Read South Giziga LUK 16 Bible Online

LUK 16 - South Giziga bible

LUK 16

¹Yesu a ɓa mizli ngi seˀeheye : «Mbur misi zlili mekelem ada, naŋ ti mbur miji zlili naŋ. Mizli a soko a ɓakaŋ: ‹Miji zlili ɗik ara hirya zlili ɗike lambaˀaˀ.›

²Buy ngi hay a slin, ara ziloko di, a ɓaŋ: ‹Yi cin mizli a ɓam mbri a hirnga ɗike ka? Slufiy gwat ka muluma ati gwat ka mitika angi slra ɗike, asi zle dana, k'anta sa ja zlili ɗu mata.›

³Dar miji zlili tuwa a ɓi ti kwacay naŋ: ‹Ani, buy ɗu a sa biy ar slra avra, i sa gi mbri ska? Hufukum tuwa, gidaŋ ɗu anta, ngi suko gwat avu mizli ma na, mesem a giy.

⁴Ɗagay, yi si na gwat ya masa ga le muduba! Ko da a bikiy le tir slra ɗu kwana, naɓa mizli masa tiɓikiy ngi hay taŋhay ada.›

⁵A zilo mizli misi duvus ngi buy naŋhaya purla purla gar. A ɓa mudumbuŋ: ‹Duvus ngi buy ɗu avu ka zleˀe kite ka?›

⁶Mbur a mbiɗaŋ di: ‹Goŋgoŋ ngi mal skat.› Miji zlili a ɓaŋ: ‹Ɗerewol ɗike n'ani, cifi kutum, toho goŋgoŋ kukur zlum.›

⁷Yo a ɓa mbur mekeleme ma: ‹Ka, ngi ɗike kite ka?› Mbur a mbiɗaŋ di: ‹Sak ngi alkamari skat.› Miji zlili a ɓaŋ: ‹Ɗerewol ɗike n'ani, toho kukur dangafaɗa.›

⁸Joˀ buy ngi hay a ngil wuy ti mbur miji zlili migaŋ gilaw tuwa, asi naŋ migi slra ti wer. Naŋ kine, mizli ngi duniyahay a gam slra ti wer haɗi avu cil taŋhaya, fineˀ mizli ngir li minjahha.»

⁹Yesu a ɓi ma: «Yi ɓukum na: Dala magi gilaw da mbur haɗa na, jam di ngama ati mizli. Da zlili kum a kiɗ mi le kwana, naɓa ngama kumoy a sa tuɓukum ar li cifi ngi sete.

¹⁰Mbur mindila le ngi pulaŋ gwat mineˀ asi haŋ naŋ, ɓa a gi di slra na, a ndila le ngi pulaŋ gwat mihaɗa asi haŋ naŋ, ɓa a gi di slra ya. Mbur magi slra mikaslsla ta ar gwat mineˀ na, a gi slra mikaslsla ta ar gwat mihaɗa ya.

¹¹Dala magi gilaw da mburo, da ki ndilaka ɓa a pulukum di asi haŋ kumo ngi gi slra ta na, masa pulukum zlili migisiŋ, i waka?

¹²Zlili ngi mbur mekeleme, da ki ndilaka ɓa a pulukum di asi haŋ kumo ngi gi slra ta na, masa vulukum zlili ngi kumo, i waka?

¹³Gawla pal magi slra gu vur buyoy cuw anta. Asi a sa hiris pal, a sa wuɗa mekeleme. Malla ta na, a sa gumbuˀ ng'avu pal numuŋ, a sa zirɗa mi ngi mekeleme. Buymisemuŋ ati dala na, ki gam gawla taŋ cuw taŋ gu ta.»

¹⁴Farisahay micinaka ɓi nah gar na, a singiram ar Yesu, asi a wuɗam dala haɗa.

