Read South Giziga MAT 28 Bible Online

MAT 28 - South Giziga bible

MAT 28

¹A dirba sabat, ɓa li a wun i dimas na, Mariya ngi Magdala ati Mariya mekelem, a soko nga pura zivi.

²Gurjik si na, hirwuy a zla a wus hiɓik hiɓik haɗi. Modro ngi Bumbulvuŋ a po sar paɗ a muŋ, a gidigila ɗugur misi a mi zivi tuwa murvay, a cifi araŋ.

³Modro vuna a wucuɗ ka vuŋ, zana naŋhaya babara ndarara ka gugumay.

⁴Soje mijigina zivihey tuwa muzluwunam di na, a jijikam ngbaˀ ngbaˀ, hã a mburom kitikpak kitikpak ka mbur mumuca.

⁵Amma modro a ɓa ngwasay tuwa: «Kumo, ki zluwunam ta. Yi si na le, ki sipam di i Yesu midiraka avu dum mizlira na.

⁶N'anta aka ta, a slikiɗ le ka naŋ miɓa zleˀe tuwa. Soko puraka li naŋ miɓaˀ ara zleˀe na.

⁷Wurenna so na, aram kutum, ɓaka ɓi nah da mizli ngi seˀeheye: «Yesu a slikiɗ le ti wuzla mumucahaya, ara ru dumbuŋ ar kum nga Galile. Ki sa puraka a diga. Ɓi ya muɓukum di na, i hana.»

⁸Ngwasay tuwa a bam kutum ti mizive, ara zluwunam, ara mumulom haɗi cici ma. A kilam ti ɓi nah da mizli ngi seˀeheye.

⁹Neˀ na, Yesu a so ji ti taŋ hirnga, a ɓa taŋ: «Zuy zuy kum aya!» Ngwasay tuwa a girdaˀam ng'avaŋ, a jakaŋ debe debe avu sara.

¹⁰Dar Yesu a ɓa taŋ: «Ki zluwunam ta. A ra ɓaka sukum ɗuwoyo, sey a ram nga Galile, a sa purikiy a diga.»

¹¹Ngwasay tuwa, taŋ maram a jiviɗe na, mekelemey a wuzla soje mijigina ziviheye, a soko ng'ar walahay. A slufaka labara nah gar da masay madiɗahaya.

¹²Masay madiɗahaya kwana, a kusom ati mizli micawwa ngi Yudeheye, a ngilam wuy. A dirba nah na, a vulaka dala haɗi da sojeheye,

¹³a ɓaka taŋ: «Ki sa ɓam na: ‹Hirak ti ndra mahinjam ngi duvuɗ na, mizli ngi seˀehey a soko, a huloko vagay naŋ le.›

¹⁴Da ko buy miwi li a sa cin ɓi nah le kwana, i ndra masa mucakaŋ mevele, i sa gaka ɓi nah ti wer ɓa didak a muɗukum ta.»

¹⁵Dar sojehey a tiɓaka dala, a gaka kaɓa taŋ miɓaka taŋ di tuwa. Naŋ kine, ɓi nah a wuh a wuzla Yudeheye gar hã dana.

¹⁶Mizli ngisi Yesu mukuruˀ ngaŋ kaˀhaya, a ram nga Galile, a muwã, Yesu miɓa taŋ di zleˀe tuwa.

¹⁷Ti taŋ mupuraka na, a huruk hurukam a mbuŋ naŋ, amma numuŋhoy ara wulkam cuw cuw ɓula.

¹⁸Joˀ Yesu a kirih ng'avi taŋ, a ɓa taŋ: «A vulikiy madiɗa le ngi wa muŋ ati hirwuyo gar.

¹⁹A ram ng'avu sukwi ngi mizli gar so, tiram taŋ mizli ngi si yahay: Caka taŋ ar yam ti slimiɗ ngi Cine, ngi Mangal ati ngi ˀUf Mipal.

²⁰Dubunaka taŋ ɓi ya muɓukum di ɗaˀ le na gar, ɓa a jaka a hirnga. Yo ya, y'ada ati kumo vur hin gar hã avu kiɗa mi ngi duniya.»