Read South Giziga MAT 24 Bible Online

MAT 24 - South Giziga bible

MAT 24

¹Yesu a bi tir hay ngi Bumbulvuŋ, ara cuh le. Mizli ngi seˀehey a kiraham ng'ava, ɓa a bigakaŋ Hay ngi Bumbulvuŋ mindiraka na.

²Yesu a sla taŋ di, a ɓa taŋ: «Hana gar na, kum ada puraka takwa? Gisiŋ, yi ɓukum na: ko ɗugur masa ndir jirngasl ar cil naŋ anta, a sa mbizlaka gar avra.»

³Yesu a cifi le a muwã tutumbur, dar mizli ngi seˀehey a kiraham baˀ pal taŋ ng'avaŋ, a ɓakaŋ: «Gwat nah gar a sa gi ti vunaka? Yo so ɗik ati kiɗa mi ngi duniya vuna, i sa sinaka avu mike? Inga ɓa ndra di.»

⁴Yesu a mbiɗa taŋ di: «Jam lesl, anja mbur a gukum gilaw ta.

⁵Asi mizli haɗi a sa soko ti slimiɗ ɗu, a sa ɓam: ‹Yi Kristu.› A sa gam gilaw da mizli haɗi.

⁶Ki sa cinam mizli maɓam ɓi ngi vurum ati hurum ngi vurumoy. Jam lesl, anja ki zluwunam ta. Mbak a gi, amma i kiɗa mi ngi duniya t'aruŋ ɓula.

⁷Asi sukwi a sa kiɗam vu ati sukwi mekelem. Buy madiɗahay cuw a sa zliram kiɗa vu ar wala taŋ. May a sa gi ar li wal wal haɗi, yo hirwuy a sa wus hiɓik hiɓik.

⁸Gwat hana gar na, a sa gi i zli virzi ngi bonoy ngi ngwas mayi.

⁹Dar mizli a sa vulukum ng'ar bonoy, a sa kuɗukum vagay vagay. Mizli duniyahay gar a sa gam mesene ti kum asi slimiɗ ɗu.

¹⁰Ti di nah na, mizli haɗi a sa pulaka tiɓi, a sa vulam vu ar wala taŋ ngi jihey, yo a sa gam mesene ar wala taŋ.

¹¹Mijiviɗ misi slirey haɗi a sa boko, a sa gam gilaw da mizli haɗi.

¹²Gi gwat malambaˀ a sa ji haɗi wãˀ, hã vendeke ngi mizli anta sa wuɗam vu wãˀ wãˀ mata.

¹³Amma mbur micici le zlak hã avu kiɗa mi naŋ na, a sa lih.

¹⁴Na Ɓimezle hana vur Zumabuy na, a sa tilam di mi ar duniya kurzluˀ gar, ɓa a gaka sedewo naŋ avu sukwi ngi mizli gar ɗagay. A dirba nah so na, i kiɗa mi ngi duniya muduba.

¹⁵«Malambaˀvu mukuy ta wãˀ, mihirya gwat, mijiviɗ Daniyel miɓa ɓi naŋ na, da kisa puraka le ar li mipal na, anja mbur maslufa ɗerewolo, a sla wala naŋ.

¹⁶Tapasa, mizli misi a Yude, anja a kilam nga muwãhay.

¹⁷Mbur misi a hirnga gbale, anja a po sar ngi zuɓa gwat misi a haya mata.

¹⁸Mbur misi ar guva, anja a mi nga dirba ɓa ngi zuɓa godo naŋ mata.

¹⁹Angi hin tayna, ngwas misi ti huroy ati misi ziri a dubahay na, kay, taŋ ar bonoy!

²⁰Diram dibiɗ ɓa hin ngi kil kum na, a gi ti hin ngi himiɗ malla ko ti hin ngi sabat ta.

²¹Asi mike na, tapasa, bonoy madiɗa a sa ndilawa. Zle avu ɗuva virzi ngi duniya hã dana na, ko bonoy migi ɗaˀ kanah anta, yo ko bonoy masa gi kanah anta ma kini.

²²Da Buymisemuŋ a juwa ngi ma hin tayna degweleˀ zleˀe ta na, anja ko mbur pal masa lih anta. Amma Buymisemuŋ a ma hin tayna degweleˀ asi mizli naŋ muwuna taŋ.

²³«Yo da mbur misa ɓukum le: «Puraka, Kristu n'anihĩ!› malla ‹Nˀani a diga› na, ko ki tiɓaka ta wãˀ.

²⁴Asi Kristu misi slirey ati mijiviɗ misi slirey a sa soko, a sa gam gwat mizli migam ɗaˀ tahay ati cekenehey haɗi, da a gi na, ɓa a zizaka mizli Buymisemuŋ muwuna taŋ na.

