Read South Giziga MAT 25 Bible Online

MAT 25 - South Giziga bible

MAT 25

¹«Yo Zumabuy ngi muŋ a sa gi kaɓa ɓi ngi ziri diilihey kuruˀu, muzuɓaka lampe taŋhay, mibam nga ji hirnga ti zil muzuɓ taŋ.

²Diyli zlum ar wala taŋ i gilaway, muzlum mekelemey i werey.

³Gilaw muzlumoy tuwa muzuɓaka lampe taŋhaya na, a wam vu ti mal ar gojogoɗ mekeleley ta.

⁴Amma diili wer muzlumoy na, a zuɓaka lampe taŋhaya waɗ mal ar gojogoɗ mekelemey a haŋ.

⁵Zil tuwa a so kutum ta, hinje ara ga taŋ cek, a hinjam.

⁶Ngi wuzla duvuɗ na, mbur a til mi: ‹Zil a ndilo le, bam, ara jam di hirnga!›

⁷Joˀ diilihey tuwa a puɗukam cek, a ɗiyaka lampe taŋhaya.

⁸Diyli gilaway tuwa a ɓaka diili wereye: ‹Inga vulam ndra mal neˀ neˀ avu ngi kumoy na ya takwa, vur lampe ndrahay ara micam.›

⁹Diyli misi werey a mbiɗaka taŋ di: ‹Kanah ta, asi mal anta haɗa ɓa a tisla ndra gar ati kumo ta. Zuwen ara hiɗikam ngi kumo avu migi tererehey.›

¹⁰Diyli gilawaya, ti taŋ maram nga hiɗika mal tuwa na, zil a ndilawa. Diyli werey muwam vu tuwa, a cam ng'ar hay ngi vula ngwasa jom ati zil tuwa. A gicaka mizlingre.

¹¹A dirba nah na, diili gilaway tuwa a ndiloko aya, a ɓam: ‹Buy, Buy, inga wuna ndra mizlingre takwa!›

¹²Amma zil a mbiɗa taŋ di: ‹Gisiŋ, yi ɓukum na, ko yi sinukum ta.›

¹³Joˀ Yesu a ɓi ma: «Anja ki hinjam ta so, asi ki sinaka hin ati pas ngi so naŋ ta.»

¹⁴«Naŋ kine, ɓi ngi Zumabuy ngi muŋ a sa gi kaɓa mbur mawuɗ ru nga mulak. A zilo gawla naŋhay, a pula zlili naŋ asi haŋ taŋ.

¹⁵A vula miliyoŋ zlum da mbur mudumbuŋ, miliyoŋ cuw da mbur numuŋ waɗ miliyoŋ pal da mekeleme ma. A vula da mburo gar avu gidaŋ naŋ. Joˀ a ru.

¹⁶Gawla mulum miliyoŋ zlum tuwa, a ru, a mbiɗi di haŋ kutum, a lum yam naŋ miliyoŋ zlum ma.

¹⁷Mbur mulum miliyoŋ cuw na kwana, a gi di kanah ya, a lum yam naŋ miliyoŋ cuw ma.

¹⁸Amma gawla mulum miliyoŋ pal na, ara li vigiɗ, a ɗumo dala ngi buy naŋ tuwa ɗum anga.

¹⁹«A zikam, a dirba nah, buy ngi gawlahay tuwa a ndilawa. Dar a zla ɓa a slufakaŋ ɓi ngi zlili naŋ, taŋ migam di tuwa.

²⁰Gawla mulum miliyoŋ zlum tuwa a kirahawa, a bigaŋ miliyoŋ zlum mekelem ma, a ɓaŋ: ‹Kumani, ki vuliy zleˀe miliyoŋ zlum. Ani yi lum le anga ti slra ɗu miliyoŋ zlum mekelem ma.›

²¹Buy naŋ a ɓaŋ: ‹Naŋ kuy, gawla mezle miteŋteŋ, ki gi teŋteŋ le ti gwat neˀkini. I sa puluw gwatay haɗi asi haŋ ɗike. Sawa i mumulom bumoˀ ati ya buy ɗike.›

²²Gawla mulum miliyoŋ cuw na kwana, a kirahawa, a ɓaŋ: ‹Kumani, ki vuliy miliyoŋ cuw zleˀe, ani yi lum le anga ti slra ɗu miliyoŋ cuw mekelem ma.›

²³Buy naŋ a ɓaŋ: ‹Naŋ kuy, gawla mezle miteŋteŋ, ki giteŋteŋ le ti gwat mineˀkini. I sa puluw gwatay haɗi asi haŋ ɗike. Sawa i mumulom bumoˀ ati ya kumani ɗike.›

²⁴Gawla mulum miliyoŋ pal zleˀe na kwana, a kirahawa ya, a ɓaŋ: ‹Kumani, yi si na le, ki mbur mutuwaˀa. Ki gi sifi ngi gwat ar li ka mizliga ta, yo ki kus gwat ngi migam ar li ka mizliɗa hilfa naŋ ta.

