Read South Giziga MAT 26 Bible Online

MAT 26 - South Giziga bible

MAT 26

¹Ti Yesu mikiɗa mi ngi dubuna gwat gar da mizli na, a ɓa mizli ngi seˀeheye: «Ki sinaka le, a ndir hin cuw ɓa muguzlum Pak a gi.

²A sa vulaka Mangal ngi mburo, ɓa a diraka avu dum mizliraŋ.»

³Akẽh na, masay madiɗahay ati micawwa ngi Yudehey a kusom a hay Kayif, masay madiɗa migi mikulihey a mbuŋ Buymisemuŋ.

⁴A ngiɓamˀay ar wala taŋ, ɓa a jaka Yesu ti wer, ɓa a kiɗaka vagay.

⁵A ɓam: «Anja i jaka tapas muguzlum ta ɓula, vur mizli masa slikiɗam ɓi.»

⁶Ti Yesu misi a Betani a hay Simoŋ misi kukula na,

⁷ngwas ada, a kirahawa ng'avi Yesu ti gojogoɗ ngi ɗugur marava, mbaf ti urdi misi cikili naŋ haɗi. Ti Yesu mazum gwat na, a paŋ di a hirnga.

⁸Mizli ngi seˀehey mupuraka na, a jam mevel, a ɓam: «A hiryaka gwata ngatara kahana mbrike?

⁹A hiɗik dala haɗa, anja a hiɗikaka avra zleˀe, ɓa a vulaka dala naŋ da misi murgahay takwa!»

¹⁰Yesu a si na wuluk taŋ le, a ɓa taŋ: «Ki giraka ngwas asi mike? Naŋ migiy di hana i gwat mezleŋ.

¹¹Asi mike na, misi murgahaya, t'ada ndrehhe ati kumo. Amma ya, y'anta i sa ndir ndrehhe ati kumo ta.

¹²Naŋ mipiy urdi hana avu vu na, a ɗiyiy ti ɗiy ng'ar vigiɗi.

¹³Gisiŋ, yi ɓukum na: Taŋ masa tilam mi ti Ɓimezle hana ar duniya kurzluˀ gar na, a sa ɓaka ɓi ngi gwat ngwas miga hana, a sa wulkam angaŋ.»

¹⁴Dar mbur mazilaka Yudas Iskariyot, mbur ngi wuzla mizli mukuruˀ nga cuwoyo, aru nga luuma masay madiɗa migi mikulihey.

¹⁵A ɓa taŋ: «Da yi vulukum Yesu vuna le na, kisa vulikiy mike?» Joˀ a slufakaŋ suloy kukur makir [15]

¹⁶Zle tapasa, Yudas a ga wer ngi vula taŋ Yesu ɓa a jaka ti tuwaˀ ta.

¹⁷Hin mudumbuŋ ngi muguzlum ngi zuma ɗaf manja is [16] ara na, mizli ngi si Yesuhoy a soko, a cufuɗakaŋ: «Ki wuɗ ɓa i ra ɗiyukuw gwat ngi zum ngi muguzlum Pak amaka?»

¹⁸Yesu a ɓa taŋ: «A ram ng'ar walahay, a hay mbur ada, ɓakaŋ na: «Kumani a ɓi na: Pas ɗu gweˀe, yi sa ga muguzlum ngi Pak ati mizli ngi si yahay a hay ɗiki.»

¹⁹Mizli ngi seˀehey a ram, a gaka ka Yesu miɓa taŋ di, a ɗiyaka gwat ngi zum ngi muguzlum Paka.

²⁰Ngi hiikuɗo, Yesu ara zumam ɗaf ati mizli mukuruˀ nga cuwoyo.

²¹Ti taŋ mazumam na, Yesu a ɓi: «Gisiŋ, yi ɓukum na, masa vuliy ɓa a jikiy na, i mbur pal a wuzla kumo.»

