Read South Giziga MRK 13 Bible Online

MRK 13 - South Giziga bible

MRK 13

¹Ti Yesu mabi le tir hay ngi Bumbulvuŋ a Zerusaleme na, mbur pal a wuzla mizli ngi seˀehey a ɓaŋ: «Kumani, pura ɗugur mezle tayna ayɗi, pura taŋ mindiraka ayɗi!»

²Yesu a ɓaŋ: «K'ada pura hay madiɗa mindira hana kwa? Ko ɗugur pal masa ndir jirngasl a hirnga cala anta, a sa mbizlaka gar.»

³Yesu a cifi le a muwã Tutumbur, puɗak a mihiri ngi hay ngi Bumbulvuŋ. Piyer, Zak, Zaŋ waɗ Andre, taŋ baˀ pal taŋ ati naŋ, a cufuɗakaŋ:

⁴«Inga ɓa ndra di, gwat nah vuna a sa gi ti vunaka? Ti naŋ masa gi na, masa biga gwat nah ara gi so na, i mike?»

⁵Dar Yesu a zla a ɓa taŋ: «Jam lesl, anja mbur a gukum gilaw ta.

⁶Mizli haɗi a sa soko ti slimiɗ ɗu, a sa ɓam: ‹I ya!› A sa zizam mizli haɗi.

⁷Ti kum masa cinam labara ngi vurum ati hurum ngi vurum na, anja didak a muɗukum ta. Sey gwat nah a gi, amma i kiɗa mi ngi duniya t'aruŋ.

⁸Mizli a sa kiɗam vu, sukwi ati sukwi, Zumabuy ati zumabuy. Hirwuy a sa wus hiɓik hiɓik angi li wal wal haɗi, may a sa gi. A sa gi i zli virzi ngi kwacay maji vu ngi yi.

⁹Amma kumo, ndiram ɗeŋ ɗeŋ. A sa vulukum ar kiita. Angi hay ngi diradibiɗeye, a sa mbukum ti kiɗ. A sa cucukum a mbuŋ buy miwi lihey, a mbuŋ buy madiɗahay asi ɓi ɗu, ɓa kisa gaka taŋ sedewo ɗu.

¹⁰Na sey da a tilaka mi ti Ɓimezle le da sukwi ngi mizli gar ɗagay far.

¹¹Ti taŋ masa ram ti kum, ɓa a vulukum asi haŋ ngi mizli na, anja didaka muɗukum daf ar ɓi kum masa ɓama ta. Amma ɓi kum masa lumam ar pas nah na, ɓakaŋ, asi i kum masa ɓam ta, amma i Uf Mipal masa ɓi.

¹²Sukumuŋ a sa vula sukum naŋ, ɓa a kiɗaka vagay, cine ngi mangal a sa gi ti mangala kanah ya. Ziri a sa slikiɗam ɓi ar miyi taŋhay, a sa vulaka taŋ ɓa a kiɗaka taŋ vagay vagay.

¹³Mizli gar a sa gam ti kum mesene asi slimiɗ ɗu. Amma mbur micici le zlak hã avu kiɗa mi naŋ na, a sa lih.»

¹⁴Ki sa puraka mukuy ta wãˀ, mihirya gwata, a cici le angi li mizlir ɓa a cici anga zleˀe ta. Anja mbur maslufa ɓi hana, a sla wala naŋ. Akẽh na, mizli misi a Yude, anja a kilam nga muwãhay.

¹⁵Mbur misi a hirnga ngbale, anja a pi sar, ngi ci ngi hay ngi zuɓa gwata ta.

¹⁶Mbur misi ar guva, anja a mi ngi hay ngi zuɓa godo naŋ ta.

¹⁷Ngwas misi ti huroy ati misi ziri a dubahay tapasa na, kay, taŋ ar bonoy!

¹⁸Diram dibiɗ, ɓa anja gwat nah a ndilo ti kiya ngi himiɗ ta.

¹⁹Naŋ kine, tapasa, mizli a sa sam bonoy haɗi. Zle avu Buymisemuŋ miga duniya hã wurenna na, ko mbur misi bonoy kanah anta, yo ko mbur masa si bonoy kanah anta ndiɗaˀ wãˀ.

²⁰Yo da Bumbulvuŋ a ma hin tayna degweleˀ zleˀe ta na, ko mbur pal masa ndir ti siifa, anta. Amma a ma hin tayna le degweleˀ, tisi mizli naŋ muwuna taŋ da naŋ.

²¹Da mbur a sa ɓukum le: ‹Puraka, Mesi n'anihĩ!› malla: ‹Puraka, n'ani a diga na!› ko ki tiɓaka ta.

²²Naŋ kine, mesi misi sliray ati mijiviɗ misi slirey a sa boko, a sa gam gwat ngi zuma hirnga ati cekenehey, da a gi na, ko mizli Buymisemuŋ muwuna taŋ na, a zizaka taŋ.

²³Kumo so na, jam lesl, gwatay masa cohom gar na, yi ɓukum di le daf dumbuŋ.

²⁴«Amma tapasa, mizli a sa sam bonoy haɗi, a dirba nah, pas anta sa wucuɗ mata, kiya anta sa pusluɗ mata,

²⁵wurzlaŋhay a sa diɗoko paɗ ti muŋ, yo gwat misi gidaŋ ngi muŋhoy a sa wusam.

²⁶Ar nah na, a sa puraka Mangal ngi mbur ara sawa, gazlavay gun hirnga naŋ, naŋ ti gidaŋ naŋ wãˀ waɗ dudok naŋ wãˀ.

²⁷Dar a sa slina modro naŋhay nga mivay ngi ruwuy mufaɗ gar, zle avu kiɗa mi ngi ruwuy hã avu mekelem, ɓa a cikila mizli muwunahaya.

²⁸«Slaka wala ngi ɓi miwa weˀ avu ˀuruf ani. Da mihaŋ naŋhay ara gam luɓuw luɓuw, yo ara ɗiɗam na, naɓa ki sinaka le mohoro naŋ gweˀe.

²⁹Naŋ kanah, da kum mupuraka le gwat tayna ara gam na, sinaka sin le, naɓa Mangal ngi mburo naŋ gweˀ ngi sawa, naŋ a mizlingre kum.

³⁰Gisiŋ, yi ɓu kum na: hana gar a sa gi na, naɓa mizli migwenehey a micam gar t'aruŋ.

³¹Muŋ ati hirwuy a sa susuymom, amma mingiɓi ɗu anta sa susuyum ta.

³²«Amma hin malla pas ngi gwat tayna masa gam na, ko mbur misina anta, ko modro ngi muŋhoy a sinaka ta, ko Mangal vuna a si na ta, sey Cine pal naŋ misinaŋ.

³³Jam lesl, anja ki hinjam ta, asi ki sinaka pas, naŋ masa sawa ta.

³⁴«A sa gi kaɓa mbur maru nga mulak. A pula hay naŋ asi haŋ ngi gawla naŋhay, ko wa gar ti slra naŋ, ti slra naŋ. A ɓa mijigina mizlingre, anja a hinje ta.

³⁵Naŋ kine, anja ki hinjam ta so, asi ki sinaka pas ngi buy ngi haya masa sawa ta. Ti pastaˀ kwa, malla ko ti wuzla duvuɗ kwa, rak ti kucukur maji ˀay kwa, malla ti miprik kwa?

³⁶Da a so le gurjik na, anja a lumukum ki ra hinjam ta.

³⁷Ɓi ya muɓukum di na, yi ɓa da mizli gar, ki hinjam ta so!»