Read South Giziga MAT 6 Bible Online

MAT 6 - South Giziga bible

MAT 6

¹«Gwat kum magaka ar sipi jiviɗ kumo, jam lesl, anja ki gaka a mihiri mizli ɓa a purukum ta. Da kanah na, naɓa Cine kum misi a muŋ anta sa wurkukum ta.

²Mizli miɓi mi cuw cuwoyo, a vulaka gwat da misi murgahaya ar hay ngi dira dibiɗey, yo a jiviɗ madiɗahay, a tilam di mi ɓa mizli a gaka taŋ dudoko. Gisiŋ, yi ɓukum na: taŋ a lumaka migir taŋ le si. Amma ka, da ki ra vul gwat da misi murgahay na, anja ki gi ka taŋ na ta.

³Da ka, ki ra vul gwat da misi murgahay na, gwat haŋ vay hazum ɗik maga na, anja haŋ gula ɗik a si na ta.

⁴Anja gwat ɗik ka mavula a ndir i gwat miyaŋŋa, ɓa Cine ɗik mapur ar li miyaŋŋa na, a sa wurkuw minjeˀe.

⁵«Mizli miɓi mi cuw cuwoyo, taŋ a wuɗam dira dibiɗ taŋ deŋ ti deŋ ar hay ngi dira dibiɗey malla a mazlaka jiviɗey, ɓa mizli a puraka taŋ. Gisiŋ, yi ɓukum na: taŋ a lumaka migir taŋ le si. Amma kumo, da ki ra diram dibiɗ na, anja ki gam ka taŋ na ta.

⁶Da ka, ki wuɗ le ɓa ki dir dibiɗ na, ci nga viŋ ɗike, gica miviŋ, tumbulo Cine ɗik misi ar li miyaŋŋa nah na, ɓa Cine ɗik mapur ar li miyaŋŋa tuwa a sa wurkuw minjeˀe.

⁷«Da ki ra diram dibiɗ na, anja ki ɓam kwiliŋ kwiliŋ ka mizli duniyahay ta, taŋ a waka kaɓa Bumbulvuŋ a sa cine dira dibiɗ taŋ vurˀe.

⁸Anja kumo, ki sulɓoko mi taŋ ta, asi Cine kum a si na gwat kum misi ti may naŋ le zle ti kum mucufuɗakaŋ t'aruŋ.

⁹«Da ki ra diram dibiɗ na, ɓam ani: ‹Cine ndra misi a muŋ, Anja mizli a sinukuw ki Buymisemuŋ mipal.

¹⁰Anja ki so zum buy a wuzla mizli. Anja gwat ka mawuɗo, a gi a ruwuy kaɓa naŋ magi a muŋ.

¹¹Vula ndra ɗaf, ndra misi ti may naŋ dana.

¹²Pula gwat malambaˀ ndra migaka, kaɓa ndra mupulaka ngi mizli migam ndra di na ya.

¹³Ki pula ndra i cam ar li ngi tikin ta, amma laha ndra tisi haŋ ngi Satana. [Asi Zumabuy, gidaŋ ati dudok i ngi ɗik hã ngi sete. Amin. [2].» ]

¹⁴«Naŋ kine, da ki ra pulaka gwat malambaˀ ngi mizli magukum di na, naɓa Cine kum misi a muŋ a sa pulukum di ya.

¹⁵Amma da kum anta ki pulaka gwat malambaˀ ngi mizli magukum di ta na, naɓa Cine kum anta sa pulukum di ta ya.

¹⁶«Da ki ra gam dalyam na, anja ki gam kaɓa ki ra likam ka mizli miɓi mi cuw cuwoy na ta. Taŋ a mbiɗaka midibiɗe, ɓa mizli a puraka taŋ ara gam dalyam. Gisiŋ, yi ɓukum na: taŋ a lumaka migir taŋ le si.

