Read South Giziga MAT 9 Bible Online

MAT 9 - South Giziga bible

MAT 9

¹Yesu a ci palalam, a tuwuɗa yam a muŋ, a mi ng'ar walahay naŋ.

²Mizli a sakaŋ ti mbur mihilɓa ɓaˀ ar cacala. Ti Yesu mupura tiɓi taŋ na, a ɓa mbur mihilɓa tuwa: «Tum vu, mangal ɗu! Mungra ɗikey a puyam le avra.»

³Dar mekelemey a wuzla buy ngi ɓimujuwahay a ɓam ti kwacay taŋ: «Mbur hana ara za Buymiseuŋ!»

⁴Yesu a si na wuluk taŋ le, a ɓa taŋ: «Ki wulkam lambaˀ kahana a mevel kumo vur mike?

⁵Ya miɓaŋ: ‹Mungra ɗikey a puyam le avra› malla ‹slikiɗ, a ru› na, ɓi mutuwaˀ ta anga i wanaka?

⁶Amma anja ki sinaka, ya Mangal ngi mburo, y'ada ti gidaŋ a ruwuyo ngi puya mungra ngi mizli avra» Dar Yesu a ɓa mbur mihilɓa tuwa: «Slikiɗ, zuɓa cacala ɗike, aru ngi hay.»

⁷Dar mbur tuwa a slikiɗ, aru ngi hay.

⁸Zigiduw mupura kanah na, hã a zluwunam, a gaka dudok da Buymisemuŋ muvula gidaŋ misi kahana da mizli titrahay na.

⁹Ti Yesu macuh deŋŋe na, a pur mbur mazilaka Matiye, naŋ ar hay ngi cikila buutu. Yesu a ɓaŋ: «Sipiy.» Matiye a slikiɗ, dar a sipaŋ.

¹⁰A dirba nah, ti Yesu mazum ɗaf a hay Matiye tuwa na, micikila buutuhoy ati mizli magam gwat malambaˀhay haɗi, a soko ɓa a zumam gwat bumoˀ ati Yesu waɗ mizli ngi seˀeheye.

¹¹Farisahaya mupuraka na, a ɓaka mizli ngi seˀeheye: «Kumani kumo, a zum ɗaf ati micikila buutuhoy waɗ mizli magam gwat malambaˀhay vur mike?»

¹²Amma Yesu a cine le, dar a ɓa taŋ: «Mizli miwirwireye, t'anta ti may ngi doftor ta, sey misi jijihey.

¹³A ram, dubunaka mbiɗeˀvra ngi ɓi miɓi: «Yi wuɗ di i pura ircece, mbak gi mikuli a mbuŋ Buymisemuŋ ti ginewey na le.» Vur yi so zila mizli mijeŋŋehey ta, amma migi mungrahay.»

¹⁴Akẽh na, mizli ngi si Zaŋhay a kirohoko ng'avi Yesu, a ɓakaŋ: «Ndra ati Farisahaya, i ra gam dalyam, amma mizli ngi si kahay a gam ta vur mike?»

¹⁵Yesu a ɓa taŋ: «Mizli miziloko taŋ le ng'ar li vula ngwasa, da zil ngi ngwasa, naŋ da a wuzla taŋ na, a hiɗam hiri ka mizli ngir li vagayay ma kwa? Amma hin a sa ndilawa, a sa muɗaka zil ngi ngwasa ti wuzla taŋ, a sa gam dalyama ti hin nah ɓula.

¹⁶«Mbur anta ɗuv zana magala ti gabaga nawaya ta, asi gabaga nawaya a sa muroho zana magala, a ngira nga mbuŋ ava ma.

¹⁷Anta zlurom mbaazla mideɗek ar kwenekwene magalahay ta, asi kwenekwenehey a sa nduzom, mbaazla a ɓul, kwenekwenehey kwana, a sa hiryam. Zuwen a zluroko mbaazla mideɗeke angi kwenekwene nawayahay, kanah na gwat mahiryi purla asi taŋ anta.»