²²Ɓi hana a muɗa taŋ didak haɗa, mbur gar a zla a cufuɗaŋ: «I ya kwa Buy? I ya kwa Buy?»

²³Yesu a mbiɗa taŋ di: «Masa vuliy ɓa a jikiy na, i mbur mica haŋ ng'ar sikiɗ ati ya na.

²⁴Mangal ngi mbur a sa muc kaɓa mutohoko ɓi naŋ zleˀe. Amma mbur masa vula Mangal ngi mburo ɓa a jakaŋ na, kay, naŋ ar bonoy! Anja zuwen taŋ miyaka zleˀe ta!›

²⁵Yudas, mbur masa vulaŋ ɓa a jakaŋ tuwa, a slaŋ di, a ɓaŋ: «I ya kwa Kumani?» Yesu a mbiɗaŋ di: «Ki ɓa le!»

²⁶Ti taŋ mira zumam ɗaf na, Yesu a zuɓa ɗaf, a ga sise da Buymisemuŋ, a dirba nah, a ngila, a vula da mizli ngi seˀeheye, a ɓa taŋ: «Ani, tiɓaka, zumaka, hana i dumvu ɗu.»

²⁷A dirba nah, a zuɓa sikiɗ misi ti mbaazla, a ga sise da Buymismuŋ, a vula taŋ di, a ɓa taŋ: «Saka gar kumo.

²⁸Asi hana i pumbus ɗu, pumbus ngi jumoˀay, a pi ɓa ngi buna mungra ngi zigiduw haɗi.

²⁹Yi ɓukum na: zle dana, y'anta sa si mbaazla hana mata wãˀ, hã tapas ya masa si nawaya ati kum angi Zumabuy ngi Baha.»

³⁰Joˀ a zlam dimis ngi muguzlum, a dirba nah, a bam ɓa a ram nga Muwã tutumbur.

³¹Akẽh na, Yesu a ɓa mizli ngi seˀeheye: «Angi duvuɗ dana vuna si, kum gar, kisa pulikiy. Asi mike na, Ɓimutoho a ɓi: «I sa kiɗa mijigine, tumuŋ ngir gezleŋhey a sa zliɗam hirnga.»

³²Amma ya misa slikiɗ le na, yi sa ru dumbuŋ ar kum nga Galile.»

³³Piyer a slaŋ di, a ɓaŋ: «Da ko mizli gar a pulukuw le kwana, ya, y'anta sa puluw ta ndiɗaˀ.»

³⁴Yesu a ɓaŋ: «Gisiŋ, yi ɓuw na: angi duvuɗ dana vuna si, ɓa hã kucukur a sa ji ay na, naɓa ki ji mi, ki ɓi le: ki siniy ta, ki siniy ta, is makir si.»

³⁵Piyer a ɓaŋ: «Ko a bi ngi muc ati ka kwana, i micam.Y'anta sa ji mi ta wãˀ.» Joˀ mizli ngi seˀehey gar a ɓam kanah ya.

³⁶Akẽh na, Yesu ati mizli ngi seˀehey a ndilam angi li mazilaka Getsemane. Dar a ɓa taŋ: «Cifam aka, y'ani ru nga dir dibiɗ a diga.»

³⁷A ram ati Piyer waɗ ziri ngi Zebedehey cuw taŋ. A zla ara lik, didak ara muɗaŋ.

³⁸Joˀ Yesu a ɓa taŋ: «Didak a muɗiy le wãˀ ti lika muco. Cifam aka, i hinjam ta gar ndra.»

³⁹Joˀ aru zar neˀ na, a huruk huruk, midibiɗ dir a ruwuy, a dirdibiɗ, a ɓi: «Aw Baha, da a gi zleˀe na, anja sikiɗ ngi bonoy misenna a kirih kileŋ avu ya. Amma ka ya mawuɗ ta ɓula, sey kaɓa ka mawuɗo.»

⁴⁰A mo ng'avi mizli ngi seˀehey tuwa, a luuma taŋ ara hinjam. A ɓa Piyere: «Ki zikam ati ya, ki hinjam ta, ko ler pal gu ta kwa?

