Read South Giziga LUK 1 Bible Online

LUK 1 - South Giziga bible

LUK 1

¹Gwatay migam ar wala ndra na, mizli haɗi a zlaka a tohoko ɓi nah.

²A tohoko kaɓa mizli mupuraka ti hiri taŋ, muslufam ndra di, zle angi zli virzi naŋ. Mizli tayna a tiram le i gawla ngi tila mi ti ɓi ngi Buymisemuŋ.

³Wurenna so na, Teyofil, ka mbur hirnga, a dirba ya mika virzi naŋ gar, zle angi zli virzi naŋ na, ya kwana, a giy le kuy, ɓa yi tuhuw di ti jiviɗ naŋ ɗalla da ka ya,

⁴ɓa ki si na gwat taŋ mudubunukuw di na, naŋ jeŋŋe.

⁵Ti hin ngi Herod mazum buy angi hirwuy Yude na, mbur mekelem ada, a zilaka Zakari, i masay, naŋ ar ngay ngi Abiya. Ngwas naŋ a zilaka Elizabete, a bo tir tizer ngi Aroŋ.

⁶Taŋ cuw taŋ, i mizli mijeŋŋehey a mbuŋ Buymisemuŋ. Ɓimujuwa ati ɓimuɗuva ngi Bumbulvuŋ muvula gar na, a sipaka ti jiviɗ naŋ kasl kasl wãˀ.

⁷Amma taŋ manja zuŋ, asi Elizabet i dirlay, yo taŋ cuw taŋ, a gam gal le si.

⁸Hin ɓa Zakari a ga slra nga naŋ masay ar hay ngi Bumbulvuuŋ na, a ndilo le, vur a mbuɗo le ar ngay taŋ.

⁹A gaka sirik ngi gi mikuli a mbuŋ Buymisemuŋ taŋ, ceregezleŋ a diɗ ar Zakari, ɓa ara zluma mukuturɓuy ar hay ngi Bumbulvuŋ.

¹⁰Hirak ti naŋ mira zluma mukuturɓuy tuwa na, naɓa zigiduw gar ara dir dibiɗ avra.

¹¹Dar Modro ngi Bumbulvuŋ a bigaŋ vu deŋ tir vay hazum ngi li zluma mukuturɓuy tuwa.

¹²Zakari mupura keɗ na, a muɗaŋ didak le, a zluwun kir kir.

¹³Amma modro tuwa a ɓaŋ: «Ki zluwun ta, Zakari, asi Buymisemuŋ a tiɓa dira dibiɗ ɗike le. Ngwas ɗik Elizabete, a sa yuw mangal mizile, kisa caŋ slimiɗe Zaŋ.

¹⁴Ki sa mumul, kisa zluzluɓ vurˀe, yo mizli haɗi a sa mumulom ti yi naŋ.

¹⁵Asi mike na, a sa tiri mbur madiɗa a mbuŋ Bumbulvuŋ. N'anta sa si mbaazla ta, anta sa si baraasa ta. A sa nih ti ˀUf Mipal zle a kwacay mumuŋ.

¹⁶A sa mo ti Israyeley haɗi ng'avu Bumbulvuŋ Buymisemuŋ taŋ.

¹⁷Yo a sa ki ɓaˀ a mbuŋ, a mihiri ngi Buymisemuŋ ti lesl ati gidaŋ ngi Eli, ɓa a jumoˀay ngi cine ngi ziri ati ziri taŋhay, yo ɓa a mo ti mizli macinam mi tahaya, ɓa a wulkam ka mizli mijeŋŋehey, ɓa a ɗiya mizli, a wam vu ngi kutuko Bumbulvuŋ.»

¹⁸Zakari a ɓa modro tuwa: «I sa si na avu mike? Asi yi midigila, yo ngwas ɗu a gi gal le.»

¹⁹Modro a mbiɗaŋ di: «Yi Gabriyel, yi ro deŋ a mbuŋ Buymisemuŋ. A slinoko ya ngi ɓuw ɓi, yo ɓa i suw ti ɓi mezle hana.

²⁰Pura ɗi, kisa ndir ngbimme, kisa ɓi gu mata, hã tapas gwat hana misa gi le. Asi ɓi ɗu masa gi angi hin naŋ na, ki tiɓa ta.»

²¹Mizli ara kutukoko Zakari, yo naŋ mizik ar hay ngi Bumbulvuŋ na, a zuma taŋ hirnga le.

²²Ti naŋ mubo na, a ɓa taŋ gu ta. Mizli a slaka wala nah le, a ro na, a pur gwat le ti kleŋ ar li mipal wãˀa. Dar a ɓa taŋ ti haŋ, a ndir, a ɓi gu ta.

²³Pas ngi slra naŋ mikiɗ mi na, Zakari a mi ngi hay naŋ.

