Read South Giziga MRK 3 Bible Online

MRK 3 - South Giziga bible

MRK 3

¹Yo Yesu a ci ng'ar hay diradibiɗ tuwa ma. Mbur mekelem ada akẽh na, haŋ i mumuca.

²Mizli misi akẽh na, ara jiɗaka Yesu, da a sa mbulo mbur misi haŋ mumuca tuwa, tapas sabata kwana, ɓa a kupakaŋ ɓi.

³Yesu a ɓa mbur misi haŋ mumuca tuwa: «Slikiɗi! So deŋ a wuzla.»

⁴Dar a ɓa mizli mapuram hiri tuwa: «Ɓi ndra a pul jiviɗ ngi gi mi tapas sabata ka? Ngi gimezle kwa, malla ngi gi malambaˀ kwa? Ngi laha hutuŋ ngi mbur kwa, malla ngi zizaŋ kwa?» Amma mizli a roko teteˀ teteˀe.

⁵Yesu a bula hiri ar taŋ bal bal ti mevel. Hirnga taŋ migidaŋ na, ɓi nah a giraŋ le haɗi. Dar a ɓa mbur tuwa ma: «Murɗo haŋ!» Mbur a murɗo haŋ muruɗ, joˀ haŋ a ɗiyi.

⁶A dirba nah, Farisahay a boko, a kusom kutum ati mizli ngisi Herodoy, ɓa a lumam wer ngi ziza hirnga ngi Yesu.

⁷Yo Yesu a baˀam ati mizli ngi seˀeheye nga mi mubuliy, zigiduw haɗi ara sipakaŋ. A soko baɗ ti hirwuy Galile waɗ ti hirwuy Yude,

⁸mekelemeye baɗ ti Zerusalem, ti hirwuy Idume, hirwuy ngi dubazaw Zurdeŋ, yo waɗ baɗ ti hirwuy Tir ati Sidoŋ. Zigiduw haɗi a soko ng'avaŋ, asi a cinaka ɓi ngi gwat naŋ maga na le gar.

⁹Yesu a ɓa mizli ngi seˀeheye, ɓa a wakaŋ vu weˀ le ti palalam, vur mizli masa kurpakaŋ.

¹⁰A mbul misi jijihey le haɗi teˀe, vurˀe, misi jijihey gar, a roko ngraɓ ngraɓ ng'ava, ɓa a tutumakaŋ.

¹¹Da setenehey mupuraka Yesu le keɗ na, a ndilam a mbuŋ naŋ, a wudam, a ɓam: «Ki Mangal ngi Buymisemuŋ!»

¹²Joˀ Yesu a mbura taŋ himaˀ, a ɓa taŋ ɓa a njikakaŋ ta.

¹³Dar Yesu a jiɗ nga muwã, a zila mizli naŋ mawuɗ taŋ, a soko ng'avaŋ.

¹⁴A wini mizli kuruˀ nga cuw asi taŋ, a ca taŋ slimiɗe ‹misliney›, ɓa a cifam bumoˀ, yo ɓa a slina taŋ nga tila mi ti Ɓimezle.

¹⁵A vula taŋ gidaŋ ngi ɓula setenehey.

¹⁶Mizli mukuruˀ nga cuw tayna, t'ani: Simoŋ, Yesu a caŋ slimiɗ ti migala Piyer,

¹⁷Zak ati sukum naŋ Zaŋ, ziri ngi Zebedeheye, Yesu a ca taŋ slimiɗ ti migala Boˀanerges, mbiɗeˀvra: ziri ngi ndisl ngi vuŋhoy,

¹⁸Andre, Filip, Bartelemi, Matiye, Tomas, Zak, mangal ngi Alfe, Tadde, Simoŋ muwuɗa hirwuy naŋ,

¹⁹waɗ Yudas Iskariyot, mbur muvula Yesu ɓa a jakaŋ vuna.

²⁰Yo Yesu a mi ngi haya a muŋ, zigiduw haɗi a kus le si ma, hã Yesu ati mizli ngi seˀehey a lumam haŋ ngi zuma gwata gu ta.

²¹Muy naŋhaya micinaka ɓi nah na, a ram ɓa ra zuɓoko di, asi taŋ a ɓam na: «Lesl a hiryi le.»

²²Joˀ buy ngi ɓimujuwahay musoko ti Zerusaleme, a ɓam na: «Beˀelzebul ada a hirnga!» Yo mekelemey a ɓam: «Naŋ maɓula setenehey na, ti gidaŋ ngi buy ngi setenehey vuna!»

²³Dar Yesu a zilo taŋ, a wa taŋ ɓi weˀ ti wi, a ɓa taŋ na: «Satan a ɓula Satana gu mbri mbrike?

²⁴Zumabuyo, da a wuɗuk hirnga naŋ le tehhe a muŋ na, naɓa Zumabuy nah na, anta cici gu ta.

²⁵Yo da mizli ngir hay purla a wuɗkamˀay le ar wala taŋ tehhe muŋ na, naɓa mizli ngir hay nah na, anta sa cicam gu ta.

²⁶Yo da Satan ara kiɗ vu ati hirnga naŋ tehhe a muŋ, da a wunuk le cuw na, naɓa naŋ anta sa cici gu ta, a kiɗ mi le.

²⁷«Amma a hay mbur migidaŋ, mbur anta ci ɓa ava gwat naŋhaya gu ta, sey da a juwaŋ le kaˀ kaˀ dumbuŋ ɗagay far, naɓa a sa ci ng'ava gwat naŋhaya ɓula.

²⁸Gisiŋ, yi ɓu kum na: mungra ngi mizli magaka gar, yo taŋ mazaka Buymisemuŋ haɗi gar na, a sa puya taŋ di avra.

²⁹Amma mbur maza ˀUf Mipal na, anta sa puyakaŋ di avra ta wãˀ. Mungra naŋ a ndir hã ngi sete.»

³⁰A ɓa taŋ kahana, asi taŋ maɓam: «Setene mihirya vu ada a hirnga tuwa.»

³¹Sukum ngi Yesuhoy ati mumuŋ a ndiloko, taŋ dedeŋ avra. A slinam ɓa a ziloko di.

³²Zigiduw a ro jojoˀ gun hirnga naŋ, a ɓakaŋ: «Ani, munuk ati sukum ɗikeye, t'ani avra, ara cufuɗukuw.»

³³Yesu a mbiɗa taŋ di: «Maha i waka, sukum ɗuwoy i waniy ka?»

³⁴Joˀ a bula hiri bal bal ar mizli mujojoˀ gun hirnga naŋ tuwa, a ɓi: «Maha ati sukum ɗuwoyo, t'ani.

³⁵Asi ko wa gar magi gwat Buymisemuŋ mawuɗ na, i sukum ɗu mizileŋ, mongoso, yo i maha ma gar.»