Read South Giziga MAT 5 Bible Online

MAT 5 - South Giziga bible

MAT 5

¹Yesu mupura zigiduw haɗi na, a jiɗ nga muwã, a cifi joˀ. Mizli ngi seˀehey a kiraham ng'avaŋ.

²Joˀ Yesu a zla a dubuna taŋ gwat:

³«Yawwa, mizli misi murgahay a mevele, a roko ar wuya: asi Zumabuy ngi muŋ inga taŋ.

⁴Mizli miteˀteˀhey a roko ar iwuya: asi a sa zumaka hirwuy Buymisemuŋ miɓa taŋ di ɗaˀ le na.

⁵Mizli matuwam a roko ar iwuya: asi Buymisemuŋ a sa tikina taŋ, a taˀaka tuwuyo.

⁶Mizli misi ti may ati madalyam ngi gi gwat mijeŋŋe a roko ar wuya: asi Buymisemuŋ a sa kiɗa taŋ maya.

⁷Mizli mapuram ircece da mizli mekelemeye, a roko ar wuya: asi Buymizemuŋ a sa pura taŋ ircece.

⁸Mizli misi ti mevel purlahay, a roko ar wuya: asi a sa puraka Buymisemuŋ.

⁹Mizli magam gwat ɓa mizli a cifam zuy zuyo, a roko ar wuya: asi a sa zilaka taŋ ziri ngi Buymisemuŋhoy.

¹⁰Mizli misi ara sipaka taŋ nder nder asi taŋ magam gwat Buymisemuŋ mawuɗo, a roko ar wuya: asi Zumabuy ngi muŋ inga taŋ.

¹¹Da mizli ara zukum, da ara supukum nder nder, da a roko slam slir lambaˀ lambaˀ a hirnga kum asi ya na, yawwa, mumulom.

¹²Mumulom, zluzluɓam, asi a sa wurkukum haɗi a muŋ, vur mijiviɗ mudumbuŋhoy ar kumo, a sipaka taŋ le nder nder zleˀe kanah ya.

¹³«Kum i mandaŋ ngi si ruwuy. Amma da lemme ngi mandaŋ a susuyum le na, a tiri lemme a muŋ gu mbri mbri maka? Ɓa a tiri gwat lambaˀ le wãˀ, sey a bgukoko avra, joˀ mizli a kirpaka asi sar.

¹⁴«Mapusluɗaka duniya njahha i kum. Walahay mipaka le ar li miɗagar na, a ɗum ta.

¹⁵Anta jam vu avu lampe, ɓa a caka kulaˀ asi kisa ta, sey a ɗuvaka taˀ ar li ɗuf naŋ a muŋ, ɓa a pusluɗa li da mizli ngi hayaya gar.

¹⁶Naŋ kine ya, anja li minjahha kum a pusluɗ a mihiri mizli, ɓa taŋ mapuraka mezle kum magaka na, a gaka dudok da Cine kum misi a muŋ.

¹⁷«Ɓimujuwa malla ɓi ngi mijiviɗey na, anja ki wulkam kaɓa yi so kiɗa taŋ avra ta. Yi so ɓa ngi kiɗa taŋ avra ta, amma ɓa yi ga taŋ wãˀ jaka.

¹⁸Gisiŋ, yi ɓukum na: ɓa hã muŋ ati hirwuy a sa kiɗam mi na, ko gwat meciɗek mineˀ ar Ɓimujuwa masa kiɗ avra anta, sey da gwatay a gam le cek far.

¹⁹Ɓi meciɗek ngir ɓimujuwa, da mbur a ngila le, yo ara dubuna da mizli mekelemeye, ɓa a gam kanah ya na, mbur nah, a sa zilaka mbur mizlew muwãˀ ar Zumabuy ngi muŋ. Amma ɓimujuwa, da mbur ara ja a hirnga, yo ara dubuna da mizli mekelemeye, ɓa a gam kanah ya na, mbur nah, a sa zilaka mbur madiɗa ar Zumabuy ngi muŋ.

²⁰Vurˀe, yi ɓukum na: da kum anta gam gwat Buymisemuŋ mawuɗo, fineˀ ngi buy ngi ɓimujuwahay ati ngi Farisahaya ta na, kum anta sa cam ar Zumabuy ngi muŋ ta wãˀ.

²¹«Ki cinaka le, a ɓaka dideˀ kumoyo zleˀe na: ‹Ki kiɗ hirnga ta, ko wa gar mikiɗ mbur le vagay na, a sa ram di nga mbuŋ mbur migi kiita.›

²²Amma ya i ɓukum na: ko wa gar miji mevel le ar sukum naŋ na, a sa ram di nga mbuŋ mbur migi kiita. Ko wa gar miɓa sukum naŋ le: ‹gilaw› na, a sa ram di nga mbuŋ mizli madiɗa migi kiitahay, ko wa gar miɓa sukum naŋ le: ‹mibirnga› na, a ndila le ngi hizigaŋ ng'ar vu.

²³Vurˀe, da ki ru ti gwat ɗik ngi gi sedege le ar li gi mikuli da Buymisemuŋ, yo da kisa wuluk le ŋkeŋ, ɓi ada ngi ɗiy ar wala kum ati sukum ɗike na,

²⁴pula gwat ɗik ngi gi sedege na a mbuŋ li gi mikuli a mbuŋ Buymisemuŋ, ara ɗiyam ɓi ati sukum ɗik na ɗagay, a dirba nah, so ga sedege ɗik da Buymisemuŋ so.