¹⁸Ti Yesu maɓa taŋ kahana na, mbur madiɗa ngir li nah a ndilawa. A girdiˀ a mbuŋ naŋ, a ɓaŋ: «Zuŋ ɗu mongoso a muc le wureˀ ani, na so buca haŋ ava, ɓa a sa mo ti siifa a muŋ.»

¹⁹Dar Yesu a slikiɗam ati mizli ngi seˀeheye, a sipakaŋ.

²⁰Dambalaka, ngwas ada akẽh, ara si bonoy ti pumbus maɓul, a gi di le vi kuruˀ nga cuw. A kiroho ng'avi Yesu ti dirba, a wusaŋ avu mi ngi zana.

²¹Ngwas vuna a ɓi zleˀe ti kwacay naŋ na: «Da ko yi wus di i zana naŋ tekeɗe kwana, yi sa ɗiyi.»

²²Amma Yesu a mbiɗi, a pura, a ɓaŋ: «Tum vu, zuŋ ɗu! Tiɓi ɗik a lihuw le.» Angi nah vuna si na, ngwas a ɗiyi le.

²³Yesu mindil a hay mbur madiɗa tuwa, naŋ mupura mifi bozlorohoy ati zigiduw magam mi wuwwo na,

²⁴a ɓa taŋ: «Kiraham, zuŋ a muc ta, amma a hinje ti hinje.» Amma mizli a singiram angaŋ.

²⁵A dirba taŋ muɓulaka zigiduwo ng'avra na, Yesu a ci, a ja haŋ ngi zuŋ tuwa kaw, joˀ zuŋ a puɗuku.

²⁶Ɓi nah a tisla hirwuy nah gar.

²⁷Ti Yesu macuh le na, dangaray cuw a sipakaŋ bal ti tila mi: «Mangal ngi Davit, pura ndra ircece takwa!»

²⁸Ti Yesu mici ngi haya na, dangaray tuwa a soko ng'avaŋ. Joˀ Yesu a cufuɗa taŋ: «Ki tiɓaka le yi ga gu kwa?» Dangaray a mbiɗakaŋ di: «Haˀaw Buy.»

²⁹Joˀ Yesu a wusa taŋ avu hiri avu hiri, a ɓa taŋ: «Anja a gi kaɓa tiɓi kum vuna.»

³⁰Dar hiri taŋ a wun. A dirba nah, Yesu a buca taŋ, a ɓa taŋ: «Cinaka kuy kuy, anja ko mbur a si na ɓi nah ta!»

³¹Amma taŋ muboko si na, a ɓaka ɓi nah angi hirwuy nah gar.

³²Ti taŋ maboko na, a sakaŋ ti mbur maɓi ɓi gu ta, asi setene a hirnga.

³³Yesu muɓula setene ɓak si na, mbur tuwa a zla a ɓi ɓi. Ɓi nah a zuma hirnga da zigiduwo teˀe, a ɓam: «Ko i puram gwat kahana angi hirwuy Israyele ɗaˀ ta wãˀ!»

³⁴Amma Farisahay a ɓam: «I buy ngi setenehey muvulaŋ gidaŋ ɓa a ɓula setenehey avra.»

³⁵Yesu a liˀi angi walahay madiɗahay ati prokoy gar. A dubun gwat da mizli ar hay ngi dira dibiɗ taŋhay, a til mi ti Ɓimezle ngi Zumabuy ngi muŋ. A mbulo misi jijihey ati misi blehey gar.

³⁶Ti naŋ mupura zigiduw na, a pura taŋ geˀ irceceˀ haɗi, asi a giram le, a hĩhĩyam le wãˀ, taŋ ka tumuŋhoy manja mijigin.

³⁷Dar a ɓa mizli ngi seˀeheye: «Slra ngi sifi naŋ haɗa, amma migi slraˀahaya taŋ haɗa ta.

³⁸Tumbuloko buy ngi sife so, ɓa a slino migi slrahay ng'ar slra naŋ.»