Read South Giziga LUK 13 Bible Online

LUK 13 - South Giziga bible

LUK 13

¹Ti di nah na, mizli a soko ng'avu Yesu, a ɓakaŋ ɓi ngi Galilehey, Pilat mikiɗa taŋ vagay vagay ti taŋ magam mikuli da Buymisemuŋ.

²Yesu a mbiɗa taŋ di: «Ki waka na, Galile mumicam tayna, i migi mungrahay haɗi fineˀ Galile mekelemey gar sukwani?

³Yi ɓukum na: Naŋ kanah ta, amma da kum vuna, ki mbiɗaka mevele ta na, kum gar, kisa zizam kanah ya.

⁴Yo mizli mukuruˀ nga dangafaɗ, hay musubur ngi slala Silowe mimbizli angi taŋ na, ki waka kaɓa taŋ i malambaˀhay haɗi fineˀ Zeruzalemey gar sukwani?

⁵Yi ɓukum na: Naŋ kanah ta, amma da kum vuna, ki mbiɗaka mevele ta na, kum gar, kisa zizam kanah ya.»

⁶Dar Yesu a wa taŋ ɓi miweˀ ti wi ani: «Mbur ada, naŋ ti ˀuruf naŋ mihirva kaˀ a hur guva naŋ ngi gudubun. Aru, da a lum yi naŋ kwani, amma ko a lum ta.

⁷Dar a ɓa mbur migi slra ngi guva: «Pura, vi ani makir, i ra so pura da i lum yi avu ˀuruf misenna kwana, amma ko y'anta lum ta. Nguma avra! A tika gidaŋ ngi hirwuyo ngi mi aruŋ maka?»

⁸Amma mbur tuwa a mbiɗaŋ di: ‹Kumani, inga pula tumbulumna ɗagay. I sa la virzi naŋ gun, yo i sa paŋ zay gwatay.

⁹Asinta, a sa yi didirba kwani. Da a yi ta ma na, kisa ngumaŋ.›»

¹⁰Ngi hin ngi sabat mekelem ada na, Yesu ara dubun gwat da mizli ar hay ngi dira dibiɗ.

¹¹Ngwas ada akẽh, setene a hirnga, a gaŋ ble le. A gi di le vi kuruˀ nga dangafaɗa. A guɓoŋ girjaŋ wãˀ, ko a slikiɗ deŋ cir cire gu ta.

¹²Yesu mupura keɗ na, a zilaŋ, a ɓaŋ: «Ngwasa, ki lih le avu ble ɗike.»

¹³A buca haŋ a hirnga ngwas tuwa. A haŋhaŋ si na, a slikiɗ deŋ, a hunuma Buymisemuŋ.

¹⁴Amma buy ngi hay ngi dira dibiɗ a ji mevel, asi Yesu miɗiy mbur ti hin ngi sabat na. Joˀ a ɓa zigiduwo: «Hin ada merkeɗ ngi gi slra. Soko ɓa ki mbulomo angi hin tayna, amma anta ti hin ngi sabat ta.»

¹⁵Buy Yesu a mbiɗaŋ di: «Kum miɓi mi cuw cuwoy, ko wa gar a wuzla kumo, a pula sla naŋ malla zungu naŋ tir li zumo, ɓa ara vulaŋ yam ti hin ngi sabata takwa?

¹⁶Ngwas misenna, Satan a juwaŋ le, vi naŋ ani kuruˀ nga dangafaɗa. Naŋ kwana, i dideˀ ngi Abraham aya. A zlir le ɓa a puskakaŋ tir bonoy naŋ na ti hin ngi sabata takwa?»

¹⁷Yesu miɓi kanah na, a ga mesem le haɗi da mesene naŋhaya gar, yo zigiduw gar ara mumul vur Yesu magi gwat hirngahay na.

¹⁸Yesu a ɓi na: «Zumabuy ngi Buymisemuŋ a bam vu ati mike? I sa wa ati mike?

