Read South Giziga MRK 1 Bible Online

MRK 1 - South Giziga bible

MRK 1

¹Ɓi mezle ngi Yesu Kristu, Mangal ngi Buymisemuŋ, a zli anihĩ:

²A tohoko ɓi naŋ zleˀe angi ɗerewol ngi Ezayi, mijiviɗ ngi Buymisemuŋ, a ɓi na: «Pura, y'ani slina mislin ɗu a mbuŋ ɗike, ɓa a ɗiyuw jiviɗi.

³Mbur ara til mi a wuzla ɓuh, a ɓi na: «Ɗiyaka jiviɗ da Bumbulvuŋ, cicakaŋ jiviɗ naŋhaya cir cir!»

⁴Naŋ kine, Zaŋ mici mizli ar yama, a bo a ɓuh, ara til mi ngi ci mizli ar yam, a ɓi: «Mbiɗaka mevel kumoyo, anja a cukum ar yam, ɓa Buymisemuŋ a puya mungra kumoy avra.»

⁵Mizli ngi hirwuy Yudehey ati mizli ngi Zerusalemey gar, a ram ng'avaŋ. Taŋ manjikaka mungra taŋhay na, joˀ Zaŋ a ca taŋ ar yam a mizaw Zurdeŋ.

⁶Zaŋ a ki zana mijaka ti ngwic ngi zlogomo, a juwa kwacaya wak ti kanda ngi garaka. Gwat ngi zum naŋ i yuk ati mam ngi ɓuh.

⁷A til mi, a ɓi na: «Mbur ada sawa a dirba ɗu. Naŋ gidaŋ fineˀ ya, yi ndila ter ngi guɓ ngi puska zeweɗ ngi tarak naŋhaya ta.

⁸Yi cukum le ar yam ɓula, amma naŋ a sa cukum ar yam ti ˀUf Mipal.»

⁹Yo ar hin nah na, Yesu a so baɗ a Nazaret, hirwuy Galile, joˀ Zaŋ a caŋ ar yam a mizaw Zurdeŋ.

¹⁰Hirak ti Yesu mabo tir yama na, a pura muŋ a wucuh le wucah, ˀUf Mipal ara po sar nga hirnga naŋ ka gonoko.

¹¹ˀAy a cino paɗ a muŋ, a ɓi: «Ki mangal ɗu ya mawuɗow haɗa, i hĩyã le ɓa i wunuw.»

¹²Ar nah na si na, ˀUf Mipal a ngi hirnga ti Yesu nga wuzlaɓuh.

¹³A zik a wuzlaɓuh a diga hin kukur mufaɗ, Satana ra tikinaŋ. Naŋ a wuzla gwat ngi ɓuhoy, joˀ modro ngi Bumbulvuŋhoy a gakaŋ gwat naŋ mawuɗo.

¹⁴A dirba taŋ mijaka Zaŋ ng'ar dangay na, Yesu aru nga Galile, ara til mi ti Ɓimezle ngi Buymisemuŋ, a ɓi na:

¹⁵«Hin a ndila le muduba, Zumabuy ngi Buymisemuŋ a kiroho le gweˀe! Mbiɗaka mevel kumoyo, tiɓaka Ɓimezle.»

¹⁶Ti Yesu macuh deŋŋe a mi yam madiɗa ngi Galile na, a pur miji kilifey cuw, Simoŋ ati sukum naŋ Andre, a ra kam zuvahay ng'ar yam ɓa a jam kilifi.

¹⁷Yesu a ɓa taŋ: «Supoko ya, yi sa tiri ti kum miji mizli.»

¹⁸Ar nah na si na, a pulaka zuva taŋhaya, a sipakaŋ.

¹⁹A kirih nga mbuŋ neˀ ma na, a pura Zak ati sukum naŋ Zaŋ, ziri ngi Zebedehey, taŋ a hur palalam taŋ, ara ɗiyaka zuva taŋhaya.

²⁰Dar Yesu a zila taŋ kutum. Taŋ a pulaka cine taŋ Zebede ati migi slrahay a hur palalama, a sipakaŋ.

²¹Yo Yesu ati mizli ngi seˀehey a cam ng'ar walahay Kapernahum. Ngi pas sabat na, Yesu a ci ng'ar hay ngi diradibiɗ, a dubuna gwat da mizli.

²²Gwat naŋ madubuna taŋ di na, a zuma taŋ hirnga le haɗa, asi a dubuna taŋ di kaɓa mbur miwi mizli, anta kaɓa ngi buy ngi ɓimujuwahay ta.

