Read South Giziga MRK 9 Bible Online

MRK 9 - South Giziga bible

MRK 9

¹Yesu a ɓa taŋ ma: «Gisiŋ yi ɓu kum na: mekelemey a wuzla mizli misi aka na, anta sa micam dumbuŋ angi zumabuy ngi muŋ masa so ti gidaŋ naŋ na ta.»

²Hin merkeɗ a dirba nah na, Yesu a zuɓa Piyer ati Zak waɗ Zaŋ, aru taŋ aseˀe, baˀ pal taŋ nga hirnga muwã madiɗa. Vu naŋ a mbiɗi a mihiri taŋ.

³Zana naŋhay a mbiɗam wilik wilik, babara ndarara, ko mbur pal a ruwuyo mapusluɗa zana kanah gu, anta.

⁴Eli ati Moyis a bigaka taŋ vu, ara kiɗam slir ati Yesu.

⁵Dar Piyer a zla a ɓa Yesu: «Kumani, naŋ kuy ɓa i cifam aka. Ɗiyukum mazlaɓay makir, pal da ka, pal da Moyis waɗ pal da Eli.»

⁶A si na ɓa a ɓi kini ta, asi zluwun a ga taŋ le haɗi teˀe.

⁷Gazlavay a so sirta taŋ. Joˀ ˀaya cino paɗ a muŋ: «Mbur hana, i Mangal ɗu ya mawuɗaŋ haɗa, cinaka mingiɓi naŋ!»

⁸Neˀ na, keɗ keɗ a ciki taŋ akẽh na, mbur anta, sey Yesu deŋ pal naŋ ati taŋ.

⁹Ti taŋ mapoko sar baɗ ti muwã na, Yesu a kuta taŋ ɓa a ɓaka ɓi ngi gwat taŋ mupuraka nah da mbur ta, ɓa sey Mangal ngi Mbur a slikiɗ ti wuzla mumucahay ɗagay far.

¹⁰Joˀ a jaka mingiɓi nah a hirnga, amma a cufuɗam vu ar wala taŋ, a ɓam: «Slikiɗ ti wuzla mumucahay vuna, mbiɗeˀvra mbrike?»

¹¹A cufuɗaka Yesu: «Buy ngi ɓimujuwahay a ɓam: ‹Sey Eli a so ndol le ɗagay› na, vurmike?»

¹²A ɓa taŋ: «Gisiŋ, Eli a so ndol le ɗagay, ɓa a ɗiya gwataya gar. Na, Ɓimotoho a ɓi: ‹Sey Mangal ngi mbur a si bonoy seˀ le haɗa, yo a hirsakaŋ› na, vur mike?

¹³Amma yi ɓukum na, Eli a so le si, a gakaŋ gwat taŋ muwuɗama le gar, kaɓa Ɓimotoho miɓi a hirnga naŋ.»

¹⁴Ti taŋ masoko ng'avi mizli ngi seˀe mekelemey na, a puram zigiduw haɗi gun hirnga taŋ, waɗ buy ngi ɓimujuwahay ara ngilam mi ati taŋ.

¹⁵Zigiduw mupura Yesu keɗ na, a ga taŋ ngirkik, a kilam ng'avaŋ, ɓa a jakaŋ haŋ.

¹⁶Yesu a cufuɗa mizli ngi seˀeheye: «Ki ngilam mi asi ɓi ngi mi ati taŋ ka?»

¹⁷Mbur a wuzla zigiduw a mbiɗaŋ di: «Kumani, yi suw ti mangal ɗu ani, vur naŋ ti setene matika mbur ɓa a ɓi gu ta.

¹⁸Ko amaka gar na, setene a jaŋ, a zlumburaŋ parara a ruwuy, yo mangal a gi mongofok kokof kokof avu mi, a humbuɗ sliŋ, a mbur mbar mbar cucurok. Yi ɓa mizli ngisi kahaya le ɓa a ɓulaka setene nah avra, amma a lumam gidaŋ nah ta.»

¹⁹Yesu zla a ɓa taŋ: «Kayya, kum mizli misi hirnga gidaŋhay! I sa ndir ati kumo hã ti vunaka? I sa ɓusukum hã ti vunaka? Sikiy ti mangal vuna.»

²⁰Joˀ a sakaŋ di. Setene tuwa mupura Yesu keɗ na, a wusa mangala ti gidaŋ, a murɗoŋ gwic gwic, mangal a diɗ a ruwuy, a putukul, mongofok kokof kokof avu mi.

²¹Yesu a cufuɗa cine ngi mangala: «A zlaŋ ngi vunaka?» Cine a ɓaŋ: «Zle ti naŋ meciɗeke.

²²Setene ada hizigiɗaŋ ndrehhe ng'ar vu malla ng'ar yam, ɓa a zizaŋ. Amma da zliv ki ga gu na, ambuh, pura ndra ˀircece, jina ndra takwa!»

²³Yesu a ɓaŋ: «Ki ɓi: ‹da zliv ki ga gu.› Amma da mbur a tiɓa gwata le ti mevele wãˀ na, gwat magi ta na, anta.»

²⁴Ar nah si na, cine ngi mangal a til mi, a ɓi: «I tiɓa le, amma jiniy ar tiɓi ɗu mutuwaˀtuwaˀ na!»

²⁵Yesu a pura na, zigiduw ara kus ng'avi taŋ, a buca setene mihirya vu tuwaŋ, a ɓaŋ: «Setene midigizla maɓi ɓi gu ta, yi ɓuw: bi tivi mangal hana, anja ki ci ava mata!»

