Read South Giziga MRK 10 Bible Online

MRK 10 - South Giziga bible

MRK 10

¹Ti Yesu mucuh ti kẽh na, aru nga hirwuy Yude, a dubazaw Zurdeŋ. Zigiduw a kus le gun hirnga naŋ, a dubuna taŋ gwat kaɓa naŋ maga hõyyõ tuwa mani.

²Farisahay a kirohoko ng'ava, ɓa a cam a kwacay naŋ, a cufuɗakaŋ: «Ɓimujuwa ndra a pula jiviɗe le, ɓa mbur a ɓula ngwas naŋ kwa mbrike?»

³Yesu a mbiɗa taŋ di: «Moyis a tuhukum di ar ɓimuɗuva mbrike?»

⁴Taŋ a ɓakaŋ: «Moyis a pula jiviɗ le da mburo, ɓa a tuh ɗerewol ngi ɓula ngwasa toh toh na, naɓa a wunkam zuy.»

⁵Yesu a ɓa taŋ: «Moyis mutuhukum ɓimuɗuva nah na, vur hirnga kumo gidaŋ.

⁶Amma angi zli virzi ngi duniya, Buymisemuŋ miga taŋ na, i zil ati ngwasa.

⁷Vurˀe, zil a sa pula cine ati mumuŋ, a sa jumom ati ngwas naŋ.

⁸Yo taŋ cuw taŋ a sa tiram dumvu purla. Naŋ kahana, t'anta cuw mata, amma dumvu purla.

⁹Vurˀe, gwat Buymisemuŋ mujumo le na, anja mbur a wunka mata.»

¹⁰Ti taŋ mindilam a haya na, mizli ngi seˀehey a cufuɗaka Yesu vur ɓi nah ma.

¹¹A ɓa taŋ: «Da mbur a ɓula ngwas naŋ le, a zuɓ mekelem le na, naɓa a gi madama le avu ngwas naŋ mudumbuŋ.

¹²Naŋ kine ya, da ngwasa pula zil naŋ le, a sliˀi le na, naɓa a gi madama le.»

¹³Mizli a soko ti ziri ng'avi Yesu, ɓa a buca haŋ avu taŋ, amma mizli ngi seˀehey a bucaka taŋ.

¹⁴Yesu mupura kahana na, a ji mevel, dar a ɓa taŋ: «Pulaka ziri a soko nga vi ya! Ki tikaka taŋ ta, asi zumabuy ngi muŋ i ngi mizli misi ka taŋ.

¹⁵Gisiŋ, yi ɓu kum na: mbur matiɓa zumabuy ngi Buymisemuŋ kaɓa zuŋ meciɗek ta na, anta sa ci anga ta.»

¹⁶Dar a zuɓa ziri tuwa gumbuˀ gumbuˀ a haŋ, a buca haŋ avu taŋ bacca bacca, a ɗuwula taŋ mi.

¹⁷Ti Yesu mazuɓa jiviɗ na, mbur a kilo ti kil ng'avaŋ, a huruk huruk a mbuŋ naŋ, a cufuɗaŋ: «Kumani mezle, sey yi gi mi ɓa i lum siifa ngi sete ka?»

¹⁸Yesu a ɓaŋ: «Ki ziliy mbur mezle vur mike? Mezle sey i Buymisemuŋ pal naŋ, mekelem anta.

¹⁹Ki si na ɓimuɗuva le: ‹Ki kiɗ hirnga ta, ki gi madama ta, ki hul ta, ki gi sedewo ti slir ta, ki gi malambaˀ da mbur ta, ɗuva hirnga da bunuk ati munuko.›»

²⁰Mbur tuwa a mbiɗaŋ di: «Kumani, yi zla ja ɓi hana a hirnga diga ya misi ti zuŋ.»

²¹Yesu a puraŋ cum cum, a wuɗaŋ le, a ɓaŋ: «Gwat purla a ndiruw le: ara hiɗika gwat ɗikey gar avra, ɓa ki vula dala nah da misi murgahay, ɓa kisa lum zlili ngi muŋ. Yo so sipiy so.»

²²Amma mbur tuwa, naŋ micina mingiɓi hana na, a gaŋ kuy ta, aru ti ndurɗo hiri, asi naŋ ti zlili haɗi.

²³Yesu a bula hiri bal bal a cikeˀe akẽh na, a ɓa mizli ngi seˀeheye: «Kay, naŋ tuwaˀ ɓa misi zlilihey a cam ng'ar zumabuy ngi Buymisemuŋ!»

²⁴Mizli ngi seˀeheye, ɓi nah a zuma taŋ hirnga haɗa, amma Yesu a ma taŋ hiri nah ma, a ɓi: «Ziri ɗuwoy, kay, naŋ tuwaˀ ɓa ngi ci ng'ar Zumabuy ngi Buymisemuŋ!

²⁵Zlogomo a ci tir vigiɗ ngi batala kutum fineˀ mbur misi zlili maci ng'ar Zumabuy ngi Buymisemuŋ.»

²⁶Ɓi nah a zuma taŋ hirnga ti gidaŋ ava ma, a ɓam ar wala taŋ: «Da kine na, malih gu i waka?»

²⁷Yesu a pura taŋ cum cum, a ɓa taŋ: «Avu mizli, i gwat magi ta ɓula, amma avu Buymisemuŋ, kanah ta, asi gwat mafucuka Buymisemuŋ, anta.»

²⁸Piyere zla a ɓaŋ: «Ani, ndra, i puloko gwat ndraˀahaya le gar ɓa i supukuw.»

