Read South Giziga MRK 7 Bible Online

MRK 7 - South Giziga bible

MRK 7

¹Farisahay ati mekelemey a wuzla buy ngi ɓimuwahay musoko ti Zerusaleme, a kusom aciki Yesu.

²A puraka na, mekelemey a wuzla mizli ngisi Yesuhoyo, a zumam ɗaf ti haŋ misi dili, mbiɗeˀvra: manja buna haŋ ceɗceɗ le.

³Asi mike na, Farisahay ati Yudehey gar na, anta zumam ɗaf manja buna haŋ ceɗ ceɗ le ta, a gam di i sirik ngi dideˀ taŋhay.

⁴Taŋ mumoko le tir luuma na, a zumam gwat t'aruŋ, sey da a bunam le ɗagay. Mezegwel mekelemey ada haɗi taŋ magaka taŋ, kaɓa buna sikiɗey, kisahay, misirgaɗay.

⁵Vurˀe, Farisahay ati buy ngi ɓimujuwahay, a cufuɗaka Yesu: «Mizli ngisi kahay anta sipaka sirik ngi dideˀ ndraˀahaya kasl kasl ta, a zumaka gwata ti haŋ misi dili vur mike?»

⁶Yesu a ɓa taŋ: «Ezayi a njika ɓi ngi Buymisemuŋ le kaslsla wãˀ a hirnga kumo, kum miɓi mi cuw cuwoy, asi a ɓi na: ‹Mizli tayna, a ɗuvikiy hirnga ti mi tewle, amma mevel taŋ naŋ kileŋ avu ya.

⁷Taŋ madilkam a mbuŋ ɗu na, i ngatara lambaˀ, yo gwat taŋ madubunaka da mizli na, i ɓi ngi mizli muɗuvaka si.›

⁸Ki pulaka ɓi muɗuva ngi Buymisemuŋ baˀ murciki, joˀ ki sipam sirik ngi mizli.»

⁹A ɓa taŋ: «Muɗuva, Ɓi ngi Buymisemuŋ ki baˀaka baˀ kuy kuy wãˀ, joˀ ki gam sirik ngi dideˀ kumoy.

¹⁰Asi Moyis a ɓi na: ‹Ɗuva hirnga da bunuk ati munuk,› yo ma na: ‹Mbur maza cine ati mumuŋ naŋ na, sey a kiɗaka vagay.›

¹¹Amma kumo, ki ɓam: ‹Da mbur a ɓa cine malla mumuŋ naŋ le: Gwat ya masa junuw ti naŋ zleˀe na, i Kurbaŋ, mbiɗeˀvra: sedege mihĩˀĩ da Buymisemuŋ na,

¹²ki pulakaŋ di i jiviɗ ɓa a jina cine malla mumuŋ mata.

¹³Naŋ kanah, ki hiryam di i Ɓi ngi Buymisemuŋ ti sirik kum madubunaka da mizli na, yo ki gam gwatay haɗi mubam vu ati tayna.»

¹⁴Dar Yesu a zila zigiduw a muŋ ma, a ɓa taŋ: «Kum gar, cinaka mingiɓi ɗu ani, ɓa ki slaka wala naŋ:

¹⁵Gwat ngi vra gar, maci nga hur mbur na, a ci ti mbur ar dili gu ta. Amma maci ti mbur ar dili, i gwat mabo ti hur mevele.»

¹⁶Da kum ada ti slimiɗ macin na, cinam kuy kuy.

¹⁷Ti Yesu mici ngi hay, naŋ mikilǝŋ vu zigiduwo na, mizli ngi seˀehey a cufuɗaka mbiɗeˀvra ngi ɓi naŋ miwa taŋ di ti wi nah vuna.

¹⁸Yesu a ɓa taŋ: «Kumo kwana, kum manja lesley ya kwa? Gwat ngi vra maci nga hur mburo, a caŋ ar dili gu ta na, ki sinaka ta kwa?

¹⁹Asi mike na, naŋ anta ci ng'ar mevele ta, amma a ci nga kwacay naŋ, a dirba nah, a sa bawa avra.» Yesu miɓi kahana, mbiɗeˀvra: gwat ngi zum gar na, a zumaka zuy.

²⁰A ɓi ma: «Maca mbur ar dili i gwat mabo ti hur naŋ.

²¹Asi mike na, wuluk malambaˀa, a bo zle a hur mbur, zle a mevele, a hizigiɗaŋ ɓa a gi biyãˀbiyãˀ, a hul, a kiɗ hirnga,

²²a gi madama, a gi may gwat, a gi moˀore, a gi gilaw da mbur, a gi sulome, suloŋ, zi vu, a gi zlokoko, a tiri gilaw.

²³Gwat malambaˀ tayna gar, a boko baɗ a hur mbur. Maci ti mbur ar dili i nah.»

²⁴Yo Yesu mucuh ti kẽh na, aru nga hirwuy Tir. A ci ngi hay mbur, a wuɗ ɓa mizli a sinakaŋ ta. Amma a ɗum gu ta.

²⁵Neˀ si na, ngwas ada, zuŋ naŋ, setene a hirnga, a cin maɓaka ɓi ngi Yesu na le. Joˀ a sawa, a diɗ a mbuŋ naŋ.

²⁶Ngwas nah i zuŋ Yude ta, cak naŋ i ngwas Finiki, hirwuy Siri. A tumbulo Yesu ɓa a ɓula setene ngi hirnga zuŋ tuwa.

²⁷Amma Yesu a ɓaŋ na: «Pula ziri a mbam ɗagay, asi a zlir ngi zuɓa ɗaf ngi ziri, ɓa ngi hiziga da ziri kiriheye ta.»

²⁸Ngwasa mbiɗaŋ di: «Kanah ɓula Buy, amma zir kirihey vuna, a zumam di i misi mi ngi ziri madiɗo nga ruwuy takwa?»

²⁹Yesu a ɓaŋ na: «Asi mingiɓi ɗik hana na, mi ngi hay. Setene a bi le tivu zuŋ ɗike.»

³⁰Ngwas a mi ngi hay, ara luuma zuŋ, a hin le tup ar arngawo naŋ. Setene a bi le ti vaŋ.

³¹Yo Yesu a pula hirwuy Tire, a cuh bal ti Sidoŋ, a mi nga mi yam madiɗa ngi Galile, a ngira hirwuy Dekapol kããk.

³²A sakaŋ ti mbur midigizla, yo a ɓi tuwaˀ tuwaˀa ma, a tumbulokoŋ ɓa a buca haŋ ava.

³³Yesu a bi di kileŋ a wuzla zigiduwo, baˀ pal naŋ, a caŋ muzuŋ haŋhay nga slimiɗe, a tuf tazlay, a wusaŋ ˀirne.

³⁴Dar a zuɓa hiri nga muŋ, a niˀic, a ɓa mbur tuwa: «Effata!» mbiɗeˀvra: «Wun!»

³⁵Ar nah si na, slimiɗey a wunam, ˀirne a pusuk, a ɓi calala.

³⁶Yesu a kuta taŋ, ɓa a ɓaka ɓi nah da mbur ta. Amma ko naŋ makuta taŋ kuteˀkuteˀ le na kwana, taŋ ra tilam di mi ti gidaŋ jaka.

³⁷Ɓi nah a zuma hirnga le haɗa da mizli, a ɓam: «Gwat naŋ maga gar na naŋ kuy! A ga, ɓa midigizlahay a cinam, yo ɓa mizli maɓam gu tahay, a ɓam!»