Read South Giziga MRK 11 Bible Online

MRK 11 - South Giziga bible

MRK 11

¹Ti taŋ mandilam nga Zerusalem, gweˀ avu Betfage ati Betani, kini ng'avi muwã Tutumbur na, Yesu a slin mizli ngi seˀehey cuw, a ɓa taŋ:

²«A ram ng'ar walahay ngi mbuŋ kum na. Kum masa cam ti ci aruŋ si na, kisa lumam zinga ngi zungu mujuwa le kaˀ, mbur a jiɗ ɗaˀ a duba naŋ t'aruŋ. Puskoko di, soko di.

³Da mbur a cufuɗukum le: ‹Ki gam di mike› na, ɓakaŋ: ‹I Buy mawuɗo.› Naɓa a sa pulukum di ng'aka kutumo si.»

⁴Joˀ a ram, a lumam zinga ngi zungu, mujuwa le kaˀ a jiviɗe, gweˀ avu mizlingre. Dar a puskakaŋ.

⁵Mizli mekelemey misi akẽh a ɓaka taŋ: «Ki puskaka zinga ngi zungu nah ngi gi mike?»

⁶Taŋ a mbiɗaka taŋ di kaɓa Yesu muɓa taŋ tuwa, joˀ mizli a pulaka, a ram di.

⁷A ram ti zinga ngi zungu tuwa da Yesu, a ciyaka zana taŋhay a duba naŋ, Yesu a cifi anga.

⁸Mizli haɗi a ciyaka zana taŋhay a jiviɗe, mekelemey a bucam kalafay, taŋ mungumoko taŋ ar guvahay.

⁹Mizli maram a mbuŋ, waɗ masipakaŋ na, a tilam mi: «Buymisemuŋ naŋ ti dudok! Anja Buymisemuŋ a ɗuwula mi da mbur maso ti slimiɗ nga naŋ Bumbulvuŋ!

¹⁰Anja Buymisemuŋ a ɗuwula mi da Zumabuy masa sawa, zumabuy ngi cine ndra Davit! Dudok da Buymisemuŋ misesẽŋ a muŋ!»

¹¹Joˀ Yesu a ci nga Zerusaleme, ara ci ar hay ngi Bumbulvuŋ. Naŋ mubula hiri bal bal gun hirnga naŋ, naɓa hiikuɗ migi le si na, a bi, aru nga Betani ati mizli mukuruˀ nga cuwoyo.

¹²Ngi li naŋ muwun, ti taŋ maboko ti Betani na, may ara ja Yesu.

¹³A pur ˀuruf kileŋ, miɗiɗi le tukuf, aru nga pura da zliv a lum yi avaˀa kwana. Amma ti naŋ mindil ava na, a lum sey kalaf tewle, asi i hin ngi yi ngi ˀuruf t'aruŋ.

¹⁴Dar Yesu a ɓa ˀurufo: «Anja mbur a zum yi ɗike mata ndiɗaˀ wãˀ!» Mizli ngi seˀehey ara cinakaŋ.

¹⁵Yo a ndilam a Zerusaleme, Yesu mici ng'ar hay ngi Bumbulvuŋ na, a zla ɓula migi cikilihey ati mihiɗika gwatay ar hay ngi Bumbulvuŋ, a putukuso tebur ngi mimbiɗi dalahay ati janga ngi migi cikili ngi ɗiyuw dirgwaɗaya.

¹⁶A pul mbur ko pal, a zuɓ gwat ɓa a cuh di tir hay ngi Bumbulvuŋ ta wãˀ.

¹⁷Joˀ a dubuna taŋ gwat, a ɓa taŋ: «A tohoko na: ‹Hay ɗu, a sa zilaka hay ngi dira dibiɗ vur sukwi ngi mizli gar ta kwa?› Amma kumo, ki tiram di buutum ngi mufuyvuhoy mbrike?»

¹⁸Masay madiɗahay ati buy ngi ɓimujuwahay, a cinaka ɓi nah le, a puram wer ngi ziza Yesu, amma ara zluwunam, asi gwat naŋ madubuna da mizli na, a ga mizli welele.

¹⁹Hiikuɗ miji na, Yesu ati mizli ngi seˀehey a bam tir walahaya.

²⁰Ti taŋ macohom ngi miprike na, a puraka ˀuruf tuwa, a muˀul le sok gar ti slaslalak naŋhaya.

²¹Piyer a wulka keŋ, a ɓa Yesu: «Kumani, pura ˀuruf ka minisa tuwa, a muˀul le soko.»

²²Yesu a mbiɗa taŋ di: «Tuɓaka Buymisemuŋ!

²³Gisiŋ, yi ɓu kum na: Da mbur a ɓa muwã hana le: ‹Budugur ti kẽh, ara ndil ar mubuliy›, da a wuluk cuw cuw a mevele ta, amma a tiɓa le, gwat hana a sa gi na, a sa pulakaŋ jiviɗ nah.

²⁴Vurˀe, yi ɓukum na: Gwat gar kum macufuɗam ar diradibiɗ na, tiɓaka, kite ki lumaka le si, a sa vulukum gwat nah vuna.

²⁵Da ki cicam le deŋ, ki ra diram dibiɗ, da ki zluɓam ɓi le avu mbur na, gakaŋ wereke, ɓa Cine kum misemuŋ a pulukum mungra kumoy ya.

²⁶Amma da kum anta ki pulaka gwat malambaˀ ngi mizli magukum di ta na, naɓa Cine kum mise amuŋ anta sa pulukum malambaˀ kumo ta ya.

²⁷Yesu ati mizli ngi seˀeheye, a mam nga Zerusalem a muŋ. Ti Yesu maliˀi a hur hay ngi Bumbulvuŋ na, masay madiɗahay ati buy ngi ɓimujuwahay waɗ mizli micawwahay a kirohoko ng'avaŋ,

²⁸a ɓakaŋ: «Ka maga gwat hana ti gidaŋ ngi waka? Muvuluw gidaŋ ngi gi naŋ i waka?»

²⁹Yesu a ɓa taŋ: «Y'ani cufuɗukum purla si. Mbiɗikiy di. Yo ɓa ya maga gwat hana ti gidaŋ ngi waka na, yi sa ɓukum di ya:

³⁰Zaŋ mici mizli ar yama, mislino di i Buymisemuŋ kwa, malla i mizli mislinoko di? Mbiɗikiy di so.»

³¹Ammahirik a ngilam wuy ar wala taŋ, a ɓam: «Dˀani i ɓam le: ‹I Buymisemuŋ mislino di› na, a sa ɓi: ‹Na, ki tiɓakaŋ ta vur mike?›

³²Malla da i ɓam le: ‹I mizli mislinoko di ma› na, na, i zluwunam ti zigiduw ma, asi mizli gar a sinaka le, Zaŋ i mijiviɗ gisiŋ.

³³Dar a mbiɗaka da Yesu: «I si na ka ta» Yesu a ɓa taŋ: «Ya kwana, kanah ya. Ya maga gwat hana ti gidaŋ ngi waka na, y'anta ɓukum di ta ya.»