Read South Giziga MRK 14 Bible Online

MRK 14 - South Giziga bible

MRK 14

¹A ndir hin cuw ɓa a gaka muguzlum ngi Pak waɗ ngi ɗaf manja ˀis araŋ. Masay madiɗahay ati buy ngi ɓimujuwahay ara puram jiviɗ ɓa a jaka Yesu ti wer, ɓa a kiɗaka vagay.

²Asi a ɓam na: «I jaka ar muguzlumo ta, vur mizli masa slikiɗam ɓi.»

³Yesu a ro hay Simoŋ misi kukula a Betani. Ti naŋ mazum ɗaf na, ngwasa sawa, naŋ ti gojogoɗ ngi ɗugur marva. Urdi miga ti nardi [6] pal naŋ mbaf araŋ, cikili naŋ tuwaˀ haɗa teˀe. A waha gojogoɗ ngi ɗugur marva tuwa, a mbiɗa mal naŋ nga hirnga Yesu.

⁴Mizli mekelemey a jam mevel, a ɓam: «A hiryaka urdi hana lambaˀ kanah mbrike?

⁵Anja a hiɗika urdi hana avra fineˀ suloy [7] skat makir ɓa ngi vula dala nah da misi murgahay ta kwa!» Joˀ a jam mevel ar ngwas tuwa.

⁶Amma Yesu a ɓi: «Pulaka ngwasa, ki girakaŋ vur mike? Gwat naŋ miga hana, avu ya, naŋ kuy haɗa.

⁷Asi mike na, misi murgahaya, t'ada a ati kumo ndrehhe. Da ki wuɗam le na, ki gaka taŋ mezle gu. Amma ya, y'anta ndrehhe ati kumo ta.

⁸Gwat naŋ maga gu na, a ga le, a kuciy urdi daf dumbuŋ, ɓa ngi ɗiyiy ng'ar vigiɗi.

⁹Gisiŋ, yi ɓu kum na: ko maka gar masa tilam mi ti Ɓimezle ar duniya na, a sa slufaka, ɓa a wulkam ar gwat ngi gi ngi ngwas hana.»

¹⁰Akẽh na, Yudas Iskariyot, mbur ngi wuzla mizli mukuruˀ nga cuwoyo, aru ng'avi masay madiɗahaya, ɓa a vula taŋ Yesu.

¹¹Taŋ micinaka ɓi nah na, a mumulom haɗa, a ɓakaŋ ɓa a sa vulakaŋ dala. Dar Yudas a pur jiviɗ ngi vula taŋ Yesu, ɓa a jakaŋ ti tuwaˀ ta.

¹²Hin mudumbuŋ ngi muguzlum ngi ɗaf manja ˀis araŋ, hin ngi kiɗa tumuŋ ngi Pak na, mizli ngisi Yesuhoy a ɓakaŋ: «Ki wuɗ ɓa i ra ɗiyaka gwatay ɓa kisa zuma ɗaf ngi muguzlum Pak amaka?»

¹³Joˀ Yesu a slin mizli cuw ar wala ngi mizli ngi seˀeheye, a ɓa taŋ: «A ram ng'ar walahay. Mbur ada na, a sa ji hirnga ti kum, taˀ ti yam ti kukulum a hirnga. Sipakaŋ.

¹⁴Hay naŋ masa ci anga na, ɓaka buy ngi haya: ‹Kumani a ɓi na: viŋ ya masa zuma ɗaf ngi muguzlum Pak anga ati mizli ngisi yahay na, naŋ maka?›

¹⁵Naŋ a sa bugukum hay mijirgasl a hirnga cala, mikiɓiŋ kiɓiŋ, mufuca le, miɗiya gwataya le angaŋ, ki ɗiyam ndra gwatay a diga.»

¹⁶Mizli ngi seˀehey tuwa, a bam, a ram ng'ar walahaya, a lumaka gwatay gar kaɓa Yesu miɓa taŋ di tuwa. Joˀ a ɗiyaka gwat ngi zum ngi muguzlum Paka.

