Read South Giziga LUK 10 Bible Online

LUK 10 - South Giziga bible

LUK 10

¹A dirba nah, Buy Yesu a wini mizli ngi seˀe mekelemey kukur tarnaˀ nga cuw, a slina taŋ cuw cuw a mbuŋ naŋ ng'ar walahay ati lihey gar, naŋ masa ru ti hirnga naŋ angi taŋ.

²A ɓa taŋ: «Gwat ngi sifi a gi le haɗi, amma migi slraˀahaya, taŋ haɗa ta. Tumbuloko buy ngi gwat ngi sifi so, ɓa a slino migi slrahay ng'ar slra naŋ.

³A ram! Ani, i ra slinukum ka ziri tumuŋhoy a wuzla kiri ɓuhoy.

⁴Ki ram ti dala a haŋ ta, ko gabal, ko tarak, yo ki cicam ngi ji haŋ da mbur a jiviɗ ta [3].

⁵Ko ar hay wanaka gar kum masa cam na, ɓam dumbuŋ: «Zuy zuy kum mizli ngi hayay.»

⁶Da mbur ngi zuy ada a haya na, zuy kum a sa ndir angi naŋ. Da kine ta na, a sa mo ng'ar kum a muŋ.

⁷Cifam ar hay nah. Gwat taŋ masa vulukum di gar na, zumakaŋ, sakaŋ. Asi migi slra gar na, a lum migir ngi slra naŋ. Anja ki tuwuɗam ng'ar hay mekelem mekelem ta.

⁸Ar walahay wanaka gar kum misa cam le, yo da mizli ngi raˀahay a tuɓukum le na, gwat taŋ masa vulukum di gar na, zumakaŋ.

⁹Mbuloko misi jiji ngi digahaya gar, yo ɓaka mizli: «Zumabuy ngi Buymisemuŋ a ndilo le gbaˀ avu kum.»

¹⁰Amma ar walahay wanaka gar kum misa cam le, yo da mizli ngi raˀahay a tuɓukum ta na, bam ng'ar li ngi luuma, ɓam:

¹¹«Ko lagwada ngir walahay kum micifi avu sar ndrahay kwana, i tukukum di le a muŋ. Sinaka sin le, Zumabuy ngi Buymisemuŋ a ndilo le.»

¹²Yi ɓukum na: Tapas gi kiita na, Sodom a sa lum bonoy haɗa wãˀ ka ngi walahay nah ta.

¹³Kay, Korazin, ka ar bonoy! Kay, Betsayda, ka ar bonoy! Asi cekenehey migam a hay kum na, da a gam zleˀe a Tir ati Sidoŋ na, anja taŋ a mbiɗaka mevele le zlezle si, zana ngi vagay ɓaˀ ɓaˀ avu vu, waɗ joˀ ar fucu.

¹⁴Haˀaw, tapas gi kiita na, kiita ngi Tir ati ngi Sidoŋ a sa gi kefek fineˀ ngi kumo.

¹⁵Na ka, Kapernahum, kisa zuɓ sesẽŋ a dadala muŋ kwa? Eyˀeh, kisa pi sar sesẽŋ ar li cifi ngi mizli mumucahay.»

¹⁶Yesu a ɓa mizli ngi seˀeheye ma: «Mbur macina mingiɓi kum na, a cin di i mingiɓi ɗu. Mbur mahizigukum avra na, a hizig di i ya. Amma mbur mahizigiy avra na, a hizig di i mbur mislino ya.»

¹⁷Mizli ngisi Yesu mizli ngir tarnaˀ nga cuwoy tuwa, a moko ti mumul, a ɓam: «Buy, ko setenehey kwana, a hinam hirnga le a mbuŋ ndra ti slimiɗ ɗike.»

¹⁸Yesu a ɓa taŋ: «Yi pura Satan ara diɗo paɗ ti muŋ ka wucuɗ ngi vuŋ.

¹⁹Ani, yi vulukum gidaŋ le, ɓa ki kirpaka kaw ati ˀurucoyo, waɗ ɓa ki funaka gidaŋ ngi mesene kumo gar, ko gwat masa gukum ngaˀa anta.

²⁰Na so na, ki mumulom asi setenehey mihinam hirnga a mbuŋ kum na ta jaka, amma mumulom asi a tohoko slimiɗ kumoyo le a muŋ.»

²¹Angi nah vuna si na, ˀUf Mipal a naha Yesu ti mumul, a ɓi: «Aw Baha, Buy ngi muŋ ati hirwuy, i ra hunumuw, asi ka muɗumo ɓi hana avu mizli misi ti sinmijileŋ jileŋhey ati mizli misi lesleye, joˀ ki njika da mizli mizlewey na. Haˀaw Baha, a gi kanah, asi ki hĩyã le.