²⁹Yesu a ɓaŋ: «Gisiŋ, yi ɓu kum na: da mbur a pula hay naŋ le, malla sukum naŋ mizilehey ati mongosohoy, mumuŋ, cine, ziri naŋhay, malla guva naŋhay asi ya, yo asi Ɓimezle na,

³⁰angi hin misi wurenna, a sa lum hayay, sukum naŋ mizilehey ati mongosohoy, mumuŋ naŋhay, ziri naŋhay ati guva naŋhay, waɗ a sa lum mizli masipakaŋ nder ndere ma, makaw skat. Yo angi hin masa sawa, a sa lum siifa ngi sete.

³¹Amma mizli ngi mbuŋhoy haɗi a sa tiram ngi dirbahay, yo mizli ngi dirbahay haɗi, a sa tiram ngi mbuŋhoy.»

³²Yesu ati mizli ngi seˀeheye, taŋ a jiviɗ, ara ram nga Zerusalem. Yesu naŋ ɓaˀ a mbuŋ taŋ. Mevel ara sla mizli ngi seˀeheye, yo mizli maram asi taŋ ara zluwunam. Yesu a hila mizli mukuruˀ nga cuwo baˀ pal taŋ, a zla a ɓa taŋ ɓi ngi gwat masa gi ava:

³³«Cinam, ani i ra ram nga Zerusalem. Adiga, a sa vulaka Mangal ngi mburo da masay madiɗahay ati buy ngi ɓimujuwahay, ɓa a jakaŋ. A sa gakaŋ kiita ngi muc, a sa vulakaŋ asi haŋ ngi mizli duniyahay.

³⁴A sa singiram angaŋ, a sa tufakaŋ tazlay, a sa sliɗakaŋ, a sa kiɗakaŋ vagay. Yo hin makir a dirba nah na, a sa slikiɗi.»

³⁵Yo Zak ati Zaŋ, ziri ngi Zebedehey, a kirohoko ng'avi Yesu, a ɓakaŋ: «Kumani, gwat ndra masa cufuɗam avu ka na, i wuɗam anja ki ga ndra di.»

³⁶Yesu a ɓa taŋ: «Ki wuɗam ɓa yi gukum mike?»

³⁷A ɓakaŋ: «Pula ndra jiviɗ ɓa i cifam ar li ngi dudok ɗike, mbur pal tir vay hazum ɗik, pal mekeleme kwana, tir vay gula ɗiki.»

³⁸Amma Yesu a ɓa taŋ: «Ki sinaka gwat kum macufuɗama ta. Sikiɗ ngi bonoy ya masa sa na, ki saka gu kwa? Malla ci ar yam ya masa ci na, ki cam anga gu kwa?»

³⁹Zak ati Zaŋ a ɓakaŋ: «I ɓusaka gu.» Yesu a ɓa taŋ: «Sikiɗ ngi bonoy ya masa sa na, kisa saka, yo ci ar yam ya masa ci na, kisa cam.

⁴⁰Amma ɓa ngi cifi tir vay hazum ɗu ati vay gula ɗu na, mavula jiviɗ naŋ, i ya ta. Asa vulaka da mizli miɗiyaka hĩˀĩ vur taŋ.»

⁴¹Mizli mekelemey mukuruˀhoy micinaka ɓi nah kahana na, a jam mevel ar Zak ati Zaŋ.

⁴²Yesu a zila taŋ, a ɓa taŋ: «Ki sinaka le, mizli micifaka taŋ le kaɓa buyoy angi zigiduw na, ara tikaka ˀay da mizli, mizli madiɗahay kwana, ara waka mizli.

⁴³Amma a wuzla kumo, kanah ta. Da mbur a wuzla kumo, a wuɗ le ɓa a tiri madiɗa na, anja a tiri gawla kum jak.

⁴⁴Yo da mbur a wuzla kumo, a wuɗ le ɓa a tiri mbur mudumbuŋ na, sey a tiri beke ngi mizli gar.

⁴⁵Asi Mangal ngi mbur a so na, ɓa mizli a gam gawla naŋ ta, amma ɓa a gi gawla ngi mizli, yo ɓa a vula siifa naŋ ngi mbiɗi hirnga ngi mizli haɗi.»

⁴⁶A ndilam le a Zeriko. Ti Yesu mabi ti Zeriko ati mizli ngi seˀehey waɗ zigiduw haɗi na, Bartime, mbur dangar, mangal ngi Time, a cifi le aciki jiviɗi, ara suk gwat avu mizli macohomo.

⁴⁷Ti naŋ micina, i Yesu mbur Nazaret macuh na, a zla tila mi: «Yesu, Mangal ngi Davit, puriy ˀircece takwa!»

⁴⁸Mizli haɗi a bucakaŋ ɓa a taˀa mi, amma naŋ a til mi ti gidaŋ ava ma jak: «Mangal ngi Davit, puriy ˀircece takwa!»

⁴⁹Yesu a cici, a ɓi: «Ziloko di.» A ziloko mbur dangar tuwa, a ɓakaŋ: «Tum vu, slikiɗi, ara ziluw.»

⁵⁰A hiziga godo naŋ kacap avra, a slikiɗ bap, a so ng'avi Yesu.

⁵¹Yesu a cufuɗaŋ: «Ki wuɗ ɓa i guw mike?» Dangar a mbiɗaŋ di: «Kumani, anja ɓa yi pur.»

⁵²Yesu a ɓaŋ: «Tiɓi ɗik a lihuw le, a ru.» Ar nah si na, ara pur, dar a zuɓa jiviɗ, a sipa Yesu.