¹⁷Ngi pastaˀa, Yesu a ndiloko ati mizli ngi seˀehey mukuruˀ nga cuwo.

¹⁸Ti taŋ micifam, ara zumam na, Yesu a ɓi: «Gisiŋ, yi ɓukum na: mbur pal asi kum a sa vuliy da mizli ɓa a jikiy, i mbur mazum gwat ati ya na.»

¹⁹Mizli ngi seˀehey a ndurɗom hiri, mbur gar a cufuɗaŋ, a ɓaŋ: «I ya kwa? I ya kwa?»

²⁰A ɓa taŋ: «I mbur ngi wuzla kum mukuruˀ nga cuwoy, maca haŋ ng'ar sikiɗ ati ya na.

²¹Gisiŋ, Mangal ngi mbur a sa cuh kaɓa mutohoko ɓi naŋ. Amma mbur masa vulaŋ ɓa a jakaŋ na, kay, naŋ ar bonoy! Anja zuwen taŋ miyaka mbur nah zleˀe ta, a funa le!»

²²Ti taŋ mazumam ɗafa, Yesu a zuɓa ɗaf, a dirba naŋ muɗuwul mi ara na, a ngila, a vula da mizli ngi seˀeheye, a ɓa taŋ: «Ani, tiɓaka, hana i dumvu ɗu.»

²³Dar a zuɓa sikiɗ misi ti mbaazla, a dirba naŋ miga siseˀ da Buymisemuŋ na, a vula taŋ di, taŋ gar a sakaŋ.

²⁴Joˀ Yesu a ɓa taŋ: «Hana i pumbus ɗu, pumbus ngi jumoˀay, a pi vur mizli haɗi.

²⁵Gisiŋ, yi ɓukum na: Y'anta sa si mbaazla misenna mata wãˀ, hã tapas ya masa si nawaya ar Zumabuy ngi Buymisemuŋ.»

²⁶Dar a zlam dimis ngir ɗerewol Dimis, a dirba nah, a bam nga muwã Tutumbur.

²⁷Yesu a ɓa taŋ: «Kum gar, kisa kilam, asi a tohoko le, a ɓi: ‹I sa kiɗa mijigine vagay, tumuŋhoy a sa zliɗam hirnga.›

²⁸Amma a dirba ya misa slikiɗ le na, yi sa ru dumbuŋ ar kum nga Galile.»

²⁹Piyer a ɓaŋ: «Ko da mizli gar a kilam le kwana, ya, y'anta sa kil ta ndiɗaˀ wãˀ.»

³⁰Yesu a ɓaŋ: «Gisiŋ, yi ɓuw na: duvuɗ dana, ɓa hã kucukur a sa ji ˀay ˀis cuw na, naɓa ka, ki ji mi le, ki siniy ta, ki siniy ta, ˀis makir si.»

³¹Amma Piyer a ɓi ti gidaŋ ma: «Ko da a bi ngi muc ati ka kwana, kay, y'anta sa ji mi ti ka ta ndiɗaˀ wãˀ.» Mizli ngi seˀe mekelemey gar a ɓam kanah ya.

³²Dar a ndilam ar li mazilaka Getsemane, Yesu a ɓa mizli ngi seˀeheye: «Y'ani ra dirdibiɗ, cifam aka kwaɗay.»

³³A zuɓa Piyer, Zak waɗ Zaŋ, a ram bumoˀ. Zluwun a gaŋ, didak a zla muɗaŋ,

³⁴a ɓa taŋ: «Didak a muɗiy le wãˀ ngi mucu. Cifam aka, ki hinjam ta.»

³⁵Yo aru kileŋ neˀ, a hin kup a ruwuy, a dir dibiɗ ɓa zliv da a gi na, pas nah a cuh kileŋ ava.