²⁴A dirba nah, ngwas naŋ Elizabet a gi hur, a ɗumo ɓi nah hã kiya zlum. Joˀ a ɓi ti kwacay naŋ:

²⁵«Hana i gwat Bumbulvuŋ migiy di angi pas naŋ muɗuva hiri angi ya, ɓa ngi kiɗa mi ngi gwat mapiy mesem a mbuŋ mizli.»

²⁶Angi kiya mimerkeɗ ngi hur ngi Elizabet na, Buymisemuŋ a slino modro naŋ Gabriyel ng'ar walahay mazilaka Nazaret, hirwuy Galile,

²⁷ng'avu zuŋ diili, meketeŋ ngi mbur mazilaka Zozef, muy ngi Daviti. A zilaka zuŋ diili vuna Mariya.

²⁸Modro ngi Buymisemuŋ a ci ng'avaŋ, a ɓaŋ: «Ka, Buymisemuŋ a guw mezle le, mumul! Bumbulvuŋ naŋ da ati ka.»

²⁹Mingiɓi nah a muɗa didak da Mariya teˀe. Joˀ a wuluk ar mbiɗeˀvra ngi ji haŋ nah vuna.

³⁰Modro tuwa a ɓaŋ: «Ki zluwun ta Mariya, asi Buymisemuŋ a guw mezle le.

³¹Ani, kisa gi hur, kisa yi mangal mizile, kisa caŋ slimiɗe Yesu.

³²A sa tiri mbur madiɗa, a sa zilaka Mangal ngi Buymisemuŋ Mimadiɗa. Bumbulvuŋ Buymisemuŋ a sa caŋ ar buy ngi dideˀ naŋ Daviti.

³³A sa zum buy ar sukwi ngi Zakop hã ngi sete. Zumabuy naŋ anta sa kiɗ mi ta wãˀ.»

³⁴Dar Mariya a ɓa modro tuwa: «Ani yi zuŋ diili mungbuˀo aruŋ, ɓi hana a sa gi mbri mbri ska?»

³⁵Modro a mbiɗaŋ di: «ˀUf Mipal a sa so ar ka, gidaŋ ngi Buymisemuŋ Mimadiɗa a sa sirtuw ti susuɗuk naŋ. Vurˀe, mangal masa ya ka na, naŋ pal , yo a sa zilaka Mangal ngi Buymisemuŋ.

³⁶Pura ɗi, muy ɗik Elizabete, ko ti naŋ migi gal na kwana, a gi hur le ya, i mangal mizile. Mizli a zilaka zleˀe dirlay, amma wurenna, naŋ ti hur kiya merkeɗe.

³⁷Asi gwat mafucuka Buymisemuŋ anta.»

³⁸Dar Mariya a ɓi: «Yi diili migi slra ngi Bumbulvuŋ. Anja a gi angi ya kaɓa ka miɓa.» Joˀ modro tuwa a pulaŋ.

³⁹Hin neˀ a dirba nah na, Mariya a bi, aru kutum nga hirwuy muwã, angi walahay mekelem ada a Yude.

⁴⁰A ci ngi hay Zakari, a ja haŋ da Elizabete.

⁴¹Ti Elizabet micina Mariya mijaŋ haŋ na, mangal a wus a kwacaya, joˀ Elizabet a nih ti ˀUf Mipal.

⁴²A zla a til mi, a ɓa Mariya: «Buymisemuŋ a ɗuwuluw mi le fineˀ ngwasay gar! Mangal ka masa ya na kwana, Buymisemuŋ a ɗuwulaŋ mi le ma!

⁴³I ya wa, ɓa hã mumuŋ ngi Buy ɗu a so ngi hay ɗu ya na ka?

⁴⁴Asi hirak ti ya micina ji haŋ ɗik na, mangal a wus, a mumul a kwacay ɗu.

⁴⁵Ɓi ngi Bumbulvuŋ muɓuw di na, ki tiɓa le, a sa gi gisiŋ. Ka mumul!»

⁴⁶Dar Mariya a ɓi: «Membezleŋ ngi vu ɗu ara ga ɗongor da Bumbulvuŋ.

⁴⁷Yo mevel ɗu a mumul le haɗi, asi Buymisemuŋ, Milih ɗu.

⁴⁸Asi a ɗuv hiri le ar ya diili migi slra naŋ, mihina hirnga. Haˀaw, zle wurenna, mizli gar a sa jikiy salalay, a sa ɓikiy: «Ki ra mumul.»

⁴⁹Vur Misi gidaŋ wãˀa, a giy gwat madiɗahay le da ya. Slimiɗ naŋ, i Bumbulvuŋ.

⁵⁰Gi mezle naŋ a njih ar mizli masa ɗuvakaŋ hirnga, masa ya ka taŋ nga mbuŋ nga mbuŋ.

⁵¹A gi gwat madiɗa le ti haŋ naŋ migidaŋ: Mizli mahuhumom vu na, a zliɗa taŋ hirnga le.

