Read South Giziga MRK 5 Bible Online

MRK 5 - South Giziga bible

MRK 5

¹Yo Yesu ati mizli ngi seˀehey tuwa, a ndilam a hirwuy ngi Gerazenehey, a duba yam madiɗa.

²Ti Yesu mabo tir palalama na, mbur misi setene a hirnga, a bo tir zivihey. A mur mata, a so ji di hirnga.

³A hin zleˀe ar zivihey, mbur majuwaŋ gu anta mata, ko ti celeluhoy kwana, anta si.

⁴Asi zleˀe na, a juwakaŋ le ˀis mbeˀ mbeˀ ti dambla, ti celeluhoy, amma a mburca celeluhoyo, yo a ngila damblahaya. Mbur misi ti gidaŋ ɓa ngi tikaŋˀay gu, anta.

⁵Duvuɗ ti papas gar na, a ro ndrehhe a zivihey, yo a muwãhay, a widi, a cira vu kõõk kõõk ti ɗugur.

⁶Amma naŋ mupura Yesu kileŋ a diga na, a kilo, a huruk huruk a mbuŋ naŋ.

⁷Dar a widi ti gidaŋ, a ɓi: «Ka Yesu, Mangal ngi Buymisemuŋ Mimadiɗaŋ, ki wuɗ mi avu ya ka? Ambuh, ti slimiɗ ngi Buymisemuŋ, ki giy bonoy ta.»

⁸A ɓi kahana vur Yesu a ɓaŋ zleˀe na: «Setene mihirya vu, bi ti vu mbur hana!»

⁹Yesu a cufuɗaŋ: «Slimiɗ ɗike mbrike?» A mbiɗaŋ di: «Slimiɗ ɗu ‹Zigiduw›, asi ndra kwesle kwesle.»

¹⁰Dar a tumbulo, a tumbulo Yesu, ɓa a ɓula taŋ ti hirwuy nah avra ta.

¹¹Ar li nah na vuna, fedemey ada taˀ gezleŋ a ciki muwã akẽh, ara zumam.

¹²Setene mihirya vuhoy tuwa, a tumbuloko Yesu, a ɓakaŋ: «Slina ndra ɓa i ra cam a hirnga fedem ngi digahay na takwa.»

¹³Yesu a pula taŋ jiviɗ. Joˀ a bam ti vu mbur tuwa, ara cam a hirnga fedemeye. Dar fedemey mitaˀ gezleŋ gar, a kilam wuw tir li miɗingir tuwa, ara ndilam griv griv ng'ar yam madiɗa. Yam a nda taŋ cek, a gam gwat ngi durmuk cuw.

¹⁴Mijigina fedemeye, a kilam ti labara nah ng'ar walahay ati prokoy. Joˀ mizli a soko puraka gwat migi tuwa.

¹⁵Taŋ mindilam aciki Yesu, a puraka na, mbur misi setene a hirnga tuwa, naŋ da joˀ, zana ɓaˀ avu vu, naŋ ti lesl naŋ kuy kuy muduba, naŋ misi ti setene zigiduw taˀ zleˀe tuwa. Dar zluwun a ga mizli haɗi.

¹⁶Ɓi ngi mbur nah miɗiyi ati ɓi ngi fedemey na, mupur naŋhay a slufaka da mizli gar.

¹⁷Joˀ mizli a tumbuloko Yesu, ɓa a cuh kileŋ tisi ruwuy taŋ.

¹⁸Ti Yesu maci ng'ar palalama na, mbur misi setene a hirnga zleˀe tuwa, a tumbuloŋ, a cufuɗaŋ, ɓa a ndir ati naŋ.

¹⁹Yesu a pulaŋ jiviɗ ta, amma a ɓaŋ: «Mi ngi hay ɗik, avu mizli ɗikey, gwat Buymisemuŋ muguw di gar ti ˀircece naŋ na, slufa taŋ di.»

²⁰Dar mbur a ru, gwat Yesu migaŋ di gar na, a zla til di mi a Dekapol. Mizli micin naŋhay gar na, ɓi nah a zuma taŋ hirnga le gar.

²¹Ti Yesu mutuwuɗa yam madiɗa nga dubazaw vay mekelem a muŋ na, zigiduw haɗi a kusom acikeˀe a mi yama.