²²Baha a pula gwataya le gar asi haŋ ɗu. Hana i Mangal na, mbur misina anta, sey Cine. Malla hana i Cine na, mbur misina anta, sey Mangal ati ko wa gar Mangal muwuɗ le ɓa a njikaŋ di.»

²³Dar a mbiɗi hiri ng'avi mizli ngi seˀeheye, a ɓa taŋ ɓi da taŋ pal taŋ: «Mbur mapura gwat kum mapuraka na, ara mumul!

²⁴Asi yi ɓukum na: mijiviɗey ati buy madiɗahay haɗi, a wuɗam pura gwat kum mapuraka na le, amma a puraka ta. A wuɗam cine ɓi kum macinaka na le, amma a cine ka ta»

²⁵Akẽh na, buy ngi ɓimujuwa a slikiɗ, a wuɗ ɓa a ci a kwacay Yesu, a ɓaŋ: «Kumani, ɓa yi lum siifa ngi set na, sey yi gi mike?»

²⁶Yesu a ɓaŋ: «A tohoko ar ɓimujuwa ndra mbrike? Ka maslufa na, mbrike?»

²⁷Mbur a mbiɗaŋ di: «Wuɗ Bumbulvuŋ, Buymisemuŋ ɗike, ti mevel ɗik wãˀ, ti membezleŋ ngi vu ɗik wãˀ, ti gidaŋ ngi vu ɗik wãˀ, yo ti lesl ɗik wãˀ. Yo wuɗ mbur cil ɗike, kaɓa ka mawuɗ vu ɗik vuna.»

²⁸Yesu a ɓaŋ: «Ki mbiɗa le kuy, ga kanah so, ɓa kisa lum siifa.»

²⁹Amma naŋ a wuɗ a biga, naŋ i mbur mijeŋŋe, a ɓa Yesu: «Na, mbur cil ɗu vuna, i waka?»

³⁰Yesu a mbiɗaŋ di: «Mbur ara ru ti Zeruzalem nga Zeriko. A ra diɗ asi haŋ ngi mufuyovuhoy. Taŋ muvakaŋ gwataya, yo taŋ mikiɗakaŋ na, a cohom. A pulakaŋ ɓaˀ, gweˀ ngi mucu.

³¹Masay ada, ara so tir jiviɗ nah. A pura mbur tuwa, a cuh zar kileŋ.

³²Mbur Levi a ndilo ar li nah ya, a pura mbur tuwa, a cuh zar kileŋ.

³³Amma mbur Samari maru nga mulak zleˀe, a ndilo gweˀ avu mbur tuwa. A pura keɗ na, geˀ ˀircece.

³⁴A kiroho ng'avaŋ, a paŋ mal ati mbaazla ng'ar waˀa, a juwaŋ di. A zuɓa lap ar zungu naŋ, aru di ng'ar hay ngi mulakay, a ɗiyaŋ.

³⁵Put ngi miprik na, a hil suloy cuw, a vula da migi slra ngi haya, dar a ɓaŋ: «Ɗiyaŋ kuy kuy, da kisa tiki gwat le fineˀ hana na, tapas ya masa coho bal na, i ya masa wurkuw di.›»

³⁶Dar Yesu a ɓaŋ: «Avu ka na, a wuzla mizli mimakir tayna, cil ngi mbur midiɗ asi haŋ ngi mufuyovuhoy na, i wanaka?»

³⁷Buy ngi ɓimujuwa tuwa a mbiɗaŋ di: «I mbur migaŋ mezle na.» Dar Yesu a ɓaŋ: «Ka kwana, a ru, ga kanah ya.»

³⁸Ti taŋ maram a jiviɗ na, Yesu a ndil angi walahay mekelem ada. Ngwas ada, a zilaka Marta, a tiɓaŋ ngi hay naŋ.

³⁹Sukum naŋ mongoso ada, a zilaka Mariya. A cifi le avu Buy Yesu, ara cine mingiɓi naŋ.

⁴⁰Marta ara gi welele ti slra ngi hayay hã fineˀ gidaŋ. A ndilawa, a ɓi: «Buy, sukum ɗu mupuliy pal ɗu ar li gi slra na, a cuw ka neˀ ta kwa? Ɓaŋ ɓa a so jiniy ayɗi.»

⁴¹Buy Yesu a mbiɗaŋ di: «Marta, Marta, ki ro lesl welele, yo ki ra wus vu asi gwatay haɗi.

⁴²Gwat mizlir ngi gi na, naŋ purla si. Vay mimezle na, i Mariya muwuna, anta sa tiɓakaŋ di ta.»