²⁵Ani yi ɓukum di le daf dumbuŋ.

²⁶«Da a sa ɓukum le: ‹Nˀani a ɓuh a diga› na, ko ki ram ta. Malla, ‹n'ani silaŋ pal naŋ a diga› kwana, ko ki tiɓaka ta.

²⁷Vuŋ mawucuɗo zle tisi pas ngi miprik hã asi pas ngi pastaˀa na, naŋ kine, Mangal ngi mbur kwana a sa so kanah ya.

²⁸Ar li misi maara ara na, mogodokoy a sa cikilam a diga.

²⁹«Neˀ a dirba bonoy ngi hin tayna tuwa na, pas a sa tiri luvuŋ, kiya anta sa pusluɗ mata, wurzlahay a sa diɗoko paɗ ti muŋ, gwat madiɗa ngi muŋhoy, a sa jijikam.

³⁰Dar gwat mabiga Mangal ngi mburo, a sa bugo vu a muŋ. Sukwi ngi mizli ngi si ruwuyoy gar a sa tuwam, a sa puraka Mangal ngi mbur masa sawa, ar gazlavay a muŋ ti gidaŋ waɗ ti dudok naŋ gar.

³¹Yo a sa slina modro naŋhay misi a muŋ, ɓa a faka tulum a mivay ngi ruwuy mufaɗ taŋ gar. A sa kusoko mizli naŋ muwuna taŋ angi duniya kuɗgulum gar.

³²«Slaka wala ngi ɓi ani avu urufu: da mihaŋ naŋhay a zlaka le ara gam liɓuw liɓuw, yo ara ɗiɗam na, ki sinaka le, mohoro naŋ gweˀe.

³³Naŋ kine, kumo kwana, da kisa puraka gwat tayna le gar ara gam na, sinaka sin le, Mangal ngi mburo naŋ gweˀ, a dungufo le si.

³⁴Gisiŋ, yi ɓukum na: gwat hana gar a sa gi mur mizli migwenehey.

³⁵Muŋ ati hirwuy a sa susuymom, amma mingiɓi ɗu anta sa susuyum ta ndiɗaˀ.

³⁶«Amma hin naŋ malla pas naŋ na, ko mbur misina anta, ko modro ngi muŋhoy, ko Mangal, sey Cine pal naŋ tewle misina.

³⁷Gwat migi zleˀe ti hin ngi Nowe na, so ngi Mangal ngi mbur kwana, a sa gi kanah ya.

³⁸Asi mike na, dumbuŋ angi mekepel madiɗa muzuɓ na, mizli ara zumam, ara sam, ara ɗuvam vu, ara vulam ziri ngi hay ziley, hã a ndila hin ngi Nowe mici ng'ar palalama.

³⁹Ko mizli a sinaka neˀ le ta, hã mekepel madiɗa a sawa, a kil taŋ ceke. So ngi Mangal ngi mbur kwana, a sa gi kanah ya.

⁴⁰Tapasa, mizli cuw ar guva: a sa zuɓaka mekeleme, a sa pulaka numuŋ.

⁴¹Yo ngwasay cuw ar li yiˀi: a sa zuɓaka mekeleme, a sa pulaka numuŋ.

⁴²Anja ki hinjam ta so, asi ki sinaka hin ngi Buy kum masa sawa ta.

⁴³Ki sinaka le, da buy ngi hay a si na le, muhul masa so ti duvuɗ na ti pas kahana na, a hinje ta wãˀ, a pula ɓa a slinakaŋ dalama ta.

⁴⁴Vurˀe, kumo kwana, juwam vu, asi Mangal ngi mbur a sa sawa angi pas kum mawulkam anga ta ya.

⁴⁵«Gawla miteŋteŋ misi lesl i wana ska? I mbur, buy ngi hay mupulaŋ mizli ngi hay naŋhay asi haŋ naŋ, ɓa a vula taŋ gwat ngi zumo kasl kasl angi pas taŋ muwuɗam le.

⁴⁶Da buy naŋ a so luuma le, ara ga na, a mumul!

⁴⁷Gisiŋ, yi ɓukum na: buy naŋ a sa pula zlili naŋ gar asi haŋ naŋ.

⁴⁸Amma da gawla nah i malambaˀa, a wuluk a kwacay naŋ, a ɓi: ‹Ani, buy ɗu a mur le, a so ta›,

⁴⁹a zla a kiɗa cil naŋhaya, aru ti zum waɗ tisi gwat ati mizli muwam le.

⁵⁰Da buy naŋ a sa ndilo le angi hin naŋ makutuko ta, yo angi pas naŋ misina ta na,

⁵¹a sa ɓulaŋ avra, a sa zum dangay misi purla ati mizli miɓi mi cuw cuwoy, a sa tuwuy, a sa humbuɗ sliŋ.