³⁶A ɓi: «Aw Baha, Cine ɗu, gwat mafucukuw anta, kiraha sikiɗ ngi bonoy hana kileŋ avu ya. Amma anta kaɓa ya mawuɗ ta ɓula, sey kaɓa ka mawuɗo.»

³⁷A so na, a luuma taŋ ara hinjam. A ɓa Piyere: «Simoŋ, ki hinje kwa? Ki lum gidaŋ ngi cifi joˀ titiri ko ler pal gu ta kwa!

³⁸Ki hinjam ta, diram dibiɗ, ɓa ki cam ar tikin ta. Mevel ada ɓula, amma dumvu a hĩhĩy le.»

³⁹A kirih neˀ ava ma, a dir dibiɗ, a ɓi ɓi misi purla ka naŋ miɓa zleˀe tuwa ma.

⁴⁰Dar a mawa ma, a luuma taŋ ara hinjam ma ni, asi hiri ziriɓ ziriɓ wãˀ. A sinaka ɓa a ɓakaŋ kini ta.

⁴¹Ti naŋ mumo sar mimakir naŋ na, a ɓa taŋ: «Kira hinjam, yo ki ra muskam vu aruŋ kwa? Muk muduba so! Ler a ndila le. Puraka, a vulaka Mangal ngi mburo le asi haŋ ngi migi mungrahay.

⁴²Slikiɗam, akum le! Puraka, mbur mavuliy ɓa a jikiy na, a ndilo le.»

⁴³A haŋhaŋ, ti naŋ maɓi aruŋ si na, Yudas, mbur ngi wuzla mizli mukuruˀ nga cuwoyo, a ndilo ti zigiduw haɗi aseˀeŋ, vu kaˀ kaˀ ti maslalam ati gandayay. Mislinoko taŋ, i masay madiɗahay, buy ngi ɓimujuwahay waɗ mizli micawwahay.

⁴⁴Yudas, mbur mawuɗ a vulaŋ tuwa, naŋ masa biga taŋ di na, a ɗiyaka ɓi nah le ati taŋ, a ɓa taŋ: «Mbur ya masa jaŋ kuɓuy na, i naŋ. Jakaŋ, a ram di, jiginaka kuy kuy.»

⁴⁵Naŋ mindilo si na, aru ng'avi Yesu, a ɓaŋ: «Kumani!» Joˀ a jaŋ kuɓuy.

⁴⁶Mizli mekelemey a ndilam vu kuvbum ar Yesu, a jakaŋ.

⁴⁷Mbur pal a wuzla mizli misi ati Yesu akẽh, a muɗo maslalam, a nguma gawla ngi masay madiɗa, a bukoŋ slimiɗe krac.

⁴⁸Yesu a zla a ɓa taŋ: «Ki soko ti maslalam ati gandayay nga ji ɗu kaɓa yi mufuyovu mbrike?

⁴⁹Vur hin gar na, y'ada ati kum ar li dubuna gwat da mizli ar hay ngi Bumbulvuŋ a Zerusaleme, ko ki jikiy ta. Amma a gi kahana, ɓa Ɓimutoho gar a gi muduba.»

⁵⁰Dar mizli ngi seˀehey gar a pulakaŋ, a kilam.

⁵¹Gawla mekelem ada sipa Yesu, naŋ ti zana gijaw avu vu tewle. A jakaŋ,

⁵²amma naŋ a pula zana naŋ kacap, a kil gulndiŋ kine.

⁵³A ram ti Yesu ngi hay masay madiɗa, masay madiɗahay gar, mizli micawwahay ati buy ngi ɓimujuwahaya, a kusom le cek a diga.

⁵⁴Piyer ara supo di zar kileŋ, hã wazlaray masay madiɗa tuwa. A cifi le ati gawla ngi hayay, ara naˀam vu.

⁵⁵Yo masay madiɗahay ati madiɗa mingila wuyoyo, a wuɗam sedewo vur Yesu ɓa a gakaŋ kiita ngi mucu, amma a lumam ta.