⁴¹Ki hinjam ta, diram dibiɗ ɓa ki cam ar tikin ta. Mevel ada ɓula, amma dumvu a hĩhĩy le.»

⁴²A mi, aru zar neˀ ngi mucuw naŋ ma, a dir dibiɗ, a ɓi: «Baha, da sikiɗ ngi bonoy misenna a cuh gu ta, sey yi sa cummo na, anja a gi kaɓa ka mawuɗo.»

⁴³A mo ma na, a luuma taŋ ara hinjam ma ni, vur hinje ara ga taŋ ziriɓ ziriɓ.

⁴⁴A pula taŋ, a mi sar mimakir naŋ ma, a dir dibiɗ, a mihiri ngi mi mupurla ka naŋ miɓa zleˀe vuna ma.

⁴⁵Dar a mo ng'avi mizli ngi seˀeheye, a ɓa taŋ: «Ki ra muskam vu, yo ki ra hinjam aruŋ sukwa? Ani ler a gi le, ɓa a vulaka Mangal ngi mbur asi haŋ ngi mizli migi mungrahay.

⁴⁶Slikiɗam, akum le! Puraka, mbur mavuliy ɓa a jikiy a ndilo le!»

⁴⁷Ti Yesu mira ɓi aruŋ na, Yudas, mbur ngi wuzla mizli mukuruˀ nga cuwoy tuwa, a ndilawa ati zigiduw haɗi, vu kaˀ kaˀ ti maslalamay ati gandayay. Masay madiɗahay ati micawwa ngi Yudehey mislinoko taŋ.

⁴⁸Yudas, mbur mavula taŋ Yesu ɓa a jakaŋ na, a ɓa taŋ ɗaˀ ɗaˀ le: «Mbur ya masa jaŋ kuɓuy na, i naŋ. Jaka so!»

⁴⁹Yudas tuwa, aru kutum ng'avi Yesu, a ɓaŋ: «Zuy zuy aya Kumani!» Joˀ a jaŋ kuɓuy.

⁵⁰Yesu a ɓaŋ: «Ngama ɗu, ga gwat ka mawuɗ na muduba so!» Dar mizli mekelemey a ndilam vu hoyo hoyo ar Yesu, a jakaŋ.

⁵¹Mbur pal a wuzla mizli ngisi Yesuhoyo, a muɗa maslalam naŋ, a nguma gawla ngi masay madiɗa a, a bukoŋ slimiɗe krac avra.

⁵²Dar Yesu a ɓaŋ: «Ca maslalam ɗike ng'ar hay naŋ a muŋ, vur mizli mamuɗam maslalam gar na, a sa zizaka taŋ ti maslalam vuna ya.

⁵³Yi cufuɗa Baha gu ɓa a sliniy modro naŋhay kutum fineˀ vurum taˀ taˀ kuruˀ ngaŋ cuw na, ki si na ta kwa?

⁵⁴Na, Ɓimutoho miɓi, anja a gi kanah na, ɓa a sa kiɗ mi mbri mbri zleˀe ka?»

⁵⁵Ti nah na, Yesu a ɓa zigiduwo: «Ki soko ti maslalamay ati gandayay nga ji ɗu kaɓa yi mufuyo vu mbrike? Hin gar y'ada joˀ, i ra dubun gwat da mizli ar hay ngi Bumbulvuŋ, ko ki jikiy ta.

⁵⁶Amma hana gar a gi na, vur ɓa ɓi ngi mijiviɗey mutohoko na, a gi muduba.» Dar mizli ngi seˀehey gar a pulakaŋ, a kilam.

⁵⁷Mizli mijaka Yesu tuwa, a ram di ngi hay Kayif, masay madiɗa. Buy ngi ɓimujuwahay ati mizli micawwahay a kusom le a hay naŋ.

