Read South Giziga MAT 27 Bible Online

MAT 27 - South Giziga bible

MAT 27

¹Ngi miprik prik naŋ na, masay madiɗahay ati mizli micawwa ngi Yudehey a ngilam wuy ar Yesu, ɓa a gakaŋ kiita ngi mucu.

²Joˀ a juwakaŋ, a ram di, a vulaka da Pilat, buy miwi li.

³Yudas muvula Yesu ɓa a jaka tuwa, naŋ mupura a gaka kiita ngi muc le da Yesu na, a zil marava, a mi ti suloy mizli ngir makir tuwa da masay madiɗahay ati mizli micawwahay a muŋ.

⁴A ɓa taŋ: «Ya muvula mbur migi gwat ta, ɓa a kiɗaka vagay na, yi gi mungra le.» Amma taŋ a mbiɗakaŋ di: «A ca ndra le kwa? Ka gi di.»

⁵Yudas a zliɗa dala tuwa ng'ar hay ngi Bumbulvuŋ, ara luwa vu naŋ.

⁶Masay madiɗahay a hilaka dala tuwa, a ɓam: «Ɓa i paka dala hana nga wuzla zlili ngir hay ngi Bumbulvuŋ na, ɓi ndra a pula jiviɗ nah ta, asi i dala ngi pumbus ngi mburu.»

⁷A dirba taŋ mingilam wuy ar dala nah na, a hiɗikam di guva avu mbur mindira gwatay, ɓa ngi dika mulakay.

⁸Vurˀe, a zilaka guva nah «Guva ngi pumbus» hã dana aruŋ.

⁹Naŋ kine, ɓi mijiviɗ Zeremi miɓa zleˀe na, a gi le muduba, a ɓi na: «A hilam suloy kukur makir, i dala mizli Israyeley mungiɓamˀay ɓa a hiɗikakaŋ ti naŋ.

¹⁰Joˀ a hiɗikam di guva avu mbur mindira gwatay, kaɓa Bumbulvuŋ miɓiy di zleˀe.»

¹¹A ram ti Yesu le a mbuŋ buy miwi li, joˀ buy miwi li a cufuɗaŋ: «Ki buy ngi Yudehey kwa?» Yesu a mbiɗaŋ di: «Ki ɓa le ta kwa!»

¹²Amma masay madiɗahay ati mizli micawwa ngi Yudehey majakaŋ ɓi na, ko Yesu a mbiɗa neˀ ta.

¹³Dar Pilat tuwa a ɓaŋ: «Sedewo magaka ar kahana gar na, k'anta cine ta kwa?»

¹⁴Amma Yesu a mbiɗaŋ mi ko pal ta, hã a zuma hirnga da buy miwi li haɗa.

¹⁵Angi muguzlum Pak gar na, buy miwi li a sirik le, naŋ da pul mbur dangay da zigiduwo mbak le, mbur taŋ muwuɗam le.

¹⁶Ti di nah na, mbur dangay ada, slimiɗ naŋ a zil haɗi, a zilaka Yesu Barabas. [17]

¹⁷Joˀ Pilat a cufuɗa zigiduw mukus kos kos tuwa: «Ki wuɗam i pulukum waka? Yesu Barabas kwa, malla Yesu mazilaka Kristu [18] na kwa?»

¹⁸Pilat a si na le, a vulakaŋ Yesu asi ara gam di suloŋ.

¹⁹Pilata, ti naŋ muar li gi kiita na, ngwas naŋ a slino ng'avaŋ, a ɓaŋ: «Ko ki ci ar ɓi ngi mbur mijeŋ hana ta. Asi ngi duvuɗ ngadana, yi musuwun le, ɓi naŋ a vuliy wuluk le haɗa.»

²⁰Amma masay madiɗahay ati mizli micawwahay a paka mi da zigiduw ɓa a cufuɗam, a pulaka taŋ Barabas, amma ɓa a kiɗa Yesu vagay.

²¹Buy miwi li a zla a cufuɗa taŋ ma: «Ki wuɗam i pulukum wa asi mizli mucuw tayna ka?» A mbiɗakaŋ di: «Pula ndra Barabas!»

²²Pilat a cufuɗa taŋ: «Na, Yesu mazilaka Kristu na, yi sa ga mbri ska?» Taŋ gar a mbiɗakaŋ di: «Dira avu dum mizliraŋ!»