²⁵Zluwun a giy le, vurˀe, yi ru, i ra ɗumo dala ɗike ɗum a ruwuy. Pura, zlili ɗike n'ani.›

²⁶Amma kumani naŋ a mbiɗaŋ di: ‹Kay, ki gawla masafaya malambaˀvu! Ki si na le, yi gi sifi ngi gwat ar li ya mizliga ta, yo yi kus gwat ngi migam ar li ya mizliɗa hilfa naŋ ta ngbaŋ.

²⁷Anja ki pa dala ɗu zleˀe angi baŋke ayɗi. Ya mumo ani na, anja yi hila ti yam anga.›

²⁸Dar kumani naŋ tuwa a ɓi: ‹Tuɓaka dala naŋ, vulaka da mbur misi miliyoŋ kuruˀ na.

²⁹Asi ko wa gar misi ti gwat na, a sa vulakaŋ ava ma, hã a sa tiri i mbur misi gwat haɗa. Amma mbur manja gwata, ko gwat naŋ mineˀ vuna, a sa tiɓakaŋ.

³⁰Amma gawla masafaya malambaˀvu hana, hizigaka ng'ar luvuŋ avra. A sa tuwuy, a sa humbuɗ sliŋ a diga.»

³¹«Tapas Mangal ngi mbur masa sawa ar dudok naŋ ati modrohoy aseˀe na, a sa cifi ar janga naŋ ngi zumabuy ti dudoko.

³²Sukwi ngi mizli gar a sa kusom nga mbuŋ naŋ. Dar a sa gwaha mizli ti wuzla mekelemeye, kaɓa mijigin magwaha tumuŋhoy ti vu away.

³³A sa pa tumuŋhoyo tir vay hazum, awaya kwana, tir vay gula.

³⁴Joˀ buy a sa ɓa mizli ngir vay hazum naŋhay tuwa: ‹Kum mizli Baha muɗuwulukum mi, soko, zumam buy, Buymisemuŋ miɗiya vur kum zle ti naŋ muɗuva virzi ngi duniya.

³⁵Asi may a jiy na, ki vulikiy gwat ngi zum le. Yam a giy na, ki vulikiy gwat ngi si le. Yi ru mulak na, ki tiɓikiy mulaka le.

³⁶Ya gulndiŋ kine, ki kikiy zana le. Ya gu ta, ki soko le jinikiy. Ya ar dangay, ki soko le purikiy.›

³⁷Dar mizli mijeŋŋehey a sa mbiɗakaŋ di: ‹Buy, i purukuw ngi vuna zleˀe, may a juw, i vulukuw gwat ngi zum na ka? Yam a guw, i vulukuw gwat ngi si na ka?

³⁸I purukuw ngi vuna zleˀe, ki mulak, i tuɓukuw mulaka na ka? Ka gulndiŋ kine, i kukuw zana na ka?

³⁹I purukuw ngi vuna zleˀe, ka gu ta, malla ka ar dangay, i ram nga pur ɗike na ka?›

⁴⁰Joˀ Buy a sa mbiɗa taŋ di: «Gisiŋ, yi ɓukum na: gwat kum migaka le, ko ngi vunaka gar da mbur pal a wuzla sukum ɗu mizlew muwãˀ tayna na, kite ki gikiy di da ya vuna si.›

⁴¹«A dirba nah na, Buy a sa ɓa mizli ngir vay gula naŋhaya: ‹Kum mizli minisahay, kiraham kileŋ avu ya ng'ar vu ngi sete, miɗiya vur Satan ati modro naŋhay!

⁴²Asi zleˀe, may a jiy na, ko ki vulikiy gwat ngi zum ta. Yam a giy na, ki vulikiy gwat ngi si ta.

⁴³Yi ru mulak na, ki tiɓikiy mulaka ta. Ya gulndiŋ kine, ko ki kikiy zana avu vu ta. Ya gu ta, yo ya ar dangay, ki ram a purikiy ta.›

⁴⁴Dar a sa mbiɗakaŋ di: ‹Buy, i purukuw ngi vuna zleˀe, may a juw, yam a guw, ki mulak, ka gulndiŋ kine, ka gu ta malla ka ar dangay, ɓa i jinukuw ta na ka?›

⁴⁵Dar buy a sa mbiɗa taŋ di: ‹Gisiŋ, yi ɓukum na: Ko ngivunaka gar, gwat kum mungumam gi naŋ ta da mbur pal a wuzla sukum ɗu mizlew muwãˀ tayna na, kite ki gaka ta da ya vuna si.›

⁴⁶Joˀ taŋ a sa ram ng'ar li ngi bonoy ngi sete, yo mizli mijeŋŋeheye, ng'ar li ngi siifa ngi sete.»