²⁶Setene a widi, a murɗo mangala gwic gwic, a bi avra. Mangal a tiri ka mumuca, hã mizli gar a ɓam: «A muc le.»

²⁷Amma Yesu a jaŋ kaw avu haŋ, a slikiɗaŋ pirtaˀ, mangal a cici deŋ.

²⁸Ti Yesu mici ngi hay na, mizli ngi seˀeheye, taŋ pal taŋ ati naŋ, a cufuɗakaŋ, a ɓakaŋ: «Na, ndr'i ɓulaka setene nah gu ta vur mike?»

²⁹Yesu a ɓa taŋ: «Gidaŋ mekelem ngi ɓula sukwi ngi setene hana, anta, sey diradibiɗ tewle.

³⁰Taŋ mislikiɗam ti kẽh na, a ngiraka hirwuy Galile kããk, Yesu a wuɗ ɓa a sinakaŋ ta.

³¹Asi ara dubuna gwat da mizli ngi seˀeheye, a ɓa taŋ: «A sa vulaka Mangal ngi mbur asi haŋ ngi mizli, a sa kiɗakaŋ vagay. Yo a dirba taŋ mikiɗaka le vagaya, angi hin mimakir naŋ na, a sa slikiɗ a muŋ.»

³²Amma a slaka wala ngi mingiɓi nah ta, yo a zluwunam cufuɗ naŋ ma.

³³A ram ng'ar walahay Kapernahum. Ti taŋ misi a haya na, Yesu a cufuɗa taŋ: «Ki ngilam mi asi ɓi ngi mi a jiviɗe ka?»

³⁴Amma a cifam teteˀ teteˀ, asi a tiram le a jiviɗe, ɓa a sinaka, da madiɗa mifineˀ taŋ i waka na?

³⁵Yesu a cifi, a zilo mizli ngi seˀehey mukuruˀ nga cuwo, a ɓa taŋ: «Da mbur a wuɗ le ɓa a tiri mbur ngi mbuŋ na, sey a tiri ngi dirba mizli gar, yo a gi gawla taŋ gar.»

³⁶Dar a zuɓo mangal taŋŋa, a cica a wuzla taŋ. A ja mangal tuwa kuɓuy, a dirba nah a ɓa taŋ:

³⁷«Ko wa matiɓa zuŋ meciɗek misi kahana ti slimiɗ ɗu na, a tiɓi di i ya vuna si. Yo mbur matiɓiy ya kwana, a tiɓi di i ya ta, amma a tiɓi di i mbur mislino ya.»

³⁸Zaŋ a ɓa Yesu: «Kumani, ndr'i lumam mbur le, ara ɓul setenehey ti slimiɗ ɗiki. I wuɗam ɓa i tikakaŋ zleˀe, asi i mbur ngisi ndra ta.»

³⁹Amma Yesu a ɓaŋ: «Ki tikaka ta, asi ko wa gar magi cekene ti slimiɗ ɗu na, a ɓi ɓi malambaˀ kutum angi ya ta.

⁴⁰Mbur maɓi ɓi malambaˀ a hirnga ndra ta na, naɓa i mbur ndra.

⁴¹Ko wa gar muvulukum yam ngisi le ti zuŋ sikiɗ, asi kum i mizli ngi Kristuhoy na, gisiŋ, yi ɓu kum na: a sa luuma migir naŋ.

⁴²«Mbur pal a wuzla mizli mizlewey matiɓikiy na, ko wa mihizigiɗ le pal asi taŋ ng'ar mungra na, zuwen taŋ majuwaka ngurvuŋ madiɗa asi ˀay mbur mihizigiɗaŋ na, ɓa a hizigakaŋ ng'ar mubuliy.

⁴³Da i haŋ ɗik macuw ng'ar mungra na, buko avra, zuwen ka maci ng'ar li ngi siifa ti haŋ sluloŋ purla, a funa ka maru ng'ar li ngi bonoy, ng'ar vu mamuc ta wãˀ, ti haŋ ɗikey cuw taŋ na le. [4]

⁴⁴[Adiga, mumuyuŋ anta muc ta, vu kwana anta muc ta wãˀ.]

⁴⁵Da i sar ɗik macuw ng'ar mungra na, buko avra, zuwen ka maci ng'ar li ngi siifa ti sar sluloŋ purla, a funa taŋ masa hizigukuw ng'ar li ngi bonoy ti sar ɗikey cuw taŋ na le.

⁴⁶[Adiga, mumuyuŋ anta muc ta, vu kwana anta muc ta wãˀ.]

⁴⁷Da i hiri ɗik macuw ng'ar mungra na, huzlugo avra, zuwen ka maci ng'ar Zumabuy ngi Buymisemuŋ ti hiri purla, a funa taŋ masa hizigukuw ng'ar li ngi bonoy ti hiri ɗikey cuw taŋ na le.

⁴⁸Adiga mumuyuŋ anta muc ta. Yo vu kwana, anta muc ta wãˀ.

⁴⁹Asi mbur gar a sa gakaŋ mandaŋ ar vu [5].

⁵⁰«Mandaŋ i gwat mezle, amma da lemme naŋ a susuyum le na, kisa tiram di lemme a muŋ ti mi aruŋ maka? Ndiram lemme a hur kumo, yo cifam zuy zuy ar wala kumo.»