²⁵«Da mbur a widi ti ka le, yo ki ra ram cuw cuw kum a jiviɗ aruŋ na, wus vu kutum ɓa ki ɗiyaka ɓi nah. Vur naŋ masa vuluw asi haŋ ngi mbur migi kiita, migi kiita kwana, a sa vuluw asi haŋ ngi sojehey, naɓa sojehey a sa kukuw ar dangay.

²⁶Gisiŋ, yi ɓuw na: k'anta sa bo tir dangaya ta wãˀ, sey da ki wurka le, ko sisi tekeɗe a ndir ta.

²⁷«Ki cinaka le, a ɓam zleˀe na: ‹Ki gi madama ta.›

²⁸Amma ya i ɓukum na: ko wa mupur ngwas le, a hĩyã le, ɓa a hin di na, kite a gi di madama le a mevele si.

²⁹«Da hiri ɗik vay hazumo, ara hizigiɗuw ɓa ki gi mungra na, huzlugo avra, hiziga kileŋ avu ka. Zuwen hiri ɗik purla mazizi, a funa taŋ masa hizigaka vu ɗik gar ng'ar vu na le.

³⁰Yo da i haŋ ɗik vay hazum mahizigiɗuw ɓa ki gi mungra na, buko avra, hiziga kileŋ avu ka. Zuwen haŋ ɗik purla mazizi, a funa ka masa ci ar vu ti dumvu ɗik wãˀ na le.»

³¹«A ɓam zleˀe ma na: ‹Da mbur a wuɗ ɓula ngwas naŋ le na, sey a vulaŋ ɗerewol mabiga a ɓula le.›

³²Amma ya i ɓukum na: da mbur a ɓula ngwas naŋ le, yo da ngwas nah a sliˀi mbur mekelem le na, naɓa a ɓula nga gi madama, sey da a zuɓam vu zleˀe ka ɓimujuwa mawuɗ ta far [1] Mbur muzuɓa ngwas nah le kwana, naɓa ara gi madama ya.

³³«Ki cinaka le ma, a ɓaka mizli misi zleˀeheye na: ‹Ki ngila hudum ɗike ta, amma ka muhudum le a mbuŋ Bumbulvuŋ na, ga cummo.›

³⁴Amma ya i ɓukum na: anja ki hudumom ta wãˀ si, ko ti birngiŋ ngi muŋ, asi i li cifi ngi Buymisemuŋ,

³⁵ko ti hirwuy, asi i li ɗuva sar naŋ, ko ti Zeruzalem, asi i walahay madiɗa ngi buy madiɗa.

³⁶Ki hudum ko ti hirnga ɗik vuna ta ma, asi ko ngwic ngi hirnga ɗik pal, ki tiri di babara malla titra gu ta.

³⁷Kum ɓam jak na: ‹haˀaw› malla ‹ˀŋ ŋ› tewle si, asi mingiɓi mekelem ameˀe gar na, a bo ti vu Satan.

³⁸«Ki cinaka le, a ɓam zleˀe na: ‹Hiri a wurkaka ti hiri, sliŋ a wurkaka ti sliŋ.›

³⁹Amma ya i ɓukum na: mbur mugukum malambaˀ le na, ki pulaka cuwal naŋ ta. Da mbur a cuw babarva le avu kwala vay hazum na, mbiɗaŋ vay mekeleme ma jaka.

⁴⁰Da mbur a wuɗ widi ti ka le, ɓa a tiɓa zana ngi si dawra ɗike na, pula a tiɓa dawra vuna wãˀ si.

⁴¹Da mbur ara tikuw ˀay ɓa ki ru kilometir pal na, aru kilometir cuw wãˀ si.

⁴²Da mbur a cufuɗ gwat le avu ka na, vulaŋ. Da mbur ara wuɗ didiɗa gwat avu ka na, ki zlikaŋ ta.

⁴³«Ki cinaka le, a ɓam zleˀe na: ‹Wuɗ mbur cil ɗike, yo hirsa mesene ɗike.›

⁴⁴Amma ya i ɓukum na: wuɗam mesene kumoy, mizli masupukum nder nder na, diram dibiɗ vur taŋ,

⁴⁵ɓa kisa tiram ziri ngi Cine kum misi a muŋ. Asi Cine kumo, ara bo ti pas ar mizli misi moˀorehey ati mizli mezleheye, ara ga vuŋ da mizli gar magam gwat naŋ mawuɗo ati magam gwat naŋ mawuɗ ta.

⁴⁶Da ki wuɗama, sey mizli mawuɗokum si na, kisa lumam di i wuruk wana maka? Ko micikila buutuhoy kwana, ara gam kanah ya ta kwa?

⁴⁷Da ki jam haŋ sey da sukum kumoy si na, ɓa ki gam di i gwat mupuɗaw kwa? Ko mizli duniyahay kwana, ara gam kanah ya ta kwa?

⁴⁸Kumo so na, ndiram mezlehey wãˀ kaɓa Cine kum misi a muŋ i mezle wãˀ na ya.