Read South Giziga MRK 8 Bible Online

MRK 8 - South Giziga bible

MRK 8

¹Angi hin tayna, zigiduw a cikil le haɗi ma. T'anta ti gwat ngi zum ta. Yesu a zila mizli ngi seˀeheye, a ɓa taŋ na:

²«Zigiduw hana, ara giy ˀircece. Puraka, a gam le ani hin makir avu ya, yo t'anta ti gwat ngi zum ta.

³Da yi waha taŋ le, a ram le ti may na, may a sa sla taŋ zlambar a jiviɗe, asi mizli mekelemey a wuzla taŋ a soko kileŋ.»

⁴Mizli ngi seˀehey a mbiɗakaŋ di: «A ɓuh aka, mbur a lumo ɗaf ngi mba mizli hanayna amaka?»

⁵Yesu a cufuɗa taŋ: «Kum ti ɗaf kite ka?» A ɓakaŋ: «Tarnaˀa.»

⁶Joˀ a ɓa mizli ɓa a cifam a ruwuy. Dar a zuɓa ɗaf mitarnaˀ tuwa, a ga siseˀ da Buymisemuŋ, a ngila taŋ, a vula da mizli ngi seˀeheye, ɓa a wunkaka taŋ di, a wunkaka da zigiduwo.

⁷T'ada ti kilif memeɗehey zleˀe neˀ ma. Yesu a ɗuwul mi ara, a ɓa taŋ ɓa a wunkaka da mizli ma.

⁸Taŋ gar a zumam, hã a mbam. Yo a hilaka is naŋ mindir bulngus bulnguso, gadagar caɓ caɓ tarnaˀ.

⁹Mizli muzum naŋhaya, a gam gwat ngi durmuk mufaɗ gu. Dar Yesu a waha taŋ.

¹⁰Ar nah si na, a ci palalam ati mizli ngi seˀeheye, aru nga hirwuy Dalmanuta.

¹¹Farisahay a soko, a zlaka ngila mi ati Yesu. Ɓa a cam a kwacay naŋ na, a cufuɗam ɓa a ga taŋ cekene maso ti vu Buymisemuŋ.

¹²Yesu a niˀic ti gidaŋ fõh, a ɓi: «Mizli migweneheye, a cufuɗam cekene vur mike? Gisiŋ yi ɓu kum na: Anta sa gaka cekene da mizli migweneheye ta.»

¹³Joˀ a pula taŋ hirkim, a ci palalam a muŋ, a tuwuɗ nga dubazaw.

¹⁴Mizli ngisi Yesuhoy a puyukam hirnga le ngi zuɓa ɗaf a haŋ. Avi taŋ angi palalama na, ɗaf purla si.

¹⁵Yesu a kuta taŋ, a ɓa taŋ: «Jam lesl, wam vu avu ˀis [3] ngi slikiɗa hapa ngi Farisahay ati ngi Herodo.»

¹⁶A zlaka ngila mi ar wala taŋ, asi t'anta ti ɗaf ta tuwaŋ.

¹⁷Yesu a si na ɓi taŋ le, a cufuɗa taŋ: «Ki ngilam mi, ki ɓam kum anta ti ɗaf ta na, vur mike? Ki cinam t'aruŋ, yo ki slaka wala nah t'aruŋ kwa? Hirnga kumo gidaŋ kwa?

¹⁸Kum ada ti hiri, ki puram ta kwa? Kum ada ti slimiɗ, ki cinam ta kwa? Ki wulkam keŋ mata mbrike?

¹⁹Ti ya mingila ɗaf zlum da mizli durmuk zlum na, ki hilaka is naŋ mubulngus bulnguso, gadagar caɓ caɓ kiteka?» A ɓam: «Kuruˀ nga cuw.»

²⁰Yo ti ya mingila ɗaf tarnaˀ da mizli durmuk mufaɗ na, ki hilaka is naŋ mindire gadagar caɓ caɓ kiteka?» A ɓam: «Tarnaˀa.»

