Read South Giziga MAT 4 Bible Online

MAT 4 - South Giziga bible

MAT 4

¹Akẽh na, ˀUf ngi Buymisemuŋ a ngi hirnga ti Yesu nga wuzlaɓuh, ɓa Satan a tikinaŋ a diga.

²Yesu a gi dalyam hiipas hiipas kukur mufaɗ, duvuɗ duvuɗ kukur mufaɗ a wuzlaɓuh a diga. A dirba nah na, may a jaŋ.

³Mitikina vu a kirih ng'avaŋ, a ɓaŋ: «Da ki Mangal ngi Buymisemuŋ na, ɓa ɗugur hanayna, ɓa a tiram ɗafahay sini.»

⁴Yesu a mbiɗaŋ di: «A tohoko na: ‹Mbur a ndir tisiifa ti ɗaf pal naŋ ta, amma ti ɓi gar mabo ti balam Buymisemuŋ.›»

⁵Dar Satan aru ti Yesu ng'ar walahay Zeruzalem, walahay mipal , a jiɗ di nga hirngi hay ngi Bumbulvuŋ,

⁶a ɓaŋ: «Da ki Mangal ngi Buymisemuŋ na, hil sar nga ruwuy, asi a tohoko na: ‹Buymisemuŋ a sa ɓa modro naŋhay vur ka, a sa puˀukuw paˀ paˀ a haŋ taŋhay, vur ka masa dunuko sar avu ɗugur.›»

⁷Yesu a mbiɗaŋ di: «A tohoko ma na: ‹Ki tikina Bumbulvuŋ Buymisemuŋ ɗike ta.›»

⁸Satan a jiɗ di nga hirnga muwã migila haɗi ma, a bigaŋ buy mazumaka ar duniya gar ati gidaŋ taŋhay,

⁹a ɓaŋ: «Da ki ra huruk a mbuŋ ɗu, ki ra putukul a mbuŋ ɗu na, i sa vuluw gwat tayna cek da ka.»

¹⁰Joˀ Yesu a ɓaŋ: «Kirih kileŋ avu ya, Satan! Asi a tohoko na: «Ki sa putukul a mbuŋ Bumbulvuŋ Buymiseuŋ ɗik, yo kisa huruk huruk a mbuŋ naŋ pal naŋ tewle.»

¹¹Angi nah na, Satan a pulaŋ muduba, joˀ modrohoy a kiraham ng'ava, a gakaŋ gwat naŋ mawuɗo.

¹²Ti Yesu micina a jaka Zaŋ le ar dangay na, a cuh nga Galile.

¹³A pula Nazarete, ara cifi a Kapernahum, walahay misi a mi yam madiɗa, angi hirwuy ngi Zabuloŋ ati Neftali,

¹⁴ɓa ɓi ngi mijiviɗ Ezayi miɓa zleˀe na, a gi muduba:

¹⁵«Hirwuy ngi Zabuloŋ ati ngi Neftali, i hirwuy misi a ciki jiviɗ ngi mubuliy, hirwuy ngi dubazaw Zurdeŋ, angi hirwuy Galile, sukwi ngi duniyahay micifam angaŋ!

¹⁶Mizli micifam ar luvuŋ na, a puram li minjahha le ciɗak ciɗaka. Mizli micifam ar li mitimbiɗim ngi mizli mumucahay na, li minjahha a go le ciɗak ciɗak ar taŋ.»

¹⁷Zle ti nah na, Yesu a zla a til mi, a ɓi: «Mbiɗaka mevel kumoyo, asi Zumabuy ngi muŋ a ndilo le gweˀe.»

¹⁸Ti Yesu macuh deŋŋe ti mi yam madiɗa ngi Galile na, a pur mizli sukumuŋhoy cuw, Simoŋ mazilaka Piyer ati Andre. I miji kilifey, ara hizigam zuva ng'ar yam.

¹⁹Dar a ɓa taŋ: «Soko asi ya, yi sa tiri ti kum miji mizli.»

²⁰A pulaka zuva taŋhaya kutum, dar a ram aseˀeŋ.

²¹Yesu a kirih nga mbuŋ ma na, a pur mizli sukumuŋ mekelemey cuw ma, i Zak ati Zaŋ, ziri ngi Zebedehey. Taŋ ati cine taŋ Zebede a hur palalam taŋ, ara ɗiyam zuva taŋhay. Dar Yesu a zila taŋ.

²²Angi nah vuna si na, a pulaka palalam taŋ ati cine taŋ a mi yama, a ram asi Yesu tuwa.

²³A dirba nah na, Yesu a bula hirwuy Galile gar, a dubuna gwat da mizli ar hay ngi dira dibiɗ taŋhaya, a til mi ti Ɓimezle ngi Zumabuyo, a mbul misi jijihey wal wal ati misi ble ngi wuzla mizli gar.

²⁴Slimiɗ naŋ a zil asi hirwuy Siri gar. Joˀ a sakaŋ ti mizli masam bonoy ti jijihey wal wal cek, misi setenehey a hirnga, midiɗa kulihey ati mizli muhulɓahay gar, dar Yesu a ɗiya taŋ.

²⁵Zigiduw haɗi maram aseˀe, mizli musoko ti Galile, ti Dekapol, ti Zeruzalem, tir hirwuy Yude waɗ ngi dubazaw Zurdeŋhey.