²³Pilat a ɓa taŋ ma: «Na, a gi gwat malambaˀ mi ska?» Amma taŋ a tilam mi ti gidaŋ fineˀ misi zleˀe ma jak, a ɓam: «Dira avu dum mizliraŋ!»

²⁴Pilat a pura na, a gi gwat ko neˀ gu mata, yo mizli a wuɗ a slikiɗam ɓi, a wuɗ yam, a buna haŋ ceɗ ceɗ a mbuŋ zigiduw gar, a ɓi: «Mbur hana, zayɓi ngi muc naŋ anta a hirnga ɗu ta! Hana i ɓi kum.»

²⁵Mizli gar a mbiɗakaŋ di: «Anja zayɓi ngi muc naŋ a mbiɗi nga hirnga ndra ati ziri ndrahay.»

²⁶Dar Pilat a pula taŋ Barabasa, a ɓi ɓa a sliɗaka Yesu. A dirba nah a vula taŋ di ɓa a dirakaŋ avu dum mizliraŋ.

²⁷Joˀ soje ngi Pilatay a ram ti Yesu ngi hay buy miwi li, a cikiloko cil taŋhaya cek gun hirnga naŋ.

²⁸A cukokoŋ zanahay avra, a kakaŋ jibe gagaza.

²⁹A fuɗam loppol ngi hadaw, a cakaŋ di a hirnga waɗ a vulakaŋ lavaɗ kaw tir haŋ hazumo. A dilkam a mbuŋ naŋ, a singiram angaŋ, a ɓakaŋ: «Zuy zuy aya, Buy ngi Yudehey!»

³⁰A tufakaŋ tazlay, a tiɓaka lavaɗ tuwa, a kiɗakaŋ ti naŋ a hirnga.

³¹A dirba taŋ misingiram anga na, a cukoko jibe gagaza tuwa avra, a kakaŋ zanahay a muŋ, a ram di nga dir avu dum mizliraŋ.

³²Ti taŋ mabam le na, a jam hirnga ti mbur ngi hirwuy Sirene, a zilaka Simoŋ. A tikakaŋ ˀay ɓa a zuɓa dum ngi dira Yesu, a jijiraŋ.

³³A ndilam aŋgi li mazilaka Golgota, mbiɗeˀvra: «guduguzluŋ hirnga».

³⁴A vulaka mbaazla milihiɗa ti meɗelek [19] da Yesu. Yesu mititila titileˀ na, a ngum sa ta.

³⁵A dirba taŋ midiraka na, a kiɗam caca ɓa a wunkaka zana naŋhaya.

³⁶Dar a cifam joˀakẽh ɓa a jiginakaŋ.

³⁷Ɓi taŋ migakaŋ kiita ngi muc aseˀe vuna, a tohoko toh toh waɗ law avu dum a hirnga naŋ. A tohoko ani: «Mbur hana i Yesu, buy ngi Yudehey.»

³⁸A diram mufuyvuhoy le cuw a ciki Yesu vuna ya, pal tir vay hazum, pal mekeleme tir vay gula.

³⁹Joˀ mizli macohomo, a hizigiɗam hirnga, a zakaŋ,

⁴⁰a ɓam: «Ka mambuzla hay ngi Bumbulvuŋ ɓa ki ndira hiri naŋ a muŋ ar hin makir tuwa, da ki Mangal ngi Buymisemuŋ na, laha hirnga ɗik vuna ti haŋ ɗike so, yo po sar tir dum mizliraŋ!»

⁴¹Buy ngi ɓimujuwahay, mizli micawwahay ati masay madiɗahay a singiram anga kanah ya,

⁴²a ɓam: «A laha mizli mekelemeye le ɓula, amma a laha hirnga naŋ gu ta kwa? I buy ngi Israyel ta kwa? Anja a po sar wurenna tir dum mizlira, ɓa i sa tiɓakaŋ so.

⁴³A pula vu naŋ le mbak da Buymisemuŋ, asi a ɓi le: «Yi Mangal ngi Buymisemuŋ!» Na, da Buymisemuŋ ada wuɗaŋ na, anja a lahaŋ wurenna muduba so ayɗi!»

⁴⁴Ko mufuyvuhoy midiraka taŋ bumoˀ ati naŋ vuna kwana, ara zakaŋ ya.

⁴⁵Pas a gi le deŋ, luvuŋ a gi asi ruwuy keɗeɗe, hã a ndila pas ngi ɓula away ngi hay.