²²Buy ngi hay ngi diradibiɗ ada, a zilaka Zayirus, a ndilawa. Ti naŋ mupura Yesu keɗ na, a huruk huruk a mbuŋ naŋ,

²³a tumbuloŋ, a tumbuloŋ, a ɓaŋ: «Zuŋ ɗu meciɗek ada, naŋ gweˀ ngi mucu. Ambuh, so bucaŋ haŋ ɓa a mbul, ɓa a ndir ti siifa takwa!»

²⁴Dar Yesu a ram cuwa. Zigiduw haɗi ara sipaŋ, ara ngislakaŋ ti ka ti ka gar.

²⁵Ngwas mekelem ada akẽh ya, a gi le vi kuruˀ nga cuw, ara si bonoy ti pumbus maɓul.

²⁶A si bonoy le haɗi ˀis mbeˀ mbeˀ ngi ru ng'avu doftoroy, a tika zlili naŋ le gar, amma ko a ɗiyi ta, ara ɓul ti gidaŋ jak ma.

²⁷Ngwas nah, a cine maɓaka ɓi ngi Yesu na le, dar a co suruɗ a wuzla mizli ti dirba Yesu, a wusaŋ avu zana.

²⁸Asi a ɓi zleˀe ti kwacay naŋ na: «Da ko yi wus di i zana naŋ tekeɗe kwana, yi sa ɗiyi si.»

²⁹A haŋhaŋ si na, pumbus naŋ maɓul tuwa, a cici kaŋ, a pura vu naŋ zuyyo muduba.

³⁰Kutum si na, Yesu a si na le, gidaŋ a bi le ti vaˀa. Vurˀe, a mbiɗi hirik murdirba a wuzla zigiduwo, a ɓi: «Muwusa zana ɗu na, i waka?»

³¹Mizli ngi seˀehey a ɓakaŋ: «Ki ra pura zigiduw ara ngisluw tika tika ma na, ki cufuɗ vu, ki ɓi: ‹Muwusiy na i waka mbrike?›»

³²Amma a bula hiri bal bal acikeˀe, ɓa a pura mbur miga gwat hana.

³³Akẽh na, ngwas tuwa, ara zluwun, ara jijik, asi a si na gwat migi ava na le, dar a so huruk a mbuŋ Yesu, a ɓaŋ ɓi nah gar njah njah wãˀ.

³⁴Amma Yesu a ɓaŋ: «Zuŋ ɗu, tiɓi ɗik a lihuw le. Aru jam so, mbul tir jiji ɗike.»

³⁵Ti Yesu maɓi aruŋ si na, mizli a ndiloko ti hay Zayirus buy ngi hay diradibiɗe, a ɓakaŋ: «Zuŋ ɗike muc le, ki gira Kumani ngi mi aruŋ maka?»

³⁶Amma Yesu a ki slimiɗ neˀ le ar ɓi taŋ ta, a ɓa buy ngi hay diradibiɗe: «Ki zluwun ta, ka tiɓiy si.»

³⁷Ko Yesu a wuɗ mbur pal aru aseˀe ta, sey Piyer, Zak waɗ Zaŋ sukum ngi Zak tewle.

³⁸Taŋ mindilam a hay buy ngi hay diradibiɗe na, Yesu a pura mizli mawusam haɓar haɓar, matuwam, yo mawudam ti gidaŋ na,

³⁹a ci, a ɓa taŋ: «Ki wusam haɓar haɓar, yo ki tuwam vur mike? Zuŋ a muc ta, a hinje ti hinje.»

⁴⁰Dar mizli tuwa a singiram angaŋ. Amma Yesu a ɓula taŋ gar ng'avra, a zuɓa cine ngi zuŋ ati mumuŋ, waɗ mizli musoko aseˀe tuwa, a cam ng'ar viŋ zuŋ misi anga na.

⁴¹A ja zuŋ kaw avu haŋ, a ɓaŋ: «Talita kum!» mbiɗeˀvra: Zuŋ meciɗek, yi ɓuw, puɗuku!

⁴²A haŋhaŋ si na, Zuŋ a slikiɗ njar, a rudigi, asi naŋ ti vi kuruˀ nga cuw. Mizli mupuraka kanah na, ɓi nah a zuma taŋ hirnga le wãˀ.

⁴³Joˀ Yesu a kuta taŋ haɗi wãˀ, ɓa a ɓaka ɓi nah da mbur ta. Dar a ɓa taŋ, ɓa a vulaka gwat ngi zum da zuŋ.