²¹Joˀ Yesu a ɓa taŋ: «Na, ki slaka wala nah t'aruŋ kwa?»

²²Yesu ati mizli ngi seˀeheye, a ndilam a Betsayda. A sakaŋ ti mbur dangar, a tumbulokoŋ ɓa a ja haŋ ava.

²³Yesu a ja mbur dangar tuwa kaw avu haŋ, a bi di nga duba gala, a gaŋ tazlay avu hiri, a buca haŋ ava, a cufuɗaŋ: «K'ada ki pur gwat kwa?»

²⁴Dangar a wuna hiri wunno, a ɓi: «Y'ada i pur mizli, yi pura taŋ kaɓa widisey. Na, ara ram ma.»

²⁵Dar Yesu a bucaŋ haŋ avu hiri tuwa ma. Joˀ mbur a pur kweŋ kweŋ. Hiri a wun le, a pura gwataya, a sla wala taŋ gar muduba.

²⁶Akẽh na, Yesu ɓula ngi hay naŋ, a ɓaŋ: «Ko ki ci ar walahaya ceˀ le ta.»

²⁷Yesu ati mizli ngi seˀeheye, ara ram kini ng'ar walahay migweˀ gweˀ avu buy Sezare ngi Filip. Ti taŋ misi a jiviɗe na, Yesu a cufuɗa mizli ngi seˀeheye: «Mizli a ɓam vur ya mbrike?

²⁸A ɓakaŋ: «A ɓam: ki Zaŋ mici mizli ar yam. Avu mekelemeye kwana, ki Eli. Mekelemeye mana, a ɓam: ki mbur ngi wuzla mijiviɗey.»

²⁹Joˀ Yesu a cufuɗa taŋ: «Na, avu kumo, ki ɓam yi waka?» Piyer a slaŋ di, a ɓaŋ: «Ki Kristu.»

³⁰Joˀ a buca taŋ ɓa a ɓaka ɓi nah da mbur ta wãˀ.

³¹Dar Yesu a zla a dubuna gwat da mizli ngi seˀeheye, a ɓa taŋ: «Sey Mangal ngi Mbur a si bonoy haɗa, mizli micawwahay, masay madiɗahay ati buy ngi ɓimujuwahaya, a hizigakaŋ avra, anja a kiɗakaŋ vagay. Yo angi hin mimakir naŋ na, a sa slikiɗ a muŋ.»

³²A ɓa taŋ di njah njah si. Piyer a bi di baˀ pal naŋ, a zla mbiɗaŋ hirnga.

³³Amma Yesu a mbuɗo hirik, hiri taˀ avu mizli ngi seˀehey, a mbiɗa hirnga da Piyere, a ɓaŋ: «Kirih nga dirba ɗu, Satan, asi wuluk ɗike, i wuluk ngi Buymisemuŋ ta, amma i ngi mizli si.»

³⁴Dar a zilo zigiduw gar ati mizli ngi seˀeheye, a ɓa taŋ: «Da mbur a wuɗ sipi ɗu le na, anja a pula wuluk vur hirnga naŋ, a zuɓa dum naŋ mizlira, a sipiy.

³⁵Asi mike na, ko wa gar mawuɗ laha siifa naŋ na, a sa zizaŋ, amma ko wa gar masa ziza siifa naŋ asi ya waɗ asi Ɓimezle na, a sa lahaŋ.

³⁶Ko da mbur a luuma gwat ngir duniya hana le gar, amma da a ziza siifa naŋ le aseˀe na, a sa lum di i mike?

³⁷Malla gwat ada, ɓa mbur a vula ngi mbiɗa hirnga ngi siifa naŋ kwa?

³⁸Vurˀe, da mbur ara gi mesem ti ya, yo ara gi mesem ngi ɓa ɓi ɗu a wuzla mizli migwenehey, migi mungahay, migi madama hanayna na, naɓa Mangal ngi Mburo kwana, ti naŋ masa sawa angi dudok ngi Cine ati modro naŋhay mipal na, sa gi di mesemaya.»