Read South Giziga MAT 3 Bible Online

MAT 3 - South Giziga bible

MAT 3

¹Ti di nah na, Zaŋ mici mizli ar yam ar ɓuh ngi Yude, a til mi:

²«Mbuɗaka mevele, asi Zumabuy ngi muŋ a ndilo le gweˀe!»

³Zaŋ i mbur mijiviɗ Ezayi miɓa ɓi naŋ zleˀe ani tuwa: «Mbur ara til mi a wuzlaɓuh: ‹Ɗiyaka jiviɗ da Bumbulvuŋ. Cicakaŋ jiviɗ naŋhaya cir cir.›»

⁴Zaŋ a ki zana mijaka ti ngwic ngi zlogomo, a juwa kwacaya wak ti kanda ngi garak, gwat ngi zum naŋ i yuk ati mam ngi ɓuh.

⁵Ar nah na, Zeruzalemey, Yudehey gar ati mizli ngi ciki mizaw Zurdeŋhey gar na, a soko ng'avaŋ.

⁶A njikaka mungra taŋhaya, joˀ Zaŋ a ca taŋ ar yam a mizaw Zurdeŋ.

⁷Zaŋ mupura Farisahay ati Sadukihey haɗi masoko ng'avaŋ, ɓa a ca taŋ ar yam na, a ɓa taŋ: «Kum sukwi ngi kwecesley, muɓukum di i wa kisa laham avu himaˀ Buymisemuŋ masa njuyo di na ka?

⁸Gam gwat mezle mabiga ki mbiɗaka mevele le n'ayɗi!

⁹Ki wulkam a mevel kumo: ‹Abraham i dideˀ ndra si mana› na, ki ɓam ta. Vurˀe, yi ɓukum na, ko ɗugur hanayna kwana, Buymisemuŋ a tiri taŋ ziri ngi Abrahamay gu.

¹⁰Sliŋ ngi zlimbe a ro taˀ avu slaslalak ngi widiseye si. Widis mayi mezle ta gar na, a sa ngumaka avra, a sa hizigaka ng'ar vu.

¹¹«Ya i cukum ar yam na, ɓa a sin ki mbiɗaka mevele le. Amma mbur masa sawa a dirba ɗu na, naŋ a sacukum ar ˀUf Mipal waɗ ar vu. Naŋ gidaŋ fineˀ ya, ko tarak naŋ kwana, yi ndila ngi cuk naŋ ta.

¹²Naŋ kaw ti gungwa ngi kufa daw a haŋ, a sa kufa dawa kaf kaf. A sa pa daw naŋ nga dirgwaɗ, cekwesl naŋ kwana, a sa pa ng'ar vu mamuc ta wãˀ, ɓa a wur.»

¹³Akẽh na, Yesu a so baɗ ti Galile ng'avi Zaŋ, sesẽŋ a mizaw Zurdeŋ ɓa a caŋ ar yam.

¹⁴Amma Zaŋ a ngum zleˀe ta, dar a ɓa Yesu: «Anja i ka maciy ar yama jak ayɗi! Ka ki so ng'avi ya mbri mbri maka?»

¹⁵Amma Yesu a mbiɗaŋ di: «Tuɓa ɗagay si. Gwat Buymisemuŋ mawuɗ na, a zlir le sey i gaka kanah.» Joˀ Zaŋ a tiɓa muduba.

¹⁶A dirba Zaŋ mica Yesu ar yama na, Yesu a bi tir yama ng'avra. Hirak ti nah na, birngiŋ ngi muŋ a wucuh wucah, a pura ˀUf ngi Buymisemuŋ mapo sar nga hirnga naŋ kaɓa gonoko.

¹⁷Dar ˀay a cino baɗ a muŋ: «Hana i mangal ɗu, ya mawuɗ haɗa, ya hĩhĩyaŋ ɓa i winaŋ.»