¹⁵Yesu a ɓa taŋ: «Ki gaka vu kum a mbuŋ mizli ka kum jeŋŋe, amma Buymisemuŋ a si na mevel kumo le. Gwat mizli mapuraka, i gwat hirnga na, avu Buymisemuŋ, i gwat mukuy ta wãˀa.

¹⁶Ɓimujuwa ati ɓi ngi mijiviɗeye , a zikam le, hã a ndila hin ngi Zaŋ mici mizli ar yam. Zle ti nah na, a tilam mi le ti Ɓimezle ngi Zumabuy ngi Buymisemuŋ , yo mbur gar a kiɗ vu ngi ci ng'ara ti gidaŋ.

¹⁷Amma muŋ ati hirwuy a sa susuymom kutum fineˀ gwat njef purla ngir ɓimujuwa masa kiɗ avra.

¹⁸Mbur gar muɓula ngwas naŋ le, yo a zuɓ mekelem le na, a gi di i madama. Mbur mazuɓa ngwas muɓula le kwana, i migi madama ya.

¹⁹Mbur ada, i misi zlili, a ki zana gagaza mislirkeɗ slirkeɗey. Naŋ ar wuya, yo vur hin gar na, ara di ɗaf mundum.

²⁰Mbur mekelem ada ma, a zilaka Lazar, i misi murga. Vu naŋ gar i waˀa. A hin a mizlingre mbur misi zlili tuwa.

²¹A wuɗ zleˀe a guɗuma misimi madiɗo tir sikiɗ ngi mbur misi zlili na, amma i kirihey masoko, a tirnaˀaka waˀa naŋhaya jak ma.

²²Mbur misi murga tuwa a mucu, modro ngi Buymisemuŋhoy a zuɓaka nga muŋ, aciki Abraham. Mbur misi zlili tuwa kwana, a muc aya, a dikakaŋ.

²³Naŋ masi bonoy haɗi ar li ngi mizli mumucahay na, a zuɓa hiri, keɗ na, i Abraham waɗ Lazar acikeˀeŋ, taŋ kileŋ.

²⁴Dar misi zlili a tila mi da Abrahama: ‹Baha ɗu Abraham, puriy ˀircece takwa! Inga slina Lazar na, ɓa ara ca muzuŋ haŋ naŋ ar yam, ɓa a sa njufiy di avu irne, asi i ra si bonoy haɗi ar vu aka.›

²⁵Amma Abraham a ɓaŋ: ‹Mangal ɗu, wulka neˀ kwaɗay, ti ka misi ti siifa ɗik aruŋ na, ki zuma duniya ɗike le. Naɓa Lazara kwana, naŋ ar bonoy. Ani wurenna, a sohõkoŋ tuwuyo le aka. Ka kwana, ki ra si bonoy aya.

²⁶Yo ma na, vigiɗ mijileŋ ada ar wala ndra ati kumo. Mizli mawuɗam cuh ti vi ndra ng'avu kum na, a gi ta. Yo mbur a tuwuɗo ti kẽh ng'avi ndra aka gu ta ya.›

²⁷Mbur misi zlili tuwa a ɓaŋ: ‹Na, ambuh so, baha Abraham, anja ki slina Lazara ngi hay baha.

²⁸Asi sukum ɗu mizilehey ada zlum. Anja ara ɓa taŋ ɓa a soko a sam bonoy ar li misenna mata.›

²⁹Abraham a ɓaŋ: ‹Moyis ati mijiviɗeye, t'ada avu taŋ si. Anja a cinaka mingiɓi taŋ.›

³⁰Misi zlili a slaŋ di: ‹Kanah ta, baha ɗu Abraham. Amma da i mbur muru baɗ ti wuzla mumucahay ng'avi taŋ na, a sa mbiɗaka mevele.›

³¹Amma Abraham a ɓaŋ: ‹Da a cinaka mi ngi Moyis ati ngi mijiviɗeye ta na, ko da mbur a slikiɗ le baɗ ti wuzla mumucahay tekeɗe kwana, t'anta sa tiɓaka ɓi naŋ ta si.›»