⁵²Buy madiɗahay na, a putukuso taŋ le tir janga taŋhaya, a ga ɗongor le da mizli mahinam hirngahaya.

⁵³Mizli muroko ti may na, a mba taŋ le ti zlili. Yo misi zliliheye, a ɓula taŋ le haŋ njoŋ njoŋ ngataraŋ.

⁵⁴A so le jina gawla naŋ Israyele. A wuluk di i mezle, naŋ miga zleˀe

⁵⁵ka naŋ miɓa ɗaˀ le zleˀe da dideˀ ndrahay, da Abraham ati dideˀ naŋhay hã ngi sete.»

⁵⁶Mariya a cifam ati Elizabete, a gi gwat ngi kiya makir. A dirba nah, a mi ngi hay naŋ a muŋ.

⁵⁷Hin ngi Elizabet a ndila le ɓa a yi, a yi mangal mizile.

⁵⁸Midigwi naŋhay ati muy naŋhay a cinaka na, Bumbulvuŋ a gaŋ mezle le haɗa. Joˀ a mumulom bumoˀ.

⁵⁹Angi hin midangafaɗ naŋ na, a soko ɓa a caka mangal a mizaw. A wuɗam ɓa a cakaŋ slimiɗe Zakari ka ngi cine.

⁶⁰Amma mumuŋ naŋ a sla taŋ di: «Kanah ta, a sa zilaka Zaŋ.»

⁶¹Mizli a ɓakaŋ: «Na, ko mbur mazilaka kahana, anta asi muy ɗikeye ta mayse.»

⁶²Dar a ɓaka cine ti haŋ, ɓa a sinaka, da a wuɗ ɓa a zilaka mbrike na.

⁶³Zakari a cufuɗ dum misliprakka, a toho anga: «Slimiɗ naŋ Zaŋ.» Ɓi nah a zuma taŋ hirnga le gar.

⁶⁴A haŋhaŋ si na, mi ngi Zakari tuwa a wun, irne a pusuku, dar a ɓi, a hunuma Buymisemuŋ.

⁶⁵Akẽh na, zluwun a ga midigwi naŋhaya, yo a ɓaka ɓi ngi gwat tayna gar angi hirwuy muwã Yude keɗeɗe.

⁶⁶Mizli micinam gar na, a jaka ɓi nah a hirnga, a ɓam: «Mangal hana a sa tiri mikpak ka?» Haŋ ngi Bumbulvuŋ a ro bac ava gisiŋ.

⁶⁷Zakari, cine ngi Zaŋ, a nih le ti ˀUf Mipal. Joˀ a njiko ɓi ngi mijiviɗey ani da mizli:

⁶⁸«Anja mizli a hunumaka Buymisemuŋ, Bumbulvuŋ ngi Israyele. Asi ara ki slimiɗ ar mizli naŋhaya, yo a mbiɗa hirnga taŋ le.

⁶⁹A bo ti ndra Milahavu migidaŋ le, a hay gawla naŋ Davite.

⁷⁰A gi le ka naŋ mubo di ti balam mijiviɗ naŋhay zleˀe. A ɓam na:

⁷¹«Milahavu a sa tiɓa ndra avu mesene ndraˀahaya, waɗ tisi haŋ ngi mihiris ndrahay gar.»

⁷²A biga gimezle naŋ le da dideˀ ndraˀahaya, a wulka jumoˀay naŋ le.

⁷³A hudum le, a ɓa dideˀ ndra Abrahama:

⁷⁴a dirba naŋ mitiɓa ndra le tisi haŋ ngi mesene ndrahay na, a sa pula ndra jiviɗ, ɓa i dilkam a mbuŋ naŋ manja zluwun,

⁷⁵ti sipa jiviɗ naŋ, ti gi jeŋŋe a mihiri naŋ ar hin ngi siifa ndra gar.

⁷⁶Na ka, mangala, a sa zulukuw mijiviɗ ngi Buymisemuŋ Mimadiɗa, asi kisa ki ɓaˀ a mbuŋ, a mihiri ngi Bumbulvuŋ, ɓa ngi ɗiyaŋ jiviɗi,

⁷⁷ɓa mizli naŋhay a sinaka Milahavu, asi naŋ mapuya mungra taŋhay avra.

⁷⁸Hana i gimezle mihaɗa, Buymisemuŋ ndra miga ndra di. Bangay ngi wuna li muso paɗ ti muŋ nga pura ndra na, mbele gimezle nah.

⁷⁹A pusluɗa li da mizli misi ar luvuŋ, yo mazluwunam ti muco, ɓa aru ti ndra, i sipam jiviɗ muzuy.»

⁸⁰Mangala kwana, ara gil, ara sin ɓi. A cifi a wuzlaɓuh, hã tapas naŋ misa bugo vu da Israyeley.