɓa kisa buna duba naŋ celele ayɗi!

²⁷Kum buy ngi ɓimujuwahay ati Farisa miɓi mi cuwcuwoy, kay, kum ar bonoy! Ki bam vu ati zivi mupuyaka taŋ burkoɗok le. Ti vra na, taŋ kuy ngi pur ɓula, amma huroˀ taŋhaya ndus ndus ti tesl ngi mizli mumucahay ati gwat mizãˀãhay gar.

²⁸Kumo, kum kanah ya. Deŋ kumo, mizli a purukum ka mizli mezlehey, amma kwacay kumoyo ndus ndus ti ɓi mi cuwcuw ati ɓi malambaˀahay.

²⁹«Kum buy ngi ɓimujuwahay ati Farisa miɓi mi cuw cuwoy, kay, kum ar bonoy! Kumo, ki ndiraka zivi ngi mijiviɗeye, yo mizli mijeŋŋehey zleˀe na, ki gaka wuya da zivi taŋhaya.

³⁰Yo ki ɓam: «Da ndr'ada zleˀe ar hin ngi dideˀ ndraˀahaya na, anja i jumom ati taŋ ɓa ngi kiɗa mijiviɗey na ta.»

³¹Naŋ kine, ki gam di i sedewo ngi hirnga kumo tehhe a muŋ si, kum i ziri ngi mizli mikiɗaka mijiviɗey vuna ngbaŋ!

³²Da kine na, slra ngi dideˀ kumoy mizlaka virzi naŋ na, aram di nga mbuŋ, ɓa ki kiɗaka mi naŋ wãˀ!

³³Kum kaway, sukwi ngi kwecesley, kisa laham tir bonoy ngi vu gu mbri mbrike?

³⁴Puraka, ya maslinukum mijiviɗey, mizli misi sin jileŋ jileŋhey ati buy ngi ɓimujuwahay na vurˀeŋ. Ki sa kiɗaka mekelemeye vagay vagay, kisa diraka numuŋhoy avu dum mizliraŋ, mekelemeye, kisa sliɗaka taŋ ar hay ngi dira dibiɗ kumoy, yo kisa ɓulaka taŋ vur walahay vur walahay gar,

³⁵ɓa pumbus ngi mizli mijeŋŋehey mipi a ruwuy gar na, a sa mbuɗo nga hirnga kum, zle avu pumbus ngi Abel, mbur mijeŋŋe, hã avu pumbus ngi Zakari, mangal ngi Baraki, kum mikiɗaka vagay ar wala ngi hay ngi Bumbulvuŋ ati li gi mikuli a mbuŋ Buymisemuŋ na.

³⁶Gisiŋ, yi ɓukum na: Pumbus ngi mizli tayna a sa mbuɗo nga hirnga mizli migwenehey!

³⁷«Kayya, Zeruzalem, Zeruzalem, ka makiɗa mijiviɗey vagay vagay, ka makuypa mizli mislinukuw taŋ na! Yi wuɗ le haɗi is mbeˀ mbeˀ, ɓa yi cikila ziri ɗikeye kaɓa kucukur mahuruk ar ziri naŋhay, amma ko ki ngumam ta.

³⁸Ani, hay kum a sa tiri diŋ.

³⁹Vurˀe, yi ɓukum na: Zle wurenna, kum anta sa purikiy mata hã tapas kum masa ɓam: «Anja Bumbulvuŋ a ɗuwula mi da mbur maso ti slimiɗ naŋ na.»