Read South Giziga MRK 16 Bible Online

MRK 16 - South Giziga bible

MRK 16

¹A dirba hin ngi sabat mucuh na, Mariya ngi Magdala, Mariya mumuŋ ngi Zak waɗ Salome, a hiɗikam urdihey ɓa ra paka da vagay ngi Yesu.

²Dimas ngi miprik prik na, a ram nga mizivi, naɓa pas a jiɗo le si.

³A ɓam ar wala taŋ: «Masa gidigila ndra ɗuguro ti mi zivi, i waka?»

⁴Amma taŋ muzuɓaka hiri paɗ na, a puraka ɗugur a gidigil le ɓaˀ murvay. I ɗugur madiɗa ngbaŋ.

⁵Taŋ micam ng'ar zivi na, a puram mbur gawla, joˀ tir vay hazum, jibe babara ɓaˀ avu vu, didak a muɗa taŋ.

⁶Amma mbur gawla tuwa a ɓa taŋ: «Anja didak a mawuɗo kum ta, ki sipam di i Yesu, mbur Nazaret midiraka avu dum na, a slikiɗ le, naŋ anta aka ta. Puraka, li taŋ mikaka anga zleˀe.

⁷A ram, ɓaka ɓi nah da mizli ngi seˀehey, yo waɗ da Piyer: a sa ru dumbuŋ ar kum nga Galile. Ki sa purakaŋ a diga kaɓa naŋ muɓukum di zleˀe.»

⁸Dar ngwasay tuwa a bam, a kilam kileŋ tivi zivi, asi ara jijikam haɗi, a muɗa taŋ didak le. Ko a ɓaka ɓi nah da mbur ta, asi ara zluwunam.

⁹Yesu a slikiɗ ti wuzla mumucahaya ngi dimas ngi miprik prik, a biga vu dumbuŋ da Mariya ngi Magdala, naŋ muɓul setenehey zleˀe tarnaˀ ti vaˀa na.

¹⁰Mariya, ara slufa ɓi nah da mizli taŋ mubumoˀhoy zleˀe ati Yesu. A ra likam, yo a roko tuwam zleˀe.

¹¹Amma taŋ micinaka, naŋ miɓi: Yesu naŋ da, a pura le na, a tiɓaka ta.

¹²A dirba nah na, Yesu a biga vu ti jiviɗ mekelem pal ma, da mizli cuw ngisi mislineye, ti taŋ maram ng'ar prok mekelem ada.

¹³Joˀ taŋ a moko, a slufaka da cil taŋ mekelemey, amma gar ti nah kwana, a tiɓaka mingiɓi taŋ ta na si.

¹⁴A dirba nah ma na, a biga vu da mizli mukuruˀ ngaŋ kahaya, ti taŋ muroko zumam ɗafa. Joˀ a mbiɗa taŋ hirnga asi taŋ mitiɓakaŋ ta, yo asi hirnga taŋ migidaŋ na. Asi mizli mupurakaŋ a slikiɗ le na kwana, a tiɓaka mingiɓi taŋ ta na si.

¹⁵Joˀ a ɓa taŋ: «A ram ng'ar duniya kurzluˀ gar, tilam mi ti Ɓimezle da mizli gar.

¹⁶Mbur masa tiɓi, yo masa ci ar yam na, a sa lih. Mbur masa tiɓi ta na, kiita a sa jaŋ.

¹⁷Puraka ɗi, mizli masa tiɓam na, a sa gam cekenehey ani: a sa ɓulam setenehey, a sa ɓam ti mi manawayaŋ,

¹⁸a sa jaka kawa ti haŋ, gwat makiɗ vu vagaya, da ko a saka le kwana, anta sa ga taŋ gwat ko neˀ ta, a sa bucaka haŋ angi misi jijihey, mizli tayna a sa mbulom.

¹⁹A dirba Buy Yesu miɓa taŋ kahana na, a zuɓakaŋ nga muŋ, ara cifi tir vay hazum ngi Buymisemuŋ.

²⁰Mizli ngi seˀehey a ram, a tilam mi ti Ɓimezle ko maka gar. Buy Yesu ara gi slra ati taŋ, yo ara biga mingiɓi taŋ matilam di mi na, naŋ jeŋŋe gisiŋ na, ti gi cekenehey cici.