Read South Giziga MAT 7 Bible Online

MAT 7 - South Giziga bible

MAT 7

¹«Ki gam ka kum i migi kiitahay ta, naɓa a sa gukum kiita ta ya.

²Asi a sa gukum kiita kaɓa kum magam da mizli na ya, yo a sa wukum gwat ti daram kum mawam di gwat da mizli vuna ya.

³Ki pura giziŋ meciɗek misi a hiri sukum ɗike ɓula, amma k'anta ki pura mbal misi a hiri ɗike ta na vur mike?

⁴Na ka, mbal ada a hiri ɗike jaka, amma kisa ɓa sukum ɗike: ‹Kwaɗay, i zuɓuw giziŋ meciɗek misi a hiri ɗike na, mbri mbrike?›

⁵Mbur miɓi mi cuw cuw, zuɓa mbal misi a hiri ɗik na ɗagay, ɓa kisa pur kweŋ kweŋ ngi zuɓa giziŋ meciɗek misi a hiri sukum ɗik na ya.

⁶«Ki vulaka gwat ngi Buymisemuŋ da kirihey ta, virzle hirnga kumoyo, ki hizigaka taŋ da fedemey ta, vur taŋ makirpaka taŋ asi sar, a mbuɗoko hiri, a nguwukum.

⁷«Cufuɗam gwat, a sa vulukum. Sipam gwat, kisa lumam. Tilam mi ngi hay, a sa wunukum mizlingre.

⁸Asi mike na, mbur gar macufuɗ gwata, a vulakaŋ, mbur masipi gwata, a lum, mbur matil mi ngi haya, a wunakaŋ mizlingre.

⁹Mbur a wuzla kumo, da mangal naŋ a cufuɗ ɗaf le ava na, a sa vulaŋ ɗugur na, i waka?

¹⁰Malla da a cufuɗ kilif na, a sa vulaŋ kaw kwa?

¹¹Da kum mizli malambaˀhay, ki sinaka vula gwat mezlehey le da ziri kumoyo na, Cine kum misi a muŋ a sa vula gwat mezle da mizli macufuɗakaŋ na fineˀ kum ta jak kwa?

¹²«Naŋ kine, gwat gar kum mawuɗam ɓa mizli a gukum di na, kumo kwana, gaka taŋ di kanah ya. Ɓimujuwa ati ɓi ngi mijiviɗey i nah.

¹³«Cam tir mizlingre muɓucco! Asi mizlingre mifiw ati jiviɗ misliprike, aru ti mburo nga zizi. Mizli haɗa a zuɓam di i nah.

¹⁴Amma maru ti mburo ng'ar li ngi siifa na, i mizlingre muɓuc haɗa, i jiviɗ misler sler haɗa, mizli maram ti raˀa na, taŋ haɗa ta.

¹⁵«Wam vu avu mijiviɗ misi slireye. A soko avu kumo ka tumuŋhoy, amma hur kwacay taŋ i kiriɓuh miji vuhoy.

¹⁶Ki sa sinaka taŋ avu gwat ngi gi taŋ. Ada ngilam yi ngi gudubun avu sisime kwa? Malla ada ngilam yi ngi uruf avu titife kwa?

¹⁷Naŋ kine, widis mukuy kuy gar a yi mezle, widis mukuy kuy ta kwana, a yi malambaˀ aya.

¹⁸Widis mukuy kuy a yi malambaˀ gu ta, widis mkukuy ta kwana, a yi mezle gu ta ya.

¹⁹Widis mayi mezle ta gar na, a sa ngumakaŋ, a sa hizigaka ng'ar vu.

²⁰Naŋ kine, kisa sinaka mijiviɗ misi slireye avu gwat ngi gi taŋ.

²¹«Mizli gar maɓikiy: ‹Buy, Buy› tewle na, masa cam ar Zumabuy misi a muŋ, i taŋ ta, amma sey mizli magam gwat Baha misi a muŋ mawuɗo.

²²Tapasa, mizli haɗi a sa ɓikiy: ‹Buy, Buy! I njikaka ɓi ɗike le ti slimiɗ ɗik kaɓa mijiviɗey ta kwa? I ɓulam setenehey le ti slimiɗ ɗik ta kwa? I gam cekenehey le haɗi ti slimiɗ ɗik ta kwa?›

²³Dar yi sa ɓa taŋ: ‹Ko yi sinukum ɗaˀ ta wãˀ. Kiraham kileŋ avu ya, kum migi gwat malambaˀhay.›»

²⁴«Naŋ kine, mbur gar macin mingiɓi ɗu, yo maga gwat ya maɓa hana na, a bam vu ati mbur misi lesl mindira hay naŋ ar mandazlay muwã.

²⁵Vuŋ a gi, mekepel a zuɓ, burkataŋ a gi ti gidaŋ, a so luuma hay tuwa. Amma ko a mbizli ta wãˀ, asi a ɗuvaka virzi naŋ ar mandazlay muwã.

²⁶Amma mbur gar macin mingiɓi ɗu, yo maga gwat ya maɓa hana ta na, a bam vu ati mbur gilaw mindira hay naŋ ar muyuŋ.

²⁷Vuŋ a gi, mekepel a zuɓ, burkataŋ a gi ti gidaŋ, a so luuma haya, hay a mbizli grip, mbak diŋ cay!»

²⁸A dirba Yesu mikiɗa mi ngi mingiɓi naŋ hana na, mizli gar, gwat naŋ mudubuna taŋ di, a zuma taŋ hirnga teˀe.

²⁹Asi a dubuna taŋ di kaɓa ngi mbur misi ti dudok, ɓi naŋ a zliram ati ngi buy ngi ɓimujuwahaya ta.