¹⁷Amma ka, da ki ra gi dalyam na, njuro hirnga ɗike, buna hiri ɗike,

¹⁸ɓa mizli a sinaka ki ra gi dalyam ta. Sey Cine ɗik misi akẽh ar li miyaŋŋa na masina tewle, ɓa Cine ɗik mapur ar li miyaŋŋa na, a sa wurkuw minjeˀe.

¹⁹«Anja ki cikilam zlili a ruwuy misenna ta, vur a ruwuyo, tiler a zumaŋ, li mileleŋ a nduvaŋ, muhuloy kwana, a slinaka haya, a hulokoŋ.

²⁰Amma zuwen wam vu ti zlili ar li ngi muŋ. A diga ko tiler anta sa zuma ta, li mileleŋ anta sa nduva ta, muhuloy kwana, anta sa slinaka haya, ɓa a huloko ta ma.

²¹Asi angi li zlili ɗik misi anga na, mevel ɗike, naŋ anga ya.

²²«Hiri i lampe ngi dumvu. Da hiri ɗike naŋ kuy kuy na, naɓa dumvu ɗik gar na, naŋ ar li minjahha.

²³Amma da hiri ɗike naŋ kuy kuy ta na, naɓa dumvu ɗik gar kwana, naŋ ar luvuŋ. Da li minjahha misi avu dumvu ɗik i luvuŋ na, kay i luvuŋ mitimbiɗim wãˀ.»

²⁴«Ko mbur purla magi gawla ngi buyoy cuw gu anta. Malla a sa hirsa numuŋ, a sa wuɗ mekeleme, malla ta na, a sa gumbuˀ ng'avi pal numuŋ, a sa zirɗa mi ngi mekeleme. Bumbulvuŋ ati zlili, ki cifam gawla taŋ cuw taŋ gu ta.

²⁵«Vurˀe, yi ɓukum na: ɓi ngi gwat ngi zum, malla gwat ngi si, ko zana kum masa kama, ki likaka ta. Siifa kum a funa gwat ngi zumo le, dumvu kumo kwana, a funa zana ngi ki le ya ta kwa?

²⁶Puraka ɗiyuw ngi ɓuhoy ɗagay: anta zligam gwat ta, anta gam sifi ta, anta pam gwat nga dirgwaɗ ta ma. Amma Cine kum misi a muŋ ara vula taŋ gwat ngi zumo!

²⁷Mbur a wuzla kumo, mamurɗo hin ngi siifa naŋ ko neˀ gu ti lik naŋ na, ada kwa?

²⁸Ki likaka zana ngi ki vur mike? Puraka matayay mafuyukom na, anta gam slra ta, anta siram gugumay ta ma.

²⁹Yo yi ɓukum na: ko Salomoŋ ti dudok naŋ kwana, a ki zana mezle ka taŋ na ɗaˀ ta.

³⁰Giziŋ misi a ɓuh dana, tiprik a sa hizigakaŋ ar vu, da Buymisemuŋ ara kaŋ zana kahana na, a sa kukum di da kumo fineˀ giziŋ vuna ta jak kwa? Kum misi tiɓi keɗeccehey!

³¹«Ki ɓam: ‹I sa zumam mike? I sa sam mike? Malla ‹I sa kam mike?› na, anja ki likam kanah ta.

³²Mizli duniyahaya, ara sipam gwat tayna ndrehhe. Amma Cine kum misi a muŋ, a si na gwat kum misi ti may naŋ na le gar.

³³Zuwen kam slimiɗ ar Zumabuy ngi muŋ ati gwat mijeŋŋe Buymisemuŋ mawuɗo ɗagay. Gwat tayna gar, Buymisemuŋ a sa pukum di ameˀe ma.

³⁴Ki likaka hin misi tiprike ta, hin misi tiprike, a sa lik hirnga naŋ vuna si. Hin gar na, naŋ ti gir nga naŋ, muk ti naŋ si.