²³Hirak ti nah na, mbur ada ar hay ngi diradibiɗ taŋ, setene a hirnga. Mbur tuwa a widi, a ɓi:

²⁴«Ki wuɗ mi avu ndra ka, Yesu mbur Nazarete? Ki so ɓa ngi ziza ndra kwa? Yi sinuw le, ki mbur Mipal ngi Buymisemuŋ.»

²⁵Yesu a mbura himaˀ da setene tuwa, a ɓaŋ: «Taˀa mi, bi ti vu mbur hana!»

²⁶Setene a wusa mbur tuwa ti gidaŋ gwic gwic, a widi ti gidaŋ, a bi ti vaˀa.

²⁷Taŋ gar, ɓi nah a zuma taŋ hirnga le haɗi, a zlaka a cufuɗam vu ar wala taŋ, a ɓam: «I ɓi wana hana ma ska? Hana i dubun nawaya ngi mbur miwi li hã a wa setenehey, a cinakaŋ mi!»

²⁸Angi nah na vuna si na, slimiɗ ngi Yesu a zil ti ka ti ka angi hirwuy Galile gar.

²⁹Ti Yesu mubam tir hay ngi diradibiɗe na, a ram deŋŋe ngi hay Simoŋ ati Andre. Zak ati Zaŋ a ram aseˀeŋ ya.

³⁰Dambalaka milar ngi Simoŋ a ro tupu, vu ava culoko. Ti Yesu mindilo ndil si na, a ɓakaŋ ɓi ngi ngwas nah.

³¹Yesu a kirih ng'avaŋ, a jaŋ kaw avu haŋ, a slikiɗaŋ. Vu muculok tuwa a tislaŋ, a zla a ga taŋ gwat ngi zum.

³²Ngi pastaˀ naŋ, naɓa pas a diɗ le si, mizli a sakaŋ ti misi jijihey gar ati misi setenehey gar.

³³Mizli ngir walahaya gar, a kusom a mizlingre Simoŋ.

³⁴Yesu a mbulo mizli masam bonoy ti jijihey wal wal gar, yo a ɓul setenehey haɗi ti hirnga mizli ma. Ko a pula setenehey ɓa a ɓam ɓi ko neˀ ta, asi taŋ a sinakaŋ le.

³⁵Ngi miprik, ngi li biŋ biŋ aruŋ na, Yesu a slikiɗ, a bi, aru nga pala silaŋ pal naŋ. Joˀ a dir dibiɗ a diga.

³⁶Simoŋ ati cil naŋhay a zlaka a ram ti sipakaŋ.

³⁷Ti taŋ mulumakaŋ na, a ɓakaŋ: «Mizli gar ara ram ti sipi ɗike.»

³⁸Amma Yesu a ɓa taŋ: «Akum ng'ar li mekelem, ng'ar prok migweˀ gweˀhey na, ɓa yi til mi ti Ɓimezle a diga ya. Asi yi so na, vurˀe.»

³⁹Joˀ a bula hirwuy Galile gar, a dubun gwat da mizli ar hay ngi diradibiɗ taŋhay, yo a ɓul seteneheye ma.

⁴⁰Mbur misi kukula a so ng'avi Yesu, a huruk huruk a mbuŋ naŋ, a tumbuloŋ, a ɓaŋ: «Da ki ngum na, ki ɗiyiy gu.»

⁴¹Yesu a puraŋ geˀ ˀircece, a tila haŋ, a wusaŋ, a ɓaŋ: «Yi ngum le, ɗiyi!»

⁴²A haŋhaŋ si na, kukula a muɗ mi le vaŋ, a ɗiyi le kuleɗ kuleɗe.

⁴³Dar Yesu a ji mevel angaŋ, a ɓula kutum,

⁴⁴a ɓaŋ: «Ji lesl, anja ki ɓa ɓi nah da mbur ta. Amma ara biga vu ɗik da masay, yo vula gwat ngi mikuli vur ɗiyi ɗike, kaɓa Moyis miɓa ɗaˀ le na, ɓa mizli gar a sinaka ki ɗiyi le muduba.»

⁴⁵Amma ti naŋ mucuh na, a zla til di mi ti gidaŋ, a waha ɓi nah ar li gar, hã Yesu a ci bidas ng'ar walahaya gu mata, amma a cifi ti vra ti vra ti ɓuhoy. Dar mizli a soko ng'ava ti ka ti ka gar.