¹⁹A bam vu ati zinga ngi lar ada [10], mbur muzuɓa, a dika a hur guva naŋ. A pus hã a tiri widis, ɗiyuwoy a ɗiyam hay angi mihaŋ naŋhaya.»

²⁰Yesu a ɓi ma: «I sa wa Zumabuy ngi Buymisemuŋ ti mike?

²¹A bam vu ati [11] ˀis ngwas muzuɓa, a lihiɗa angi hapa kilo kukur cuw nga zlum, hã a slikiɗa gar.»

²²Yesu aru bal ti dubuna gwat da mizli angi walahay madiɗahay ati prokoy gar, hã sesẽŋ a Zeruzalem.

²³Mbur ada, a ɓaŋ: «Buy, masa lahama i mizli neˀkini si kwa?» Yesu a ɓa taŋ:

²⁴«Tumom vu ɓa ki cam tir mizlingre muɓucco. Yi ɓukum na: Mizli haɗi a sa puram jiviɗ ngi ci, amma t'anta sa cam gu ta.

²⁵Da buy ngi hay misa slikiɗ le, a gica mizlingre le na, kum mindiram avra na, kisa zlaka tila mi a mizlingre: «Buy, wuna ndra mizlingre.» Joˀ naŋ a sa mbuɗukum di: «Da ki soko ti damaka na, yi sinukum ta.»

²⁶Dar kisa ɓam: «I zumam, yo i sam gwat le bumoˀ takwa? Ki dubuna gwat le da mizli ar luuma ndraˀahaya takwa?»

²⁷Joˀ naŋ a sa ɓukum ma: «Da ki soko ti damaka na, yi sinukum ta. Kiraham kileŋ avu ya, kum migi gwat malambaˀhay gar.»

²⁸Ti kum misa puraka ti Abrahama le, Izak, Zakop waɗ mijiviɗey gar angi Zumabuy ngi Buymisemuŋ, amma kumo, a hizigukum le avra na, kisa tuwam, kisa ngirɗam sliŋ a diga.

²⁹Mizli a sa soko tisi pas ngi miprik waɗ tisi pas ngi pastaˀ, tir vay muŋ waɗ tir vay ruwuy, a sa cifam ngi zuma ɗaf ngi muguzlum angi Zumabuy ngi Buymisemuŋ.

³⁰Naŋ kine, mizli ngi dirbahay wurenna, a sa tiram ngi mbuŋhoy, yo mizli ngi mbuŋhoy wurenna a sa tiram ngi dirbahay.»

³¹Hirak ti nah na, Farisa mekelemey a kirohoko ng'avu Yesu, a ɓakaŋ: «Cuhu, aru ng'ar li mekelem, asi Herod ara wuɗ kiɗ ɗike vagay.»

³²Yesu a ɓa taŋ: «A ram, ɓaka biigaɗ nah na: Dana waɗ tiprik na, i ra ɓul setenehey avra, yo i ra mbul mizli. Hã duwul na, a kiɗ mi le.

³³Amma dana, tiprik ati duwul na, sey i zuɓa jiviɗ ɗu, asi ɓa a kiɗaka mijiviɗe vagay ar li mekelem pal, mbak a Zeruzaleme le na, a gi ta.

³⁴Kay, Zeruzalem, Zeruzalem, ka makiɗa mijiviɗey vagay vagay, ka makuyupa mizli mislinukuw taŋ na! Yi wuɗ le zleˀe sar mbeˀ mbeˀ, ɓa yi cikila ziri ɗikeye, kaɓa kucukur mahuruk ar ziri naŋhay, amma ki ngum ta.

³⁵Ani, hay ɗik a sa tiri diŋ wãˀ! Yi ɓuw na: Kum anta sa purikiy mata, hã tapas kum masa ɓam: ‹Anja Bumbulvuŋ a ɗuwula mi da mbur maso ti slimiɗ naŋ!›»