⁵⁸Piyere kwana ara sipa Yesu kileŋ hã a hay masay madiɗa tuwa ya. A ci ngi haya, a cifi le ati gawla ngi hayaya, ɓa a pura ɓi nah, a sa kiɗ mi mbrike na.

⁵⁹Dambalaka masay madiɗahay ati mizli mingila wuyoy gar ara sipam sedewo misi slirey vur Yesu ɓa a kiɗaka vagay.

⁶⁰Amma ko ti mizli haɗi musoko gam sedewo ti slir ar naŋ na gar kwana, a lumam ɓi midar ta. Ar nah na, mizli cuw a soko,

⁶¹a ɓam: «Mbur hana a ɓi zleˀe na: «Yi mbuzla hay ngi Buymisemuŋ gu, yo yi ndira hiri naŋ a muŋ angi hin makir.»

⁶²Masay madiɗa tuwa a slikiɗ, a ɓa Yesu: «Ka ki mbiɗa ko neˀ ta kwa? Mizli tayna a ɓam mbri vur ka ka?»

⁶³Amma Yesu naŋ teˀteˀe. Joˀ masay madiɗa a ɓaŋ: «I cufuɗuw ti slimiɗ ngi Buymisemuŋ misi ti siifa, ɓa ndra di njah si: Ki Kristu, Mangal ngi Buymisemuŋ kwa?»

⁶⁴Yesu a mbiɗaŋ di: «Ki ɓa le. Amma yi ɓukum na: Zle wurenna, kisa puraka Mangal ngi mburo joˀ tir vay hazum ngi Misi gidaŋ wãˀ, yo ara sawa ar gazlavay a muŋ.»

⁶⁵Akẽh na, masay madiɗa tuwa, a ngira zana naŋhaya, a ɓi: «A za Buymisemuŋ le! I wuɗam migi sedewohoy ngi mi aruŋ maka? Ki cinaka naŋ miza Buymisemuŋ na le takwa?

⁶⁶Ki wulkam mbrike?» Mizli a mbiɗaka: «A ndila le ngi kiɗ vagay.»

⁶⁷Dar a tufakaŋ tazlay avu hiri, a turɓusoko haŋ, a kiɗakaŋ. Numuŋhoy a cakaŋ babarva,

⁶⁸a ɓakaŋ: «Kristu, si na so, mukuɗuw na, i waka?»

⁶⁹Piyere cifi le a mamay, ngwas migi slra ngi hay a kirahawa ng'avaŋ, a ɓaŋ: «Ka kwana, ka zleˀe ati Yesu, mbur Galile na ya!»

⁷⁰Amma Piyer a ji mi a mbuŋ mizli gar, a ɓi: «Ki wuɗo ɓi mbrike na, yi si na ta.»

⁷¹Ti naŋ maru ng'avi mizlingre na, ngwas mekelem a pura ma, a ɓa mizli misi akẽh: «Mbur misenna naŋ zleˀe ati Yesu ngi Nazaret na.»

⁷²Piyer tuwa a ji mi, a hudum, a ɓi: «Yi si na mbur nah ta.»

⁷³Neˀ a dirba nah ma na, mizli misi aŋkeŋhey tuwa a kirohoko ng'avi Piyere, a ɓakaŋ: «Ki mbur ngi si taŋ gisiŋ gisiŋ. Mingiɓi ɗik ara biga li ka muso ti ra.»

⁷⁴Joˀ Piyer a ɓi: «Da yi gi di i slir na, anja Buymisemuŋ a giy kiita! Hadam, yi si na mbur hana ta gisiŋ!» Hirak ti nah vuna si na, kucukur a ji ay.

⁷⁵Joˀ Piyer a wuluk keŋ ar ɓi ngi Yesu miɓaŋ di zleˀe tuwa: «Ɓa kucukur a sa ji ay tikeˀe na, naɓa ki ji mi le, ki siniy ta, ki siniy ta, is makir si.» Dar Piyer a bi ng'avra, a tuwuy irslik irslik.