Read South Giziga LUK 17 Bible Online

LUK 17 - South Giziga bible

LUK 17

¹Yesu a ɓa mizli ngi seˀeheye: «Gwat mahizigiɗa mizli ng'ar mungra na, a tik ta. Amma mbur mahizigiɗ mizli ng'ar mungra na, kay, naŋ ar bonoy!

²Zuwen taŋ majuwakaŋ ngurvuŋ tindriŋ asi ˀaya, a hizigakaŋ ng'ar mubuliy, ɓa anja a hizigiɗ mbur pal a wuzla mizli mizlew tayna ng'ar mungra mata.

³Jiginaka hirnga kumo kuy kuy! Da sukum ɗik a guw mungra le na, kutaŋ. Da a zil marava le na, pula ɓi nah teˀe.

⁴«Da a guw mungra le is tarnaˀ angi hin purla, amma da ara mo ng'avi ka, a ɓuw: ‹Wereke, wereke› hã is tarnaˀ aya na, kisa pula ɓi nah teˀ si.›»

⁵Misliney a ɓaka Buy Yesu: «Sika ndra tiɓi ndra ava.»

⁶Buy Yesu a mbiɗa taŋ di: «Da kum ada ti tiɓi ko neˀ, ka zinga ngi lar ada [12] kwana, kisa ɓaka bazlawar hana: ‹Muɗ muroh, ara ngi a hur mubuliy› na, a sa cinukum mi.

⁷Mburo, da naŋ da ti gawla naŋ mahuvaŋ ar guva malla majiginaŋ ginewey, da naŋ mumo le ti ɓuh na, a ɓaŋ: ‹Aru kutum, ara zum gwat› si na, i wa a wuzla kumo ka?

⁸Amma a sa ɓaŋ jak na: ‹Diy ɗaf, yo ka zana ngi slra ɓa ki siy ti gwat ngi zum, i sa zum, i sa si. A dirba nah, ka kwana, kisa zum, kisa si aya› takwa?

⁹A ga sise da gawla nah vur naŋ migaŋ gwat naŋ miɓaŋ di na kwa?

¹⁰Naŋ kine ya, kumo kwana, gwat muɓukum di le ɗaˀ le gar, da ki gaka le na, ɓam: ‹Ndr'i mizli migi slrahay si, i gam di i slra ndra magaka cummo.›»

¹¹Ti Yesu mazuɓa jiviɗ nga Zeruzalem na, a cuh bal ti Samari ati Galile.

¹²Naŋ maci ng'ar walahay mekelem ada na, misi kukulahay kuruˀ, ara jam di hirnga. A cicam zar kileŋ neˀ.

¹³Joˀ a tilakaŋ mi: «Yesu, Kumani, pura ndra ˀircece!»

¹⁴Yesu mupura taŋ na, a ɓa taŋ: «A ra bigaka vu kumo da masayay.» Ti taŋ maram ti ru aruŋ si na, a ɗiyam le.

¹⁵Mbur pal a wuzla taŋ mupura a ɗiyi le na, a mo ng'ava bal ti hunuma Buymisemuŋ, ˀay paɗ a muŋ.

¹⁶A huruk huruk asi sar ngi Yesu, a gaŋ sise. Dambalaka i mbur Samari.

¹⁷Dar Yesu a ɓi: «Mizli mukuruˀhoy na gar a ɗiyam le takwa? Na, mungoltir mekelemeye, taŋ amaka?

¹⁸Ko mbur pal asi taŋ mumo nga ga sise da Buymisemuŋ anta, sey mbur Samari hana tewle si kwa?»

¹⁹Joˀ Yesu a ɓaŋ: «Slikiɗ, a ru, tiɓi ɗik a lihuw le.»

²⁰Farisahay a cufuɗaka Yesu: «Buymisemuŋ a sa so Zumabuy naŋ ti vunaka?» Yesu a mbiɗa taŋ di: «Buymisemuŋ masa so Zumabuy naŋ na, anta ɓa hã mizli a puraka gu ta.

²¹Anta sa ɓam: «Nˀanihĩ», malla: «Nˀani a diga» ta. Amma sinaka sin le, Zumabuy ngi Buymisemuŋ, naŋ da a wuzla kumo.»

²²Dar a ɓa mizli ngi seˀeheye: «Hin a sa ndilawa, kisa wuɗam pura hin pal a wuzla hin ngi Mangal ngi mburo, amma kum anta sa puraka ta.

²³A sa ɓukum: «Puraka, n'ani a diga!» malla: «Nˀanihĩ!» Amma anja ki ram ta, ki kilam nga diga ta.

²⁴Vuŋ mawucuɗ zle asi diˀis, hã asi diˀis vay mekelem na, hin ngi Mangal ngi mbur masa sawa na, a sa gi kanah ya.

²⁵Amma sey a si bonoy seˀ le haɗi ɗagay, mizli migwenehey a sa hizigakaŋ avra.

²⁶Gwat migi zleˀe ti hin ngi Nowe na, a sa gi kanah ti hin ngi Mangal ngi mbur aya.

²⁷Ti hin ngi Nowe, mizli ara zumam, ara sam, ara zuɓam ngwasay, ara vulam ziri ngi hay ziley, hã a ndila hin ngi Nowe mici a hur palalama. Dar mekepel madiɗa a zuɓawa, a ziza mizli leɗeɗ gar.

²⁸Malla ta na, a sa gi kaɓa ti hin ngi Lot. Tapasa, mizli ara zumam, ara sam, ara hiɗikam gwatay, ara hiɗikaka gwat taŋhay avra, ara zligam gwatay, ara ndiram hayay.

²⁹Amma ti Lot mibi tir walahay Sodom na, Buymisemuŋ a po vuŋ ngi vu ati yam ngi baruudu minjulili paɗ ti muŋ, a ziza mizli leɗeɗ gar.

³⁰Tapas Mangal ngi mbur masa bugo vu njah na, a sa gi kanah ya.

³¹Ti hin nah na, mbur misi a balaka, anja a po sar ngi hila gwat naŋhay a haya mata. Yo mbur misi ar guva kwana, anja a mi ngi hay naŋ mata.

³²Wulkaka ɓi ngi ngwas ngi Lot.

³³Mbur masa pur jiviɗ ngi laha siifa naŋ na, a sa zizaŋ, amma mbur masa ziza siifa naŋ na, a sa luuma a muŋ.

³⁴Yi ɓukum na: angi duvuɗ nah na, mizli cuw tup tup ar gwat ngi hin purla, a sa zuɓam pal, a pulam pal.

³⁵Ngwasay cuw masa yaˀam ar leˀe, a sa zuɓam pal, a pulam pal.

³⁶Ziley cuw ar guva, a sa zuɓam pal, a pulam pal.»

³⁷Mizli ngi seˀehey a slakaŋ di: «Buy, a sa gi vuna a maka?» A ɓa taŋ: «Ar li misi maara anga na, mogodokoy a sa kusom a diga ya.»