⁴⁶Hirak ti pas ngi ɓula away ngi hay tuwa na, Yesu a til mi ti gidaŋ: «Eli, Eli, lemasabaktani?» Mbiɗeˀvra: «Buymisemuŋ ɗu, Buymisemuŋ ɗu, ki puliy fuk vur mike?»

⁴⁷Mekelemey a wuzla mizli misi akẽh micinaka na, a ɓam: «Pura, naŋ mazila Eli!»

⁴⁸Mbur pal asi taŋ a kil kutum, ara yupo gugumay ar mbaazla mikwerek, a ngika ngik a mi lavaɗ, dar a sikaŋ di ɓa a saŋ.

⁴⁹Amma mizli mekelemey a ɓam: «Ɗagay, purukum di, da Eli vuna a sa so lahaŋ kwana!»

⁵⁰Amma Yesu a til mi ti gidaŋ ava ma, dar a mucu.

⁵¹Hirak ti nah na, godo misi ar hay ngi Bumbulvuŋ a Zeruzaleme, a ngir puɗak a wuzla cuw, zle a muŋ sesẽŋ a ruwuy. Hirwuy a wus, mandazlay muwãhay a ciram puɗak puɗak.

⁵²Zivihey a wunam, mizli ngi Bumbulvuŋhoy haɗi mumicam zleˀe, a slikiɗam a muŋ.

⁵³A dirba Yesu mislikiɗ na, a boko tir ziviheye, a cam ng'ar walahay madiɗa mipala , hã mizli haɗi a puraka taŋ le.

⁵⁴Sojehey ati madiɗa taŋ, taŋ majiginaka Yesu bumoˀ tuwa mupuraka hirwuy muwus ati gwatay migam gar na, a ga taŋ zluwun le haɗi, a ɓam: «Mbur hana i Mangal ngi Buymisemuŋ zleˀe gisiŋ gisiŋ!»

⁵⁵Ngwasay ada haɗi akẽh zar neˀe, ara puram hiri. Tˀada sipaka Yesu zleˀe zle a Galile ti gaŋ gwat naŋ mawuɗ gar.

⁵⁶Mariya ngi Magdala, Mariya mumuŋ ngi Zak ati Zozef waɗ mumuŋ ngi ziri ngi Zebedeheye, t'ada a wuzla taŋ aya.

⁵⁷Ngi pastaˀ wãˀ na, mbur misi zlili ngi ruwuy Arimate a ndilawa, a zilaka Zozef. Naŋ vuna kwana a tiri mbur ngi si Yesu le aya.

⁵⁸Aru ng'avi Pilata, a cufuɗa ɓa a vulaŋ vagay ngi Yesu. Pilat a ɓi ɓa a vulakaŋ di.

⁵⁹Zozef a zuɓa vagay ngi Yesu, a tuwuɗa ti gabaga manawayaŋ mislirkeɗ.

⁶⁰A ra ka ar vigiɗ naŋ muguro hĩˀĩ da naŋ wureˀ aruŋ ar mandazlay muwã. Dar a gidigilo ɗugur madiɗa, a disla mi naŋ ti naŋ, a cuh.

⁶¹Ti nah na, Mariya ngi Magdala ati Mariya mekeleme, t'ada joˀakẽh, hiri pulaˀ pulaˀ nga mi zivi vuna.

⁶²Put ngi miprik naŋ na, i hin ngi juwa vu ngi sabat. Masay madiɗahay ati Farisahay a ram arleˀe ng'avu Pilata,

⁶³a ɓakaŋ: «Buy, i wulkam le keŋ ar ɓi ngi mbur misi slir nah, ti naŋ mumuc t'aruŋ zleˀe na, a ɓi: «Angi hin mimakir naŋ na, yi sa slikiɗi.»

⁶⁴Zuwen ɓi, ɓa sojehey a jiginaka zivi hã a ndila hin makir, vur mizli ngi seˀehey masara huloko vagay naŋ. A dirba nah, a sa ɓaka mizli: «A slikiɗ le.» Naɓa slir taŋ ngi dirba nah na, a sa funa ngi dumbuŋ wãˀ le.»

⁶⁵Pilat a ɓa taŋ: «Sojehey anihĩ, aram, jiginaka zivi ka kum mawuɗam.»

⁶⁶Dar ara slurɓaka ɗugur ngi mizivi tuwaŋ, waɗ a pam sojehey sek ɓa a jiginakaŋ.