⁵⁶Mizli haɗi a gam sedewo ti slir a hirnga Yesu, amma sedewo taŋ, a jam haŋ ta ma.

⁵⁷Mizli mekelemey a slikiɗam ɓa a gam sedewo ti slir ar naŋ, a ɓam:

⁵⁸«I cinaka zleˀe, a ɓi na: ‹I sa mbizla hay ngi Bumbulvuŋ misi a Zerusalem, mizli mindiraka na, yo angi hin makir na, yi sa ndir mekelem, misi i mizli masa ndiraka ta.›»

⁵⁹Amma ko gar ti nah kwana, a jumomˀay ar sedewo taŋhaya ta si.

⁶⁰Masay madiɗa, a slikiɗ a wuzla kus tuwa, a cufuɗa Yesu: «Sedewo, mizli tayna magaka taŋ ar ka gar na, ki mbiɗa neˀ ta wãˀ kwa?»

⁶¹Amma Yesu aro lek lek, a mbiɗa ko neˀ ta. Masay madiɗa a cufuɗa ma, a ɓaŋ: «Ki Kristu, Mangal ngi Bumbulvuŋ ndra maɗuwulakaŋ mi na kwa?»

⁶²Yesu ɓaŋ: «I ya. Yo kisa puraka Mangal ngi mburo, a cifi le joˀ tir vay hazum ngi Buymisemuŋ misi gidaŋ wãˀ. Yo ara sawa ar gazlavay a muŋ ma.»

⁶³Masay madiɗa a ngira zana naŋhaya, a ɓi: «I wuɗam sedewo ngi mi aruŋ maka?

⁶⁴Ki cinaka naŋ maza Buymisemuŋ na le. Ki wulkam mbrike?» Taŋ gar a slakaŋ kiita, a ndila le ngi kiɗ vagay.

⁶⁵Mekelemey ar wala taŋ, a zlaka a tufakaŋ tazlay, a juwakaŋ hiri, a turɓusoko haŋ, a kiɗakaŋ, a ɓakaŋ: «Mukuɗuw na, i waka? Njika so.» Joˀ gawla migi slrahay a tiɓaka Yesu, a cakaŋ babarva.

⁶⁶Ti Piyere muro a ruwuy, a wazlaray na, diili pal a wuzla diili migi slra ngi masay madiɗa a ndilawa.

⁶⁷A pura Piyer maniˀi vu tuwa, a singila, a singila na, a ɓaŋ: «Ka kwana, ka ati Yesu, mbur Nazaret na ya.»

⁶⁸Amma Piyer a ji mi, a ɓi: «Yi si na ta, ka mawuɗo ɓi vuna, y'anta sla wala nah ta.» Joˀ aru ng'ar jawleeru avra. Akẽh na, kucukur a ji ˀay.

⁶⁹Diyli migi slra tuwa a pura, a zla a ɓa ɓi nah da mizli misi akẽh ma: «Mbur hana, i mbur ngisi taŋ!»

⁷⁰Amma Piyer a ji mi ma. Neˀ a dirba nah ma na, mizli misi akẽh, a ɓaka Piyer tuwa ma: «Gisiŋ, ka ki mbur ngisi taŋ, yo ki mbur Galile.»

⁷¹Joˀ Piyer a zla a hudum, a ɓi: «Yi si na mbur kum maɓikiy vurˀe vuna ta. Da yi gi di i slir na, anja Buymisemuŋ a kutiy ti bonoy.»

⁷²A haŋhaŋ si na, kucukur a ji ˀay sar mucuw naŋ, dar Piyer a wuluk keŋ ar ɓi Yesu miɓaŋ di zleˀe tuwa: «Ɓa hã kucukur a sa jiˀay sar cuw na, naɓa ki ji mi le, ki siniy ta, ki siniy ta, ˀis makir si.» A wus vu ng'avra, dar a zla a tuwuy.